Opinion Politics

Hnam thatchhia CM-in a tih chhan hi

Chief Minister Lal Thanhawla chuan tunlai Mizote chu pi leh pute ang lo takin kan thatchhiat tak thu a sawi a, ‘hnam thatchhia kan ni’ tih hi tum khat chauh lo a lo sawi tawh. Phaizau Minor Irrigation Project Champhai leilet a hawnnaah Lal Thanhawla hian Mizote hnam thatchhia kan ni tiin chiang nawn turin a sawi lang leh a ni.

CM hian hnam thatchhia a tih hian pi leh pute chu a huam lo niin a lang a, hnam thatchhia a tih hian tunlai Mizote a sawi tum ber niin a lang. Hetianga langsar tak (bold)-a sawi tur hian pi leh pute eizawnna leh tunlai eizawnna hi CM hian chiang taka a khaikhina hmasawnna thang zelin hnam khawsak phung a thlak dan chiang takin a chhut phawt turah i ngai ang.

Lal Thanhawla hian thatchhia tia a sawi reng reng hian kuthnathawh hi a sawi uar ber zel a ni, tun tumah pawh hian Mizorama rawn pem lut mi nuai hnih dawnin kuthna an thawk bawrh bawrh chu Mizote thatchhia tilangtuah entirnan a hmang leh a ni. Pi leh pute hunah chuan kuthnathawh bak eizawnna a awm lo, insumdawn-tawnna (trade) a awm mumal lo a, an economy phak tawk chu kuthnathawh la ni.

Kuthnathawka taima taka intodelh thin kha kumpinu sawrkarin min rawn nek a, kan indo viau hnuah a ralthuam nei chhe zawk kan tlawma min awp. Hemi hnuah hian India-in min awp zui leh a, Assam state hnuaiah Union Territory (UT) kan ni chho a, kan hmelhriat ngai loh sum lengvak a tam ta em em mai a, sawrkar hnathawh te, contract hna thawhte chuan hnahnuai-hnung min thawhpeihtir ta lo a ni. India sawrkar chuan sumin min vur a, kan rilru leh taksa a lo thatchhe ta a.

“Lehkha zir rawh a nih loh chuan nakinah sawtiang sawn kuthna i la thawk ang,” tiin nu leh pate chuan an fate an zilh ta a, chu chuan thangthar rilru thui takin a kaihruai ta a. White colour job an tih chauhte chu chhuan tharte chuan ‘hna’ emaw an ti ta a ni. Hei hi UT hangover tih pawhin a sawi theih hial ang, hemi kawngah hian Mizote a tuamah inmawh thei kan awmin a lang ta lo. Hmasawnna kan dawl zawh loh kan tawng thut a, chu chu hnamin kan hak za a, kan tuar za ta a ni.

Chutianga kuthnathawh hmusit tura inzirtir hnam chuan tunah hian kan thawh ai thawktu tam tak lo hnam ta tuam tuam chu kan hmu a, ‘hnam thatchhia’ kan in ti leh ta mai si a ni. Hnam naupang kan la ni tih hi sawi nawn fo a ngai lo, amaherawhchu hnam naupang ta na na na chuan tawrnhriat tur kan ngah tih erawh kan inngaihtuah chhuah nawn fo nan a tul hle a ni. Chief minister ngei pawh hian a hun lai chuan a tu leh fate tan chuan kuthnathawh aiin mawi taka inthuam chunga hnathawh chu a fuihna a ni mai thei, chutiang chu tuna nu leh pa tam tak hi an ni, hei hi kan duhthlanna a ni lo a, changkannain hnam hnufual zawk rilru leh nun thui tak a khawih pawi theih zia a lantirna a ni thei ang. A mawhphurtu kan awmin a lang lo, kan cho loh khawvelah kan lut a ni, nakin zel atan inenfiah nawn nan hman a tha hle ang, changkanna thil dang a lo luh dawnin hnam a khawih pawi dawn em tih zawhna kan inzawh fo a tha ang, tisual nawn leh tawh lo turin i fimkhur tawh i la.

Related posts

Corruption reached endemic proportion

H.Vangchhia

Who drives better?

H.Vangchhia

Hringnun chaw collection….

ltachhakchhuak

39 comments

Leave a Comment