Luangliam

Nû

(He thu hi tu chanchin emaw behchhana ziah a ni lo va, kan Zorama sualna lo pung zel leh thenkhat ten thalai chhawr tlak loh an pung chak an tih chhan hi engnge tih ngaihtuah chunga Nû mawhphurhna tarlanna atana ziah a ni e)

Nû, he thumal tawite hi a pawimawhna leh mawhphurhna a ken tel hi i chhût ve ngai em le? Nû, i zarah khawvel êng ka hmu a, I hnutetuiin min chawm seilian a. Ka tan tiin a thim a var thlu lovin theihtawp i chhuah thin anih kha. Hun a liam zel a, tunah chuan puitling ka lo ni ve ta.

Mahse mi puitlingin an tihtur ang leh mawhphurhna hlenchhuah tur ang chi ka kova a tlak ve chiah hian engvanginnge a hlenchhuak thei lo tu ka nih bik ziah mai le? A chhanna chu keimah vang a ni. Mahse, ngun takin ngaihtuah ve teh, a bul ber chu nangmah i ni asin.

Nû, khawvelah hian nang lo chu nû dang ka nei lo va, chuvang chuan ka haw ngai lo vang che. Mahse, ka thinlung chhûngril hian a dem che asin. Nû tih thumal tawite hian ka damchhûng huna ka kal zêlna tur leh ka lo seilen chhoh zêlna-ah hian mawhphurhna sâng ber a chang asin.

Tûn hun, ka lo puitlin tâk hnua khawtlangin an sawi huai huai khawpa hnawksak leh ruihhlo bâwiha ka tàn chhanah hian kei chuan kan thenawm nu emaw, ka thiante chhûngte leh midang mawhpuh tur ka nei lo. Ka mawhpuh theih awmchhun chu nangmah i ni.

 Nû, mi tam tak leh nangmah ngei pawhin, i nun a ni a, nangmah i pawimawh ber; i duhthlanna vanga tun dinhmun thleng hi i ni min ti mai thei, a dik tho ve. Mahse (ka’n ti leh hram teh ang), nausên mai ka nih lâia chhia leh tha pawh thliar thiam lo, rilru thianghlim tak ka put lâi atang tawh khan duhthlanna dik ka hman theihna tura kaihhruaina tha ka dawng em le?

Mithiam ten naupangte hian kum 6 an tlin hian an puitlin huna an mizia tur ang zatve aia tam an pu tawh an tih thin hi thudik anih chuan naupang chumchiap mai ka la nih lâi, i duh ang anga min kawih her theih hun lâia i mi kaihhruai dan khan ka tun hun hi a herchhuahpui a ni zawk lo’ng maw?

Ka thinlungin a zawn lam chu ka pan mai a, ka tân a that leh that loh ka la hrethiam lo. Chutah tak chuan ka kawngzawh tur min kawhhmuh turin hmuh tur i awm ngai lo va, naupang mai a la ni a, nakinah a lungfin deuh hunah a hrethiam ve mai ang i tih lai mêkin tun hun hi ka thleng ta asin.

 Nû, he khawvel êng hmachhawn tura ka lo pianchhuah ve khan nausen i pawm a, ka ril a tamin eitur min pe a; ka mut a chhuahin min awimû a, mahse duat taka min enkawl lai khan ka hringnun kawng zawh tur min sialsak tih erawh i hre si lo!

 Nû, hetiang dinhmun duhawm lo taka ka din chhan hi engnge ni? A chhan bulpui ber, a mawhphurtu chu nangmah ka nû ngei hi i ni; tumah mawhpuh tur dang i zawng thei lo vang. Duatna leh Hmangaihna i thliarhran thiam loh vang a ni ti ila nâ i ti mai thei, mahse ka nu i ni miau va, i nihna i pawm ngamin mawhphurhna chu i kovah i nghat ngam ve dawn lo‘m ni?

 Nû, nang chu mifing i ni a, khawtlâng leh Kohhran lamah pawh an hawlh lar pawl i ni kha chu ka chhuâng thin khawp mai che. Mahse, chhungkaw nû ber i ni a, inchhungkhura i mawhphurhna pawh a sâng asin. Khawtlang tâna thu tha tak tak i sawi leh Kohhran ho hmâa hlim hmêl pu chunga Pathian thu i sawi zawh apianga inchhûngkhura I ànhlá-in a zui ziah erawh kha chu ka dem lo thei lo che. Khatiang boruak hnuaia seilian hnenah hian thil tha beisei tur a awm thei dawn em ni?

 Nû, naupang dangte ang bawkin ka lo thanglian ve zel a. Kan seilenna hmun inang reng si ah hian hun a ral zel a, kan dinhmun inthlauh tak zia hi i chhût ve ngai em le? I dinhmun atang ngei pawh khan han chhûtlet ve teh. Nangmah ang tho a rila rah fanau enkawltu, nû dangte an fate vanga hlim leh lawma an nuih mêk lai hian engvangin nge i tah bik? Tunah i fa, keimah ngei hian ka tih tah hma che a min lo vel hmasa lo kha a pawizia i hrechhuak ve tawh em le?

 Nû, ka’n sawi nawn leh teh ang, Duatna leh Hmangaihna i thliarhrang thiam lo kha a pawi ber chu a ni. Ka nunah thil dik lo, nakin zêl atana pawi tur eng emaw i hmu a, min duat em avangin min vaw phal lo va, chu chu hmangaihna emaw i ti tlat thin kha a pawi asin. Tûn hnu, thil ka chhût ve thiam tak chinah hian huatna vang ni lo, hmangaihna vanga an fa, an duat em emte vaw thinte khan inchhir hmel an pu ngai lo tih hi ka hmu thiam asin.

 Nû, miin ka dik lohna leh ka that lohna i bula an sawi te khan nuam ka ti thin ngawt mai. Fel taka thlahin lungawi takin i kal liam tir thei zêl a. An kal liam chiah maw tihin an fate that bik loh zia leh engmah an nih bik loh thu min han fah chhunzawm zat bawk a.

Midang bulah lah a tha ber leh fel ber ni awm fahranin ka nihna bak bakin min fak a, khatih hunlai kha chuan nuam ka ti thin asin aw! Midang bula i sawi tak fo si ah chuan a tak tak emaw ka tih chhunzawm a, kan nihna ai sâng daiha inhmu chunga khawlai len kha chu ava nuam em! Mahse, tunah zet chuan nuam kan tih apiang hi kan tan a lo tha vek kher lo a ni tih hi ka tawnhriat atang hian sawi ve ngam tawh tur niin ka inhria.

 Nû, keimah vangin i tap maw? Engatinge keimah vanga I tah hma khan min lo velh mai loh le? Tûna i tah chhan hi nangmah vàng a ni tih hi ka sawinawn leh duh! Ka naupan lâia i Bible châng chhiar thin kha ka la hre reng asin-

 “Naupang chu a kalna âwm kawngah chuan zirtir ula,A puitlin hun pawhin a thlah lo vang.” (Thufingte 22:6)

 “Naupang thunun tim suh, Tiangin vaw mah la, a thi dâwn si lo va.

 Tiangin I vua ang a,Tichuan Seol ata a nunna I chhanchhuak ang.” (Thufingte 23;13,14)

Related posts

Tleitiri

ltachhakchhuak

Nguri

Pc-a

“Ânu, i thi dawn ami?”

TuaiSialA

25 comments

sisen July 19, 2011 at 8:02 AM

Nu pawimawhna hi sawi tur ava tam em!

chhangteval July 19, 2011 at 8:08 AM

Ka chung ami khian a chhiar hman ami :-O

Nu aia hlu an awm bik lovang..

kilung July 19, 2011 at 8:12 AM

Nu hi an lo va hlu em!!! (Y) (Y)

Mawia Pachuau July 19, 2011 at 8:12 AM

Tha khawp mai. (Y)

superpinqponq July 19, 2011 at 8:38 AM

Nu te hi zawng an lo pawimawh ani! ni e ‘NU’ fa enkawl thiam leh thiamlo kar hi a lo va hla tak em! Naupang future chu Nu in a a enkawl dan in thui tak a hril thin si a..

awmawmpuia July 19, 2011 at 8:51 AM

Fa te laka Nu mawhphurhna hre miahlo, nilenga fa te awmna hre lova ngaihthatloh nachang pawh hrelo nu hi ka hre nual mai. (N)

saint sammoo July 19, 2011 at 8:56 AM

kapa hriat hlau tak chunga pawisa min pek thin kha, ka hmanna tur i hre vek si a. kanu, min lo va hmangaih lo em.! Mahse, nu.. ka van ngaidam chiang tak che em… Nu, ka hmangaih che… ka van ngai tak che em..

pa-para July 19, 2011 at 10:37 AM

Nu atan duh ka thlang thei lo, ka fate nu tur erawh duh ka thlang thei. Fimkhur a va ngai em hringnun hi.

Chhuaklinga July 19, 2011 at 10:45 AM

Nia, khita i sawi khi chu ka nu a nilo chiang, keichu a duh dan a ka awm loh chuan ka nu chuan min vaw er zawk zawk zel, tunah pawh hian a thin ka tih rim vaih chuan min la tuk chawrh zel mawle, ka nu, ka nu duhtak chuan.

Dr Mahminga Sailo July 19, 2011 at 10:56 AM

I thuhma leh i thuziak a inmil hle mai. Post tha a ni e.(Y) (Y)
Ka NU (Fam) erawh chuan, aw dam takin min enkawl a; a mitmei leh tawngka hian min thunun hneh em em. Ka hriat chinah ka nu khan kut min thlak ka hre miah lo!! Ka NU ka va ngai thin che emmm… ;-(

chawnghilh July 19, 2011 at 11:10 AM

Nû tih hian thingpui, tuihawk lam sawina turah ka lo ngai thlarawk a, NU (Mother) lo ni rengin! Nu tel lova piang kan awm emaw chu le? An pawimawh tawk, faktlak NU erawh chu an awm phauh phauh.

lushai_er July 19, 2011 at 11:53 AM

@KK : Nu i ti duai duai mai anih khi maw le! I ko tho si a, ‘Ka nu’ tih hi a mawi zawk lo maw….te kan ti ve mai mai NOI (W)

maddafizzuker July 19, 2011 at 1:55 PM

Ni e nu mawhphurhna hi tunlai khawvelah chuan a sang tawh khawp mai..fa ten a an duh an ngen apiag leisak zel mai te hi hmangaina emaw kan ti a, ”hmangaih e” in lo ti ani thei e..,mahse kha mi piah lamah khan engthil nge an tih tih kan va chhut pui leh si lo…thalai lam zawk hi kan than han a hun tawh takzet ani,.

CFL July 19, 2011 at 2:01 PM

Post tha tak ah hian comment a va tlemve maw le.
Nu leh patena min lo hmangaihzia hi chu kan lian tawlh tawlh anga, kan la hre chho zel dawn ani tak sia le. Nu pawimawhzia hrechiangtu D.L. Moody chuan,” Kanu ang hi khawvela nu zawng zawng hi ni tase,Tan in hi a awm a tul lovang” a tih kha. A nu ngaihsanawmzia hi chu aw….. (Y)

jesuslovesme July 19, 2011 at 2:25 PM

Va post tha ve. Hetiang ang nu hi Aizawl ah hian a majority an ni tlat.

An fate diklohna hmu duh miah lo. Tan tlat, ‘ka fa in chutiang a ti ngai lo’ ti tlat te hi an awm. An fate dik lohna kha an mawng hlimna ani tih an hmu thiam ve ting si a, siam that tum aiin, thup bo lamah an tang a. An fa te enkawl tha peih si lo kha, sawi sel sak ngam pawh ani ni hlei nem.

Tunlai hian kan ngaihtuahawm lehzual. Inru a nu leh pa ni ngawt, engtinnge ka fa te ka enkawl anga, an laka ka mawhphurhna hi engtia tih hlawhtlin chi nge tih pawh ngaihtuah eih lo, (kan duhthawh deuh te’ng :-O ) a siam a nawm avanga fa nei ta mai an va tam suau suau tak em.

An nu leh pa te,( zei lo ve bawk te kha) enkawl sak turin fa an han pai / an han rai ve pawp pawp mai a.

Nu tam tak chu, an fa te ‘cute’ taka cheia, lenchhuah pui larh larh tur bak fate tangkaina hre lo ni awm tak hi an tam mai.

An fanu kum 3 – 7 rual lek te nawhchizuar ni awm a mawiin an chei parh a, an mamawhna leh inpekna a lo hunah mahni nu leh pa te chungah an innghat thui hle si… a thu dawn tlat. In short 😉 😉 😉

jesuslovesme July 19, 2011 at 2:27 PM

Va post tha ve. Hetiang ang nu hi Aizawl ah hian a majority an ni tlat.

An fate diklohna hmu duh miah lo. Tan tlat, ‘ka fa in chutiang a ti ngai lo’ ti tlat te hi an awm. An fate dik lohna kha an mawng hlimna ani tih an hmu thiam ve ting si a, siam that tum aiin, thup bo lamah an tang a. An fa te enkawl tha peih si lo kha, sawi sel sak ngam pawh ani ni hlei nem.

Tunlai hian kan ngaihtuahawm lehzual. Inru a nu leh pa ni ngawt, engtinnge ka fa te ka enkawl anga, an laka ka mawhphurhna hi engtia tih hlawhtlin chi nge tih pawh ngaihtuah eih lo, (kan duhthawh deuh te’ng :-O ) a siam a nawm avanga fa nei ta mai an va tam suau suau tak em.

An nu leh pa te,( zei lo ve bawk te kha) enkawl turin an fa an nei/ han rai ve pawp mai a.

Nu tam tak chu, an fa te ‘cute’ taka cheia, lenchhuah pui larh larh tur bak fate tangkaina hre lo ni awm tak hi an tam mai.

An fanu kum 3 – 7 rual lek te nawhchizuar ni awm a mawiin an chei parh a, an mamawhna leh inpekna a lo hunah mahni nu leh pa te chungah an innghat thui hle si … a thui dawn tlat(luangliam). In short 😉 😉 😉

jesuslovesme July 19, 2011 at 2:30 PM

Ah khi chu. ka edit a, a double kauh.

PKfanai July 19, 2011 at 2:31 PM

“Nu te zah leh hmangaih a, ngaihsak thiam takte hi, Pasal atan an tha”, an ti thin. # “Pa ber corruption chung changah pawh hian, Nu hian kawngro an su khawp mai” an ti bawk. #Fate nungchangah lek phei chuan…

Keimah Mimawl July 19, 2011 at 3:26 PM

In comment zawng zawng hi uluk takin ka chhiar chhuak vek a. In zavaia hnenah lawmthu ka sawi e. Thuziak mi ka ni lo va, amaherawhchu ka rilru-ah tunlai chu a khahliam em avangin ka’n chhawpchhuak ve phawng a ni a. Thurawn min pek zawng zawngte pawh ka lo hre reng dawn nia. (Y)

Terema Chhakchhuak July 20, 2011 at 12:19 AM

“Nû, keimah vangin i tap maw? Engatinge keimah vanga I tah hma khan min lo velh mai loh le?” heti lai sentence hian thu tam a va han hril tak em! A nalha a tha bawk.
Tunlaiah nu tha an pawimawh tawh a, fate sualna pawh thup tang tang ho hi chuan an fate sual an thup emaw an tih lai hian fate sual an puang chiang zawk a ni ber awm e. Suahsualna leh ruihhlo a pun telh telh reng avang hian nute hi an pawimawh chho telh telh reng mai dawn a ni. Kawikawm tha leh tha lo deuh chu a rah atangin kan hre chho zel mai dawn a ni. Nawhalh bawk khat alh chu a chhemmih theih mai a, mahse chappui hal nana hman a nih tawh chuan a chhemmih theih tawh thin loh; chutiang chiah chuan fate sualna pawh hi an naupan lai atanga an nu ten an pasalte laka zep an chin chuan siamthat theih tawh loh hun a awm nge nge thin.
Post tha tak a ni e, hmeichhe tan phei chuan save hmak chi a nih dawn hi.. (Y)

sisen July 20, 2011 at 12:22 AM

Post tupa, i ziak thiam, i ziak tha, ziak zel rawh

Keimah Mimawl July 20, 2011 at 2:04 AM

Thian pa, terema leh sisen-a te, in ti lawmawm e. Ni e, min bawl fuh deuh chuan ka at ka so ang a, ka rawn inphawrh zel ang 😀

spa jongte July 20, 2011 at 2:55 AM

Nu mawhphurh na lo pawimawh zia hi chu aw..chu tih lai in pa ai in nu in a fa a hmangaih zawk bawk.. (W)

levodopa July 21, 2011 at 9:23 PM

a tha hle mai, ka sawi leh pek ang a rilin a ngawihnawm (Y)

Keimah Mimawl July 21, 2011 at 11:17 PM

In zavaia chungah ka lawm e.:-D (Y)

Leave a Comment