Mizo Society & Culture

Tunlai thalaite incheina leh Kohhran

Mizorama Kohhran lian ber, Presbyterian rorelna sang chuan tunhnai lawk khan ‘Biakin chhunga incheina chungchangah inkaih-hruaina siam nise’ tiin an rel a. He thu kan ziak lai hian inkaihhruaina hi an la siam zo lova, chuvangin eng ang chiahin nge inkaihhruaina hi an siam dawn tih hriat a la ni lova, an siam zawh hunah pawh thupek ang zawnga ‘tur a ni’ tih ang tawp tawp chuan an siam a rinawm lova. Ngen-na ang deuhin ‘ni thei se’ tih ang zawnga an dah a rinawm. Kohhranin Biakin chhunga inchei dan tur inkaihhruaina siam a tum ta mai hian ngaihtuah a ti thui a, tunlai thalaite inchei dan hian kum upa zawk, kohhran hruaitute mit a ti kham ta a ni berin a lang.

Thasiama hun ata tawh, tunthleng mai hian rual u zawk leh thangtharte inkarah ‘duh dan in an lohna’ a awm reng a. Tunlai thalaite mawi tih zawng hi kum upa zawkte chuan mawi an ti ve lova, hetiang bawk hian an ngainat zawng pawh a in ang lova, rilru sukthlek zawng thlengin a in ang lo. Tunlai thalaiten rimawi an ngaihthlakte hi upa zawk tan chuan rimawi ni lovin, ri bengchheng a ni a. Kum upa zawkte thinlungah America ropui zia nghet taka a intuh laiin tunlai thalaite erawh chuan sorkar policy an thlir a, Obama foreign policy a hlawhchham nia ngaiin, India leh China economic thang chho zel an thlir daih a, kum upa zawkte erawh chuan US President hmalakna a nih tawh phawt chuan dik tura ngaihna an nei tlat. He ngaihdan leh duhdan in an lohna avang te, thil thlir dan hrim hrim in ang lo lutuk avangte, ngaihnat zawng leh duh-zawng in ang lo lutuk avangte hian incheina chu sawi loh,  lumeh dan thlengin kan inhrethiam lo tawn ta a ni ber mai e.

Tumah indem thei kan awm lova,  kan khawvel danglam chak lutuk hi a chhunga cheng mihringte hian kan um pha lova, chu chuan kum upa zawk leh thalaite inkarah ngaihdan in an lohnate, thil thlir dan in an lohnate leh duhdan in an lohna te hi a hring chhuak a ni.

Tunhnai kum 20 emaw vel lek chhung ringawt pawha kan khawvel danglam nasat zia hi mita hmutute kan ni. Tuna thalai, kum 30 bawr vel te hi an naupan lai han chhut sak ta ila, chhungkaw pangngai deuh atanga chhuak tawh phawt chuan unau mipa an nei a nih phawt chuan krismas kawrah  ‘suit in ang’ an nei deuh ngei ngei anga. Pistol lem, a kep kahpuah theih ang chi an nei ngei ngei bawk ang. Tleirawl ve tan an nih chuan Krismas thing phurhnaah an kal ngei ngei anga, ruai thehna tur hnahte pawh an la ngei ang. An thenawm hnaiah tlema hausa deuh TV nei thei an awm a nih chuan Bangladesh hruaitu Ershad-a’n tuilian tuar enfiah a, tui a dai bawrh bawrh lai hmuhnawm ti takin an en ngei fo anga,  kungfu shoe chhuat nal tak bunin, Shaolin temple an mitthla fo ang.

Tunlai naupang zingah erawh unaua suit in ang nei duh an awm ta meuh lova, TV remote control humin, an duh duh channel an en a, TV an en peih loh deuh leh Computer games an khel leh a, Krismas ruai thehnan hnah hman ngai a ni tih an hre miah lova, Krismas thing phurh a awm ngai tih an hre lo bawk.

Tun kum 20 emaw vel chhung lek pawha mihring nunphung danglam nasat tawh zia hi hriat thiam a har a, tunlai thalai zawkte nunphung chu rualu zawkte tan chuan mak ti a thlir ngawt ngawt bak chu tih vak ngaih-na a awm lo a ni ber mai.

He khawvel danglam chak lutuk hian kum upa zawk leh naupang zawkte inkarah inhriatthiam lohna a hring a, chu chuan kan sakhuana thlengin nasa takin a nghawng a ni. Thalai zawkten kum upa zawkte rilru kan hriatthiampui pha lo a niha, ‘a thing’ kan tihsak zel a nih chuan he inhriatthiam lohna hi a lian tulh tulh dawn a, chu chuan kohhran leh khawtlang nunah harsatna nasa tak a thlen ngei ngei dawn a ni.

Hetih rual hian kohhran hruaitute pawhin tunlai thalaite duhzawng hi an hriatthiam a ngai. An hrethiam lo a nih a, an thil ngainat zawng apiang ‘khawvel thil’ hmuha an hmuhsak zel a nih chuan tun atanga kum 20 velah chuan ‘kristian zaa za’ tih tawngkam hi kan hmang khat pharh tawh mai thei a ni.

‘Eng hi nge Pathian thil ni a, eng hi nge Setana thil’ tih pawh hi kohhran hruaitute hian ngaihtuah hram teh se. Thil hmuhsitawmte thlang a, thil awm lo te nen lama thlangtu, kan Pathian hian thinlung leh tih tak zeta a tana kan hlan tawh phawt hi chu a hmang duh zel mai dawn lawm ni? Zu hmuna an ben thin avanga kristian hmasa ten ‘Setana thil’ nia an ngaih Khuangte pawh hi Pathian tana hlan a nih hnuah chuan a tel lovin Pathian kan fak thei ta lo hial a ni lawm ni?

Zahawm taka inchei hi Biakin chhungah chauh ni lovin, khawi hmunah pawh a tha- tih theih chuan. Mahse miin a tlin lo a nih tlat erawh chuan hnawl ngawt chi a ni ang em? Thalai zawkte inchei duh dan hi kohhran hian hnawl sak ta tlat zel ila, kohhran pawnlama an duh dan ang taka an inchei theihna hmun lam  an pan daih mai ang em?

Tunlai sam tihphir leh chalsam lehlama mit khuh ang chi te, puanfen chhingte, chhip sam tihzum chhoh ang chi te hi ‘a tha’ chu ka ti hauh lo. Mahse miin a inchei duh dan leh a mawi pui ber nia a hriat, a lungawina ang taka a inchei hian thikthu lo tihchhiat em em ringawt hi kan thatpui kher ang em?

Tunlai khawvel thiamna sang chho zel leh media chak tak mai hian kan ram hi min run a, a rah chu kan thalaite nundanah kan hmu. He hmasawnna min luhchilhtu hi lo dan pawh tum ila, kan dang thei dawn lo. A theih loh. Dan theih loh tur dan tuma phet phet ai chuan hman tang-kai dan zir mai a tha zawk lawng maw? Tunlai thalaite ngainat zawng hi hnawl ta vek ila, Absalom-a’n a pa a do let ang mai khan kan fate hian min do let anga, kan buai hle mai thei a sin. An nundan a pawhlawh a nih a, vantlang ngaihdan pel deuh hleka inchei chunga a dera Biakin an la rawn thleng thei a nih chuan a lawmawm lamah ngaih tur a ni zawk ang em? A der pawha an tih peih loh hun a thlen vaih chuan kan koh eih zawh a rinawm tawh lo.

Khawvel danglam zel mila koh-hran hian a kalphung a thlak ve zel loh chuan kan Biakinte hi a ram mai ang tih a hlauhawm a. Hmasawnna lo thleng apiang hnawl zel kan tum a nih chuan tuna kan thalai tam tak, khawvel hipnain na taka a hip beh mek te hi kan hloh vek ang. Kan ngaihdan apiang a kawi a ngila zawm vek tura kan thalaite kan beisei a nih chuan kan beisei a thlawn fo dawn a. Min run mektu khawvel hmasawnnain kan nundan a thlak zel hi dan tuma phet phet ai chuan Pathian hman tlaka kawihher dan hi ngaihtuah zawk ta ila, kohhran hian a thatpui zawk mai lo ang maw?

Related posts

Aizawl Venglai tlangval duat rawn Ramhlun South ah a tualthi

Dust_Lv

Mizo Hmanrua/ thil thenkhat

CFL

Aizawl, 2011 Chapchar Kùt Thlalak thenkhat – Vaivut khu reng a awm ta lo…!!!

kawlhawk

42 comments

Zephenath January 3, 2011 at 9:07 PM

😆 A va reh ve….

Pawn lam landan chauha mawi tum lo hian thinlung chhung lam nen thlenga mawi tumin inchei i tum ang u.

Reply
kawlhawk January 3, 2011 at 9:07 PM

U1uk takin chhiar i1a, comment pe tak2 ang aw.

Reply
kawlhawk January 3, 2011 at 9:09 PM

2ephenath mai2 chu aw… Min va ti 2ak mai2 e…

Reply
H.Vangchhia January 3, 2011 at 9:16 PM

Incheina/inthuamna te hi chu generation a zirin a dang zel ni maiin ka hre mai. Mahse, mit tikham (Inappropriate)deuh hi chu a awm thei khawp mai, eng generation ah pawh hian.

Reply
bauhbauh January 3, 2011 at 9:23 PM

a hun leh a hmun a zira in chei thiam hi a tha ber mai in ka hria…
Tunlai kan thalaite hi chuan tlem chuan an incheina hi chu an uluk deuh chu a tul in ka hria, chumi pian lamah an nu leh pate pawhin an inchei dan tur hi an enpui chu a tul khawp in ka hria… sawi zel ah khek phawt ang.
He post hi chai laih tham a ni dawn tlat mai.. 😀

Reply
Sadbutt January 3, 2011 at 9:33 PM

Eng chin ah nge a kaihhruaina hi kan reh bun ang aw tih chu chhut tham tak a ni. Incheina hi kan rilru leh ngaihtuahna hruaitu leh thununtu chu a nih na tam tak a awm khawp mai. A pawimawh ber pakhat chu chhungkua atanga inzirtirna hi a ni. Nu leh Pate’n tunlaina leh rualpawl kan tum lutukna hian kan fate ah a lang chhuak a ni thei. Pawn lam lan dan aia chhungril nun pawimawhna inzirtir uar i la a hlawk ang.. A lutuk hi chu engmah a tha ngai lo. A hun leh a hmun thliar thiam i in zirtir ang u. Khap leh ringawt thin zawng a ni lo ve.

Reply
Ignatia (33-115 AD) January 3, 2011 at 9:35 PM

Tha hle mai,tun Krismas lai a tang khan kalo ngaihtuah mek a. Mipa te in cheina hi chu ka hrethiam chiah lo a. Hmeichhia te hi a bikin Mizoram pawn a an inkhawmna a an inchei dan hi a u chuak ka ti ang reng khawp mai. Mizorama ka awm lai khan min hrilh fo va mah se engah vak kalo ngai lem lo a,mah se han hmuh tak tak chuan alo nuam lo riau.Kan ti mah mah in ka hre deuh. Vai thian te hmuh ah mawi lo tak a ni. A chhan ni bera an sawi chu-nu leh pa hmuh lohah duh duh in an in chei thei a an ti mai zel a. 😉

Chuan Presbyterian hma lakna hi ka thlawp e kei chu. :happy:

Reply
ChhawnBura January 3, 2011 at 9:36 PM

Tunlai khawvel thiamna sang chho zel leh media chak tak mai hian kan ram hi min run a, a rah chu kan thalaite nundanah kan hmu. He hmasawnna min luhchilhtu hi lo dan pawh tum ila, kan dang thei dawn lo. A theih loh. Dan theih loh tur dan tuma phet phet ai chuan hman tang-kai dan zir mai a tha zawk lawng maw?

Min run mektu khawvel hmasawnnain kan nundan a thlak zel hi dan tuma phet phet ai chuan Pathian hman tlaka kawihher dan hi ngaihtuah zawk ta ila, kohhran hian a thatpui zawk mai lo ang maw?

Khawvel hmasawn dan mil zela kan kal thiam hun a nghahhlehawm khawp mai. Pathian thu erawh her danglam tum lo ila.

Reply
nimer January 3, 2011 at 9:43 PM

biakin pawnah chuan an/kan duh duh danin inchei ang hmiang….mahse biakin chhungah chuan zahawm deuhin an/kan inchei tur a ni ka ti ve tlat…..
#7 Pathianin kan thuam a en lo kan chhung a en zawk….ni e a dik alawm mahse zahawm lo deuha biakin chhunga inchei tu chuan ‘chhung’ tha tak a nei dawn bik ami? 😀

Reply
TuaiSialA January 3, 2011 at 9:45 PM

Silhfèn chungchang sawina a nih deuh ber hi a..!

I post uluk taka han chhiar chuan tlang taka Kohhran rorèl sawhsel lovin, Kohhran hian tunlai thangthar incheina leh hmasàwnna hi pawmthiam se i tihna ni deuh berin ka hria.

A ni viau tho nâin a tua tan mai pawh hian Biakin chhunga inchei dan tâwk a awm. Hmeichhia pawnfèn chhîng lutuk leh kawrhma zau lutuk bakah sexy lutuka Biakina an lut hi chu an Biakin luhchhan an thelh deuh thin niin ka hria. Biakin chhung hi fashion-a intihsiakna hmunah kan chhuah mek. Hemi kawngah hian Kohhran thil rèl hi tha ka ti a, Salvation Army anga uniform neih te pawh hi thil tha tak niin ka hria.

Biakina kan incheina hrim2 sang lutuk avangin mi rethei zawkte’n an zingah inkhawm an zak mek.

Chutih rualin upa zawkte pawh hian a nazawnga thangtharte incheina hmuhthiam loh hi a fuh ber lem lo. An hun lai khawvel leh tunlai khawvel hi an thliarhran thiam a pawimawh tak zet.

Post tha tak a ni e. Upa zawk leh naupang zawkte tan chhiar a pawimawh khawp mai.

Reply
spam January 3, 2011 at 9:45 PM

A pawn lang chauh hi ngati nge maw kan khel kan khel le!!! In cheina mai mai ai a ngaih pawimawh ngai a tam teh lul nen. Engti pawn in chei ila, kan Pathian hma ah te chuan engkim saruak leh in hawngsa vek in kan lang zawk si a, kan incheina hi Pathian hiang a ngai pawimawh viau angem aw tih hi ka hre chak khawp mai. Nun a Pathian tihna tak tak lang silova Biak In a zahawm taka inchei te hi a vei awm leh ling phian tawh zawk lo maw??
‘Pathian tihna leh zahna tak tak atanga chhuak nge ni a keimahni tha tih dan leh mawi tih dan kal pui tum na?’ tih hi kan kalphung tam tak ah hian in zawh nawn a ngai tan ta em aw? Incheina chung chang mai nilo, thil dang tam tak ah pawh.
Amah erawh chu a uchuak lutuk te hi a awm ve hrim hrim a, mahse chutiang u chuak lutuka tak mai a inchei chu Biak In chhung ah chuan ka hmu tawh em le????

Reply
jalal January 3, 2011 at 9:47 PM

Thlir zau bawk a ziak tha hle mai.. He lai Post mai a tan chuan a uih awm zawk in ka hria…Daily paper ah te hian han pho chhuak teh u.Pa in ti un pui pui te nen han chai ho a chak awm tlats….

Reply
kawlhawk January 3, 2011 at 10:01 PM

nimer@11, ka #7 khi khawngaihin han chhiar chhuak law2 teh khai… 😮

Reply
Mapuia January 3, 2011 at 10:33 PM

In cheina hi chu Evi’n theipui hnah a fen lai atang tawh khan a dang lam chho zel a, hnam tin zingah he inthlakthleng (change) hi chu a awm reng. Sakhuana la urhsun hnamah a muang deuh va, la urhsun vak lovak a inthlakthleng chak mai zel.

Incheina maksak deuh a lo chuahin, a pawng a puia lo nêk chiam hi a tha lem lo. Hun a lo kal a, a thar a lo chhuak leh zel dawn.

Hmeichhiate’n mipa fit deuh ti-za-pa thei khawpa an inchei erawh zawngin a fuh ber lovang. An tan a him lo thei. Mahse chung pawh chu an society azirin ngaiah neih mai theih a la ni fo.

Mizo nula leh tlangval kan innel ang ngaihtuah hi chuan kan rilru a thianghlim fu. Tunlaiah a ni tawh lo mai thei. Hei hian hnam ziaa kan neih leh neih loh hian thu a sawi thui hle tih a tilang.

Chutiang chuan incheina pawh hi hnam ziaa kan lakluk that leh that lohvahte awmzia a nei thui hle ang.

Kei atan erawh zawng, pangai taka inchei hi a tawk ka ti mai thung. Mi inchei dan hi ka pawmzam thei viau lawi si a. Mahse hnam zia tipawi thei chu ka tei thei vak chuang lo.’ tih hi he post atang hianka ngaihtuah kual vel mai mai.

Reply
speeds January 3, 2011 at 10:35 PM

A tha khawp mai,post tha tak a ni. Kan Pathian biak dan kan zahthiam poh leh kan sakhua midang sakhuain min en dan a tlabal lo a ni mai tih hi ka ngaihdan a ni.Eng generation ah poh hian a chintawk leh uchuak a awm.Hmeichhia chauh hi a ni tawh lo,mipa( a bikin rawlthar) zingah lu meh dan mak tak tak,zahpuiawm tak tak hi ka hmu fo mai.A hnam ang zawng pawhin in en chian hun laitak niin ka hria.

Reply
caribou January 3, 2011 at 11:04 PM

Inchei sexy lutuk hian mipa rilru a hruai kawi nasa thei hle a. Leggings te nen hian inkhawm ta se, awmbawr lang ruak te leh kap thla lang feih feih te hian rawn inchei ta se, tisa chakna tho rang tak mipa tan chuan enzui vawng vawng a awl khawp ang. “Enui hi a pawi lem em ni” pawh a la tih zui theih thova. Rilru ah hmeichhe itna a awm tlat tawh chuan kan inkhawm chhan ber kha rilruah a lang thei tawh lovang.

Kan inchei dan leplerh ta lutuk hi chuan ngaihtuahna a tithui khawp mai. Mipa chakna cho chhuah tum, kap nek ran incheina ang chi hi chuan dawr a dap alawm. Hmuh a nuam a, a hmuhnawm bawk. Mahse, thlemna nasa tak siamtu a ni thin.

Engah nge kan hmeichhia te hian SEXY nih hi an chak em em le? Hmeichhe fel, ngaihnobei, leh duhawm nih ai chuan hmeichhe sexy nih hi an duh tawh zawk. Vawkpui vak vak pawhin ekthing a tawng leh mai thin ang deuh hian, an inlak Sexy tum lutukna hian a tawpah Sex ah a hruai lut nge nge thin.

Reply
g January 3, 2011 at 11:16 PM

salvation army in uniform a van lo tha tak em! Mihausa leh mirethei Pathian biak inkhawmah kan in ang khat vek..hall (biakin) ah zu rui,K.s.,etc. tan pawn thusawi na hun a awm. A tir atang a khuangte nen leh music chikim Pathian biak nan a hmang thin,dang lam ve ngai lo chhandamna sipai pawl (kohhran) kei ni chhungkua,duh hun2 a thawmhnaw thar leina nei lo tan chuan a va man hla em!..tunlai incheina leh kohhran chungchangah chuan kan chhungkua kan him e…ziaktupa, i ziak tha hle mai..

Reply
lrpa January 3, 2011 at 11:41 PM

Computer screen atanga thil ziak thui deuh hi chhiar a peih awm lo thin a. Comment pawh hi zep lohah chuan comment dangte chhiar deuh zuai zuai atang hian ka pe ngawt thin..! hei pawh hi chutiang deuh tho ani leh pek e!
A topic hrim hrim khian min hit lo nghal a. Incheina leh kohhran..hetiang lam hi FTv leh UPC a in zawm loh ang tluk zet a in chukha lo anih kan beisei ve ngawt!! :happy:

Reply
nastycool January 3, 2011 at 11:43 PM

Post tha tak ani! Ngaihtuah a ti thui duh kher mai. Mizoram ah biakin thleng a fashion sang lutuk hi chu piansualna chikhat ah ka ngai. Ram rethei tak ah hian incheina kan ti sang em em ringawt hi chu zahna chang kan hriat a hun tawh ani.

Reply
nastycool January 3, 2011 at 11:58 PM

Keini ai a hausa vaiho hi biakin vel ah chuan incheina sang lo khawp mai,delhi,kolkata,b’lore,mumbai,chennai ah te vaiho biakin a incheina kan hmu hlawm in ka ring,mizoram ang a biakin a incheina sang a awm lo hulhual. India rama biakin pui ber tia chhal theih tur apostle Thoma biakin San Thom basillica ah pawh manchester utd jersey, lungi,etc leh thawmhnaw dang mizoram a biakin a hak chi a kan ngaihloh ha an tam thei khawp mai. Mumbai ah pawh chuti tho.Mt.Mary church lar tak a inkhawm te fashion chu zoram thingtlang khaw biakin a lawi te incheina ai pawh in a simple zawk ang.Mahse an Pathian bia chu an urhsun em em thung.

Reply
Uaiizzz January 4, 2011 at 12:59 AM

Incheina, a thuanhmaw ai chuan khami thuanhnaw ka inbel duhna thinlung lam kha a pawimawh zawk hmel. Thuamhnaw-a hrim hrim kan khel vak dawn anih chuan tawp-in-tai a nei lo ang 🙂

Reply
zodikalz13 January 4, 2011 at 2:02 AM

A thupui chiah ka chiar a ka rilru-ah he hla thu (MALTA ho sak) hi zuk han lo lut daih chuan :))

Tunlai thangthar nun dan hi
A mawi leh mawi lo pawh an sawi lo
A then in sam an tan tawi a
A then in sam an herhkir virvel e

Reply
H.Vangchhia January 4, 2011 at 3:06 AM

zodikalz13 #25 MALTA ho kha midang sel mai loh chu (khami hlaah khan) tih ngaihna vak an tan a awmloh hmel em bawk alawm mawle hairehai 😀 😆 NOI

Mipa Inthuamna leh hmeichhia te incheina hi chu mahni mimal duh ang ang a inbel theih, tuman an sawisel thiang heklo, a sawt heklo. Mahse, chumi anih vang erawhin uchuak tak erawh a zahawm loh mai bakah mi nuih leh en tleuna a ni. Chu mai te chu ni tawh teh se. Ka lawm e hairehai 😀

Reply
Rooney Opa January 4, 2011 at 4:10 AM

a va tha ve. Incheina hi kan mize lanchhuah dan a ni fo reng a ni. Tunlai thalaite khawvel hmasawn dan ang zelin kan inchei ve tawh a. Fimkhur a ngai khawpin ka hria. A bikin Biak inah phei chuan inchei uluk a tulin ka hria. Kan inchei dan a pawimawh lo, van ram kaina a dal lo ti thin mah ila, kan inchei dan hi kan rilru puthmang lanchhuah dan a nih tel tlat avangin inchei uchuak tak chu a rilru pawh mi pangngai tak a nih loh hmel tlat thin. Tin, Mizoram pawna kan thalaite pawh h vei tham an ni in ka hria. An vai chuan ni lo mah se a tam zawk inchei dan hi cu ka lo zahpui thin. Kan bula vai ho ten kan Mizo nula te inchei dan an sawi an sawi a, a mawilo zawng leh a sihhnip zawng anga an sawi chuan thin a lo rim ve tung a, engmah tih theih kan nei thin si lo. Fimkhur a ngai khawp mai. Kan inthuam fimkhur loh chuan hnam dang pawhin min zuam mai thin.

Reply
Vetehmial January 4, 2011 at 6:36 AM

Tha phian maithei,fuh chiahlo theibawk..

Reply
khuangdailova January 4, 2011 at 6:40 AM

Ka chhiarchhuak dap e,,,thuziak thiamtak thuziak a ni e,lehlam zawng pawh hian ziak la ,,eee a lo ni maw ti tawk chu kan tam viau tho ang.A tlangkawmna a mi chiah hi ka han tuihnih v duh chu a ni.

“Khawvel danglam zel mila Kohhran hian a kalphung a thlak ve zel loh chuan kan Biakin te hi a ram mai ang tih a hlauhawm”, tih lai hi…Kohhrante hi khawvel mila kal tur an nih ka ring lo,Pathian thu mila kal zawk turah ka ngai.A number tam ringawt ai chuan titak zeta biak kha a duh dan a ni lom ni kha.

Tunlai khawvel ah zawng ram changkang a piangah Pathian ngaihsak lohna leh ti ve mai mai a biakna ahluar ta a nih hi maw,biakin chhung a nupa/inngai zawng inkuah /infawp te hmuh tur an omfo mai…chuvangin kan ramah incheina te chen a Pathian biak kan la uluk hi chu sang tak kan la ni.Incheinah pawh club a kal dawn mai mai pawn smart takin inchei angaia kan inchei mai a,Biakinah Pathian be tur ngat phei chuan kan uluk hle a tulin ka hria..man to lam chi erawh tul lem lo. In ti ve teh ang,

Reply
ThaiBoy January 4, 2011 at 6:42 AM

Kan incheina hian kan rilru nasa takin a kaihhruai fo avang hian kan uluk angai reng ani. Uchuak lutuk a inchei hi eng generation ah pawh an awm; a arh uar leh arh over a zuih uar leh chuti bawk, Hmeichhe lam pawh Fengchhing lutuk leh ha tight over an awm, a hun leh hmun pawh thliar lova mahni duh dan a inchei tawng mai ho hi chhungkua leh khawtlangah mi tangkai tak anni ngai lemlo.
Thilmak deuh mai pakhat chu miin taima tak leh thahnemngai tak a miin hna a thawh hian eng thawmhnaw pawh inbel se a mawipui mai, engmah thawk peihlo nalh zuar ringawt hi tuman an hmu mawi ngailo.

Reply
Benny January 4, 2011 at 7:45 AM

Incheina hi a pawimawh a ni. A hun leh hmun a zir zela inchei thiam hi a tha khawp mai.

Reply
Maisek January 4, 2011 at 8:04 AM

Tunlai Zoram chhung bikah hi chuan biakin a kan inchei dan hi a mawi viauin ka lo hria a. Puan hi kan nula te hian an veng tlangpui a. Hmun danga puan veng ngai hlei lo te pawh hian biakin chhungah chuan an veng tlangpui ni mai hian ka lo hria a. Sawisel tur teh chiam ka lo hre lo zawk asin! Biakin chhung na na na ah hi chuan, trawp lutuk leh zahawm lo lutuka inchei hi a mawi lo zawk. Mipa pawh Pathian be tura kal chu a theih ang tawka fai leh nalha a inchei khan a zahawm zawk ani! 🙂

Reply
triplestar January 4, 2011 at 8:18 AM

Post tha leh pawimawh tak a nih hi. Comment pawh ka chhiar chhuak dap a ngaihdan a inang lo hlawm hle mai, incheina hi chhungril nun tilangtu a ni e in tih hi a dik hmel khawp mai, chuti a nih chuan rilru thianghlim lo leh felfai lo te chu biakinah pawh an duh angin inchei mai sela a tha zawk lawng maw, rilru tha leh thianghlim awm taka inthuam a nghawngawrh leh suit man to nena induan zuah a tha si lo,mipui bum zawnga khawsak ai chuan.

Chutianga kan rilru mil ang zela kan inthuam dawn chuan rukru leh kutkem nei te hian kawr inthuam dan bik hi nei ta se,mi bummang pawhin inthuan dan hran nei se, kan lo inveng ve thei anga, politician ho pawh hi an policy an tih tlawhtlin dawn leh dawn loh te an thawmhnaw inbel atangin kan hre thei anga, kan thlang lo mai anga, ram pawhin hma a sawn phah anga a tha viau mai lawng maw, tlang bum nana inthuam lo hian langchiang law law ila 😆

Reply
shailendra January 4, 2011 at 8:55 AM

Pathian Biakinah chuan mawihnai takin in chei ila, han ti ngawt ila, Engnge mawihnai chu? tih hi kan topic khi a ni si a. Kan mawihnai tih chin a in anglo ang. Ka vei ve ber zawk a chu. Incheina a lo sang zel a, hetih karah hian mirethei leh harsa zawk ten Inkhawmna a incheina tur tha anneih loh avanga inkhawm tha ngamlo te hi ka lainat.

Incheina chungchangah chuan, Salvation Army nih a, hnathawhna lama sipai nih bawk hian, incheinaah harsatna a tlem ber e, an ti 😆

Reply
Dr.John January 4, 2011 at 10:35 AM

Thangthar-te Incheina chungchang hi a pawimawh viau na a, kan duhthusam ang zawnga keuh-thluk-pui kan tum palh ang tih erawh a hlauhawm hle-in ka hria. Incheina (fashion) reng reng hi khawvel changkang zelin a ken tel (impact of modernism)a nih tlat avangin keimahni zawk hi lo-insiamthat (adapt) ngai kan ni zawk fo. Amaherawhchu, Thangthar-ten Incheinaa kan THEIH-NGHILH FO leh Kan HRIAT-RENG TUR pakhat chu “FORMAL DRESS & CASUAL DRESS INBEL HUN HI KAN HRE NGEI NGEI TUR A NI” tih hi. 😆

Reply
Mapuia January 4, 2011 at 10:43 AM

#34, A dik chiah.

Ramri khamna tur chin hi a vang khawp mai. Thawmhnaw chu engkawngah pawh uchuak lo se a tha tlangpuiin ka hre mai.

Reply
Mapuia January 4, 2011 at 10:43 AM

#34, A dik chiah.

Ramri khamna tur chin hi avang khawp mai. Thawmhnaw chu engkawngah pawh uchuak lo se a tha tlangpuiin ka hre mai.

Reply
sekibuhchhuak January 4, 2011 at 12:07 PM

Kohhran ho hian hmeichhia chuan inkhawmnaah bikini hak vek tawh tur rawn ti mai se 😛 Hotuni, Maisek te leh pi BMW te chuan nuam anti ang chu 🙂

Reply
ruatruatapa January 4, 2011 at 1:37 PM

Khawvel hi…. ngaihsan a tam e….

Reply
Maisek January 4, 2011 at 1:41 PM

# 38 @ Seki, a va sawi tur hriat loh thlak ve awww! :blush:

Reply
shailendra January 4, 2011 at 1:49 PM

#40. 😆

Reply
zoho January 4, 2011 at 1:58 PM

Post ril tak ani. Ngaihdan a phir thuau2 nei ang le. @Posttupa, ‘Spirit of Compromise’ hi Pathian in a haw lutuk tih pawh hi theihnghilh lo bawk ila, Kohhran hi thangthar nun mil a a inherrem ve zel chuan a dazat chak lutuk ang.

Chutih laiin ‘spirit of stubborness’ luhlul, chapo, ti ngut hi a chungzawk tlukpui tho a thalo ani bawk si. Petera te a ang a thuilohkawr la hak tum tlat chu ani lul bawk si lo.

A tawk a awm, chu chu pafa/nufa incheina hi thinlung taka an in pawmsaktawn vel hi ani mai awm e. Chu aia incheina hi a inthlakchak chuan a breaktu tur puitling zawk in an tihtur an ti tawklo ani mai.

Reply
Lersia January 4, 2011 at 2:22 PM

thahnem ngaih ana ani ange. Tawngtam vakloa ka ngaih thin tepawn tlar sawm dawn an sawi mai. :happy:

Nia, chunglam a zir zelin pawnlamah a langchhuak a, chhunglam rilru put hmang a dik phawt chuan pawnlam a fuhlo mawh khawp mai.

Reply
mamboihi January 4, 2011 at 7:00 PM

Vawikhat chu Funeral service ah nula pawnfen tight deuh, mawng lam tepa chhing bawk si ha ka hmu a, a function a zira in chei thiam te pawh hi kan zir a va ngai em te ka ti ve mai mai…

Reply
lawls January 4, 2011 at 10:04 PM

Tunlai chu post thar a vang hhe mai.

Reply

Leave a Comment

Skip to toolbar