Opinion Religion

Hriatloh Pathian

Khawvela kan mamawh chi hrang hrangte neih tumin theihtawp chhuahin kan bei a. Intlansiakna khawvel, a tlan chak apiang an dinchanna hmun a ni. Khawvel thil taka intlansiakna kan beih lai leh kan khawvel mamawhte neih tuma kan hun leh nun tam zawk kan hman lai mek hian kan thinlungah zawhna a lo lut fova. Chu zawhna lo lut thin, mitin thinlunga mathei lova rawn inlar thina chu – Nun awmzia leh damchhan hi a ni a. He zawhna chhan tum hian mihring hian sakhuana a bel thin. Zawhna chhan har tak tak ‘Hringnun awmzia hi engnge ni le?’ ‘Eng hi nge kan damchhan?’ ‘Thihna hi tawphlenna a ni em?’ ‘Engvangin nge mifelte hian harsatna leh tawrhna te an hmachhawn fo si?’ tihte hi kan inzawt bang hleithei lo thin a nih hi.

Mi tam tak chuan kan rinhlelhna te hi kan thup hram hram a. Rinna nghet nunpuitu niawm fahranin kan nitin nun kan hmang a. Kan rinna hriatchian tuma zawhna min zawttute hnenah lah kan rinna awmzia kan hrilhfiah leh thei ngai si lo. Thomas Jefferson, America ram danpui duangtute zinga pawimawh pawl ber mai chuan, “ Pathian awm leh awm loh thleng pawh hian zawhna hi kan zawt ngam tur a ni. A lo awm a nih phawt chuan pawi a ti lo reng reng ang. Hlauhna avanga hrechiang mang lova ring ve ringawttu ai chuan, rinna nghet neih tuma rinhlelhna nena amah zawngtu chu atan pawh a hlu zawk daih ang” a lo ti a.

Sakhuana chungchangah hian thlirna chi li a awm a. Chungte chu :
Theism : Lei leh van zawng zawngte hi chatuan Pathian, engkimtithei, engkimhria leh hmangaihna-a khat Pathianin a siam a ni tih ringtute an ni. Juda sakhua te, Kristian sakhua leh Islam te hi heng Theist kan tih zinga mi te hi an ni.

Pantheism : Pathian chu engkimah hian a awm a. Engkim mai hi Pathian peng pakhat a ni a, chumi inghahna chu thlarau lam thil a ni a; kan nitin nundan leh he khawvel awmphung hrim hrim hi hlimthla ang maia ral mai tur a ni tih rinna a ni a. Hinduism, Taoism leh Buddhism te hi he rinna vuantute hi an ni leh a.

Atheism : Thlarau lam thil reng reng a awm ring hauh lotute an ni a. Pathian awm ringlomi kan tihte hi an ni.

Agnosticism : Pathian awm leh awm loh chungchanga rindan mumal nei lo. ‘A awm e’ emaw ‘ A awm lo ve’ emaw pawh ti lem lo. Hang si lo, al bawk si lo te hi an ni.

Pathian awmphung chu : Pathian nihphung niawma kan rinna te sawi chiam hi, tihsual palh hlauhawm tak a ni a. Tihsual loh har tak tur pawh a ni bawk. A chhan chu, a awmphung leh zia kan hrechiang meuh si lo atin a ni. Heti zawng hian i han thlir dawn teh reng ang –

Anthromorphism : Hei hi Pathian chu mihring pianzia leh landan ang emaw, nihphung ang nei ve tura ngaihna hi a ni a. Hei hi Kristiante tihchhuah a ni lem lova, hmasanga Greek mite chuan an Pathiante chu mihring ang tak, mahse, mihring aia chak leh thiltithei zawk angah an lo ngai a. Pianzia-ah erawh mihring ang turah an ngai. He rinna hi Kristiante pawh hian kan kalpui chho ta zel niin a lang bawk. Philosopher Xenophanes (580-478 BC) chuan, ‘Ui te hian mihring suangtuahna ang hi nei ve theiin, Pathian a awm te hi ring ve ta sela..an Pathian chu, Ui lian tak leh thiltithei tak angin an suangtuah ka ring’ tiin a lo sawi a. Hei vang hian Atheist kan tih tam takte chuan, ‘Pathian hian mihringte hi amah angin a siam ni lovin, mihringte hian Pathian hi keimahni angin kan siam mai mai zawk a ni’ an lo tih phah hial reng a ni.

Michelangelo meuh pawn Pathian chu Patar tawh lampang hmuihmul var veu vo nei angin lo ziak mah sela, ‘Pathian lem a ni e’ tiin thutak khukin kan khukpui tak tak duh lem lova. Kristian rinna vuantu tam zawkte chuan Pathian chu ‘Pa’ a ni e tiin he khawvela ‘pa leh fa’ inlaichinna ang hi Pathian leh mihring inlaichinna chu niawmin an sawi thin a. Hei vang hian lemziak hrang hrangah pawh Pathian chu ‘Pa’ anga tarlan a ni fo thin. Mahse, a ni tak tak em? tih hi zawhna awm thei tak a ni. Kan rinna leh rindan engkim mai deuh thaw hi ‘entirna-ah’ hian a innghat lian em em mai a. Pathian awmphung hriatthiam hi thil harsa tak mai a ni ta a ni.

Philosopher-te Pathian chu: Heti a lo nih avang leh Pathian awmzia leh awmphung chu hriatthiam a har em avang hian Philosopher-te chuan Pathian chu nihna chi hrang hrang pe-in hrilhfiah an han tum leh ta a, Engkimtithei (Omnipotent), Engkimhria(omniscient), Hmangaihna-a khat (omniamorous), chatuana danglam ve ngai lo, lei leh van siamtu tiin. Hetia han tih hian mi tam zawkin ‘Pathian’ an tih chu heng nihna chi hrang hrang kan pekte hian a hrlhfiah tha hlein a lang a. Mahse, a hrilhfiah ngut emaw chu le? Bihchian a dawl ngut emaw chu le

Pathian hian engkim a ti thei em? : Kan sawi ber tura chu ‘engkimtithei’ tih tawngkam hi a ni. Engkimtithei ni ta chiah sela, he zawhna ‘ Pathian hian mihring amah aia thiltithei zawk, a thunun zawh loh tur a siam thei angem?’ tih hi han inzawt chin ta ila. Siam thei ta se…a thunun zawh loh rual chuan ‘omnipotent’ a nihna chu a hloh dawn tihna a ni anga. Siam thei lo se, engkim a ti thei lo tihna a ni bawk ang. Hei hian, Engkimtithei ni tura dah ringawt hi amah leh amah a inhnialkalh sa hrim hrim mai a ni tih a tarlang ta a ni.

Pathian hi a ‘famkim’ em? : Heta famkim tih tawngkam pawh hi bihchian chuan hriatthiam hleihtheih a ni leh meuh lova. Mihring chanchin ziakna kan chhuilet chuan mihring nun leh khawvela Pathian a inrawlhdan chi hrang hrang kan hmu a (Thuthlung Hlui te chhiar ila). Famkim awmzia chu tlangchhipa din ang mai a ni dawn a, chuta i din tawha i famkim tawh hnu chuan kal leh chuanna tur a awm tawh lova, i chet hlek pawhin tlangchhip atanga chhuk leh a nih ngawt loh chuan, chet lak dan tur dang reng reng a awm lo a ni tiraw? Mihring chanchin ziakna kan en vang vang hian Pathian famkim ni-a kan dah hi tlang chhip atang hian a chhuk zing em em mai a. A chhuk apiang hian a famkim lo a ni tih entirna a ni thei em le?

Hmangaihna-a khat Pathian? : Hemi chungchang hi hriatthiam har em em mai thil a ni leh a. Thil pahnih han ngaihtuah ta ila ‘Pathian chu hmangaihna-a khat a ni a, kan tawrh a phal lo a ni’ tih leh ‘Pathian chu engkimtithei a nih avangin kan tawrhnate a lakiang thei a ni’ tih rinna te hi. Heti hi a nih si chuan engvanga khawvelah hian tawrhna hi tam em em mai si nge a nih le?

Duhthlanna pek kan ni meuh em? : Pathian chu engkimhria (omniscient) angin kan ngai a. Chumi awmzia chu kan tunhma nun zawng zawng a hria a, kan nun leh zel dan tur pawh a hria tihna a ni. Duhthlanna min pe tiin kan sawi fova, duhthlanna min pe tak takin, kan chetdan tur leh khawsak dan tur hi hre lo ta se…engkim hria a ni lo tihna a ni dawn a. Kan chetdan tur zawng zawng leh kan hmalam hun a hre vek a nih si chuan, keini mihringte hi chu Pathianin drama ropui tak a ziahah chuan,a changtute lek kan ni a, hremhmun leh vanram kal tur chu a duanglawk vek tawh tihna a ni anga. ‘Duhthlanna min pe’ kan tih ve chamchi te hi..min lo pe hauh lo tihna a ni dawn a ni.

Sakhuana chungchangah leh rinna chungchangah hian ‘language’ hian kawngro a su em em a. Pathian nihna ni-a kan hriat tawngkama kan dahchhuah tam takte hi hetia kan han chhuikual atang hian mahni leh mahni inkalh tak tak an ni tih a lang chiang ta em em a. Hei hian kan ngaihtuahna pawh a tibuai thei hial a. Amaherawhchu, thil pakhat pawm mai harsa lem lo leh ringtu tana pawm ngei ngei ngai zawka chu Pathian nihna leh Pathian awmphung te hi mihring hriatna hian a chhui phak lova, kan tawngkam bungrua neih ve te hian a hrilhfiah famkim zo lo a ni tih hi a ni. Hei vang hian a ni, Sakhuana-a miril, Pathiana rinna nghet neite chuan ‘mihring tawnga hrilhfiah leh hriatfiah phak a ni lo ve’ ti chunga fianrialah te kala ngawirenga Pathian pawlna hun an lo neih thin ni.
(Lehkhabu rawn ka nei lem lova. Ka thil chhiar tawhte atanga tukina ka rilru-a lo lang ka han share mai mai a ni e.Chhiar peih kan awmdan azirin sawi chhunzawmah khek ta ila – James F)

Related posts

ZORAM POLITICS- Congress leh MNF insiamthat lehzual nana ka beiseite.

Chemtatrawta

Mizo tawng kan hman dan hi..

Ku Muanga

Tuikuk politics a khamawm ta

Xonas

20 comments

chemtatrawta September 27, 2011 at 3:17 PM

chhiar zawhah..in comments ka lo en ang.

Silver Oak September 27, 2011 at 3:28 PM

Ava tha awm he article chu (Y) ve chhiar ang.

pinkstarz September 27, 2011 at 3:35 PM

Pathian hian kan tawrh chu a phal teh meuh mai, amaherawhchu kan tawrh zawh loh khawp hi kan chungah harsatna a thlen ngai lo,..harsatna kan chungah a thlen tir rual2 in a tlanchhuahna/talchhuahna kawng min hawnsak nghal thrin….

Jacka Pi September 27, 2011 at 3:52 PM

Zawhna zawng zawng chhanna – we live in a fallen world and nothing is as it should be (H)

bulaya September 27, 2011 at 4:15 PM

I va hrut kimchang deuh ve. (Y)
Kan lo belh ve hlek aw…

Deism: Engkim dintu Pathian a awm. Mahse a thilsiamte ah a inhnamhnawih lem lo…eg. Thomas Jefferson-a te rin ang chi (ka hriatsual loh chuan)

Aristotle-a ‘Being’ pawh kha, Aquinas-a “The Unmoved Mover” te nen a inang leh miah lo bawk.

The God of Spinoza leh The God of Eisenstein tihte pawh hian in anlohna tam tak an la neih a rinawm. 😉

The God of the Old Testament hi engemaw chang chuan a ‘den’ fia fia reuh. (ka ngaihdan mai mai) 😛

Engpawh chu ni se Pathian pakhat a awm tur a ni. Khawvel mi chi hrang hrang te hian kan nunze milin “Essence” hran hran kan neih tir a ang hle. Heng Abrahamic Religions pathum – Judaism, Christianity, Islam – te pawh hian kan Pathian Nihna in ang lo thiauvin an lantir.

A tawp berah…

Pathian hian a duh ang takin mihringte a siam nge,Mihringte hian kan duh ang takin Pathian kan siam zawk?

CFL September 27, 2011 at 4:37 PM

@ Khawvel mihringten chunglam mathematics lo chawh dik ve phet tum hi thil tul ber a ni lem love. (I)

@ ” Mihring mihrinna hian a ngaihtuah chhuak zo lova che,
Ka chhandamtu i thuruk hi” – R.L.Kamlala

rohlupuia chalrang September 27, 2011 at 5:03 PM

A thupui hian asawifiah chiang ber anih khi….

muansakhi September 27, 2011 at 5:19 PM

He post chu a ‘Cool’ hle mai. Chuan atheist ho hi engngemaw vang a an tense viau tum chuan a tlangpuiin ‘tuemaw’ hnenah tihtakzetin an ‘tawngtai’ ve tho thin zu tia!!!

PKfanai September 27, 2011 at 5:20 PM

Pathian awm ring lo hnen a Pathian a awm ngei zia tlar 4/5 vel lek a hrilhfiah tum hi chu a hahthlak lam deuh a ni. Rinna a hriat fiah chi a nia, a hmufiah tawh te chuan kan nun kan thap ngam hle mai bawk si a. “Hei heta hi” han tih ngawt chi lah ni bawk si lo. Bible hi Pathian thawkkhum a ziak a nih ka ring bur a, Pathian ka hriat dan pawh hi bible a inziak ang ang hi sawi pherh kual lovin ka pawm chawr mai a ni. Thil lothleng tur a sawi lawk zawng zawng a thleng dik vek a, khawvel tawp thleng tur, Setana meidila paìh hun tur leh Ringtu leh Ringlotute chatuan chatuana kan inthen hlen fel hmak hun tur thleng a sawi lawk tlang raih mai si a. Engtinnge mite hian an rinhlelh theih zawk? Tih hi ka hrethiam pha lo letling zawk. I conclusion a tha e.

LR_rengsi September 27, 2011 at 5:29 PM

A bengvarthlak hle mai..

Khawngaihna in min chhandam a…keinin rinna in kan zui a.
“Pathian atna chu mihring aiin a fing zawk a, Pathian chak lohna pawh chu mihring aiin a chak zawk bawk si a.” 1Korinth 1:25

Alanism theory September 27, 2011 at 6:50 PM

Khawvel hi eng niah emaw chuan ka la chhuahsan ve ang a,ka beisei ber chu Pathian hnen thlen a ni.Heti hian ka ngaihtuah thin khawvel a kan thiltum ai chuan Pathian hnena thlen tum chu a pawimawh fe zawk tih hi.Mahse,hmelmapa hian Pathian hnen ka thlen lohna turin thang tam tak a kam si.Fimkhur a va ngai em! Ringtu ten kan tum ber kan thelh loh nan damchhung chiah hun kan nei,chu chu a rei si lo.A hnen kan thlen hunah chuan Amah chu kan hre tawh ang.

Atom c September 27, 2011 at 9:17 PM

@Coolsoul-a thil ziak hi chu(h) bible thu ren runlo mahse a psychic tlat zel. A mah hrim hrim hi pa thau tak leh sa tha nelh nawlh chu a nilo tawp ang…ka ring dik angem aw…ha3 😉 (fmth.)

covenanter September 28, 2011 at 1:16 AM

@CFL-a chu Pu Chawngkhupa phuah niin ka lo hria a

Shanks0 September 28, 2011 at 2:13 AM

atheist tam tak nen kan inhnial ve thim alom, ha thlak tak cu ani… ka hmu dan ah chuan atheist a tam zawk in pathian/bible an awi lo nachhan cu, an zawng lo vang a ni ber in ka hria, an ni duh dan ah chuan mi tu emaw ni hian ron proof top se an duh… keini christian ho cu kan tet te a trang min lo hrilh vang ani ber in ka hria, chuan keimah ni ten kan research ah kan mit ngei pon a tam zok chuan thil explain theihlo kan hmu a.. khang zawng zawng in khawl khawm khan kan faith hi a ti chak ni in ka hria.. chuan atheist ho in an hriat lo tlang pui cu pathin om dan proof roh?? tih hi ani.. a answer awl sam ber cu, bible chiar la nang mah in in zawn hmuh tum roh.. a answer cu bible ah a om vek mahse an chhiar leh paih toh bok silo kha khan a ti buaithlak vek..

Terema Chhakchhuak September 28, 2011 at 2:48 AM

@ Covenanter, he hla hi Pu Chawngkhupa phuah ngei chu a nia lawm. CFL-a sawi, “Mihring mihrinna hian a ngaihtuah chhuak zo lova che,
Ka chhandamtu i thuruk hi” tih hi a phuah dan dik tak a nia…

Mx September 28, 2011 at 5:14 AM

Chhiar a manhla angreng hle mai (Y)

KingJulien September 28, 2011 at 8:28 AM

tha phian mai.. Ka rilrem zawng tak a ni..

laimizo September 28, 2011 at 10:20 AM

He post chu ngaihtuahna ti thui tu post tha tak a ni e… (Y)

Agnostic ho hi mi dawihzep an ni berin ka hria. Pathian awm leh awm loh pawh hre si lovin, miin Pathian a awm tia an sawiin, a awm lo angin an hnial leh vak si…

“Enkimtithei” tih chungchanga i zawhna khi chu logical fallacy pakhat “Question with in built unanswerability” a nia, zawhna atthlak a ni… (N)

“Famkimna” chungchanga famkimna leh tlangchhip i rawn tehkhin khi a inmil thlawt lo, logical fally dang pakhat “misuse of analogy” a ni leh… famkimna leh tlangchhip chu a inang lo em a ni! (N)

“Pathian hmangaihna” chungchang i rawn sawi khi chu a dik ang reng viau a, inhnialna tawp thei lo a ni ber. Mihring tan chuan hriatfiah tak tak pawh a theih loh hial khawpin ka ring. Chutin rualin khawvel tluchhe (fallen world) a awm kan nih avangin tawrhna te hi chu a lo awm ta a ni. Pathian min hmangaihzia chu KROSS ah a lang, AMAH meuh rawn chhuk thlain kan tuar ai a rawn tuar ta a ni….

“Duhthlanna” chungchang khi chu i ‘premise’ a fuh loh deuhin ka hria… Pathian chu engkim hria a nih chuan engatinge mihring te duhthlanna te pawh a hriat theih lohvang?? Mihring ‘free’-a a siam avangin an duhthlan (choices) a hre lo tihna a ni lo. Open Theism pawmtute phei chuan hun lo la kal tur (future) hi Pathian pawhin a hre bik lo, a chhan chu hriat tur tak (definitive) a awm lova, chuvang chuan engkim hria a nih lohna a awm lo an ti ve tlat! (Open theism hi chu ka pawm l0)

malsta27 September 28, 2011 at 12:21 PM

Tha viau mai, nia paradoxical hi chu thil tam tak hi a ni deuh vek mai awm e a, electron leh proton te ang chi poh hi in kalh vek ang mahse a huho a chak tak si an ni leh lawi a.

Literati ang deuh a han tih ve chiam ngaihna ka hre lo, Ziak tha khop mai (Y) (Y) .

Mahse a siam in,a siamtu hriat chian lo tum phet mai hi chu mak chu ka ti deuh. A thu zawm harsat chu sawi loh a thilsiam, fanghmir ang, pakhat poh la siam theih loh lai a enge a nih hriat lo tum hi chu a thluak min pek atanga lo chhut hi chuan ‘ngaihna om loooooo’ tih ang deuh kha ni 😀 😛 😛 NOI

coolsoul09 September 28, 2011 at 1:52 PM

Tunlai…aa..tunla chang a ni lo. Hman hman atang khan ka buai em em reng mai a. Thuziah nuam ti em em thin hian thu pawh ka ziak ngai ta meuh lova. Rilrua rawn lang ka han thailang mai mai a nia.
@laimizo : I comment a ngaihnawm khawp mai. Mahse, ‘omnipotent’ chungchang hi chhut neuh neuh la..logical fallacy tih chi chu a ni lem lovang. Fallacy leh Truth danglamna chu i hrechiang hlein a lang a. Fallacy tih chi a ni lo deuh e.

Pathian famkim leh famkim loh chungchanga ‘analogy’ ka pek khi..nguntakin ngaihtuah neuh neuh la. ‘Perfect’ tih i hriatthiam chian hnu chauhah i tan awmzia a nei thei ang. Ngaihtuah mai chuan thil intuha lo lutuk angin a lang reng ang. Ka hnial hran lo che a nia 😀 Ngaihtuah chiang leh deuh chhin teh.

Leave a Comment