Opinion

Police-in zu an rui thin em ni?

Vawiin khan office-a ka awm laiin ka cousin pasal-in min rawn phone a. An taxi driver police-in an man chungchangah an lungawi loh thu min rawn hrilh a. Rilru a tibuai deuh hlek a. In ngaihdan han thawh ve liam liam teh u le. Hetiang hi an driver-in a report dan chu a ni. “Police OC zurui ka hma-ah bike-in a tlu a. Ka su lo hrim hrim a, a rawn tho leh chiah chuan Car chhunga ka thu chu ka awmah min rawn tham a, min hnek nghal a…”.

Hemi hnu hian, driver hi Police Station-ah an hruai a, an hnek a, an pet bawk a ni. Heng thil a thlenna hmun hi Traffic Post bulah a ni a. Traffic Duty pahnih an awm a, chung mite chuan driver thlavang hi an rawn hauh a. Driver Police Station-a an hruai hnu hian, Traffic Police-te pawh hi OC chuan a kohtir a, a hau a ni awm e.

Driver zawk hi zurui-ah an puh ta hlauh a. A ngenna angin Doctor hnenah an hruai a. Doctor chuan zu a ruih leh ruih loh a lo test a. Driver chuan, “zu ka rui miah lo” a ti na-in Doctor Report atang chuan zu a rui niin a lang ang lawi bawk a. Zurui chunga motor khalh tiin a document an hrensak a. Tukin khan ka cousin pasal chuan, Rs. 1000-in a zu khul chhuak a. A tirah chuan Rs 2000 chawi turin an lo ti a ni awm e.

An thu hi a saisa deuh nuaih a. Driver hian “zu ka in lo hrim hrim” a ti a. “Police Station-a awmho chu zu rim an nam vek” a ti letling a. Ka cousin pasal hian, a driver thusawi hi a awih zawk a. Police lam thusawi hi awih har a ti a, a lung a awi lo hle mai a. Mahse, thubuai hlabuai-ah han la chiam dawn se, buai namen lovin an buai zui ang tih an hlau ve tho bawk si.

Ngaihtuah ho atan:
Driver hian dawt a sawi thei a. A tidik lo a ni thei. A thusawi hi awih diak diak vek a fuh kher lo mai thei.
Driver hian zu lo ruiin, Police OC hi lo su palh pawh ni ta reng sela, Police OC hian a hnek a, a hnua Police Station-a kut an thlak hi thildik a ni em? India ram dan ka hriat ve-ah chuan, Magistrate-in thu a pek loh chuan Police hian tumah kut an thlak thei lo.

Tin, ka cousin-te driver hian thudik lo sawi ta sela…kan Police ho hi an inluling hle tihna a ni dawn a. He OC pawh hi, zurui chunga Bike khalh, tlu ta, a tluk vanga a hnunga Taxi Driver kutthlak ta a ni tihna a ni dawn a. A zahpuiawm hle tihna a ni. A chiang lo nuaih a. Mahse, ka cousin-te hi an thin a rim nasa mai sia. Ka han share ve reng reng a ni e. Hetiang lo tawng tawh te kan awm mial takin. Police chetdan dik lo deuh te hi a awm thin reng em le ?

Related posts

Zu ka’n rui ve lawk

chhana

Tu hmangaihna nge thuk ber ang?

eL

Ka hla duh zawng pathum te

bauhbauh

73 comments

Leave a Comment