Mizo Society & Culture

Mizo thuhlaril hmasawn dan – Part 3

HLA LAMA KUTCHHUAK NEI MI PAWIMAWHTE:

LAITHANGPUIA(1885-1939): Laithangpuia hi kum 1885-ah Sesawng khuaah a lo piang a. Naupang kum 6 vel a nih laiin lungnalah a tawlhthlu a, a vanduai a siamin a damchhungin a mit a del phah ta a ni. Hmun hrang hrang Ralbawm, Sihphir leh Thingsat-ah te an pemkual hnuah Sesawngah kir lehin Kum 1939, December ni 7 khan mitdel awm tawh lohna hmun Jerusalem Thar lam a pan ta a ni.

Laithangpuia hla phuah lak khawm theih chin hi 27 a ni a. A hla te hi hmun li-ah a then phawk theih a: Rinna indona hla te, Lusun hla te, a mimal nun atanga Pathian a pawlna hla te, leh hun bik nei hla te a ni. Hla a phuah thiam bakah a thluk a siam thiam a, a hlate hi amahin a thluk a siam vek a ni. A hla phuah lar zual deuhte chu- Do chak hmel pe in, Lungngaihna sual tinrengten, Phungrual an tin ang a, Hnam ka len nuam mang e tih leh Aw, i bei zel ang thim Lal chu tih te hi a ni.

HRAWVA(1893-1956): Zofate zinga B.A. passed hmasa ber leh Mizo hla thu hmanga Chhamhla tha tak phuah hmasa ber Hrawva hi Thanthulha leh Dolaii te inkarah Lunglei chhak lam Khawthir khuaah kum 1893 khan a lo piang a. A laiah hming chu Rolala a ni chungin a pian kum hi Hrawva ram neih kum a nih avangin a hmingah Hrawva hi a pu hlen ta zawk a ni. Ngaihtuahna thuk leh zau tak nei mi Hrawva hi kum 62 mi niin kum 1956, April ni 28 khan Durtlang Damdawi Inah a boral ta a ni.

Hrawva hian hla 16 phuahin hla 4 a letling a. A hla phuahte chu- Rairahtea hla, Baichi Khawhlui tlawh thu, Pu Thangluaia SDC phuahna, Phaituala lehkhazir u thihna, Thirhrui hmuh thu, |hiante thenna, Awmkhawmna in hlui, Khuanu leng chawi, Kumhlui thlahna, Khawvel ruat hma thangvan siam, Pianna thu lam ka chhui lo, Vanram(Hmalam ram), Ngaiteh vawiin Van Lal Fapa, Aw Van lengrual zaithiam te u, Kan lungduh kan lawmna ber, Khawilam mi nge Lehlinte- Hla Bial, I zahngaihna avangin, Ngai r’u, van mi tlangau chu, Khawngaih takin Aw Lalpa tih te hi a ni.

PATEA(1894-1950):
Kum 1920 kum bul lam atanga hla phuah tantu Patea hi Selbawnga leh Sinnawiite fapa niin kum 1894 khan a lo piang a, a hming tak chu Zaliana a ni. Hla 55 lai a phuah a, a hla phuah hmasak ber “Ka ropuina tur leh ka himna hmun” tih chu Mizopa irawm chhuak atanga lo piang Kristian hla hmasa ber a ngaih a ni.

Patea hi Mizo hla phuahtu thenkhatte anga Pathian hla baka khawvel lam hla phuahtu a ni ve lo va. Pathian lam hla chauh a phuah a, a hla phuah 10 lai chu Kristian Hla Bu-ah telh a ni a. A hla phuah te hi a lar hlawm em em a, chung zinga thenkhatte chu- Aw Lalpa, Davida leh a thlah arsi tih te, Buaina lo kiam la tih te, Dam lai luipui dung leh vang fang mah ila tih te, Chung lam Jerusalem thar khi tih te, Lal lungawi kum hun lawmawm chu tih te, Ni ropui a lo thleng dawn ta tih te, Ram thianghlima lal lo piang chu tih te, Mal min sawm turin tih te, Zan lungngaihthlak zion pindan chhungah tih te hi a ni. Heng a hlate avang hian mite thinlungah a nung reng tawh dawn a ni. Kum 1950, March ni 23-ah Samthang khuaah a lu a phum ta a ni.

SAIHNUNA(1894-1949): Kan khawhar hla neih zinga tha leh sak nuam thlang chhuak ila, Saihnuna phuah a lo ni deuh zel mai a. Hei hian hla phuah a thiamzia a tichiang awm e. Kum 1896-ah |hiak khuaah a lo piang a, a pa chu Pazika a ni. Kum 1898 khan Maj.J.Shakespear(Tarmita) chuan Leng ram chu Pazika a pe a, a pa thih hnu hian Bawrhsap N.E.Perry chuan Leng lal turin Saihnuna hi a ruat ta a. Chuvangin, “Leng lal Saihnuna” tih a ni deuh kher thin.

Leng lal Saihnuna hian kum 1926 atangin hla a phuah tan a, kum 1949, a thih dawn hnaih thlengin hla a phuah a, hla hi 100 vel a phuah a ni. A hlate hi Vanram ngaih hla te, Lusun khawhar hnemna lam hla te, Khawtlang lunglen hla te, Hla lenglawng te leh Pathian chibai bukna lam hlate a ni. A hla phuah zingah chuan- Fiara tui, Han thlir teh u romei zam karah khian, He lei hi chatuan ram a tling lo, Ka taksa lungngai mah sela, Khawvel chhuahsan i la, |ap lo thei ka ni lo, Tlang a dang lung a leng em mai, Zaiin ka awi ang hun ral ta tih te hi a hla lar thenkhatte a ni. Kum 1949, June ni 17 khan a thi ta a ni.

CHHUANA(1897-1944): Mangsavunga Zadeng leh Thangteii Hmar te fapa Chhuana hi kum 1897-ah Runtung khuaah a lo piang a, a hmingpum chu Dengchhuana a ni. Chhuana hi hla duh mi leh hla ril tak takte phuah mi a ni a, zai lam erawh a ti vak lo. A hla phuahte chu- Zokhal zai, Kawltu chawia, Ka lainat ber Imanuel, Ka chun sakhmel, Duhten laitual kan lenna, Thli kohna, Mim ang pianna, Chhura rawngbawl, Chhura lenrual, Chhura leh Nahaia, Kawrnu leh Val uang thlawna tih te hi a ni a. Hla hi 12 chauh phuah mah se, belhchian a dawlin hla ril tak leh rotling tak a ni hlawm a ni. Kum 1944, November ni 17 khan kum 47 mi chauh niin Serkawnah a thi ta a ni.

LIANDALA(1901-1980): Liandala hi Dophunga leh Vanhnuaithangi te fapa niin Thiltlang khuaah kum 1901, December ni 19 khan a lo piang a. Hla phuah thiam leh letling thiam tak a ni. A hla phuah leh lehlinte hi 57 lai a ni a, chhamhla tih tur chu tlem azawng a phuah bawk a, chu’ng zinga lar deuh deuhte chu- Pi pu chhuahtlang hlui, Kan tlang ram par vulna, Kan chuanna tlang, Chhura leng ui te leh Serkawn Concert Hlate tia lar takte kha a ni. A hla phuah kalphung han thlir hian Zirna leh thiamna ngaisangtu, Ram leh hnam hmangaihna chawisangtu, Mi tlawmngai leh pasaltha, Hruaitu, Sakhawmi leh Khawtlang siamthatu ti te pawhin kan sawi thei ang. Kum 1980, December ni 19, a pianni-ah chiah a thi a ni.

R.L.KAMLALA(1902-1980):
Lutzathanga fapa R.L.Kamlala hi Kum 1902, April thla khan Ngurlen khuaah a lo piang a, Pathian thu ngaihsak mi a ni. Kum 1921 atangin hla phuah tan a, “Rinin thlir thiam ila” tih hi a hla phuah hmasak ber a ni. Kum 1921-1930 lai bawr hi a hla phuah run pui lai a ni a, hla hi sak chi leh chham chi 90 dawn lai a phuah nia hriat a ni. Kutchhuak tha tak tak a neih hnu, kum 1965, April thlaah kum 63 mi niin a lei kumte chu a chhiar chhuak ta a ni. A hlate zinga lar zualte chu- Aw ropui ber Halleluia, Buaina reng reng a awm ngai lo, Hlimna ni ropui chu a eng, Ka tho vanga ka pa hnenah, Endi chim loh kan tuai, Tinkim han dawn ila tih leh Engtin nge tihte hi a ni.

Ralte tawng pawhin hla tam tak a phuah a, Sap tawng thiam ve tawk tak a nih bawk avangin Jeremia |ah hla leh Solomona Hlate hi ama’n a duh ang takin a letling hran ve ngat a ni. A kutchhuakte kan thlir chuan R.L.Kamlala hi sap tawnga Hymn Writer-cum-poet tih ngei tur chi a ni ang. A chhamhlate hi duhawm hle mah se, a saka sak tur chi a phuahte hi a tam fe zawk a ni.

LALMAMA(1902-1959): Kum 1902, June ni 15 khan Pukzing khuaah Sena fapa Lalmama hi a lo piang a, a hming tak chu Lalhmingthanga Kawlni a ni. Hla phuah leh thuziak lama tui tak a ni a, Mizo Cultural Organisation dinchhuaktu zinga pakhat a ni. A lemchan siam pakhat Tuaisiala tih chu Sap tawngin a letling a. A Thesis ziah “Dances, Festivals and Customs or Costumes of the Mizos” tih chu Gauhati University-in an dil a, sawrkar pawhin kum 1956 khan cheng zanga(`500/-) lai a kutchhuakte avangin a pe nghe nghe.

A hla phuah leh lehlinte hi a tam lo na in a hla thu hman te, a thu leh ri inchawih chungchangah hian belhchiah a dawl hle a. A hla phuah zingah- Haudang leng, Thaibawih hla, Virthli leng, Valdawngthlawna, Ka ngai mang e, Chhura sangha vua tih te hi chham leh sak pawh a nuamin a lar hle a, Song writer-cum-poet ropui tak a ni. Kum 1959, December ni 8 khan khawvel hi a chhuahsan ta a ni.

VANKHAMA(1906-1970): Pastor Vanchhunga leh Thanglianpuii te fapa Vankhama hi Kum 1906, August ni 24 khan Diarkhai khuaah a lo piang a. Zofate zinga hla phuah thiam kan sawi apianga hming lang ziah tur khawpa hla phuah lama sulhnu nei tha a ni. Hla thu un pui pui rem tak sia remkhawm thiam a ni a. Sap hlate a hre tam a, chu’ng thluk hmang chuan Mizo hla te a phuah nual a ni. Kum 1928 khan Tirhkoh Sena huaihawt hla inphuahsiakah “Aizawl” tih hla a phuah chuan lawmman pakhatna a dawng a. Lawmman atan Sam Bu an hlan nghe nghe a ni.

Vankhama hla phuah zawng zawng hi 50 vel lai a ni a, chhamhla tia kan sawi lam chi hi chu a phuah tam lem lo. Song writer-cum-poet ropui tak a ni hrim hrim a. A hla tam berte hi kum 1930-1950 inkara a phuahte a ni. A hla phuah kan hriat lar zualte chu- Khawngai hnuchham, Rimawi ram, Mizo Vaihlo, Nunrawng Hmeltha, Tlaizawng Par, Ka ngai ber che, Chhuak lo zawk se vawiin ni chu tih te a ni. Mizo zinga palian tak fit 6 leh inchi 2 laia sang a ni. Kum 1970, December ni 29 khan a khawvel nun chu a zawh tawp ve ta a ni.

DAMHAUHVA(1909-1972):
Zofate zinga hla siamtu hmingthang tak Damhauhva hi kum 1909 khan a lo piang a. Laikunga leh Thanghnuni te fapa a ni. A laiah hming tak chu Lallianchhunga ni mah se, Damhauhva tia hriat hlen a ni ta zawk a ni. Damhauhva hian hla 29 chu a phuah ngei tih a chiang a. Chung a hla phuahte chu- Pathian Hla 9, Khawhar hla 6, Khawvel mawina leh lengzem hla 14 te a ni. A hlate hi a saka sak chi, thluk nei vek a ni a. Pathian fak hla siamtu tia sawi a him ber a, Hymn Writer-cum-poet pawh ti ila, a inhmeh hle ang.

KAPHLEIA(1910-1940): Kaphleia hi Chhakchhuak hnam, Chhingvunga leh Chuailovi te fapa niin kum 1910, January ni 10 khan Thiak khuaah a lo piang a, kum 1927-ah Tachhip khuaah pem lut lehin a lu pawh an phumna hmun a ni ta a ni. Kaphleia hi thu leh hla lama tui mi tak a ni a, kum 1939-a a ziah zawh Chhingpuii chu Mizo thawnthu hmasa pathum zinga pakhat a ni. Kristian Tlangau leh, Mizo leh Vai Chanchin lama chhuah tur thuziak pawh a nei nual a ni. Hla tha tak tak pakua emaw chauh a phuah a, chu’ngte chu Chhamhla tia chhal chi vek a ni. A hla zingah hian Zoram ka ram tih leh Kan run khawhar tihte chu a lar hle a ni.

ROKUNGA(1914-1969): Thanghluta Hmar leh Zalianite fapa Rokunga hi kum 1914, February ni 20 khan Venghnuaiah a lo pianga. Kum 1934 vel atangin hla a phuah tan a, hla hi 126 a phuah a, a tha hlawm hle. Kum 1952 khan |halai Hlabu tih a chhuah a, a ma hla phuah leh midang hla tha tak tak a lawrkhawm a, lehkhabu hlu leh tangkai tak a ni. Assam Rifles Band Party-in a hla pakhat Lentupui kai vel leh romei chhumin tih chu kalrem rimawi atan an hmang a, Kan zotlang ram nuam tih hla pawh hi kalrem rimawi atan an hmang tangkai hle bawk.

A hla phuahte avang hian Zofate zingah Rokunga hming hi a dai tawh lo vang. Kum 1969, July ni 12 khan a Lalpa hnenah a chawl ta a ni. Hla 126 a phuah te hi- Krismas hla 20, Kristian hla 35, Khuarel hla 22, Ram leh hnam hla 14, Hla chi hrang hrang 35 a ni a. Chhamhla hi a phuah tam tehchiam lo. Zofate zinga Song & Hymn Writer lar tak a ni a, Poet of the Century chawimawina pek a ni nghe nghe. A hla phuah zingah hian- Ro min rel sak ang che, Ka pianna Zoram nuam, Raltiang i kai ve ang, Aw hun leh kumte chu, Zawlkhawpui leh Sualin bo mah ila tihte hi a lar hle a, a dang lar tak takte pawh sawi kim chi mai a ni lo.

LALTANPUIA(1915-1997): Hrangchina leh Kapkungi te fapa Laltanpuia hi kum 1915, June ni 16 khan a lo piang a. Hla 40 vel phuahin kum 1932 atangin a hla te hi a phuah tan a ni. A hla te hi a sak a sak chi, hnam nun pho chhuak tha tak tak te a ni hlawm. Kum 1997, April ni 8 khan a lei zinkawng chu a awmna khua Sialsukah a zawh tawp ta a ni. A hla phuah zingah hian- Kan lenlai en chim loh parte i am dun ang, Mahten awmhar ka dawn changin, Awmhar Champion val ka ni, Kan ram hi kan ram a ni tihte hi a lar hle a. Kan ram hi kan ram a ni tih ngat phei hi chu ram kalsiam dinna kawngah hman ata tawh tun thlengin hman lar zel a ni.

L.BIAKLIANA(1918-1941): L.Biakliana hi Saitual khuaah kum 1918, August ni 26 khan Tirhkoh Liangkhaia leh Ngurchhuani te nupa inkarah a lo piang a. Lehkha thiam thei tak a ni a, vanduaithlak takin tunlaia pawl 11-12 ang chi I.A.(Intermediate of Arts) a zir laiin Ngawr(Tuberculosis) natna a vei a, a zirna a chhunzawm thei lo va. Chu natna chu a thihpui ta nge nge a ni.

A hun lai chuan Mizo zinga lehkha thiam ber pawl a ni ve hrim hrim a, a kalna apiangah mite ngainat leh ngaihsan hlawh tak a ni. Kum 18 mi lek a nih laiin thawnthu ngaihnawm tak Hawilopari tih chu kum 1936 khan a ziak zo va, a kum lehah thawnthu tawi Lali tih a phuah leh a. Thawnthu ziak kawngah Zofate zingah kutchhuak tha pangngai nei hmasa a ni a, a kutchhuakte pawh hian belhchian a dawl hle. L.Biakliana hi thawnthu phuah thiam leh khawtlang tana mi tangkai a ni satliah mai lo va, Chhamhla phuahtu a ni. A hla lehlin leh phuahte hi 25 vel a ni. Pathian fakna hla lamah kutchhuak a neih bawk a vangin Poet-cum-Hymn Writer tia sawi kher chi a ni. A chhamhla phuah larzualte chu- Chunnu, Hmarah topui a hnim, Hmangaihna dik, Sumdawngpa Vanduaina, Ka Nu Thlan tih te a ni.

P.S.CHAWNGTHU(1922-2005): Ch.Pasena leh Chawntualite fapa P.S.Chawngthu(Pahlira Sena Chawngthu) hi kum 1922, December ni 1-ah a lo piang a. Hla phuah thiam, rimawi tum thiam leh lam thiam a nih bakah lemchan lamah pawh a tui hle. Hla sak chi hi 50 chuang phuahin Chhamhla a phuah nual bawk a. Pathian fakna hla te, Lengzem leh Khuarel lam hlate a phuah a ni. A hla phuahte hi kum 1940-1960 inkara a phuah vek a ni. A hla phuah thiam a vang hian kum 1989, April ni 27-ah Mizo Academy of Letters chuan chawimawina hlu tak Academy Award an pe a. Chu bakah, India ram chawina sang Padma Shri in Literature a dawng bawk. A kutchhuakte hi uluk taka kan thlir chuan amah hi Song Writer-cum-poet tih tur chi a ni. A hla phuah zinga hriat hlawh thenkhatte chu- Parmawi tin bawm tih te, Aw, min hrilh rawh zaninah ngei tih te, Chhingkhual lenmawi tih te, Siamtu Pathian tan tih te, Nghilhlohna Par tih te, Kan damchhung ni tih te hi a ni.

CAPT.L.Z.SAILO(1924-2008): Zofate zinga India ram chawimawina sang leh ropui tak Padma Bhushan(2007) dawng hmasa bertu Capt.L.Z.Sailo hi kum 1924, November ni 21-ah Sialhawk khuaah a lo piang a. A pa chu Liankanglova a ni. Thuziak lama kutchhuak nei tha tak niin, sawmli(40) chuang a ziak a. Chung zinga 14 chauh chhut a la ni. A thawnthu ziak ngaihnawm leh tangkai tak “Runlum Nuthai” chu Mizo Academy of Letters pek “Lehkhabu tha ber-2002” (Book of the Year-2007) lawmman dawngtu a ni.

Capt.L.Z.Sailo hian a saka sak chi hla 350 chuang a phuah a. Chung zinga hla 289 chu bu khata lakhawmin “Insuihkhawm leh zai i rel ang u” tih hming puin kum 2008 khan chhut a ni a. Chhamhla bu “Awmkhawhar Suihlunglen” chu kum 2008-ah a chhuah a. “Suihlunglen Hlahril” bu chu kum 2001-ah a tichhuak bawk. Henga chuang chhamhla hi tlar singhnih vel a ni a. Zofate zingah amah aia chhamhla phuah tam an awm kher awm lo ve. A hla phuah zingah chuan “Insuihkhawm leh zai i rel ang u” tih hi a lar ber a ni.

LALZOVA CHHANGTE(1924-1945): Zofate zinga lengzem hla phuah thiam ber pawla chhal tel Lalzova Chhangte hi Hnuna leh Aimawii te inkarah kum 1924, December ni 2 khan Lunglei Rahsi vengah a lo piang a. Pawl 5 thleng Sikul a kal a, Indopui pahnihna a lo zual zel avangin 1943 atangin lehkha a zir chhunzam thei ta lo a ni.

Lalzova Chhangte vanglai hun hi kum 1940-1945 inkar chauh nimah se, hla 48 vel a phuah hman a; hla phuahremtu(Songwriter) hlu tak a ni. Kum 21 mi chauh niin kum 1945, December ni 8 khan Khawsikpui(Typhoid) natna avangin a thi ta a ni. A hla phuah thenkhatte chu- Ka chantawk ka lungawi lo, Par ang a chul, Min then lul suh, Ka rawn fang leh, Mitthlain ka hmu che, Mahriakte’n ar ang ka vai e Parte, Matehawngi, Lenna khua hmun lo tih te hi a ni.

HLA PHUAHTU DANGTE: Heng mimal hming kan tarlan bakah hian C.Z.Huala te, Lalruali te, Zikpuii Pa te, F.Rokima te, Ngurchhawna te, V.Thangzama te leh midang eng nge maw zat kum 1920-1970 chhung hian hla phuahtu an awm bawk a ni.

Related posts

Mizo tawng kan hman dan hi..

Ku Muanga

Rempy lah hi min pawngsual sek a..!!!

Chemtatrawta

Tute nge kan nih!? Part 1

Rinzova Khawlhring Lalhnam

17 comments

ReMpYâ„  September 26, 2011 at 8:17 PM

first hi ka duh ngailo asin!

Reply
ReMpYâ„  September 26, 2011 at 8:26 PM

part I, II, III, an vaiin document thlap tlak a ni. Nangmah ziah anih phei chuan i fakom. Helaia lo online thin ho hi kan ril lem lo lutuk a, sawi vak tur poh kan hrelo aniang! 🙂

Reply
ruatruatapa September 26, 2011 at 8:40 PM

Pastor Thangngura leh Rev. Lianruma te hi ropui ka tih pawl, i tarlan loh zingah chhuan. An chanchin hi hmanah lehkhabu hawhin ka ziak a; mahse, chhunzawm lovin ka dah ta reng a. Ka tibo ta a, ka ui khawp mai.

A bengvarthlak e…… Save hmak ang.

Reply
chhangteval September 26, 2011 at 8:56 PM

P.S. Chawngthu – Nghilhlohna Par tih hla thu kal mawi nalh zia hi (Y) (Y)

Reply
rohlupuia chalrang September 26, 2011 at 9:03 PM

A va tha thei em (Y) Chhiar liam mailova dahthat chi anih hi.

Reply
PKfanai September 26, 2011 at 9:23 PM

Hrawva hla ‘Awmkhawmna In hlui’ tih tluk a ka lung tileng hla hi a awm lovin ka hria. LP.School-IV, ka va ngai thin em. A awmna hmun hlui ka hmuh hian, a building hlui leh kan nun hlui zawngte ka mitthlaah chiang takin a rawn lang uar thin. Post tha tak a ni e.

Reply
CFL September 26, 2011 at 9:26 PM

“Lalzova Chhangte vanglai hun hi kum 1940-1945 inkar chauh nimah se, hla 48 vel a phuah hman a; hla phuahremtu(Songwriter) hlu tak a ni. Kum 21 mi chauh niin kum 1945, December ni 8 khan Khawsikpui(Typhoid) natna avangin a thi ta a ni. A hla phuah thenkhatte chu- Ka chantawk ka lungawi lo, Par ang a chul, Min then lul suh, Ka rawn fang leh, Mitthlain ka hmu che, Mahriakte’n ar ang ka vai e Parte, Matehawngi, Lenna khua hmun lo tih te hi a ni.”
@ ” Ka rawn fang leh hmanah kan tuanna tlang ” tih hla hi Lalzova phuah a ni han tih ngawt hi a huaisenthlak lam deuh chu a ni. Hman kumah pawh inhnialna a chhuah vak tawh kha. Kan mithiam pui pui IAS te pawh an tan vak hlawm tawh kha a. Lalliana ( Ka la hre dik em aw), Vaivakawn khan MUP Chanchinbu lamah a rawn ziah lan ang khan Pu Darchhunga phuah zawk niin huai takin kei chuan ka pawm. A chhan chu a tu leh fate ngei a biakrawn vek hnua a rawn ziah a ni tlat. Kohhran upa a nih tak avanga a tlangzarh duh loh vanga a phuahtu pawh hriat mumal lohva awm ta hial a ni a. A chang tawp ber erawh hi chu ama phuah ni tawh lovin Lunglei lama a va lar phei ve chu Lalzova hian a lo phuah belh ve chauh nia ngaih a ni. A chang dang nena han en pawh hian a thuken a inang miah lo a nia.
E khai, ka comment thui lutuk palh ange, remchangah hemi chungchang hi ka la rawn post ve ange.

Reply
matea_tmj September 26, 2011 at 9:30 PM

Ka pu Saihnuna pawh i rawn sawi lang ve a, ka lawm e.
Chuan , tun lai ah Hla in chuhpui a awm ta zeuh zeuh mai hi a pawi thin hle a ni

Reply
Ozima September 26, 2011 at 9:30 PM

Post tha tak a ni e. (Y) CHHUANA(1897-1944)erawh ka lo hre ve vaklo a nih hi.

Reply
century child September 26, 2011 at 9:40 PM

(Y)

Reply
bk September 26, 2011 at 9:53 PM

Dah that tlak a ni e (Y)
ruatruatapa@3, lenkhawm hla, a bik takin vanram ngaih hla lam pang hi hmar trawnga phuah, lehlin leh a tam khawp mai. Rev. Thangngur chanchin phei hi chuan min hneh khawp mai.

Reply
V-a_USA September 26, 2011 at 9:59 PM

Tluanga, Part 1-3 thlengin ka chhiarchhuak veka, a bengvar thlak hle mai.

Reply
Ignatia (33-115 AD) September 26, 2011 at 10:06 PM

Va tha leh pap pap ve aw. Ka save zel e.

Ozima: Chhuana hi i hre lo tak tak a maw? Tluanga hian Runtunga piang niin a ziak a, kei chuan Kawmzawla(Pukpui bul) piang niin ka hre thung. Chhuana nu leh Pastor Challiana nu kha thuhmun an ni. Tin, Dr Lukira(L) nena Dibrugar-a LMP zu zir hmasa ber an ni bawk. Dam lo enklawl leh damdawi sem lamahte Sap Upa pui bertu kha a ni.

Sa kap thei, ram lama thang chhuah ngat- Khawtlang muantu a ni. A thih lai khan an tia lawm- Pukpui, Zotlang, Serkawn leh Zohnuaite chu a NGUI ruai e an tih kha. A u Rev Challiana’n urhsun takin a vui ta a nih kha.

Rualu deuhte tan- ‘Phuahtu Chhuana’ tiin an hre lar viau.

Reply
Ozima September 26, 2011 at 10:11 PM

Ignatia (33-115 AD): Ka hriatloh teh tlat chu le….

Reply
mi_sual September 26, 2011 at 11:10 PM

i va fakawm êm!!!

Reply
vakul September 27, 2011 at 12:30 AM

Post tha tak a ni.ka save leh keuh e. Ka rilru tiphirtu chu a awm. “SAIHNUNA(1894-1949)” chungchangah hian:

‘Han thlir teh u Romei zam karah hian’ hi hi hlabu hrang hrangah a phuahtu hming a inang lo thin a-Saihnuna aiin Lianpuia-Saihnuna hlaphuah sa lar thintu kha a nih ka ring zawk, kei chuan.

Phunthang, ni tain ka hria-a nupui a thi a-a ngai em em a a tap a tap thin a. A neih hlim chauh a nih avangin a tap bang thei lo a ni. Nikhat chu zel angin a awm a-van atang chuan a nupui hi vantirhkoh pahnihin an rawn laitat a-ani chu an rawn bia a-chutia an inhmuleh chu a lawm em em mai a an zingah chuan kal ve a tum ta a.

Mahse an phal tlat lo-‘i hun a la thleng lo ve’ an ti a, van eng mawi takah chuan a liam san ta a-chutia an liam lai chuan van mite chuan hla an rawn sa a ‘kan leng dial dial lungrual kimin, kan awi Lalnunnema’ an ti a. Tuna mi thluk ang hian an sa a ni.

A hla chu phuah zawm dan a hre si lo va, hla phuah thiam Saihnuna, Leng lal hnenah chuan a kal ta rawih a. Ani chuan a bei ngial thin a, a dawng thei tlat lo. Kar khat chhung phuah tuma a beih ngial pawn a thei der lo va-a tih ngaihna hre lo chuan ‘va kal ta la, ka hla phuah sa lar thin Lianpuia a awm a-ani hnenah sawn va kalpui mai teh’ a ti ta a.

Phunthanga chu Lianpuia hnenah chuan a kal a-Lianpuia pawh chuan a phuah thei mai lo va-Ramhnuaiah chawfun meuhin an thawk chhuak a..ni hnihthum hnuah chuan chang khat leh thunawn a rawn nei hawng ta a; ‘mahse kan leng dial dial ‘ kan ti ve thei lovang ‘an leng dial dial tih a tul’ a ti a. a hnu ni thum chhung chuan chang dang dawn leh beiseiin ramhnuaiah Pathian pawlna dawng turin a vak chhuak a..a tawpah chuan a rawn nei hawng ta a.

Saihnuna Leng lal chuan a lo hre vat a; ‘ka duh e, a va tha em..ka hla ni rawh se’ a ti a. Lal a ni a, an hnial ngam si lo va…Saihnuna hla a ni ta reng mai a ni. Saihnuna kha hla phuah thiam tak a ni tih erawh phat rual a ni chuang lo va.

Chuta tang chuan a phuahtuah Saihnuna…Lianpuia…Phunthanga tih a lo awm phah ta a ni..hei hi Saihnuna lo kawm hmantu hnen atanga ka hriat a ni. dik tak maw..ka pawm tlat thung.

Reply
rlchhana September 27, 2011 at 7:28 AM

Mahni tawng ngeia thuziak kan nih chuan saptawng tel lo a ziah tum hram hram hi a tha hian ka hre thin. Chutih laiin mizotawng dik leh mawihnai thei ang ber zel hman tum hram hram a tha bawkin ka hria. Pu Damhauha chanchin ziahah hian hei hi alo awm hlauh mai, ‘Zofate zinga hla siamtu(N) hmingthang tak Damhauhva hi kum 1909 khan a lo piang a.’ tihah hian, ‘hla siamtu’ ni loin ‘phuahtu’ tihtur anih hmel e, tihsual palh ani ngei ang.

Reply

Leave a Comment

Skip to toolbar