Admin Info

Thawnthu Tawi Inziahsiak – Lawmman Pakhatna

Kan nghakhlel tlang bawk a, sawi kual vel lo in puang nghal tawp ang aw.

Tichuan Pakhatna chu:


KHA THIHNA KHA – submitted by Lalrammawia

“Dim deuh khan han tlan teh i pa hian a zo lo tlat” a pate a’n a tih avang chuan Zothanpuia chuan a Gypsy khalh lai chu a ti muang deuhva, a rilru erawh chu hmanmawhna leh thlaphanna in a khat a, damdawiin thlenpui hmanloh mawlh chu a hlauva. A pa chu a patea leh a ni Kungi leh a nau Sangtea ten an buaipui a, a nau Kimtei chu a bulah a thu a, a pa tawhsual tawk an hmuh vel leh a rang a rangin Aizawl an pan pui nghal a.

Hetiang reng reng a Aizawl a hlat hi a la hre ngai lova, kawng a lo tha lo bawk nen, a thinrim teuh mai a. Sorkar a dem a, a chang leh an bialtu MLA chak loh vang niin a hria a, ruling MLA ni si hetiang taka an kawng a chhe rei mai hi chu, ram hruaitu hian ram aiin anmahni an in hmangaih zawk vek niin a hria a, chu chuan a pa damloh vanga a rilru na pawh a belh chhah hle a ni.

Ralkhat atangin Aizawl pawh a lang uar tawh a, tlan hmanhmawh theih a ni bawk si lova. A pa chu a chau tawh hle a, zan thla eng dul ruih hnuaia Aizawl khawpui lo eng uar mai chu, damlo mangang hruaia kal zawng ni lo se’ng chuan, an khawpui ngaihhlut em em mawi zia chu, a nau nen chuan an sawi dun chulin a ring a. Mahse tunah chuan lungngaihna tlakbuakin, thihna chuan an chungah thla a zar mek si a, tawngtai pawh a tawngtai zing tawh hle a ni.

A patea chuan, “Zova ding mai teh i pa hi chhan theih dinhmunah a ding tawhin ka hrelo, a mar ka zawn rukna a rei tawh riau mai” beidawn hmel takin a ti . A ni Kungi chu chhuak em em maiin, “Ka u” tiin a tap ta rawih rawih mai a, lungchhe tak mai a a Ni a han tap ta chuan Zova rilru a chhunchhe vek a ni ber mai. Bei nge sei run dung tiin a pa chu chhan theih a la nih tak hlauh beiseiin, “Nilo ka pate, Aizawl chu kan thleng reng reng tur a ni,” tih leh motor chu a theih anga chakin a tlawhlir a, a rilru chu a na kher mai. A pa chu kuaha tah hawm hawm a chak a, a pa natna chu vanduai vang ni a a hriat loh avangin a rilru chu huatna in a khat a, a rin anga mi kut tuar a nih ngat zawngin mi engzat a tam pawh nise, enganga chak pawh nise a thinlung damna khawpin a thungrul ve ngei ngei ang tih chu a rilru nghet tlat a ni.

A duh ang ngeiin damdawiin chu an han thleng na a, mahse a beisei doctor te chu a pa thih thu lo nemngheh pui tute mai an ni ta. An chhungte inah a pa ruang chu an la a, YMA-in kuang an siam saka, a pa ruang chu an phur let leh ta a. In an thlen chuan Zova chuan a nu hmel hmangaihnaa khat thin, mittuiin a luan a lungngaihna vawrtawp tuar a hmuh chuan a rilru na lutuk chu a insehruh ngat ngat mai a. A pa ruang bulah chuan a thu a, a pa hmel chu lungchim takin a en a, a pa bek veilama duk kaih leh vung a han hmuh chuan a thinrim leh rilru na lutuk chu a puak keh lo chauh a ni. “Ka pa, nang ang tar chaklo dim hauh lova kut thlak tu che hian, fapa i nei tih a hrelo a nih hi, i tawrhna hi na ka ti lutuk, chhantu neilo ang maiin, kan khuaah ngei i tual thi hi engtinnge kan tawrh theih ang le” tiin a pa mutna khumtlangah chuan a thu ngawi ran mai a, thildang reng reng a ngaihtuah theilo… phuba…! phuba ….!

A pa ruang an postmortem zawh chuan an vui ta nghala. Zova pa thih dan chuan khawtlang a nghawng hle mai, mitin mai chuan mak an ti a. An khuaa pa fel leh taima, mi pawisawi ngailo chutia a han tual thi ngawt chu mak an ti hle a, kohhran lamah lah mi tangkai, tual upa ni mek, ramthar rawngbawlna vei em em bawk si a ni a. Postmortem result a lo chhuak a, Zova pa chu mi kut tuar ngeia thi a ni tih an finfiah avangin police ho pawhin case an siam a, a bul atangin uluk takin an chhui a, tawhsual an tawhna bul vela thil engkim mai chu an exam nawn leh vek a, rinhlelh awm thil an han la khawma, tumah man tur an hre silo. Zova rilru na chuan mutmu pawh a tuah tlem hle mai a.

Thlakhat a liam meuh chuan thenawm hnai nutar patar te bak inleng an awm meuh tawh lova, Zova chuan len chakna reng reng a neih loh avangin, inlengte thingpui a lo lum a, an ti ti te a ngaithla a, a chang leh hmun fianrialah phuba lak dan turte a lo ngaihtuah leh veng veng thin a.

Zankhat chu thiante hmaizah vangin a chhuak ve a, a bialnu Muantei te inah an len pui a. Zova a hmuh chuan Muantei pawh a hlim hle mai a. Muantei chuan, “U Zo, I va rawn leng duh love,” a ti a.

Zova chuan, “Leng thei ka nih loh dan chu i hre vek lawm ni” a ti sap a.

Muantei chuan “ Tak tak a ka hria alawm.”

Zova chuan, “Ni e, i lakah chuan zep pawh tul ka ti lo, ka rilru a na em a ni. Thih dan pangngai nilova mi kuttuar a ni bawk si a. Chu bakah a fapa te awm lai a kan khua ngeia a tual thi hi ka rilru a damtheilo a ni, hmeichhia lo ni zawk ila tha tur” a ti a.

Muantei chuan, “U Zo keipawhin na ka tih pui che asin, indem duh reng reng suh, Pathian kutah innghat phawt ila” tiin a hnem a.

Zova chuan, “ Muante kei chu Pathian kutah ka in nghat thei lo a ni..tar chaklo thih nan chuan a na lutuk, a titu khan a rul ngei tur a ni. Tunah chuan tawngtai pawh ka tawngtai thei tawh lo, i bul a ni bawka ka han hrilh ang che, phuba ka lak zet loh chuan ka rilru a dam lovang,”a ti a.

Muantei chuan, Zova mita en pah chuan, “U Zo chutiang tur em ni? Pathian thu chuan ‘Phuba reng reng la suh u, keiman ka thungrul ang’ a ti asin,” a ti a.

Zova chuan, “Ka rilru hi min tawmpui thei lovang, chuvang alawm kei pawhin i bula awm chak hle chunga ka rawn kal hreh em em ni, kan inthen pawh a ngai mai thei” a ti a.

Muantei chuan dam diai hian, “Nilo, U Zo ka hmangaih che, i lusun lai leh i rilru nat lai ngaihdan hi ka hre thiam lutuk alawm, Pathian hnena kan in tawngtaisak tawnna te kha a thlawn lovang, eng harsatna mahin min then tur a ni lo” a ti leh a.

Zova chuan, “Muante hmana hlim taka kan sawi dun te kha a thlen theih ka ring ta lo, ka thil tum dan hian chu chu a kalh tlat a ni, phuba ka lak chuan neih tlak ka awm tawh lovang, mahse la lo thei ka ni silo, min hrethiam ang che. Ka hmangaih loh vang che a ni lo a nia” tiin Zova chuan Muantei chu a mangtha a, a chhuahsan ta a.

Muantei pa hi Primary Head Teacher, rawngbawltu fel tak mite zah kai a ni a, a nu erawh chu pir va mai a ni thung a. Muantei hi a pa anga Pathian tih tlat, mite pawhin a fel an tih thin a ni a, Zova nen pawh hian rawngbawlna atanga in hria a, hmangaihna kawng zawh chho ta zel an ni a. A nau Rinfela erawh chu a nu in rual a elpuina lamah Aizawl lamah hostel-ah an dah thung a, a nu a chhuna, inkhawm a peih lo em em a, zu in te a chinga, insual buaite hi a nuam tih zawng a ni a, chutih laiin a u Muantei anga a hmelthatna erawh nula lamah a to phah hle mai a, nula play kual vel pawh a zei hle a. B.A. Final a zir mek a, an khua aiin Aizawlah a awm tam zawk a, an khua a a haw chang chuan a u Muantei chuan a nau vang hian a zak leh ang tih hi a hlau thin hle a.

Kum khat a liam hnu chuan a pa thih dan chu Police-ho pawhin chanchin thar an nei chuang lova. Zova nun chu a danglam tawh hle a, inkhawm a bansan tawh a,tawngtaiin awmzia neiin a hre tawh hek lo, zu in a ching tan a, a chang phei chuan insualnaah a hming pawh a ri ve ta fo a. A rilru beidawng chuan police ho a han dem ngawt a, dem theih niin a hre chiah bawk silo, amaha a lo chet ve dawn chuan pawisawi lovin an tuar ang tih a hlau deuh bawk si, a rilru a buai tak zet a ni. Police officer-in “Tunah la hmu chhuak lo mahila, nakinah kan la hmuchhuak tho tho vang, hetiang sual lian hi thup bo theih a ni ngai lo” a tih te chu a innghahna a ni rih mai a.

Favang awllen lai chuan Kohhran-in camping an buatsaih a, Zova chu lut turin Muantei chuan a thlem nasa hle mai a, Zova chuan luh a tum der silo, tum dang lian zawk a nei tlat si a. Zova’n “Pathian hriata phuba lak loh ai chuan, hriat rih loh ka duh zawk,” a tih chuan Muantei rilru chu a ti na hle a. Zova khawngaih tak chungin, “Aw, U Zo, Pathian hmangaihna i hrethiamlo a ni, Pathian hian i hriat a mamawh a ni lova, i mamawh zia a hria a, in hriattir che a duh a ni zawk. I pa thihna pawh hi thlaraubo chhanchhuahna a ni mai thei a sin, nang hian hrechiang la, a hmanrua pawh i ni thei a sin” tiin a chhang a.

Zova chuan, “ Muante min hrethiam mai teh ka lut thei lo a ni, awmzia pawh a awm chuangin ka ringlo” tiin a tang tlat a.

Muantei chuan, “U Zo, i pa thihna avanga chatuan nunna hnar hi i pa duhzawng a ni bik lovang” a tih pawh chuan Zova chuan, “Ka nun zawng ka ngai hlu love, ka pa tawrh na te kha ka thungrulhna a nih dawn phawt chuan, engmah ka pawisa lo. Chuvangin Muante min vei buai duh suh, vei tlak ka nilo, min hawisan hi i tan a tha zawk ang” a ti a.

Muantei chuan “ Ni love khawdang ka hawi hauh lovang. Engtikah engmaw chuan Pathian lam i lo hawi leh ka ring tlat a ni, ka lo tawngtaipui reng zawk ang che” tiin a kalsan ta a.

Nilai zan tlai tawh takah Muantei pa Pu Zara chu torchlight nen Zova te inah chuan a lo kal a. Pu Zara chuan, ‘“Kan fapa khawsik a na buai riau mai a, Aizawl pan kan ngai ta si a’ tiin a a mangan zia, a rawn sawi a. Zova nu pi Zawni chuan Zova chu a kaithova, rei pawh insiam lovin Muantei te in lamah chuan an phei nghala. Rinfela chu chhuatah a lo mu a, a sa hal nge ni, a rak tuarh tuarha, a tal vak vak maia, a pu te leh an thenawma Pu Biaka te’n an lo buaipuia, Muantei chuan, mangang takin a lo thlir renga, a nu phei chuan a lo hnaih ngam lova, hmun dangah an lo awm bo pui daih a. Zova te motor chuan Aizawl an pan pui ta a, Muantei chu Zova bulah a thu a.

Rinfela chu a rak vak vak mai a, a mit chu meng ve reng mahsela, hmuh nei awm pawhin a lang lo. Muantei chu Zova chuan theih tawpin a hnem a, a rilru chuan a pa an phurhzante kha a hre chhuak rum rum mai a.

Aizawl an thlen dawn hnaih chuan Rinfela chil phuan chu a rawn tla a, mangang taka au chul chungin, fiah takin a rawn tawng chhuaka, “‘Dingrawh u, saw an rawn kal, min chhan rawh u, ka hlau a nia,” a ti chul mai a. “Enge i hlauh”‘ tiin an zawt a, “ Saw an lo kal sawi an phallo” a ti a. Muantei chuan ramhuai tihbuai ngei niin a hria a, an tawngtai ta a. An tawngtai zawh chuan a lo harh ta deuhva, hmanhmawh deuhvin an kal pui leh ta a, Damdawiin an thlen chuan, doctor te chuan rilru buai nia an hriat avangin psychiatry ward-ah an dah ta a.

Rinfela chu hlauh nei ang hian a awm leh ta vak mai a, Muantei leh a pa chuan an tawngtai a, a harh deuh hnu chuan, Rinfela chuan, “U Muante kal sawn miah suh aw, an biru rih a nia, in tawngtai khan an tlanchhe vek zel a” tiin tlangval pui tawh chu a U Muantei bulah chuan a thu ta tlat mai a. Muante-i chuan, “Hlau reng reng suh, Isua hming kan lamin ramhuaiho an tlanbo thin alawm” tiin a nau chu a thlamuan a. Doctor chuan muhil se tha a a hriat avangin an chiu mu ta a.

Zova leh Muantei chu pawn bathlarah thlifim dawn pahin an ti ti a. Muantei chuan, “ U Zo in chungah kan lawm khawp mai,” a ti a. Zova chuan, “I nau tana i inpek nasatzia ka hmuh che hian ka ngaisang sawt che, Isua ringtu tha tak zawng i lo ni e” tiin nui var var chungin a rilru tak chu a sawi a. Muantei chuan “ka lawm e” a ti sap a, a nau a buai leh tak avangin an rawn kova, an lut leh ta a..

Rinfela chu hlauh nei tih hriat tak hian a tal leh vak vak a. Muantei chuan rang takin a kuah a, a tawngtai nghal mawlh mawlh a, “Lalpa engkimtithei, sual leh ramhuaite aia thil tithei tu, thihna pawh min hneh saktu, tunah hian min hneh sak tawh ramhuai sual ten ka nau an tibuai meka, Lal Isua Kross thil tihtheihna hmangin ka nau sualna hi min hnehsak la, a hlauh zawng zawng lak ata chhanhim ang che, i khawngaihna ka dil e, Lal Isua hming in ka dil e, Amen.” a ti a, a nau chu a pangngai leh ta a. Muantei tawngtaina leh a thil hmuh chuan Zova chu a hneh hle mai a, a nunah chuan engngemaw hlauhthawn neiin a inhria a, nuamlo a ti ru ta hle mai a.

Muantei chuan, “ Mama nang pawh tawngtai ve ta che” tiin a nau chu a han bia a. Rinfela chuan bangbo hmel takin, “Engtin,” a lo ti a. Muantei chuan a kut hmalama suihin a awmzawnah a han dah a, “Ti hian ti ve la,” a han ti a. Rinfela chuan a han tih veleh chuan hlauh nei tih hriat takin a rawn meng a, a u hnenah chuan, “Ka duh lo saw min nuih,” a ti a, Muantei chuan mak ti takin a en a. Rinfela chuan, “Ti ve suh, misual i nih kha, an ti” a ti leh a. Muantei chuan “An thu a ni hleinem, enge i tih suala” tiin a nau chu a zawt a, an bula mite en pah chuan Rinfela chuan, “Ka duh lo mi an tam e” a ti a.

Muantei chuan a piaha cabin ruakah chuan phalna pawh la hmasa lo chuan, a nau chu a hruai luta, rei tak an va awm a, an thawm chu a chang chuan a hriat leh zauh thin a. An rei tak em avang chuan Zova chuan thim hmaa an khua let leh hman a duh si a …. a kal dawn lai tak chuan Muantei te unau chu an lo chhuak ta a. Muantei mangtha lova haw chu Zova chuan a hreh deuhva, mangtha pahin a va chibai a. Muantei chuan chhan pawh chhang lovin mittui kar atangin a lo chibai ringawt a. Zova chuan a hmui phun chu a hmu a, Muantei lungchhe em em chu mak a ti hle mai a, rilru nuam lo takin a kal san ta a.

Zova chuan zankhat chu mumang a nei a. Thim hnuaiah kawng bo in, kal ngaihna reng hre lovin a lo awm a. Chutih lai chuan a pa chu hnathawh kawr ha in ipte pui nen a bula lo kal in kawng a lo kawhhmuh a. Thui vak lo an kal hnu chuan hlim taka zaithawm a hria a, kohhran ho camp chhuak kawng zawh hi an lo ni a. A pa chuan “Saw saw i kalna tur anih saw, i duh zawng zawng i hmu ang” tiin a lo kal san a. A rilru-ah a cham renga, a nu chu a hrilh a. A nu chuan, “Kan tawngtai chhanna a nih chu, camp hi i luh ve ngei ngei a ngai a nih chu” tiin a chhang a. Zova chu a in ngaihtuah nasa hle a, a nu bawk chuan “Mama khawvelah hian engpawh tuar ila, chatuan nun kan neih chuan eng nge pawi chuang le, i pa kha eng vang pawhin lo thi ta mahse a kalna tur van ram a ni tho a, a thihna avanga nangin chatuan nun I hloh hi i pa khan tha a ti hauh lovang. Chuvangin mumangah a rawn inlar a nih chu, camp-ah chuani luh mai a tha ang” a ti leh a, Zova chuan camp luh chu a duh ve ta a.

Camp chu Zirtawpni-ah an chhuak a, a nu bianga mittui luang a hmuh chuan Zova rilru luhlul thin tak pawh chu a tui zo ta a, “Ka nu min ngaidam rawh aw, keipawh Lal Isuan min ngaidam a sual hnehna nun min pe tawh a sin” a nu hmaah chuan a ti a, a nu erawh chuan engmah a sawi theilo, awrawl chhuah meuhin, “Mama pa” a han ti a, an bula mite chu hnuk ulh teuhin an lo in hru fap fap a.

Camp chhuak chau a ni bawk a Zova chu a mutui hle a mai a. Mumang a lo nei leh a, a mumangah chuan mi pakhat khuarkhurum thuk leh thim taka tang mangang taka chhanchhuak tu tur au vak vak hi a lo hmu a. Chutia a en reng lai chuan puan var sin pakhat hlim hmel siah mai hi alo kal a, Zova’n a han en chian chuan a pa niin a hria a, “Ka fapa chhanchhuak rawh” tiin a hria a, Zova chuan, “Ka thei dawn em ni, a thuk si a, engtin nge ka tih ang” a lo ti a. Chu aw bawk chuan “Ka ngaidam che, Lal Isuan min ngaihdam angin ti rawh” a rawn ti leh a, Zova chuan ring takin chu thu chu a han sawi a.Chu veleh chuta tang chuan mitang chu thla neiin a lo thlawk chhuak ta mai a, Zova chuan a hmuh hnu ni tlatin a hria a, tunge a nih erawh a hre chhuak zo tawh silo.

A tukah chuan an chhungin an ser huanah chuan an feh a. Chaw an fak lai chuan Zova chuan a mumang chu a nu leh a naute bulah chuan a han sawi a, a naute chuan mumang mai mai a ho e an lo ti satliah mai a. A nu erawh chuan “Chutiangin an ti ngailo ve, Lalpa hian mumang hmangin a mite hnenah thu a sawi fo thin a sin” a ti a. “Mama Lalpa hian i pa that tute hi i rilru taka ngaidam tur che in a duh a niang” a ti a. Kimtei pawh chuan “Kei chu Pathian hmingin ka ngaidam daih tawh hmu leh mah ila huatna neih ka tum tawh lo” a lo ti ve a, Sangtea pawh chuan kei pawh alo ti ve a.

A nu chuan “Chuti chu i u mumang chu i u tan bawk a nih chu” a ti a. Zova chuan “Ni e, ka ngaidam thei mai ang ka lo ti thin a, hmu ta ila ka rilru takin ka ngaidam thei ang em tih ka lo ngaituah ngai hauh lo”, a ti leh a. Chaw eikham chuan a nu chuan, “I tawngtai ang u. I pa chungthu-ah hian Pathian hnenah lawmthu i sawi ang u, a thattu pawh Lal Isuan min ngaidam angin kan ngaidam tih Lalpa hnenah i puang ang u” a ti a. Lungrual takin an tawngtai ta a, a nu chu a tawp hlei thei ta lova, tawng hriat loh ten a bei a, a kar lakah “Mama i ngaidam ngei tur a ni, i ngaihdamna aw hmangin Lalpan thlarau saltang chu a chhuah ta. Lalpa kan pa thihna malsawm tu i hming chu fakin awm rawh se, ka fapa nunna i chhandama a hmelma pa nunna pawh i chhandam a ni tih hi dik takin min hriattir si, i hming fakin awm rawh se” tiin a ‘Amen’ ve thei ta hram a. Zova hnenah “Mama zaninah kohhran ho hma-ah Lalpa hminga i ngaihdamna hi i puang tur a ni,” a ti a.

Kimte-i chuan a u Zova melh pah chuan, “ Ka nu U Muantei te pawh an lo haw tawh asin, Rinfela pawh a piangthar an ti,” a ti a. Zova chuan a rilru chuan Muantei hmuh hlan chu a nghakhlel ru ta hle a, a nun thar hi hmu ve se a lawm hle in a ring a. Zan inkhawm chu dar hmasa a rik chuan biakin chhung chu a khat v ek tawh a. Zova pawh testimony sawi tum a ni bawk a, a kal hma hle a, a hnung lama Muantei te chhung thu chu a va hmu a. Muantei hmel chu ngui hle in a hria a, eng vang nge ni ang tiin a ngaituah neuh neuh a.

Chairman chuan testimony emaw hnehna puang duh te tan hun a hawng a. Zova chuan pen thawm a hria a, a han en chuan Muantei nau Rinfela a lo ni a.

Rinfela chu a zam hmel hle mai a, a kut leh ke khur deuh dar dar chu a hmuh theih a, a kut chu van lamah phar chhovin, “Halleluiah hnehna chu Lalpa ta a ni” tiin a au a. Mipui chuan Amen tiin an lo chhawn a, a testimony chu a sawi ta a.

“Ramhuai tihbuaiin ka awm a. Aizawlah ka pa leh ka u Muantei ten min kal pui a, engmah ei hlei thei lova ka awm lai khan tawngtainain ka nun a chelh hram hram a. Ka u in Pathian hming lam tura min tih angin lam ka han tum a, ramhuaiho chuan, “Ti ve suh, misual i nih kha tiin min khap a.” Ka u chuan ka sualnate puang turin min hrilh a, mahse midang zah avangin ka puang thei lova. Tichuan room dangah min hruai a, tah chuan ka sualna te chu ka puang ta a.

Ka sual puan erawh chuan ka pa leh ka u te a tibuai em em a. Ka u phei chu tun thlengin a tap bang thei lo. Lal Isua hming lam chauh chu ka tan sual laka himna a ni tih ka hriat avangin ka tawngtai ta reng a, min hriat angin Lalpan min chhanchhuak ta a nih hi, Lalpa chu fakin awm rawh se,” a ti a, a aia ring leh zualin “Hnehna min petu Lalpa chu fakin awm rawh se” a ti leh a, nu ho chuan ‘Amen Halleluiah’ tiin an lo chhawn a, in sut ri hraih hraih thawm pawh a awm reng a.

Zova chuan Muantei a va en chuan a lo la kun renga, a lawm vang niin a hria a, a lawmpui hle a. Muantei tawngtaina chuan ama nun leh a nau chu a chhandam niin a hria a, tunah chuan nunthar a nei tawh bawk a, Muantei chu hrilh hlan a nghakhlel hle a ni.

Rinfela chuan, “Lal Isua neitu ka lo nih tak avang hian ka pa te leh Lalpa hma a ka sual ka puang ang khan zan inah hian a kohhran-ho hma-ah hian puang ve lo thei ka ni tawh si lo, ka nih nih ka ni ang a, he thil avanga sawi sen loh rilru natna tuarte hnenah pawh ngaihdam ka dil nghal bawk a ni. Chu chu..” a sawi zawm thei ta lova, Muantei leh a nu chu hmai hupin an thu kun tlat a. Zova chuan mak a ti hle a, chutah Rinfela chuan, “Pu Thanzuala kha keima kut palh tuara thi a ni” tiin lungchhe tak chuan a han sawi ta a. “Mahse ka tum reng vang chu a ni lo, ka hlauhthawn avangin ka zep ta ringawt a. Misual tualthat chu keimah hi ka ni. Lalpa hma a ka nihna chu in hma ah puang lo thei ka ni ta lo a ni. Pu Thanzuala chhungte hnenah Lalpa hmingin ngaihdam ka dil a ni. Lalpan min ngaihdam ang hian. “ tiin a thusawi chu a ti tawp ta a.

A thu hriat chuan Zova chu a thawng chiang hle mai. Muantei tahna chhan chu a hre ta a, a rilru chuan hetiang a nih dawn vang a nih hi mumang ka lo neih a, vawiinah thlarau hriattirna kan dawn tiin a nu thusawite a han chhut kir leh a. Chairman pawh a hamhaih deuh nge ni din nachang a hre lawk lova. Mipui mit pawh chu Pu Thanzuala chhungte chungah chuan a fu thup a, tumah an din loh avangin Zova chuan dawhsan lam chu a pan phei ta a, mipuite pawh chu an thaw ta lo emaw tih mai tur a ni.

Zova chu an thlir thap mai a, a ke pen ri te chu a ring hle a. Zova chuan lectern atang chuan a han en a, a nu tap lai chu a hmu a, a naute pawh an bang bik lo. Sawi mai tur a hre lo a, Muantei te chhung chuan beisei nei takin an lo thlir reng tih a hria a, chu chuan a thil sawi tur chu sawi a ti chak zual a.

“Zan inah hian inbuatsaih sa a rawn kal ka ni a, hnehna puang chhuak tur leh ngaihdamna thu puang tura lo ding ka ni. Zaninah Pathian thil rel leh remruat ngei a lo thleng a ni tih chiang takin ka hria a, ka thusawi tur in hriat hunah nangni pawhin Pathian ropuizia hi in fak lo thei bik lovang” a han ti a.

Muantei chu a thaw huai a, a hmangaih hmelma chu a nau alo ni tih a hriat atanga a rilru na zawng zawng chu dam huaiin a hria a. Zova chu a hma-a a hriat thin, rilru nghet leh dam tak kha niin a la hre renga, mahse alo beisei ruk thin chu thleng thei turin a rilru pawhin a suangtuah ngam ta lo. Tualthattu chhungkua hi an thah a te chhung nen a inzawm leh chu thil harsa tak niin a hria a.

Zova chuan, “ Ka pa thihna avanga rilru nat vanga kawng diklo ka zawh a, phuba lak tum a thildang reng ka ngaihtuah loh lai khan, camp pawh ka luh duh loh hial lai khan mumang dik si ka mang a. Tah chuan keimah chauh hian kawng bovin ka lo awm a, tah chuan kalna kawng min kawh hmuh turin a hnathawh thawmhnaw nen ka pa ngei kha a lo kal a. Pathian mi te camp zai mup mupna hmunah min hruaiin, saw tah sawn kal la i duh zawng zawng i hmu ang” min lo ti a, tichuan ka harh hnu chuan camp luh ngei chu tha ka tiin ka lut ve ta a. Lalpa hmangaihna avangin sual min bumna zawng zawng leh thihna lak ata hnehna Lal Isua zarah ka lo chang ta a, ka lawm em em a ni. Nizan khan mumang ka nei leh a, tah chuan khuarkhurum thuk leh thim takah hian mitang pakhat hian tanpuitu a lo au vak vak a. Chutia ka en reng lai chuan ka bulah puanvar sin mi pakhat a lo kal a, a ni chuan, “Chhanchhuak rawh” min lo ti a. Kei chuan “Engtin nge ni ang, a thuk si” ka lo ti a. Amah bawk chuan, “‘Ka ngaidam che, Lal Isuan min ngaihdam angin’ ti rawh” min lo ti leh a. Tichuan a thu anga ka han sawi veleh chuan chu mitang chu thla neiin a lo thlawk ta mai a. Chu pa chuan hmel hlim tak hian min rawn en a, keipawhin ka hmuh hnu ni ngeiin ka hria a, ka hrechhuak zo silo. Mahse zanin a Rinfela hmel ang ngei kha a niin ka hria, chuvangin zan inah hian Lalpan kan zingah thil mak a rawn ti ta a nih hi, Lalpa thu chu tunge hnial thei teh lul ang ni. Chuvangin keipawhin zaninah hian he thu hi kan chhungkaw aiawhin ka puang duh a ni. “Rinfel ka ngaidam che, Lal Isuan min ngaihdam angin” tiin hnukulh teuhin a sawia, lawm avanga tap thawm a tam ngei mai.

Zova leh Rinfela te chhung chang nilo, chu thih dan hre tute chuan Pathian thiltihtheihna lo lang avang chuan lawmin an lo tah pui a ni. Inkhawm boruak a dang zo vek a, Zova’n Rinfela a zuk chibai lai phei chuan tap lo an awm lo hial a ni.

Chairman a lo dinga, “Zanin hi Lalpa ropuizia lan zan anih hi. A biakbuk thianghlimah ngei inremna ropui tak a thleng ta si a. Chuvangin an ni chhungkua kha han inchibai se la, kohhran ho ten chibai kan buk vek bawk ang,” a ti a, tap thawm a ri ta chuah chuah a. Khuang pu in hla a rawn la a, tui takin an zai ta a. Chumi zan ang reng reng a Pathian awmpuina an dawn nasat tumahin an la hre ngai lo.

Mi tinin KHA THIHNA KHA Pathian remruat a lo ni an ti ta vek a.

Related posts

How to become yourself

benjamin rualthanzauva

Thawnthu Tawi Inziahsiak – Lawmman Pahnihna

aduhi

Kan Comment pek hi !!

Sanam-a

122 comments

Leave a Comment

Skip to toolbar