Luangliam

July 15

He ni a lo inher chhuah apiangin rilru leh ngaihtuahna-in nunhlui a chhui kir ziah tawh dawn a nih hi. Kum tinin January ni 1 atangin hun bi kan chhiar tan a. Kan dam anih chuan kar lovah he ni hi a lo inher chhuak leh ngei dawn a ni. He ni lo thlen hma hauh atangin kan lo thlir lawk ang a. Thlen inbeisei siin kan huphurh viau dawn a ni.

A lo thlen meuh chuan rilru-in nunhlui thui tak a chhui kir ang a. Pi leh pu, u leh nau kan intuk khawm anih pawhin rilru chhung rila na kan tih vawng vawng chu inhnem tur chuang kan awm kher lovang. Tisa khawvel a chengte’n thlarau khawvel kan suangtuah ang a. Kan suangtuahnate’n engmah min thlen dawn si lo. Hla phuah thiamte hlain min hnem emaw pawh ti ila, kan lunglenna leh khawharna a puang chhuak lek a ni dawn  a ni.

Duh vang renga piang ni lo te hi duh vang reng lo bawkin mual kan liam leh tho si thin a. Hun engemaw chen zin bo, lo haw leh mai turte hi chu inngai bawk mah ila, in hmuh leh ngei beiseina-in rilru kan seng a. Lunglenna leh khawharnate chu kan in tawh leh ni chuan lak bo-in a awm a. Hlim takin kan inhmu-a kan induhna leh lainatnate pawh a pung ta sawt emaw tih mai tur a ni. Kan duhtakte zin bo kan ngaih avanga thinchhe ta riau emaw ngaihtuahna mang ta riau emaw tu kan awm lovang.

Mahse thihna-in mi an then tawh chuan pa chang pawh an nem zo a, pa remhria leh fingte pawhin an remhriatna leh finna an hmang thiam hlei thei lo thin a ni. Thinlung sak ber pawh tih nemin an awm a, an zawr zan mai a ni.

Tlai ni kawlah a liam a, zan khua a lo nguiin khua a lo thim thin. Hei hi leilung dan a ni. Tlai khaw lo ngui hian zan lo thleng tur a hril lawk a. Lunglen nan chhan a tling ngai lo. Zanriah ei a lo hun chuan chhungkaw kimin kan awmkhawm a, kan ei a, kan in a, Normal routine ang maiin hun kan hmang a. Thil danglam lo awm tur kan hre lawk ngai hauh lo. Zanah nise kan leng a, kan mu a,  zing a lo ni a; kan harh a ni thar duhawm tak kan tawng a. Lawm nachang hria leh hre lo kan inpawlh nuk ta ve ang.

Mahse kan kung pui ber an han tliah meuh chuan thil a danglam a. Ral hla tak chhum lei vak kara mi In lo lang ringawt pawhin kim lo kan awm ta tih a tichiang em em a. Mi fate leh mi chhungkaw awmdan kan tur kan suangtuah a, lung a awi thei thin lo. Suangtuahna-in thil chi hrang hrang a dap kual a. Mi thiknate, awhnate, midang vannei ta riau-a va hriatna te a lo piang chawpchilh a. ‘Hei hi chu khawvel dan ve reng a ni’ tih hre rual zet mah ni ila, hriatthiam-a tuar thiam a va har si ve le.

Mi hlimthawm leh nui ri te hi inhau buai leh inngur thawm ai chuan hriat a nuam thin ngai a. Amaherawh chu nui ri leh hlim thawmte hi kan hun tawn a zirin bengchheng a lo chang mai si thin a ni. Thian ngaina leh inkawm hlim duh mi tak tepawhin lusun khawhar ni chuan mahni chauh a awm nuam tih chang an nei fo-in a rin awm. Kan suangtuahna leh rilru kal vel min tawmpui ve lo tute phei chu ninawm leh hnawksak mai an nih chang a awm hial ang. Titi vawrh tur an hriat poh leh thu ninawm an chhak chhuak hnem mai a ni dawn a ni.

Biak In dar ri te hi school dar ri ai chuan a mawi a.  Dar ri rau rau-ah hlimna leh thlamuanna a keng tel bik a ni. Mahse Biak IN dar a rik apianga inkhawm ve tawh lo tur an awm tih hriat tlat chuan Biak In dar ri pawh a mawi thei lova. Mi dang kara tu emaw thu ve tlat tura ngaihna-in rilru a luah chuan kohhran thu puan leh sermon pawhin rilru chhung ril a pawh pha lo. Zing khua a lo var a, Tawngtai Inkhawm dar a lo ri val val a, ni thar duhawm tak lo chhuak tan thuchah ropui a rawn puang thin.

Mahse zing tho tur awm ve ta lo an awm tih hre reng chung chuan dar ri hriat nuam tak a ni thei lo hrim hrim. Harh chiang mang lova zing taka kawngkapui inhawng leh inkhar ri kan hriat fo thin kha hriat tur a awm ta lova. Hriat tur awm leh pawh nise, kawngkapui ngai chiah la ni mahse, thil a danglam tawh a. A danglam hlen vang vang tawh dawn. Khawvela rimawi tum thiam ber berte  fuankhawmin rimawi ropui leh mawi tak rem mahsela, hmana kan kawngkapui zing taka ri rak rak thin leh Chappal hlui tawh lam inhrut ri hraih hraih thin kha a ngaihnawm zawk dawn a ni.

Mahse chu chu tunah chuan kan hre ngai tawh dawn lova. Hriat tumin bei chiam mah ila, sum leh pai leh tha leh zung eng anga nasa pawh, neih bak hial pawh seng mah ila , beidawnna ruam a thuk sauh dawn a ni a. Kan chhungkua-ah thil danglam a awm a, a danglam kumkhua tawh dawn a ni.

Pasalthate leh ramvachal te chuan rampalailengah sa hnu an chhui a. Dawhthei tak leh taima taka an hnu chhui an chhui fuh chuan hlawhtlinna an hmu a. An hahna leh riltamnate chu an sa kah avang chuan chhawkin an awm a. hah hle mahse an hlim a. Trophy ropui tak dawngin in thlen hlan an nghakhlel thin.Hah hle mahse hlim takin an haw thin. Hlawhchham chang nei mahse an thinlungah beiseina lian  tak an la nei tho thin. Keini nufa ho hnu chhui ve chu chhui harsa pakhat mah a awm lova.

Maimit chhing chung pawhin chhui ila, hmuh loh a awm lova.Meng reng chunga chhui ai hian a chiang mah emaw tih tur a ni.. Kan thlen theih chin leh chhui phak chin apiangah hian sulhnu hlui kan hmu a. A kil khawr ber lai pawh chhui thleng ila, eng Trophy mah chawi tur kan hmu ve lovang. Kan beidawnna ti sei tur chauh kan hmu ang a. ‘Chhui loh tur kan chhui a ni’ pawh ti ila, chhui lo thei lo dinhmunah kan ding miau tawh a.

Kan chhui kan chhui ang a, kan chhui thui poh leh kan beidawnna pawh a thui ting mai dawn a ni. Thlanmual thleng pawhin chhui ila, thla la thar tak kan hmu ang a. Chu chuan kan hnu chhui a ti tawp chuang lovang. Chu hmunah ngei chuan rilru tawt tak siin, sawi chhuah tur nei si lovin kan ngawi tlawk tlawk ang a. Hreh tak chung siin chu thlan khawhar chu kan tin san a ngai tho dawn a ni.

(Ka pa hriatreng nan a ziak a ni)

Related posts

Lawmthu sawina

kawlhawk

Mi ramah zawng lunglen a na e

Sangpuiipa

Enge I ngaih ve dan??

sheldon

7 comments

zeus March 2, 2011 at 3:07 PM

*Your Sweet memories lingers in my heart* 🙂

Reply
Zodin_RM March 2, 2011 at 5:10 PM

Ka chhiar mek lai in ka lung a ti leng, ka khua a ti har bawk..
kawngkapui zing taka ri rak rak thin leh Chappal hlui tawh lam inhrut ri hraih hraih thin kha a ngaihnawm zawk dawn a ni. ka khua a ti har ve ringawt

Reply
lushai_er March 2, 2011 at 5:19 PM

“Duh vang renga piang ni lo te hi duh vang reng lo bawkin mual kan liam leh tho si thin a.”
(Y)

Reply
H.Vangchhia March 2, 2011 at 5:30 PM

Ngaihtuahna ati kal thui khawp mai. Hringnun kalphung hi ngaihtuah chian chuan ‘a ho’kan ti dawn nge pawh ka hrelo e; lunglen tir thei ngaihtuahna kan nei lawi si. 🙁

I ziak a chhiar tlak khawp mai (Y)

Colette khan, ” What a wonderful life I’ve had! I only wish I’d realized it sooner,” a tih khan hunin min liam san hmaa lawmna chang hriat pawimawh zia min ti hrechhuak bawk.

“Each thought, each action in the sunlight of awareness, becomes sacred.”

Reply
Zodin_RM March 2, 2011 at 9:11 PM

Ka chhiar nawn leh, ka lung a kuai a ni e. Engtik hun ah emaw chuan kan la in kalsan ngei ang, kalhmasa tur zawk lah kan in hre mang si lova. Nitin hian hmangaihna lantir i la, a va tha dawn em… (Y)

Reply
Kawnga March 2, 2011 at 10:01 PM

Ka zuapa a fam ta, he lei khawharah,
Ka chunnu leh unaute hrilh a hai ngei…

K.Lalchamliana sak, Remkimi Cherputin a rawn sak ve leh kha i duh hle dawn a nih hi..

Reply
tlau March 3, 2011 at 2:14 PM

I ngaihdan chu ka lo suangtuah thin dan nen a va inang ve. Thil awm leh ngai tawh lo tur leh danglam hlen tawh tur hi tun thleng hian a danglam hma ringawt ngaihtuah hian ka rilru ka va hmang tam tak em. May 23 2007a ka NU in min boralsan atang khan he khawvelah hian hlim taka ka awm leh ngai ka la hrelo tun thleng hian. Khawiah pawh awm ila tun hma ang khan nuam tihna tak2 khawi hmun mah ka nei ngai tawh lo. Thihna hi zawng a na ani .Pathian hnenah pawh hian ka vui fo thin. Ka pian atanga kum 24 (ka nu thih hma thleng) chhung te chauh hi he khawvela ka hlim ve ber lai ka ti ve fo thin.

Reply

Leave a Comment