Fiction Religion

Riangvaite tan angel

Chêng sawm tlang zäwr tawh tak chu humin Tom-a, kum 11 mi chu mipui tam tak karah chuan a kal ve bek bek a. Kawng sirtuaka dawrkáite chuan rîng taka âu lauh lauh chungin an thil zawrhte chu an fak a. Dawr pakhatah chuan Christmas Card chi hrang hrang te, naupang lawm chi tinrêng mai chu a tlêp tuar a.

Chumi dawr zãwnah tak chuan Tom-a chu a ding chat a. An thil zawrhte chu hmuhnawm ti taka thlîr chungin dawr chhûngah chuan a lût ta a. A pawisa neih chhun chêng sawm chu a hum rei tawh avangin a hum thlan düp tawh a. Chutah a pawisa chu a’n melh leh zawk a, banga silai lem tha tak tak an zawrh chu a kâwk ta chat a. Dawrkaipa hnenah chuan,

“Ka pu, he silai lem hi engzat man nge?”

“Cheng za leh sawmnga”

“Anih leh hei hi”

“Kha kha chu cheng sawmriat chauh. A nalh asin, lei ta che, chêng ngain ka lo tlâwm dawn che nia”

Thil dang dangte chu a man a zawt kual a, a pawisa neihin a lei zawh tâwk reng an lo zuar si lo. Lunghnûr takin a chhuak ta hna hna a, mipui zi hut hut karah chuan a inhnawh lût leh ta a. Mi an tam êm avangin an innêk buai nasa hle mai a.

Vawilehkhatah mi pakhat hian Tom-a chu a rawn nêk per láwp mai a, a tlu bawkkhup thláwrh a, a chêng sawm pawh chu a thlauh phah a. Chhar tumin a han ban a, mahse, a kut chu an rawn rap a, nâ a ti lutuk chu a tê tuar a, mahse, tuma’n an ngaihsak lo.

A chêng sawm chu a melh a, lâk leh a tum lai takin tuemaw hian a chhir sawn sak daih a, a kut nâ pawh hre chang tawh lovin a pawisa chu a zawng zel a. A tawpah zawng a hmu zo lo chu kawngsirah a ding ta a. A kut an rah pilh deuh nin nian chu a nuai fai a, thîp a ti hle a, a chhêm hauh hauh a.

A rilru te te chuan a rethei lutuk chu a inkhawngaih a, a lung a chhe hle a, mahse, a tap duh miah lo thung a. A thawmhnaw hâk chu a’n enchiang a, a hluiin a bal hle a. A tlûkna lamah khan vaivut bal a lo kâi teuh chu niin, chubakah, a lo teh belh bawk a. A inbengfai sawk sawk a, engmah a neih tawh loh avangin an in lam panin a kal ta hna hna a.

Ina a nu damlo chu a ngaihtuah chhuak a, a nu in chêng sawm chiah a duhzawng lei nan pêk tur a neih laia a tibo ta daih mai chu a inthiamlo êm êm a. Kawng pawh en mang lovin hnuailam bihin a kal chhet chhet a. A tum reng vang pawh ni hauh lovin amah ang rual vel mipa naupang pakhat hi a su ta chawrh mai a. Chu naupang chuan a bula a nu hnenah chuan, “A nu, he pa hian min su a, ka silai lem a chhiat phah” a ti a.

Chu nu chuan lainatna tel hauh lovin a hau ta phiar phiar a. Tom-a chuan hrehawm a tiin a zak hle a. Chumi te hnenah chuan ngaihdam a han dîl a. Chu nu chuan, “Tun tumah hi chuan ka ngaidam ang che. Vawikhat pawh ka fapa hi han su leh teh, i châk lo chiang hle ang” a ti hrép a. Toma chuan a kalsan thei ta hràm a.

In intlâr phei pûtte chu a kal pel a, in atanga eitur tuihnai tak tak rim rawn chhuakte chuan a hnar a verh êm êm a, a riltamzia chu a inhrechhuak a. Mahsela, inhnawhpuar theihna turin eitur reng leina a nei bawk si lo. In thenkhat atang chuan zairimawi tak takte a lo chhuak bawk a, chû’ngte chuan a riltamnate chu an hnêm hîalin a hre bawk a. In tam tak a kal pelh hnu chuan veng kilkhawr deuh lam chu a zawh zel a.

Hla deuh taka râp in chhe tawh tak lam chu panin a kal chhet chhet a. Chu in a thlen dawn chuan a mittui a rawn far zawih zawih a, inhnît faih faih chung chuan inah a lût ta a.

Inchhûng chu a lo reh thîap mai a, ngâwi rengin pindan chu a pan a. Khumah hian pawnkawp chhe tawh tak sinin nu pakhat hi a lo mu bêm a. Tom-a chuan mittui far zawih zawih chungin chu nu kut chu a vuan a, “A nu” a han ti a. A mittui chuan a nu kut chu a far kauh kauh a.

A nu chu a rawn mengchhuak dîar dîar a, “Bawihte, i lo haw tawh a ni maw?” zawite hian a ti a. Chutah, Toma bianga mittui lûang chu a hmuhin, “Bawihte, engvangin nge i tah?” tiin a zawt nghal a. Lungchhe takin a thil tawn chu Tom-a chuan a nu chu a hrilh ta a. Tom-a nu chuan thei leh theilo hian, “Bawihte, ka va lainat tak che êm! Kei lah chu ka thi têp a ni mai si a…” thâwk a han la te te a, chutah, “Bawihte, ka thih hunah chuan maw, sâw laia kan Pastor te inah khân i va kal ang a, ka thih thu hi i va hrilh dawn nia. Mahse e, Bawihte…. Engtin ng..ee..i…i….lo awm tak…ang le?” tiin a biangah chuan mittui chu hrûk hul zawh rûal loh hian a lo lûang a.

Tom-a chuan a ngaihna a hre lo hle a, a nu kut chu a vuan reng ringawt a. A nu chuan, “Bawihte, ka awmah hian min rawn kuah la, i muhil dawn nia” a ti a. Tom-a chuan a nu awm chu kuahin a bei ta hle hle a. A nu chuan zawite hian, “Vanramah retheihna reng reng awm lohnaah ka lo hmuak dawn che nia. Pathianin a awmpui zel ang che” a ti a, a maimitchhing dîar dîar a.

A nu chu a ngawih tak daih avangin Tom-a chuan a muhil emaw a ti a. Rei fê hnu ah pawh a chêt tak miah loh avangin a han ko a,

“A nu, a nu”

Chhànna rêng rêng a awm lo.

“A nu, a nu!”

A nu chu a han sãwi a, a tihchêt ang ang chuan a awm a, a la thàw em tiin a han ngaithla a, a lo thaw tawh reng reng lo va.

A nu chu a thi ta!

“A nu, a nu, i thi thei lo. Engtin nge ka awm ang? Tunge min enkawl tawh ang? A nu, a nu, thi lo mai rawh. Enga’ti nge i thih?” tiin Tom-a chu tap háwm háwm a.

A nu chu a han en thin, a nu lah chuan a fapa kohna te, mittui tlate chu a hriain a hmu thei tawh si lo.

Tom-a chu in atang chuan a chhuak a, Pastor inlam panin a kal ta a. Pastor chênna in a thlen chuan kawngkâ a’n kik a. “Lo lût rawh” inchhûng atanga tih ri a hriat chuan kawngkâ chu a hawng a, a lût ta a.

Inchhûngah Pastor chuan zan lama a thusawi tur inbuatsaihin lehkhabu a lo chhiar mêk a. Tom-a a han hmuh chuan, “Valte, eng nge i duh tak?” dam thlûam hian a lo ti a. Tom-a chu a lung a chhe thut a, a mittui chu a sûr zung zung a. Pastor chuan Tom-a chu a pawm a, duat takin, “Eng’ati nge i tah?” a han ti a.

Tom-a chuan inhnît faih faih chungin, “Pastor, ka nu a thi a. Ka nu’n ‘Ka thih hunah Pastor hnenah i kal dawn nia’ min ti a” a ti a.

Pastor chu a phu zawk mai a, a inngaihtuah vung vung hnu ah, “Tap tawh suh le, ka’n insiam ang a, in inah chuan kan kal dawn nia” a ti a. Pindanah a lût a, a inthlâk a. A lo chhuah leh hnu chuan Tom-a chu a kai a, pâwnah a chhuahpui ta a.

Tom-ate in an thlen chuan mi an lo bâwrkhawm teuh a. Tom-a chhuah hnu lawk khan an thenawmnu chu inah hian lûtin Tom-a nu chu a hmu a, a thi tih a hmuhin an thenawmte a lo hrilh kual a ni.

Kum 6 vel liam taah khan Tom-a pa hi a hnathawhnaah chesualin a thi a. Chumi hnu atang chuan a nu nen chauh an khawsa zui ta a. Khawvelah hian a nu lo chu lainâ a neih reng reng a hre lo va. A nu pawhin chhûngte an neih leh neih loh a hrilh ngai si lo.

Thlanmual lam pana a nu ruang an zàwn lai chuan a hnungah a zui hnak hnak a. Thlàn khura an han thlâk a, leia an han vür chiah chu a hmuhin Tom-a chuan hrehawm a tiin tuar hár a ti lutuk a, a tap ráwi ráwi mai a. Mi tam tak chuan an khawngaih hlawm hle a. Mahse, khawngaih avanga an in lama hruai haw tum erawh an awm lo.

Mahni chauhva khawsa turin Tom-a chu a la naupang lutuk si. Fahrah chàwmna ina awm mai chu a ngai dawn niin a lang ta. Nu leh pa nei tawh lo, chhûngkhat lainâ sawi tur nei ve reng reng lo chu Van rama Angel-te chuan an lo hmu reng a lo ni a. Angel pahnih chu an inbia a.

“En teh, Tom-a chu a va lainatawm êm! Nichin lawk khan a nu chu kan zîngah lâk a ni si a” Angel pakhat Gabriel-a chuan a han ti a.

A bula awm Mikael-a chuan, “Engngati nge amah pawh khu lâk ve mai a nih loh le, amah chauhva hrehawm tam tak a tûar tur khu a khawngaihthlak êm a ni” a lo ti ve bawk a.

Gabriel-a chuan, “Kan Lalpan a la remti rihlo a ni” a ti a.

“Engtin emaw tak tanpui dan a awm ange’m?” Mikael-a chuan a han ti a.

“Awm thei ang” Gabriel-a’n a han tih chuan,

“Engtin?” Mikael-a chuan a lo ti vat a.

Gabriel-a chuan, “Pastor thinlûngah khûan Tom-a lâinat lehzualna zuk hriattir ila, ani’n a inah hruaiin a awmpui thei ang” tiin a chhâng a.

Chu veleh Mikael-a chuan, “Tihdan tha tak anih chu, ka zuk hrilh nghal mai dawn em ni?” a lo ti thuai a.

Gabriel-a chuan, “Kal thuai rawh. Tom-a hrehawm ti hmél khu en a nuam lo ve” a ti a.

Related posts

Thianpa James Bond-a

lr hlonchhing

Kal la, tun hnuah tisual leh tawh suh

digimalt

Zawhna (thutak) – Murders in the name of religion? Keima chhanna – II

TurannaSikul

24 comments

Kawnga September 11, 2011 at 12:38 AM

Tha h1e mai 🙂

Reply
Pc-a September 11, 2011 at 12:54 AM

kan nui zo choha, ava lungchhiat thlak leh si ve.

Hlim taka kan awm lai hian lungngai taka kung tlawk tlawk an awm ve reng tak a sin.

Reply
Benny September 11, 2011 at 1:05 AM

Thawnthu lungkuai tak a ni. A ngaihnawm khawngaìhthlak hle mai.

Reply
lrpa September 11, 2011 at 1:15 AM

Thawnthu pangngai, lungkuai tur a ziah..a tir atanga a a tawp thleng tur ngaihtuah thlen nghal theih anih hi..mahse a tha tho tho mai (Y)

Reply
As_khiangte September 11, 2011 at 1:28 AM

Lei hi anchhe dawng ni mahse heti em ema rethei leh hausa, vannei leh vanduai inkar hla lutuk hi chu ngaihthiam a har ka ti thrin ;-(

Reply
Chian_Fu September 11, 2011 at 1:50 AM

A tha hle mai,kan nu le pa te hlutzia min hriat thar tir,nu leh pa te thlazar hnuaia thlamuang taka ka la awm thei hi Lalpa malsawmna ava ni tak em

Reply
H.Vangchhia September 11, 2011 at 1:56 AM

Tha viau e (Y)

As_Khiangte, Chantawka vui renglo vin, lawm tak siin hmalam pan hi tum zel ila a tha maiin ka hria. Hma kan sawn leh hlimna min pe a, hma kan sawn vak theih lemloh pawhin kan chhiat phahlo tih hriatna kan nei thei mai bawk a!

Reply
chawnghilh September 11, 2011 at 5:30 AM

Michaela leh Gabriel-a te hian ni lo baksak lutuka he thawnthu lungkuai tura inziak hi an haw teh ang chu! (U)

Reply
PKfanai September 11, 2011 at 6:17 AM

Mi kan khawngaih a kan tanpui amaw kan intih hian, mahni kan intanpui alo ni reng thin. A tawpah chuan kan mamawh phuhruk tuah an tang let duh khawp mai.

Reply
ninja September 11, 2011 at 7:01 AM

Mizo film a va ang

Reply
Maisek September 11, 2011 at 7:08 AM

van lungchhiatthlak ngai ve aw… i ziak thiam ka ti…

Reply
Pakak September 11, 2011 at 8:46 AM

(Y)

Reply
rohlupuia chalrang September 11, 2011 at 9:12 AM

Riangvaite tan hian Pastor anga hmangaihtu khi anlo va hlu dawn em.. (L)

Reply
lr hlonchhing September 11, 2011 at 9:18 AM

A ngaihnawmin a lungchhiat thlak bawk si…

Reply
phawkars September 11, 2011 at 9:38 AM

Ngaihnawm hle mai..

Reply
Phivawk September 11, 2011 at 10:42 AM

(Y)

Reply
Vitamin_C September 11, 2011 at 11:42 AM

mittui tla phung a kan chiar chu le……. (Y)

Reply
Arontea September 11, 2011 at 11:54 AM

Tha hle mai..

Reply
taituki September 11, 2011 at 1:06 PM

tom-a hi ka van khawngaih tak….hetiang hian a tak tak ah awm theih angem le…

Reply
rohlupuia chalrang September 11, 2011 at 5:27 PM

#19 @taituk, awmthei ngei ang.. kan ram ah pawh hian an awm ka ring..

Reply
Maya September 11, 2011 at 5:39 PM

Khawngaihthlak reuh eee ;-( ngaihnawm bawk si (Y)

Reply
ChhanaPa September 11, 2011 at 6:08 PM

Kumkhuain hlim takin a awm ta a a in ti dawn emaw tih nak alaiin.. ;-( ;-(

Reply
Fergie September 11, 2011 at 8:10 PM

A va han tawp laklawh ve aw! Engtin tak awm zel ang maw! Pastor khian a lo tanpui duh em ang chu maw!

Reply
TuaiSialA September 12, 2011 at 12:49 PM

Post tha tak a niin ka hria.

Reply

Leave a Comment

Skip to toolbar