Christmas Lifestyle Religion

Anni leh Keini/Nangni leh Keini (Sunday Pual)

Khawnge vawiin chu Krismas a hnai ta tak tak bawk a, Arunachal lama Krismas an hman dan i han chhiar ho mai mai teh ang aw.

1. Krismas Arsi (Bethlehem Arsi):

December ni 1 a lo nih chiah hian, Arunachal a Kristian tawh phawt chuan an inah Krismas Arsi(Bethlehem Arsi) tar ngei ngei turah an ngai a, December thla hi chuan, Kristian in hi a chhiar theih a ni. Mahse tunah erawh chuan, Itanagar Capital Complex chhungah hi chuan Kristian an tam tawh lutuk a, chhiar peih chi pawh ani tawh lo. A sen vul chuk ve tawh mai a ni. Mi hausa deuh ho phei chuan Vai hovin Diwali laia an in an chei mawi ang hian eng phe sep sep thei hian an in te, an Chrismas Tree te, an Krismas Arsi te, an in bula thing te chenin an chei vul chuk thin a, khua pawh a timawi tham hle thin.

2. Krismas Carol:
Krismas Carol hi tih ngei ngei turah an ngai bawk a, December ni 10 atang vel hian an tan deuh ber a, ni 20 bawr vel hian an tawp thin. Adi ho hi Music Teacherin a lo thutchilh hma deuh vang leh hnam changkang annih ve hrim hrim avang aniang Krismas hla pawh an nei tha a, Mizo hla Adi tawng a lehlin pawh an sarual ve thiam hle. A hmasa berah Krismas Arsi kengin hma a hruai thin a, Mi hausa deuh ho chuan an kawtah Meipui an lo chhep hluah thin a, chu chu kan lam hual a, a nuam ve thin hle.

Nyishi ho erawh chuan an tawnga Krismas hla han sak rual theih hi an la nei tlem khawp mai a, zai lamah chuan kan pachhe thin hle. Jingle bell, Everybody likes to take a holiday, Joy to the World tih vel hi an sa tlangpui a, chu pawh an sa rual thei vak lo. Amaherawhchu, a tawpah hian mihausa inah hian Pandal tenau an lo siam a, meipui an lo chhep hluah bawk a, hunserh tawite neiin Ruai kan theh thin a, a dai deuh thin na a, Carol man a awm thin hle.

3. Krismas Sports:
Adi ho tih ngai loh, Nyishi hovin an uar em em chu, veng hrang hrangte Sports neih thin hi a ni. An tang thei thin hle. Outdoor ah chuan inhruipawh leh Volleyball hi a tel ngei ngei thin a, Indoor lamah chuan, Bible chang in zawn hmuh hmat siak te, Bible Quiz te, Traditional dress nena in lam siak te, Group singing te a tel ngei thin a, Naupang te ber atanga Pitar-putar thlengin tihtur leh chanpual an nei vek thin a, an hlimpui thin hle a ni.

4. Krismas Cake:
Mizo te angin Lenkhawm/Zaikhawm an nei ve ngai lova, December ni 24 ‘Urlawk zan’ ah hi chuan Indoor Competition an bei nasa thin hle a, zanlai dar 12 chiahah Krismas Cake zai tur a ni. Hei hi Krismas Speaker chanpual a ni a, Thu a sawi zawhah a zai thin. Dar 12 minute 15 a ala rik lohah thu a sawi tan chauh pawhin zanlai dar 12 hi a pel thianglo hrim hrim. Itanagar Capital Complex chhungah hi chuan MLA leh tuna Chief Minister nita, Nabam Tuki te hian Kohhran tinah Krismas Cake hi an pe thin a ni.

5. Krismas Speaker:
Nyishi ho hi chuan Krismas hian Kohhran dang ami a theih hram chuan Kohhrana thawktute hi Speaker ah hman ngei an tum thin a, NBCC G/S hnenah hian Speaker duh hian an rawn dil thin a, a nin a lo sem thin a ni. Krismas Cake zai hi Speaker tihtur liau liau a ngaih a ni bawk. Tin, Speaker hi Present an pe tha thei hle. Nikum khan keipawhin Nyishi chem. Rs.1500 man, Nyishi Jacket Rs.1000 man leh Nyishi Lukhum Vapual Lu awm vung mai Rs.1500 man vel ka dawng a, Ka nupui leh fa te pawh Puan leh Muffler an pe vek bawk a ni.

6. Krismas Ruai:

Krismas Ruai tur hi In tinin thawhlawm thawh a ngaih chang a awm zeuh zeuh na a, a tlangpui thuin Mi hausa ten Sial an thawh tlangpui. Tin, Officer rual te pawhin an sponsor fo bawk. Krismas Inkhawm banah Ruai kan han theh a, Ruai theh zawhah hi chuan Krismas hi a zo chiang thin hle mai a, Mizoram a ngaihawm duh thin hle a ni.

Nikum khan Itanagar ram neitu inti ho khua Ganga kohhran ten Speaker-ah min sawm a. A nuam danglam hle. A chung point a ka sawi ang khian Present pawh kan dawng tha a, Tin, House 4 ah an lo inthen a, an lo inel hle mai a, Sports an lo lana hle mai a ni. Inte nuam tak an lo nei hrang theuh a, ni 24 zanah khan Krismas Cake zai hmain Chung in 4 te chuan Chaw leh Chawhmeh an lo insiam tui siak pek a, a endik turin kei(Krismas Speaker) leh Deputy Commissioner leh All Arunachal Pradesh Student Union President te kha min lo ruat kha a lo nia. (AAPSU President hi Opposition MLA Leader ang tluk vela ngaih anni a, thil an tithei zawk mah lehnghal. Sawrkar laite hian an hlau thin hle.)

Sa chihrang hrang an siam te kha tem diat diat a ngai ta si a, min zui dul dul mai bawk a, a nuam kher mai. A tawpah Ruaithehin a zui nghal a, a nuam hle. Adi ho zingah khan Fatu velah ka tel ngai lova, Galo ho zingah khan tumkhat Fatuah ka tang ve a, a nuam hle. Tukthuan ei hun awm velah khan Sa kawchhung leh Buhban chiar kha kan ei nghek mai a, a hmeh turin Ar kawchhung kan an rawn sem bawk a, Ril a tam bawk a, a tui duh kher mai.

Mizo te nena kan in anloh em em na chu Krismas Lenkhawm /Zaikhawm an nei ve tlat lo hi a ni a, Tin, Krismas ah Games and Sports lam an uar em em mai thung hi a ni. A khawhar thlak duh viau na in, Naupang atanga Pitar-putar thlenga hlim takla tel ngei ngei ngai zawnha Programme an siam thiam hi an fakawmin an awhawm ang reng ka ti thin. Mizoram Krismas Zaikhawm a va ngaihawmin ava chakawm thin em.

Related posts

Food festival: A ni tawp mai.

khumchikthei

Heli, Bethlehem Arsi

CFL

Misualte zawhna

triplestar

28 comments

vlhauhnar December 11, 2011 at 6:21 AM

hriatzauna atan paws tha tak a ni.
Mahse, January 1 atang x’mas arsi an tar ngei ngei tih leh……December chuan christian in a chhiar theih tih khi ka buai deuh hlek.

Reply
PKfanai December 11, 2011 at 7:29 AM

Hets, Admin te u. Point 1 na Krismas arsi tih a, January tih khi December in min lo thlak sak hram teh u. Pliz. Mak thei ngei e.

Reply
lr hlonchhing December 11, 2011 at 8:11 AM

Hriatna tizau tu atan a tha e. Ngaihnawm hranpa ve reng reng e. (Y)

Reply
H.Vangchhia December 11, 2011 at 8:13 AM

(Y)

Reply
Pakak December 11, 2011 at 8:17 AM

bengvar thlak hle mai, paws tupa leh chhiar tu te masi chibai vek u

Reply
PKfanai December 11, 2011 at 9:16 AM

Thanks Admins, ka mawi lohna in rawn hliah khuh a, ka lawm e. Vlhauhnar pawh i chhiar uluk tih a hriat a, a lawmawm e.

Reply
Leviji December 11, 2011 at 9:23 AM

A ngaihnawm khawp mai… (Y) Hnam dang hnena Chanchin tha kan hril hian anhnam zia rang ang zel a kan hril hi apawimawh tak zet… 😀

Reply
LR_rengsi December 11, 2011 at 9:42 AM

A bengverthlak hle mai…Sunday hman nuam vek u.

Reply
century child December 11, 2011 at 10:02 AM

a nawm hmel hle tak mai a (Y)

Reply
TuaiSialA December 11, 2011 at 11:41 AM

A bengvarthlakin a bengverhthlak kher mai.

Reply
Sadbutt December 11, 2011 at 12:10 PM

Christmas Speaker 😀 Dangdai, ngaihnawm hle mai…

Reply
tepuia December 11, 2011 at 12:42 PM

Ngaihnawm in bengvarthlak khawp khawp mai. A post at tanga ka hriat belh chak chu an chawhmeh in siam tui siak ah khian an sa siam kha a tui ve em? An chaw hmeh siam hrang hrang ah Rawtuai uih an chelek viau em? Niyshi in pakhata an kelsa kan ka ei ve chu (’95 vel a ni tawh ang) a thang lutuk a ka ti thei thlawt lo. Chhiar a nuam in a Krismas raih mai. Krismas hman nuam le.

Reply
PKfanai December 11, 2011 at 12:56 PM

@12,tepuia, an sa siam ho kha, Sialsa, Vawksa, Arsa leh Sangha te an nia. Arsa tih loh hi chu a rep leh a hring a awm hran vek a, chhum tawp te, mautuai tenga pawlh te, a tui nei deuh chep chep a kan(curry) te, roast te ani deuh ber. Khawpui anih ve bakah an tunlai ve tawh a, a tui hlawm khawp mai. An bekang erawh chu a tur/tak mah mah a ni.

Reply
PKfanai December 11, 2011 at 1:39 PM

Pu Lh.Lalnghakmawia, Missionary b/o.Dr.Lh.Lalrammawia te inluah lai neitute in
http://i.imgur.com/2Woru.jpg

Reply
Maisek December 11, 2011 at 1:41 PM

(Y)

Reply
PKfanai December 11, 2011 at 1:48 PM

Kristian mihausa chhungkaw pakhatin An kawta Thing(Herhse) zuih nalh tak tak an chei. Zan ani a, Thinghnah a langthei lo.
http://i.imgur.com/Bhd9B.jpg

Reply
Chhuaklinga December 11, 2011 at 3:33 PM

Chawhmeh insiam tui siak tih khi. (y) Chhungtin hian insiam tui siak ila, keng khawm ila chhungkaw dangte nen han thet ho ila, tih hi ka chak thin. Fatute tan a hahdam dawn si, chawhmeh tuihnai leh siam dan tui tak tak kan ei dawn si a.

A bengvarthlakin a nawm hmel hle mai. Krismas hman nuam le. (F)

tren tren.

Reply
PKfanai December 11, 2011 at 3:40 PM

17. (Y) .Sapawt sapawt.

Reply
chawnghilh December 11, 2011 at 4:04 PM

A va bengvarthlak chiang, Zangkawltuk kan tihte ngei pawhin hmasawnna kawng an lo ngah hle mai. Mak ve mai mai chu —US lama an Radio-ah te pawh Christmas vuakvet lai chuan Carol leh Christmas Songs an tichhuak ve reng a. A ni a pelh tawh hi chuan an tichhuak zui lo khawp mai. Mizote hi kan lung a leng rei a, kan retheih phah hial a ni! Veng tlabirha khuang ri tleng tleng, zankhua khuaa lengkhawm an awm peih zui reng thin pawh hi, Khurbinna lam rawngkai a ni duh khawp mai!

Reply
PKfanai December 11, 2011 at 4:15 PM

Pu Chawnghilh, i reh rei vang vang hle mai. I tel lo chuan a khawharthlak ka ti deuh tlat mai. Fb lamah min pemsan te hi ilo tum ngawt ang e. Keipawh thianthate hian min sawm fo thin a, ka la tang tang tang rih anih hi. Tunlai chu misual lam a khawharthlak lek lek thin.

Reply
chawnghilh December 11, 2011 at 5:57 PM

Fb lamah hian ka ti ta mah mah a, ka ngai khawp tho che u. Ka khua a har ve khawp asin, in zinga rawn luh zauh zauh chang, comment nei lo hian ka khawsa tho thin.

Reply
xotea December 11, 2011 at 8:03 PM

Ngaihnawmin bengvarthlak hle mai, chawhmeh insiamtuisiak mawlh khi a nawm hmel riau (Y) Krismas hman nuam

Reply
Astericâ„¢ December 11, 2011 at 9:28 PM

Mizo chu lengkhawm leh inkawm khawm nuam ti mi kan nia Kristmas ah hian kan lung a lengin kan kham khawplo tlangpui vek in ka hria, khawi ah pawh 🙂

(Y)

Reply
CFL December 12, 2011 at 12:22 AM

A bengvarthlak e.
Zai nuam timi tan chuan a khawharthlak hle dawn tak mai a. (I)

Reply
chawnghilh December 12, 2011 at 10:00 AM

Gastronomy hi nuam dangdai ve tak a ni. Hnam tin inhmuhkhawmna remchang ber mai chu World Scout Jamboree hun hi a ni —Dal (dailuah) kan kang ve hluah mai a. Hnam dangin an rawn tem ve nasa. Tui ti awm tak veka kan han infaksak velte kha nuam danglam ve tak a ni. Mexican-ho ZU ka’n duk chiah mai chu; nuam chem chem khawp mai! Arunachalee-ho chawhmeh intemsak chu tel ve ka chak hle mai.

Reply
MamiPa December 12, 2011 at 3:56 PM

khawchhak mifing 3 te zing a tel lo mifing palina an tih chanchin hman ah tu ziak emawni ka chhiar tawh a chhiar leh ka chak hle mai hria in awm lo maw han post teh u

Reply
PKfanai December 12, 2011 at 4:23 PM

mamipa, keipawh ka chhiar tawh ngei mai. A ngaihnawm ka ti khawp mai.

Reply
PKfanai December 12, 2011 at 5:28 PM

@26.Mamipa,Ka hai chhuak a, Thawnthu sei tak ani a, Sunday lehah a tawi thei ang bera kaitawiin rawn post ka tum dawn nia.

Reply

Leave a Comment

Skip to toolbar