Mizo Society & Culture Opinion Religion

Mizo-na nge Kristianna?

Mizo nun kan sawi apianga thinlunga lo lang thin chu ‘Sakhuana’ hi a ni .Hmanlai kan pi leh pute chuan serh leh sang thil hi an ngaipawimawh em em a, thildanglam leh mak deuh an hmuh chuan an inthawi thin a, hemi atang hian tawngfung tamtak pawh alo chhuak reng a ni.

He ‘Supernatural’ thil hlauh leh rinna hian Mizo culture nen inthlunzawmna thuk tak anei bawk a ni. Hemi hunlai hian khawtlang nun chu ralmuanlohna leh hlauhna in atuam vel anih kha. Sakhuana hian ngaihpawimawh a hlawh thin em em a, Mizo te nun ah hmun pawimawh tak alo luah tawh thin a ni.

Mizo te hi, “hnam huaisen leh hlauh neilo,” tia in chhal si hi hlauh ngah ber leh thil serh leh sang (Superstitions) ngah ber pawl kan ni thung awm e.

Hei hi kan hnam in a thanlen pui leh kan Mizo nun, kan chetze kawng tinreng a a cheng bawr vuantu a ni ti ila kan sawi sual tam in a rinawm loh. Kan pi leh pu te kha han che chhuak hlek se khawih thiangloh leh tih thiangloh an hmu thuai a, hlauhna bawihah tangin an nun a huaisenna awm ve te pawh chu anih dan tur ang pawn a par chhuah tir thei lova. An inthawia, a nih loh leh an hna te an thulh phah a.

Thanlenna te leh hmasawnna eng te chuan hmun an chang thei lova, an suangtuahna bawihah chuan an tang a. Bawlpu leh serh leh sang khawih bik tur mi te in siamin sakhuana hi an lo kalpui ve thin a ni.

Hetih hun lai hi Mizo nunze mawi: tlawngaihna te, aia upa zahna te, taimakna te leh huaisenna te’n a vawr tawp an thlen lai tak a ni a. Mizo hnam a nih na tur diktak anga a parchhuah hunlai kha a ni ti ila kan sawi sual tamin a rinawm loh. Hmelma hmaah an zam ngai lova, mahse an suangtuahna chuan a thunun si. Hmuh theih laka thih an hlau lova, mahse hmuh theihloh laka thil sual tih chu an hlau thung si!

An nitin nun leh khawsakna te chu hlauhna leh raltitna ten a tuam a, khua leh khua an inrun a; Zo hnahthlak thisen ngei mai chu Zo hnahthlak vek chemtum-ah te chuan a luang a. Hmangaihna te chu a hnam bil tan chauh chhuan so a ni a, huaisenna te chuan rah tha aiin rah thalo a seng ta zawk a. Mizo hnam chu, “lu la hnam,” tih alo ni ta!

Heng hunlaia an boruak hi ngun taka thlir hian hnam aiin khua leh tui nihna an ngai pawimawh zawk a ni tih a lang chiang hle a, inpumkhatna a awm lova, a ni biin an ral zel a. Ram a dam lova, kan aia hnam lian leh chak zawk ten min chim ral lek lek a.

Amaherawhchu, Pathian khawngaihna changin sap Upa leh pu.Buanga ten Mizoram leilungah Chanchintha meichher rawn luhpui in, Mizo dan hlui chu Krista dan tharin an rawn khengbet ta a. Hla thu in, “chanchintha in kan ramah ramhuai a um bo ta!” a tih ang khan kan hlauhna te leh kan suangtuahna atthlak tak tak te chu chanchintha chuan a rawn um bo ta a, ‘Mizo’ tih hming hi Zohnahthlak hnam tin te hriat turin a rawn in pho chhuak ta a.

Kristianna chuan ZONUNTHAR rawn din in, kan mawina diktak leh kan huaisenna te leh kan tlawmngaihna te chu mawi takin khawvel mit hmuhah a parchhuah tir ta a a ni.

‘KALVARI DOCTRINE’ CHU :
Mi tamtak te chuan heng kan NGO neih : Y.M.A, M.H.I.P, M.U.P etc. te hi kan hnam inpumkhatna leh himna thlentu awm chhun niin an sawi thin a, a dikna lai pawh a awm awm e. Mahse, mi tamtak te’n a kan hmuh hmaih thin a chakna leh a damna khawl leh thahrui tak tak chu ‘KRISTIANNA’ hi a ni.

He mi chungchanga entirna tha ber chu kan bul hnaih mai a cheng heng hnam hnuaihnung zawk: Reang, Tripura, Debbarma, etc. te hi an ni awm e. A thenin Hindu sakhua vuanin a thein Thingbul an be bawk a; an chakna thahrui chu a ni biin a pan tial tial a, tunah chuan an aia hnam lian leh chak zawk te hnuaiah an kun tawh a nih hi.

Mihring te inlungrualna thlen tur hian ‘neih inang’ aiin, ‘beiseina thuhmun’ neih hi a pawimawh zawk awm e. Zohnahthlak nih na mai chuan inremna leh inlungrualna a thlen thei lova, beiseina hmun khat neia tual kan len a, thurin bu khat hmanga vanlam kan thlir na chuan MIZONUN thi lek lek a awm tawh chu a rawn kai harh ta a.

Chanchintha chuan beiseina leh nunna thar rawn pein, ‘Mizo culture hlui’ chu a thalo lai chhawk thlain, Krista hriatpui ‘Mizo culture thar’ a rawn din ta a. Hemi atang hian Mizo nun chu awmze nei takin a rawn in her danglam ta a, hnam dang te hmuhsit a awm mai tur chu ‘Kalvari Doctrine’ chuan Mizo nun ze mawi: tlawngaihna te, Huaisenna te, Aia upa zahnate vawng nung zel chung chuan tuipui lian leh chak zawk a finpui ta a.

“Mizo nih a nuam,” tih tawngkam te chu alo chhuak ta a. Kohhran alo dinga, thlarau harhtharna te rawn thleng in, hnam dangte sakhuana hriamhrei hmachhuana an in do mup mup laiin Mizo hnam chuan Kristianna puanin kaihpharh duai hnuaiah Bible keu in kut an in suih a.

Hmangaihna te, tlawngaihna te, aia upa zahna te chu tun hma zawng aiin a vul mawi deuh deuhva, hnam innghahna lungpuiah KRISTA a awm avangin kan ram chuan hmasawnna rahbi thar a tuk zel bawk a. “Mizo te hi Lalpa hnam thlan kan ni,” ti ila kan daw hauh lovang.

KRISTIANNA TELLO PAW’N MIZO TE HI CHU KAN DANGLAM BIK THO LO MAW?? :
Mizo te hi hnam a chiang leh hnam zahpuilo mi kan ni tih chu hai rual a ni lo. Mahse, tunlai kan khawvel thlir hian hei hi Kristianna tello chuan a chhunzawm reng theih angem? tih chu zawhna lian tak a ni. Kan sawi tawh angin kan vela hnam dang te nun ah hian a chiang hle awm e.

Rinna hmun khat leh sawi hrangtu awmlo Mizo society a Kristianna thlazar hnuaia kan cheng ho hi kan inlungrualna thlen tu chu a ni mai lo maw?? Sakhaw chi hrang hrang te hian tihdan phung (ritual practices) chi hrang hrang an nei theuhva; Mizo te hi sakhuana hmun khat vuan nilo ta ila harsatna chi hrang hrang kan kawng daltu tur an awm dawn tih chu a chiang reng mai.

Mahni hnam nih na thukru in Khawvela hriamhrei hlauhawm ber, ‘Sakhuana Thurin’ hmachhuanin inbeihna hrisello tak a chhuak thei a ni. Hei hi thlirna mit tam zawk te’n a an hmuhlawk chu a ni. He Kristianna hi awmlo ta se tuipui ralah pawh, “Mizo ka ni,” kanla ti tlatin In ring em??

A tawp ber ah chuan, ka thalai pui te leh ka Mizo pui te hnena ka chah duh chu hei hi a ni : Rinawmna, Huaisenna, Zawldawhna, Hmangaihna,etc. te Mizo nun a a bet tlat ang hian Kristianna pawh hi Mizo nun a bet tlat a ni tih hi. Kan ram hmasawnna rahbi tuk tu a ni a, tunlai khawvel changkang tawh tak leh hmasial tawh tak a Mizo nunze mawi chhawmnunga vawng thatu (preserver) a ni tih hi zep rual a ni lo.

Chuvangchuan, Mizo anga chet kan lakna te, Mizo anga thil kan tihna reng reng ah Kristianna hi kan en khum a nih vaih chuan eng hlawhtlinna mah hi kan chang dawn lo tih hi I hre theuh ang u. Ram leh hnam dinchhuahna bulpui ber chu Krista chanchintha hril hi a ni.

“Lalpa zawnchhuah Ram te chu an hawi kir leh chuan tah leh rumna te chuan kiansan ni a nei ngai dawn silo”

– Dustin Lalkulhpuia

Related posts

Makpa tawmkailo

Vitamin_C

Eden Natna hi Corrupted DNA ani em?

zoho

Presbyterian Church (USA) in Gay Pastor an nemnghet!

Aryan

17 comments

Zephenath September 2, 2011 at 9:01 AM

(Y) Chh1ar phawt ang…. ngaihnawm hmel tlat

Reply
Asteric September 2, 2011 at 9:40 AM

(Y)
HnamSakhua khan lo comment ve sela 😉

Reply
Zakzuma September 2, 2011 at 9:44 AM

Ngaihnawm dawn mange.

Reply
PKfanai September 2, 2011 at 9:58 AM

Hetiang thudik awmsa hi, inhrilh nawn fo a tul ta tlat a nih hi.A sei viau na a, a tha khawp mai.

Reply
century child September 2, 2011 at 10:04 AM

a tha hle mai.. (Y)
OT lawks..google chrome atangin internet ka khawih thei lo a..DNS chu ti khati a inti zel a..enge DNS pawh ka hriat si lauh..lol..min lo pui hram teh u kei mimawl hi :-S

Reply
Telphawka September 2, 2011 at 10:08 AM

chhiar chhuak hram e, ziak tha khawp mai…

Reply
Pcresn Val September 2, 2011 at 10:24 AM

A thratna zel lak khawm (Y) a post a nih hi tha khat e..!
A nihna tak ah chuan pipu te puithu na leh naupang an enkawl dan kha puithu na ti punlun tu a ni awm e..! Naupang chu uite rim an nam ti a an hnar bo leh upa titi ngaihthlak a ankianga awm ve phal a ni ngai lo..(eng lehkhabu bu emaw ka chhiar a trang in, a kawm nei tawh lo kha ni mai thei.. 😛 ) naupang lo Å£hanglian te kha zilhna leh zirtirna awm mumal lo kar a sei lian chu, ‘a, hei i lo puitling ta a…’ an ti ngawt leh si a.. Chu chuan pipu te nun ah rau rau pawh puithuna mumal hre lo leh serh leh sang mumal pawh hre lo an tam awm e..!
Kristianna lo luh hnu pawh in fate uite rim nam a hnar bo leh thu tha zirtir nan a hun hman aia tv en tur pek tawp a in enkawla seilian, kristianna a hming chauh hria, a nundan tur hre lo an tam phah awm e..
Leh lawk in mizo te hi hnam inzahpui ching tak kan ni in ka hria.. A ruala Phaia zuk kal ho te pawh khan Mizo kan ni kan hmel a tha kan Tum e anti a ni awm e..An sa tluan ngam lo..! :-[

Reply
Chhuaklinga September 2, 2011 at 11:06 AM

A va dik ve aw, ram ni tla seng lova rorel kumpinu sorkar pawh kha an ropuina chhan leh malsawm an dawnna bulpui ber chu, chhanchintha puan darh hna an thawh nasat vang a ni tlat a ni.

Reply
lr hlonchhing September 2, 2011 at 11:08 AM

A ngaihnawm khawp mai, gud post…

Reply
H.Vangchhia September 2, 2011 at 11:25 AM

Ka chhiar e (Y)

Reply
mate ainawn September 2, 2011 at 12:23 PM

(Y)

Reply
Sony September 2, 2011 at 2:12 PM

Piangthar lo, a hming chauhva Kristian chu tam tak mai. Piangthar dik tak chuan a hnampui Kristian aiin hnam dang Kristian tak a ngaina zawk tur ani. Bengali, Malaylee pawh nise rinna lama in thurual pui tur zawk anni. Mizo piangtharlo ai chuan in anna in ngah zawk. Hei hi kan pawm theih loh chuan Kristian tak tak kan ni lo vang.

Anih leh YMA in Myanmar lam mi Kristian niawm tak an hnawhchhuah kha hnam inpumkhatna atan a that in ring em ni?

Mizo sang tam Kristianna bansana Juda sakhaw zuita te leh Setana be ho te hi in la Mizo hmuh tho em? Anih leh Mizo zinga secular/scientific rilru pute hi?

Kan Kristianna a dal avangin kan culture pawh a dal tawh anih hi.

Reply
Fergie September 2, 2011 at 2:18 PM

ziak tha khawp mai.
Kan sakhua ‘kristianna’ in a ken tel tlat chi ‘kohhran’ pawl hi a ni a. Kan ramah hian pawl pakhat chauh awm sela chuan kan inpumkhatna hian a thleng sang leh zualin a rinawm. Hnam inpumkhatna chungchang ngaihtuah hi chuan kan ram a Kohhran pawl hrang tam ta lutuk hian inpumkhat tha thei lovin min siam ni hian ka hre thin. YMA ang chuan engpawh kan ti ho thei, mahse Kohhran pawl boruak hnuaiah erawh chuan mi hrang angin kan in en a, ‘cold war’ kan ti em ni kha, misual ho dial dial thinte pawh hian a boruak hi kan zo chiah lo em aw! Min tham khawmtu hian min thendarh tel bawk a ang ka ti thin.

Reply
bk September 2, 2011 at 3:24 PM

Ni e, Mizo hnam min din chhuaktu leh min suih khawmtu chu Kristianna hi a ni a tih loh theih loh. Tuna kan hman tlan theih tura Mizotawng kan neih tak pawh hi Kristianna leh Kohhran thawh rah a ni a. YMA pawh hi a tirah tak chuan Kohhran atanga intan a ni. Chuvang chuan Mizona leh Kristianna hi kal kawp ah ka ngai.

Han sawi kai leh ta hram ila, Manipur lama Zohnahthlakte zingah pawh khian kum 1953-a NEIG Mission a kehdarh hma kha chuan lungrual takin khatih hunlaia Lusei tawng kha lingua franca a hmangin Mission khat hnuai ah an awm hova. Lusei Bible leh Hlabu pawh lungrual takin an hmang tlang thei a. Harsatna neuh neuh avanga an inthendarh tak hnu ah tun dinhmunah khian an lo ding ta a ni. Kan Kristianna hi inpumkhat lehzual nan hmang thei ila a duhawm hle mai.

Kan pipute puithuna chi hrang2 kha chu an dinhmunah khan pawimawhna chen a awm ve thovin ka hria. Nu leh pa, aia upa zah etc te pawh kha an ngaihpawimawh loh chuan a chhe zawnga an chunga thil thleng thei awma an hriatna khan an nun a khalh ngil ve tlat ani. Thil atthlak alang engemaw zat chu awm tho mahse. Tunlai thalaite hian hlauh leh pawisak kan nei tlem ta lutuk hi kan chhiat phah ve thei tho a ni angem?

Reply
PaihteMakpa September 2, 2011 at 4:07 PM

Kristianna hi Zofate tan kan dinchhuah theihna chhan a ni.
Amaherawhchu, Rev.Khup Za Go chuan Zofate inpumkhatna tichhetu leh min thenhrang tu chu Kristiannna hi a ni a ti ve tlat mai. In awih emaw. A ngaihdan chuan: Kristian pawl hrang hrang ten Zo hnam hrang hrang zingah thawkin an thawhna dialect in Bible an lehlin sak zel a, chu chuan a pumpui a Zofate kan inpumkhatna a tichhia a ni a ti.

Reply
vakul September 2, 2011 at 8:46 PM

Tha hle mai (Y)

Reply
laldoma September 2, 2011 at 10:55 PM

Inva comment thui hlawm ve,kei pawhka inthlahrung lo mai teh ang…he2. He thu hi a pawimawh kati thin. Mi tamtakin Kristian kan nih hnuah hian hmanlai kan tlawmngaihna te a bovin sualna a pung nasa zawk anti thin a. Kan mithiam te zingah pawh kan missionary te lo sel tawk an awm ta fo mai. Heihi a dik tawklo. Zau zawkin thlir ang aw…he idea, Kristian kan nih hnuah sualna a nasa zawk kantihna chhan tamtak hi vai hovin Kristianna an huat em avanga min BRAINWASH an tumna a an sawichhuah tamtak ani. Heng Vhp,rss te hian Western culture an haw em2 a, extreme takin an do ani. Chu2 Mizoramah chauhlo pawh an sawichhuak nasa ang. In culture theihnghilhin Kristianna inzawm a,chu vang chuan sualna a pung nasa ani minti maithei,mahse Mizorama sualna langsar ti pawih sumdawng? rawka that zuitu te kha Kristian an ni reng2 lo. Jail an tan hnuah Zosapthara khan a tlawh thin a,pakhat phei chu a thih hma khan a piangthar hman ani (L Keivom). Vai ho hian Mizoramah Kristianna avanga sualna pung anga an sawileh chuan Kristian an huat vang tih kan hriat a hun ta,hei hi a bikin vai rama awm lehkhazir tamtak zawhna dawn ani fo dawn ani. Mizo culture hi Kristianna avang hian a tha zawngin akal chho zel dawn a ni.

Reply

Leave a Comment