Information

July 2009, Mizoram Diary

1st. Wednesday: Mizoram Primary Hindi Teachers Association hruaitute chuan an thil ngen bawhzuia New Delhia kal, Chief Secy. Pu Vanhela Pachuau, vawiin khan a pisa-ah an hmu a, Pu Vanhela chuan Human Resources Development Ministry-a Financial Adviser a hmuh thu leh beiseina a neih thu a lo hrilh niin Primary Hindi Teachers Association thuchhuah chuan a sawi.

2nd. Thursday: Sinlung Indigenous Peoples’ Human Rights Organisation SIPHRO chuan vawin khan Aizawl Press Club ah chanchinthar lakhawmtute kawmin Tipaimuk Dam siamtur chungchang ah Mizoram pawhin a tawrh ve theih thu an sawi.

3rd. Friday: Presbyterian Pastor Rev. Dr. R. Lalbiakmawia, Executive Secretary i/c Education etc. chu Kanghmuna Presbyterian English School tlawh turin vawiin khan a kal

4th. Saturday: Mizoram Co-operative Forum bul tumin Co-operative Conference hall-ah UNO – ICA International Co-operative Day vawi 87-na, vawiin khan hman a ni a, thupui atan ‘Co-operative hmanga khawvel sum dinhmun siam that’ tih hman a ni.

5th. Sunday: Vawiin kha Presbyterian Kohhran chuan Damdawi-in Pathianni (Hospital Sunday) atan an hmang. Thupuiah “Damlote tidam ula” tih an hmang a ni. Kohhran tinah an remchan dan angina inkhawm tumkhat an neia. Thawhlawm pawh Presbyterian Kohhran damdawi-in, Presbyterian Hospital Durtlang tana hman a ni. Mizoram Presbyterian Kohhran hian Hospital Sunday hi kum 1928 atang khan a hmang a, kumin hi kum 81 an hmanna a ni. Hospital Sunday hman tirh hian a hman hun tura ruat bik a awm lo a, 1981 atang khan July thla Pathianni hmasa ber hi Hospital Sunday atan hian hman zui a ni ta a ni.

6th. Monday: Vawiin July ni 6 hi Mizoram hmeichhe insuihkhawm Pawl (MHIP) Day vawi 35 na a ni a, Mizoram hmun hrang hrang a, Branch MHIP te chuan he hun hi an hmang a ni.

7th. Tuesday: Zanin atang khan Synod Music Committee buatsaih, Residential Choir Conductors’ Training vawi 14-na chu Synod Multipurpose Training Centre (SMTC)-ah neih tan a ni.Training hawnna inkhawm hi Synod Secretary (Sr.) Rev. C. Laltanlianan kaihruaiin training hi a hawng a. Music Coordinator Upa H. Lalhmingmawian Inhmelhriatirna hun a hmang a; SMTC Programme Director Rev. C.Sanglianan SMTC hman dan chungchang a sawifiah bawk. Nl. Belinda L. Sailo-in Pathian fakna hla sain kalkhawmte a awi bawk.Tun tuma Residential Choir Conductors’ Training-ah hian Aizawl khaw pawn Bial 10 atangin mi 27 an tel thei a ni. He traning hian July 10 (Zirtawpni) thleng a aw hang.

8th. Wednesday: Chakma District BJP President, Pu Laxmi Bikash Chakma-a’n Bangladesh ramri hungna-ah dik lo taka zangnadawmna atana hman ral, cheng nuai 366 chuang a awm ngei niin vawiina Aizawl Press Club-ah thuthar lakhawmtu te a hrilh.

9th. Thursday: Setana betu inti Chawlhhmun hmeichhe tleirawl pakhat chuan tukin khan Vaivakawn Presbyterian Kohhran Biak In a suasam a, amah hi Vaivakawn police ten an la nghal a, thubuai siamsak tum a ni.

10th. Friday:Vawiin chawhnu dar 3:00 khan John Calvin-a piancham vawi 500-na lawmna inkhawm, D.E. Jones Hall, Aizawl Theological College-ah neih a nia, Rev. Dr. C. Lalhlira, Registrar in lawmthu sawiin he hun hi a kaihruai a ni.

11th. Saturday: Vawiin khan Sihphir Bial huapin Sihphir Kohhranah Kristian Chhungkaw Seminar neih a ni a, seminar neihpui hian Nl. Vanlalsawmi (Asst. Coordinator i/c Kohhran Hmeichhia), Pi Lalchawimawii (Committee Member) leh Pi Lalsawmliani (Committee Member)-te an kal a ni.

12th. Sunday: Kumin April ni 11-a Chiahpuam sum kaihhnawiha ruk bo, Lallawmzuala, Aizawl Dinthar Veng chu a ru botu, Tripura-a hel pawl, National Liberation Front of Tripura -te’n, July ni 9-a an chhuah hnuah, vawiin khan CID ten Aizawl an rawn thlenpui.

13th. Monday: Chief Minister, Pu Lal Thanhawla chuan zanin atang khan Chief Minister Bangla a luah tan ta.

14th. Tuesday: Chief Minister Pu Lal Thanhawla hova, vawiin Cabinet meeting neih chuan Autonomous District Council Area thlenga dan hmanga rorelna, Judiciary, a hrana dah nan dan ding lai siam tha a, Mizoram Civil Court bill, 2009 siam an remtih thu an sawi.

15th. Wednesday: Mobile Medical Unit Van 3 zinga 1 chu vawiin chawhnu khan Lunglei Salem Vengah a chesual a, kawng thlanga lumin Pu B. Sangsiama in Assam Type chu nasa takin a delh chhia. In chhungah hian mi lo awm nual mahse vanneihthlak takin thi leh hliam an awm lo hlauh a ni. Mita hmutute sawi danin driver Lalsangliana hian motor thunun theilo khawpin a rui a ni. Driver hian hliam a tawrh avangin Lunglei Civil hospital-ah dahluh nghal a ni.

16th. Thursday: Mizoram sorkarin Mizoram Youth Commission Chairman atana Pu Hmingdailova Khiangte, MLA a ruat thar lawmna inkhawm chu vawiin khan Treasury Square-a Youth Commission Office-ah neih a ni a, CM Pu Lal Thanhawla’n a hmanpui.

17th. Friday: Nizan dar 9 vel khan Chhinga Veng Branch YMA-in an veng in pakhat-ah Sap zu um puitling 162 an man a, vawiin tlai khan heng an zu mante hi YMA hall kawtah an leih bua a ni.

18th. Saturday: Tukin zing khan Sangau – I Ramhlun Veng a Pu.Zamhleia Vawk chuan note a nei a, an zing a pakhat chu Sai ang chiah in a piang.

19th. Sunday: Tukin dar 6:30 vel khan Dinthar vengah Alto car MZ-01 E 2793, Lawmliana (40) s/o P. Hrangtawna, Luangmual West khalh chuan Lalnghinglovi (60) d/o Darropuia, Dinthar veng chu a kawng kal lai a su a, Aizawl Civil Hospital thlenpui a nih hnu, tukin dar 8:00 rik hma deuh khan a hliam tuar lovin a boral.

20th. Monday: Mizoram Police leh Aizawl Venglai VDP tangkawpte chuan vawiin khan Govt. Zirtiri Residential Science College bulah heroin leh ruih nana hman chi, damdawi heng: heroin hawng khat leh a chanve, nitrosun strip 16 leh mum 5, syringe thahnem tak, vodka um khat leh tangkafai cheng 14,450/- leh a neitu Ricky Lalrinchhana, kum 25, Pu Lalhlimpuia fapa, Ramhlun South-a cheng ni-a insawi leh a nupui, Esther Lalrinmawii, kum 23 bakah an damdawi zawrhpui pa, Zosanglura, kum 34, Ramhlun Venglaia Pu Hrangdailova fapa ni-a insawite an man.

21st. Tuesday: Vawiin chawhnu dar 2:30 vel khan Rangvamual tawntirh Forest checkgate bul kawiah Michael-a, Durtlang ami khalh Tipper MZ 01C 1094 leh Santro Xing MZ 01 1089 Zohmingthanga Zemabawk ami khalh te chu an insua; Santro zawk hi a chhe hneh hle. A chhunga chuang Lalvenpuia, Zohmingliana, Joseph Lalthanmawia Chhinga veng te chuan hliam an tuar a, Aizawl Civil Hospital panpui nghal an ni.

22nd. Wednwsday: Tukin khan awkin ni a lema; hei hi tun kum zabi chhunga a rei ber tum tur nia ngaih a ni. Zing dar 7:30 vek kha a vanglai tak a ni naa; Aizawlah chhum a tam avangin a lang chiang thei lo. Amaherawhchu a hnu deuhvin a hmuh leh theih a ni. Mi thiam leh zirlai tamtak ATC Durtlangah he mi thlir tur hian an pungkhawm a ni.

23rd. Thursday: Vawiin khan Kolasib New Diakkawn VC hnuaia ni za inhlawhna (NREGS) a inhlawhnaah vanduaina a thleng a. Inhlawhna hmunah hian lei a min a, Pi Sumzahnuni (58) w/o L. Kaisanga (L) leh Pi Zamawii (45) w/o Upa VL Kungate chu leimin hian a chhilh hneh deuh avangin an haichhuak lawk thei lova; an boral veve ta a ni.

24th Friday: Zanin dar 9:30 vel khan 407(truck) Dawr bungrawphur MZ 01-D 8914, Silchar atanga Aizawl pan Pu Sapdawla (57) S/o Lalrema Serkhan Motor, K.Vanlalmuana (24) S/o Lalnunmawia Lungmuat a mi khalh chu Bilkhawthlir dai Bawngbuk khamah a accident a, a hmunah hian a neitu Pu Sapdawla leh Driver K.Vanlalmuana te hi an boral nghal a, he motor-a chuang ve Zonunmawii (30) d/o Thangvunga (L) Nursery Veng, Aizawl chuan hliam tuarin, Bilkhawthlir Damdawi In ah enkawl a ni.

25th. Saturday: Luangmual Pastor Bial Thalai Kristian Pawl chuan vawiin khan Aizawl Civil Hospital-a damlote tan thisen unit 31 an pe. Thisen petute hi mipa 28 leh hmeichhe 3 an ni a, blood bank-a hnathawkten Luangmuala Baptist Kohhran Hall-ah an thisen hi an laksak a ni.

26th. Sunday: Nizan dar 8 khan Mamit Bazar venga mi in luaha khawsa Nl.Lalduhzuali kum 22, Pi Thangveli fanu chu an in luah neitute ina an leng haw lam step-a an kal laiin rulngan a rap palh a, rul hian a ke ah zemin a chuk a, zan dar 9 velah Mamit Damdawiin panpui ni mahse chhan thei lovin tukin dar 4 vel khan a boral.

27th. Monday: Tukin dar 4 vel khan Rangvamual bul, Sairang Road, Tawngtaina hmun, Vaivakawn Zohnuai area-ah 407 truck MZ-01 C 2955, Lalngaihsaka Zarkawt ami ta chu a chesual a, Motor a chuang Fakrul Islam, kum 22, Abdul Latif Bangga, Silchar ami fapa chu a thi a, a ni bakah hian driver Anam uddin telin mi 4 in hliam an tuar a, hliamte hi Aizawl Civil Hospital panpui nghal an ni a, dinhmun hlauhawm lutuk erawh an awm lo hlauh.

28th. Tuesday: Central YMA Executive Committee chu vawiin khan Central YMA office-ah an thukhawm a, kumin October ni 20 atanga ni 22 thlenga Darlawna YMA General Conference neih tur chungchang an sawiho. Central YMA President, Pu JH Zoremthanga kaihruai Committee- ah hian Conference khuallian atan CM Pu Lal Thanhawla sawm nise tihte an rel a ni.

29th. Wednesday: Mizoram sorkara Art & Culture Department leh North East Zone Cultural Centre tang dun buatsaih, Hmar chhak bial huap Zaipawl Kutpui, North East Choral festival chu vawiin khan Vanapa Hall-ah neih a ni. He Zaipawl Kutpui hi Art & Culture Director, Pi Boichhingpuii’n a kaihruai a ni.

30th. Thursday: Vawiin chhun khan Samuel Lalrindika tun thla ni 9-a a thih thu avanga man Ramhlun Venglai VDP te bail chhuah tumin VC leh tlawmngai pawl hruaitute Pu KL Liana court ah an kal.

31st. Friday:Vawiin chhun dar 11 khan BJP North East Zonal Organising Secretary P.Chandra Sekhar chuan Aizawl Press Club-ah chanchinthar lakhawmtute a kawm a, Congress nilo zawng zawng party chu Joint Action Committee a inchhung khawma Mizoram tana thawk turin a sawm.

Related posts

Bank Letter Maksak

grady

Mizo tawng hi!

H.Vangchhia

An chhuanawm mang e!

H.Vangchhia

4 comments

Leave a Comment

Skip to toolbar