Christmas

Aw Krismas

Fam ta lo chu Pathian zarah December kan chuang kai leh  tep tawh. A zahngaihna zarah Krimas tepawh hlim leh lawm taka hmang turin in beisei ila. Hun pui lo inher chhuah dawn hi chuan mi tupawh mai hian nun hlui hi kan thlir kir duh chawk thin a. Hlim ni leh lungngaih ni hmang ral zelin kum bi kan chhiar chho zel bawk a.

Hmana nuam thin kha tunhnu ah chuan thawnthu a chang tawh a. Hre ve lo tan lah ho mai mai emaw bengvar thlak emaw a ni a. Kan nu leh pa, pi leh pute hunlai a mi phei chu a hmanlai leh zual a. Mahni hmuh phak leh hriat ve chhun te hi thai lang ve dawn teh ang hmiang.

Sikul session hi chu a la pangngai viau a. Amaherawh chu kumtawp sikul chawlh kan hman dan erawh kum rei lote chhung hian a danglam ve riau. Kum tawp lama sikul kan chawlh tawh chuan rilruin hmun dang a hawi tawh vak lova. Thiante nena  luia kal leh thing tuai put kha a ni mai a.

Vanneih chang chuan tuteemaw sangha vua, lui mawng lama an awm hlan a lo man ve chang kha a awm a. Thleng  khatte kan lo man ruk ve chuan nuam ve tak a ni. Kawtlaia thingtuai an tluk ve ram tawh hnua chuan hma bak a tam vak tawh lova. Kan hmabak chu Krismas a ni tawh mai. Sikul chawlh kan hmang ning hman tep tihah Mas an rawn thleng thin kha a nuam  danglam tlat thin.

Mas bawng te hi thlah ngai a nih pawh hre lo rual kan awm tan ta. Tlangsam par leh Rairuang par te Mas bawng ki ah kan han tar hnawk ve a. A huai zualin a chung chuan ngam a nih leh nih loh pawh hre hlei loin an han chuang ve ngawt a. Thui vak lote chu an chuang ve mai bawk a. Ti fuh vak lo lah an awm bawk. Thlanmual leh hnim peh tur awmna lai apiang kha Mas bawng thlahna hmun a ni mai a. Nuam ve thin deuh a ni.

Savun thui pum ham puar ni lo. a original ngat chu ‘a phing ham puar’ a ni a. A mum nalh vak lo tih a ni mai a. Pet nuam ve tak a ni. Ran an talh tuka a phing nei nalh tur chuan fatu zinga huai deuh hlek fa nih a ngai a. Mar tha taka hampuar tur chuan ten chhiat loh pawh a ngai. Zun rim nam ram ram kha pawi sa miah lo a ham a ngai a. Mahse ham puar loh chuan a pet tlak si lova, kan ham puar peng peng mai a. Kan pet thlawk nawlh nawlh mai thin.

Gas a la awm lova, ruai pui siam tur chuan thing tam tawk a ngai a, Thermo Plate a awm lova, Changel hneh lak a ngai. Hahthlak hle mahse nula tlangval tan chuan Mas thing lak leh Hnah lak te chu chak sa khaia neih chi a ni a. Tel ve lo mah ila a nuam an ti a ni. Mas thing tam tawk lo thlen hnuah Mas thing ek tura hna tlan a tul leh a. An eh darh tawh pho ro te chu keini pawhin kan seng khawm ve fo.

A huhova thil tih a tamin hna thawh ho a tam a, nuam ti fe fe chu an awm thin ang. Mas hmanna tur mamawh lak kim hnuah chuan a ‘next’ chu Urlawk zan/ Tlaivar zan a ni mai. A tuk maiah ran a tlu dawn tih a chiang tawh a. Urlawk zanah chuan tlaivar ngei ngei tur a ni mai.

Mas thlen In te lah an inhawngin zaikhawm tur an awm lo ang tih hlauin thahnem an ngai a. A ngur lo piang lawm turin an zai tluk tluk mai thin kha  a ni a, tun hma leh tun hnu zawng a dang zel dawn a ni. Ruai theh zanah zai khawm lehin tui takin an zai a. Pa thilphal deuhin ‘Mas nawn nan ka vawk ka thawh e’ an tih ngei beisei vang pawh ni chuang loin an zai tui em em zel a. A tawpah chuan bawng emaw  vawk emaw an thawh leh nge nge a. Mas  nawn tur a ni leh ta.

A va nuam thin tak em ! Mahse mau thei a sa tui hawp a ngai thin khan harsatna a siam thin a. Duh aia tam hawp pawp mai a awl. Changel hnah phah chungah chaw khawrhin a lai an han hawrh kaw pawp mai a. Fatu kut a tenawm ngai loh tih pahin sa an rawn theh vum thawr tawh mai thin a. Dul hmul khat phuar a ei chiah hmabak a ni tawh.

Tunlai ang chu ni se veng khat pa bawl theih deuh kan ti ngei ang a, mahse an thil phal vangin Mas te kan nawn a. Kumtharte pawh kan nawn thin a ni. Mas ruai sa tui te chu a tui bik em em a, tunlaia mi ai hian a tui tihna erawh a ni lo mai thei. Mipui mimir khan sa duh tawk a ei tur kan hmu ngai lova, duh tawka hawp tur sa tui hang kan hmu ngai hek lo. Chuvang chuan Mas te chu tisa leh thlarau a puar leh fanna hun a nih avangin a thlakhlelhawm thin a ni.

Krismas carol tepawh hmanah kha chuan a nawm hmel thin a. Tlaivar dawn dawn te khan an zai thinin ka hria. Tunah erawh kan uar ta lem lova. Thlasik khaw vawt hnuaia khawlaia zai ai chuan, thlasik khaw vawt hnuaia Foreign Blanket sina HBO etc en te kha a lo nuam  ta zawk a.

A nih loh vek pawhin Jacket lum tak ha chunga ‘Ride’ te kha a lo ‘happening’ ta zawk a. Nuam thin kha a nuam tawh lo a ni ber e. Mas thlen In nei lovin Hall-ah kan zai khawm zel tawh bawk si a, a neitu ni vek siin tumah hi kan phur ta lo emaw ni. Mas  thlen In a awm ngai tak loh atang hian kan zai tui lo zo ta em ni ang ? Keimahni theuhah hian Krismas hi a thlen loh phei chuan Krismas nuam tak hman hi a harsa tial tial ang a. Ruai theh pawh hi a la thing riau ang a, kan changkanna hian min la pawt darh zel mai dawn niin a lang ta.

Hun inher chho zelin khawsak dinhmun a sang chho zel a. Kum khat chhunga duh tawka sa ei theihna ‘chance’ vawi khat awm thin kha tunlaiah chuan kartin kan ei thei a, thing tuah lovin Gas kan tuah tawh a. Chhemthei tepawh a tul ta lo. Naupang zawt ila an hre lo ang, an hriat dan ber tur pawh ‘cylindrical pipe’ a ni mai.

Material culture hi a kal chak em avangin mihring hian kan um phak lova. Kan thing zung zung mai a nih hi. Kan thil tawn tawh, hriat tawh leh hmuh tawh, hunin a liam pui tak te hian lung an ti leng thin a. Kan la hmuh ngai hauh loh Vanram erawh ngaih a har viau mai si a, ngai  viau thei ila a that dawn nen.

Related posts

Hey Tonight! -Misual.Commers Charity bawm hawn a ni dawn ta!

^-||R@lT€||-^

Heli, Bethlehem Arsi

CFL

Krismas bawk

Dina Pa

20 comments

cornilius November 11, 2011 at 6:03 AM

ngaihnawm dawn ve, chiar ang lem

cornilius November 11, 2011 at 6:13 AM

ava ngaihnawm in a lunglen thlak hle mai. i sawi tam tak khi ka tawng ve hman a, a nuamin a hlimawm hle a ni. Thiangtlang naupang chuan kan tawng tam deuh bik alo ni.

Maya November 11, 2011 at 7:02 AM

Ngaihnawm khawp mai . (Y) lung iva ti leng tak . masi kan nghahhlelh thin zia kha aw , tun lai naupang toys tha ber ber leh eitur tui ber nen a chrismas hmang ai chuan . chhangban leh kurtai baloon leh Kep silai vel nen khan masi kan hmang nuam zawk . . masi bawng thlah a achung chuan kan in chuh laih laih te , hnah lak te kha a va nuam thei tak . . ka lung i ti leng riau mai .

muka November 11, 2011 at 7:12 AM

Ngaihnawm tan dawn chauh a, a tawp daih.Chhunzawm na nghak ang.Lung a leng laklawh a lawm. (B) (B)

Sm0kester November 11, 2011 at 7:18 AM

A ngaihnawm hle mai…lung a ti leng pha ve tlat mai (Y)

PKfanai November 11, 2011 at 7:48 AM

I ziak ngaihnawm hle mai. Kan naupanlai leh tlangval laia krismas nghahhlelhawm zia leh nawm thin zia kha aw. Kan college kal lai te hlei hlei kha. December ni 15 velah khua kan han thleng a, engkim kha a hlimawm a ni. Missionary ka kal hnua ina ka hawn leh hmasak ber tum hian ka college kal laia ka zauthauna leh phurna ang kha a awm ta si lo va, ka Pa inah khan mikhual ta riauva inhriatna ka nei a, a khawhar thlak ang reng khawp mai. Tleirawl min ngaisang leh phur/zauthau taka min lo entute aiah pitar/putarin min lo lawm ta a. Nupui neih hnuah erawh chuan a nuam leh law law. Lunglen thlak e.

kanidar November 11, 2011 at 8:29 AM

Aw Krismas

TuaiSialA November 11, 2011 at 8:39 AM

Ka lung i va han tileng tak em! I ziak thiam bawk si. A phing hampuar kan pet laih laih thin laite kha, hunin a liam hnan tawh a, hmanlai an chang zo ta!

Lenkhawmna tur in hi biakin kawtah an sa chawp a, a tual velah chuan far an phun teuh va, far thingah chuan baloon an tar teuh va, thli a thawt deuh chuan a puak ri phak phak thin. Far thingah chuan nalh takin decoration light an zam chiat a, lengkhawm thing muh tur an put chu an mût hluah a, chumi kil chuan kan lengkhawm thin a, kan tlaivar thin a. Zanlaiah masi chhangban la bang te chu kan kang a, thingpui senthlum nen kan eiin kan in a, kan va phur thei tak! Hmanlai an chang zo ta….awiii!

Tunah chuan masi pawh kan dah lau tial tial ta niin a hriat ta mai.

“Aw krismas, ka damchhungin ka nghilh lo’ng che..”

Maya November 11, 2011 at 8:49 AM

Mau thei a sa tui hawp i sawi tak ah chuan ,mau thei kha an hem sa vet vawt a . a chhung ah tuisik vawt zet kha an thun hlauh a . rui deuh phelh phawlh a ruai theh kha an lo pe thin a . an han in chiah hi chu a va nuihzatthlak thin tak. 🙂

XaiA November 11, 2011 at 8:51 AM

Kan nghakhlel thei em em thin a,kawr thar neihna hun a ni tlat a!

shailendra November 11, 2011 at 9:07 AM

‘mas thing phurh hnatlang an han au a, a khawnawt in mas thing kan han phur a. Chutah ruaithehna tur hnah la in thalai leh naupang ho kan han thawk chhuak leh a. ‘Rawksai’ angin hnah kan han tel khawm a, changel hnah hnun kha kut a han zut a ri pap pap theiin kan han siam a. Silai a chan tirin kan han indo lem thin te kha a va han nuam thin tak em.

Zanah, ‘mas thleninah nu leh pa ho leh rual u deuh te an zaikhawm a, kawt a ‘harah’ puanhlap bat chung in mei lum kan lo ai a…

badboy November 11, 2011 at 9:14 AM

“naktuk krismas..kan tih lai..te kha” tih te kha kanlo va uar thin tak em 😀 kep silai thir khawrchawp lutuk tih hriat ngawih2 kan han kap puak ve khep khep thin te kha angaih awm ta hle mai 😀

century child November 11, 2011 at 10:49 AM

Thlawh lunglenthlak ve.

hovaks2 November 11, 2011 at 10:54 AM

ngaihnawm e,naupang tha leh thei ila o,

hovaks2 November 11, 2011 at 11:00 AM

ngaihnawm e,naupang tha leh thei ila o,tah i ti chhuakzawk e a (

H.Vangchhia November 11, 2011 at 11:02 AM

Ka lung i ti leng hle mai :-S

H.Vangchhia November 11, 2011 at 11:50 AM

Nikum 2010 Masi hunlai a Kulikawn kawtthler:

http://i41.tinypic.com/o6fytt.jpg

Alfred.ralte November 11, 2011 at 1:28 PM

Ka va han chhiar tui tehreng em, ziak ngaihnwm khawp mai, Lung a leng khawp mai te tive khanglang ila, Hnahlak chu thalai kut a an dan deuh thin a vanga hnah latura phur em2 mai a kan kal te, thing phurh na ah phur tlem bik nih hlau reng2 a kan thawh thin te, A va han ngaihwm tehlul em, Thawmhnw thar Nu ten min han lei saka kan lungawi zia, hak kan thlakhlelh theih zia te kha ka ngaihtuah in ka lung a ti leng vwng2 mai lawm, lo ziak zel teh.

ruatruatapa November 11, 2011 at 2:59 PM

ziak ngaihnawm thiam hle mai… Kan naupan lai ka ngai (U) (8) (G) (P) (@) (D) (C) (&)

chhana November 12, 2011 at 12:41 AM

Aw Krismass……

Leave a Comment