Luangliam

Ram hmangaih thu

Ve tawp mai a.Tunlaiah ram hmangaihtu an tam a, eng ang takin nge an hmangaih tih erawh ka hre lo. Ram hmangaih avangin Mirethei pawlte, Kut hnathawk pawlte, Mipui pawlte an awm ani awm e. Eng ang chiahin nge ram an hmangaih tih chu hunin a la hril ang chu. Kei pawh hmanah khan ram ka hmangaih ve a.

Ka vei ve nasa mai a, ka vei chhuah em em phei chu ka hre lem lo. Khatih hun laia ka hmangaihna kha ka bansan leh bansan loh pawh hi ka hre chuang lo. Ka da deuh tawh pawh a ni mai thei. Ka in hriat dan ai chuan mi min  hmuh  danah a chiang zawk awm e.

Khatih hun lai khan zirlai ka la ni a. Inti zirlai ram hmangaih tak ka ni awm e. Mi hnu khawiah kan lo hmangaih ve pawh a ni mai thei e. A hun lai na na na kha chuan ngaihtuahna pawh seng ka in ti ve khawp mai. Mahse kei aia ram hmangaih hnuhnung pawh an awm ve tho ang. Zirlai ni ve chang chang mahse mahni zirlai bu keu ngai mang lo, ram hmangaih nia inchhala, Pawl hruaitu nih khel vel mai mai te pawh an awm an ti. Mahse Student I.D card chu an nei ve tlat alawm scholarship te pawh an dil ve tho an ti.

An chung thuah kei hian sawi tur ka nei love. Zirlai nih remchang a laa hruaitu nih tum leh popularity khel ho hi ka duh thak lo. “Vawiin nia zirlaite hi nakin a kan ram hruaitu turte in ni” min titu tam tak te khan dawt an sawi lem lo. Mahse kei chu vawinni thleng hian ram hruaitu nih ka la tum chhin lo. Ka “line” lo lam a ni ang e.

Tichuan ram chu ka hmangaih ve em em thin a. Zirlai ram hmangaihtu dik tak, fuih pawrh nuam tak ka ni. Kan hruaitute’n min han fuih pawrh a “…………di” tiin ka au vak a. Mi dang chuan “Go home” an lo ti a. Kan “Go home” ring ta viau a.Kan au tantirhna atanga hla lo te ah hian Truck dum deuh ren run, a number plate-a ZRP tih inziak hi a lo ding vung mai a. Kan “Go home” zel a. Chu Truck dum ren run chhungah pawh chuan a hmei a pa in kan “Go home” ta zel a. Mipa 16 vel leh hmeichhia 20 rual zet chu kan in thiat ther ta fur mai a. Mahni chauh chu ni ila “…..Go home” ka ti ngam lek lovang le. Mahse a hu ho kha chuan kan “Go home” ngam-in kan au ring tak zet a ni.

Chuti taka au ring ngam ta chu,chu motor neitute chuan hmun danga au zelah min duh nge ni min phur liam ta vuah vuah mai a. Kawng bi boh leh pawng deuhah pawh an tlan mar pat mai a.Keini ram hmangaihtute chu min vawk  phurh ta vel mai mai a. Khawchhak vawk ho ang a damdawi pek kan nih loh vang a ni mahna kawi li kawi nga velah pawh chuan kan la harh hru vek mai a. Kan nula ho lah a hu hova Truck hnunga chuang ngai lo na fam chu an nui leh haw thin bawk a.

Mahse min phurtute chuan kan Voice lam control an thiam ngang a niang, truck hnung atang chuan kan “Go home” tam peih ta lo niin ka hria. Kha truck hnungah khan mahni chauhin”….Go home” tiin au dawn ila au ngam lo tur kan tam hian ka ring tlai khawhnu a ni. Mahse, nakin lawka ram hruaitu turte kan nih avang kha a ni teh chek a niang chu a huho khan hrawk phiar tawng tawngin “….Go home” kan ti dual dual a ni. Haw tura kan duh ber lah kha vawiinni thlengin kan la tluk ta chuang lo.Keini aia pawl hniam zawk zawng nise a “Go home” ngei chuan ka ring a. Mahse, haw haw ringawt hi chuan thil a lo ti thei vak lo a ni ang.Kan au hnu fe-ah chauh a ni a haw ni. Executive chair-a thu vir map map tawh chin hi chu auh zam mai mai chi an lo nih loh hi te ka ti ta vel a ni.

Tichuan le, kan lawng chuan …awh…ka tihsual, kan chuanna Truck chuan hmun pakhat min thlenpui a. Chu hmunah chuan Father case te, Mother Case te,Family Case vang te pawh a ni ang; mi engngemaw zat an awm a. Kan hriat ngai pawh an ni lova. Nakin lawka ram hruaitu tur zingah pawh an tel ve lo. Signboard lian takah hian De-addiction      & Rehabilitation Centre ( District Jail an ti bawk ) tih hi a in tar kuau a. Khang hun lai khan ka lo hre thiam lova, tunah ka hrethiam ta.

Ram hmangaihna lam kha kan lo Addicted a, chuvang chuan khalai hmunah khan enkawl kan lo ngai niin ka hria. Motor an din fel hnu chuan keini mipa ho chu min chhuk tir a, min admit ta der mai a. Kawnghren, nawhalh, meizial tih vel zawng zawng chu an Duty Room-ah chuan min hnutchhiah tir a. Admission la fel tawh ho chu chhinchhiah nan kawmawl dum fai fahran lo hi min pe zel a. Helicopter Garrage(?) tiat zet tur a lian kawngkhar chu an hawng a, kawmawl dum nen chuan kan inzui lut ta diah diah a. A hungna bang a sang bawk a,tlang sang deuh lai lo chu a hmuh theih der lohva, keini “Ram hmangaihtute” khaw hawi chu a tawi  nghal raih mai a.

A thawktute chuan in pakhat sipai Barrack ni awm tak hi min kawhhmuh a, “ hei hi in awmna tur  a nia, zan dar 6 ah kalh hnan in ni ang a, zing dar 7 ah hawn a ni ang” an ti a. Kan in zui lut ta hlawm a. Tlai khua a lo ni a,chaw ei a hun ta a.Thleng hlai ang reng tak hian chaw kan dawh a. A lo awm hmasa ho an thu hle a.Induction service min han neih pui chu,in tih thutak a har ngei mai. Stool chunga dingin hming,veng leh tul an tih ang ang min sawi tir a.A then chu an zai tir a. A nuam vak lo.

Riahbuk kan han sual a,hak lai leh kawmawl pakhat kha kan mut bu a ni a. Khum a awm lova,piallei hmun rem kan bel ta zawk.A nuam chiam lo. Khua a lo var a, duh hunah a chhuah theih lohva,kawngka an rawn hawn hun nghah a ngai. Hriat ngai loh ram thleng kan ni bawk a, a zan khatna chu engtin tin emaw kan hmang zo ve mai. Aurinna hian thu an rawn puang a “ Mi pakhat tan-a ei siam dan tur hetiang a ni.Dal-Gram chuti zat,Tel-ml.  chuti zat,Buhfai-Gram chuti zat” ….. tui vak ngaihna hi a awm lo.

Mahse keini ram hmangaihtute chuan tui ti awm takin kan ei tur a ni.Chhun lamah chuan in chhungah  min khungkhawm lo. A ni thumna velah chuan thir kawngkhar lian pui mai a, awng awm chhun atang chuan  pawn lam kan bih sek tawh mai a. W.T-a in bia te lah chuan eng eng emaw hi an sawi a. An “ Over” loh leh an “ Roger” sek leh nghal a.An tih dan kan zir fo avang a ni ngei ang  mawl min tih thu an sawi fo lehnghal a.  Engemaw hnuah phei chuan an insawn daih nghe nghe. Keini  “nakin lawka ram hruaitu tur” nia inngai ho chu “Mawl” tih kan hlawh leh ta a. Kan in tih pawl san tawh teh lul nen kan lo la “mawl”teh chek a ni ang, “in mawl lutuk”min ti fo mai.

Chutiang chuan thil a lo ni chho va. A ni chho zel a,ni sarih chhung chu mahni duh ang a awm thei lovin kan awm a. Vawiin ni thleng hian “A nuam khawp mai” tia sawi tur ka hre lo. Mahse,ram hmangaihna thu hla vanga ni sarih chhung dah hran kha kan ni a. Titi tur erawh a ti tam a,in hre zui tha ta viau pawh kan awm bawk. Khang hunlai leh tun hun kan khaikhin hian ram ka hmangaih dan hi sawi chhuah thiam har ka ti ta a ni. Khanglai kha chuan zirlai hming ka pu ve a, mite chuan “nakin lawka Ram hruaitu tur”nihna min pe a.

Tak tak emaw ka lo ti a,a lo ni hauh lo. Ram hruaitu tur chu Pathianin a ruat mai a ni. Mi zawng zawng a ruat lo, a ti awm mi an awm mai. Tunah tak hi chuan ka huan lo ram leh hmun-te hi ka hmangaih bing ta zawk niin ka hria a. Midang pawh hian kan in hmun leh huan lo ram hi hmangaih ila. Duat taka enkawl in kan mamawh thar chhuak turin sawngbawl theuh ila,ram hmangaih dik tak kan ni zawk ang a te ka ti ta a ni.

A tawp berah chuan Unaute u,zirlai chuan in lehkhazir kha hmangaih ula, kut hnathawktute pawhin in hna kha hmangaih ula,kamdingte pawhin rinawm takin thawk ula. Eirukna leh hlemhletna erawh ti lo tlang ngam mai ang u. Tichuan, ram hmangaihtu dik tak kan ni zawk ang.

Related posts

Rev Dr HS Luaia’n Rihsang Min Lo Kaisan A Lawm Le!

Ignatia (33-115 AD)

Ka á¹­ap á¹­hin

TuaiSialA

“Ânu, i thi dawn ami?”

TuaiSialA

12 comments

muantea March 7, 2011 at 9:40 AM

A nih hi

Zodin_RM March 7, 2011 at 10:32 AM

Mahni chauh chu ni ila “…..Go home” ka ti ngam lek lovang le. Mahse a hu ho kha chuan kan “Go home” ngam-in kan au ring tak zet a ni... a va dik em, mahni chauha ram hmangaih ngam hi engzat tak awm ang maw? Mizo 2/3 kan awm tawh hian chuan khawi ah pawh hian kan pawr viau thei zel mai, maltlat ngam erawh kan tam lemlo.
A tha hle mai a i thu ziah chu.

mawianu March 7, 2011 at 11:19 AM

Ka zin haw ni takin man inni anih chu. Ahnuah ‘haw rawh se’ ka tive nasa ‘chhuah rawh se’ pawh kan tiin ka hria. Tunah chuan kei pawn ka fate ram hmangaih em em tura enkawl hi ka ram hmangaih tih lanna ani tawh(kan pa ahna tha taka thawk tura tanpui nen).

hmingtea March 7, 2011 at 11:25 AM

Ram han hmangaih hhi chu a huho chuan nuam tak ani.
Fuihpawrh lah hi kan nuam hlom ropui si a.
A sir a mi lo fuihpawrhtu te khan a hlawkna an tel tentun leh lawisi thin hi a nih hi maw le. (Y)

Sony March 7, 2011 at 11:28 AM

In chhiar vek hman loh chuan para hnung ber khi chhiar ula, a sawi tum in chiang mai ang. Mahni hna, a hniam emaw, a sang emaw, seious taka thawk hi ram hmangaihtu dik tak an lo ni. Ram hmangaih inti in hlawh sang lutuk an ngiat lovang a, contract rin hlelhawm takin an thawk lovang a, office an tlai lovang.

ReMpY_ScisSoR March 7, 2011 at 12:09 PM

A sei deuh leh a ngaihnom tihna a ni thrn.. 😉 misual.com a thu post sei deuh soisel hi kn ching tlat..keimah tel in. Thuziak thra tak tur chu a toi thei thrin lo a, te ti duah ila, kn ciar ag e auh.

ReMpY_ScisSoR March 7, 2011 at 12:28 PM

Hmmm…satirical.. :-S
Last 2 paras cu a thra bab bab khop mai.. 🙂
mahse zirlai ram vei ho kha ram kalphung khalh ngiltu zingah hmun poimoh tak an chelh ve tho alom…i soi ang khian zirlaite aw cu a effective em2 lo poh a ni mai thei ( keicuan effective k ti tho), mahse mahni thil chauh an vei a, ngoih an chuh tlat chuan a thra lam aiin thralo lamah a result zok ang..

kawlnicolney March 7, 2011 at 12:32 PM

zirlai pawl hrim hrimah hian ka la in hmang lo mahse ka thlawp tlat,an dik loh na a awm te anih loh chuan.An pawimawh hle ve a niang khawvelah awm loh na ram sawi tur ka la hre mang der lo,kei ka sawi ve duh chu zirlai te u in zirlai kha hmangaih ula in ram leh hnam pawh hmangaih ula,thil dik lo/thalo te chu au chhuah puiin do zel rawh u,in dikna lai leh in chanvo humhalh tlatin bei zel rawh u

chawnghilh March 7, 2011 at 12:41 PM

RUM pawh a hmangaih theih! (L)

PimPom March 7, 2011 at 2:58 PM

A huho leh mipui zingah chuan Ram hmangaih hi chu a awlsam. Mahse, hmangaihna tihlan hun hi mahni chauh a hnathawhna hmunahte hian a ni thin si a. Mahni a ram hmangaih thei hi kan Politician zingah hian an awmlo. Nilo, an tlem viau ang a ka hre lo te pawh a ni mahna.

H.Vangchhia March 7, 2011 at 5:21 PM

Ram i hmangaih nge fuihpawrh i nuam a, thiante kiangah i pawr?

zualbonez March 7, 2011 at 5:25 PM

a sei emai ka chhiar paih/hman lo …..# 11 hi ring ve tawp mai ang auh

Leave a Comment