Whatever

Dawt Sawi Thiam Mifel!

Tute emaw thuziak anga hlathu nena han chham thlum vel chiam pawh ka tum lem lo. Rilrua awm ang ang hi han puahchhuahpui leh phawng phawng ila, a tha a ni mai. Duh leh ‘Hmui Kaisara, thinlung Bethlehem’ te pawh kan ni mai ta lawng! A ni tak taka, December thla han chuankai meuh hi chuan vawi te khat mah a hring a hran pawha kan la hmuh loh, thlasik mangah tak ngial pawh kan la man loh Bethlehem te hi kan han ngai ve kawkalh a! Takzet hian!

Facebook lamah lah thiante’n, “Engtik nge i lo haw dawn?” tiin min zawt awl lova. A sawi pawh ka sawi ning deuh hlek tawh hial a. Mi ang lo takin Masi vuakvet nang hman lovin, urlawk ni velah Rulchawm dawrkawnah kan tumthla khu leh luih mai dawn a ni. Engtik lai atang chiah khan nge heti khawpa ka buai tak a, Krismas tak ngial pawh rilru dam dapa ka hman theih tak loh pawh hi ka hre mumal tawh bik lo. Mahse, thil nihdan phung inthlak danglam hian nunphung tharah min kailut miau tawh si a. A ngaihna tak pawh ka hre meuh tawh lo ve. Hetia keinin, Masi nghakhlel ngawih ngawiha zing thang thanga “O come, all ye faithful..” kan tih lung lung lai hian thenkhat erawh chuan kan kalphung hi ‘vanram kai lo tur style’ niin min hriatsak a. Mizote thinlunga vanram kal chakna a lian lutuk hi (ti khanglang ila!) eng vang nge pawh ka hre tawh bik lo. Kan vanram kai loh hlau lutuk Israel ramah te pemin, serh tan loh nih hlauvin a sang tel kan inpuchhuak a, kan inpemsan dawr dawr hlawm tak a! Vanram aiah hian kan pi leh pute beisei ‘pialral’ zawk kha a lo awm hlauh anga, Pawla hian a lo sai pawp pawp hlawm ang tih te hi ka hlau. A zia lo dawn em a sin!

Facebook lam bawkin rilru a la luah ta cheu mai. Sawi zawm zel teh ang. An siamdan phungin a zir bawk a. Mi maksak tak tak ka tawng ta teuh mai. Hmaichhana inhmu ni ila a melh pawh min melh peih hlei lo tur te hian mitak cheiin min han chei ve a. Group eng eng emaw-ah te kan han awm ve a, patling thankin uah tawh pawn ‘Tun dinhmunah hian Mizoram hi Independence thei kan ni’ (independent ti lovin) ‘A tul chuan bahra pawh kan lai mai ang’ te an ti thul. Keini ang thingtlang fahrin, thirsakawr khalh aia thingkung lawn thiam hmasate nen hi chuan kan ngaihdan te hi a inpersan nasa ta mai thin a. Bahra laih tur a van tluk zetin ngaihtuahna tak tak seng mi te pawh hi an vang ta a nih hi maw le. Heti a ni chung hian zantin mi titi kotlangah kan la dakfan peih thova. A, peih loh theih pawh a ni chiah lo. Bhubaneswar ang khaw mawngping atang chuan zanlai pelha Airtel hmang ngeia “I miss you too” han tihpui vel tur kha awm mawlh hek lo! Zanah light off-in kan han mu ve hmak a; Zoram lam leh hmun danga inbengbel kan thiante chuan mitthla-ah an bialnu te an hmuh zet zet laiin, keini ve chu kan han maimichhing hlek a, mitthla-ah Konark Temple te a lang leh lurh mai thin a. A ngaihna hi a awm ngang lo a ni e.

Ka thuziak thupui atana ka vuah khi ka thlak leh daih dawn em maw ni chu aw. A thupuia lut lova thuziak hi ka kalna lam tur tak zawk te pawh a ni ta ve ang. Kan nikhua lo he hu tawh em mai. Lut zuai ang. Zanin chu heti hian ka ngaihtuah mai mai a. Dawt sawi theih miah lohna khawvel hi awm ta se, a hrehawm awm tih hi. Mi hawihawm pawh a awm hleihtheih loh anga. Thiante fa hmelchhe ve tak takte pawh dim baksak lovin, “Khai a! Tu thiam loh nge? Hetiang em ema fa hmelchhia in neih ka lo ring lova”, te kan intihsak anga. Anni lam lahin min thlahlel der vel lovin, “I leng rei tawh kan mut a chhuak, haw tawh rawh”, te min ti lawlh lawlh mai dawn a. A zia lo ngawt ang. He kan khawvelah hi zawng, mi dawheh lo hi kan awm tak tak lova, dawt sawi nachang hre lo hi chu mi a an nih loh vek pawhin mi pangngai pha zan lo an ni chawk a nih si hi.

Related posts

Traits required to succeed in politics

benjamin rualthanzauva

Notice at SBI ATM, Bawngkawn

The_Chhamanator

Your fav line?

commieguerra

22 comments

lyze December 6, 2011 at 1:03 PM

Chhiar ilaa

kilung December 6, 2011 at 1:25 PM

Nia, chhiar ang.

Dr Mahminga Sailo December 6, 2011 at 1:26 PM

Phur lo deuh chungin ka chhiarchhuak dawn emaw ka tia, ka chhiar thui tial tial a, ka tui tual tual; a tawp leh daih si.. :-O

Ziak ngaihnawm hle mai(Y) (G)

Post-tu pa, Lungngai mah ta che, nang ang (i insawi ang tak tak i nih chuan.. 😀 ) hi kan la awm a nia. Bangalore khawpui changkang (an tih) ah pawh engtehual kan nih bik loh hi 😛 😛

sheldon December 6, 2011 at 1:28 PM

A nih duh hmel hle tak mai. Mahse kei chu Facebook lam hi sawitur ka hreve lo. Account pawh ka nei lova, ka online ve na awmchhun chu Misual hi a ni mai a. Hetah pawh hian i sawi ang hi a ni tho mai. Kan ‘anonymous’ na hi a nawmna pakhat chu a ni tlat. Inhrechiang em em hlawm ila chu kan online peihlo tawp ang.

Rokok December 6, 2011 at 1:35 PM

Ka rin ai ka chhiar ngaihnawm ka tiphian. post tha khawp mai..(Y) facebook i rawn sawite phei hi chu:-D hmelchhe deuhin hmel tha deuh pic an bel daiha anmahni pic chu hei hi ka thian ania an ti daih 😛 I sawi anga dawt sawi theih tawh loh ni se kan va intuk ngun hlawm awm ve le… te ka ti mai mai 😉

Chhuaklinga December 6, 2011 at 1:42 PM

Ngaihnawm hle mai. A thupuiah i lut hman lo teuh hle tak mai a. :d (y)

Keipawh Sheldy ang khian facebook hi ka chul nel teh chiam lo khawp mai. Ka hriat tirh chuan hmai cheina lam ziahna bu hming emaw ka ti vel. :p :d Misual hi a tha ber mai.

tren tren.

coolsoul09 December 6, 2011 at 1:45 PM

Hei kan biru char char a, Masi dawnah chuan kan rawn inhawlhchhuak ve leh zawk mai alawm 😀 Admin lam an zahawm lek lek mai..

Dr Mahminga Sailo December 6, 2011 at 2:00 PM

Facebook in sawi tak ah chuan.., intineitu deuhin ka’n sawi mai ang e 😛 Facebook hi ka hmang tam khawp mai.

(&) (@) chanchinte, ka awmna, ka thiltih, adt., hi ka ziak kur luk zel mai 😀

DXBFreak December 6, 2011 at 2:00 PM

ka chhiar rei tulh tulha chhiar tui telh telha, a zo thuta ka kham lo hle mai.. (Y)

Dr Mahminga Sailo December 6, 2011 at 2:07 PM

Chuan…, nick-name (an ti maw ni? :-O ) hi ka nei ve lem lo a. Ka hming ngai ngai hian khawi hmun (site) ah pawh ka comment mai thin. Tichuan, ka tihdikloh leh felhlelhna te, ka thiantha te’n min hrilh fawk fawk thei ang tih ka ring. Thil tha ber a ni em tih erawh ka hre bik law.. 😀

Misual zing a mi pakhat hian putar emaw min lo ti lehnghal.., ka la young mai nen hian… 😛 😛

Keimah Thingtlangpa December 6, 2011 at 2:25 PM

A post tupa hi Dina Tlau a ni em le?

Dr Mahminga Sailo December 6, 2011 at 2:39 PM

Keimah Thingtlangpa… Ni lo tlat. Ka hre rin ran mai a, kei chu… 😉

boihapa December 6, 2011 at 2:40 PM

Fb chu ka lut ve zuai thin. Ka awmna group amiin he ka commet hi lo hmu fuh palh in awm hlauh chuan min man chiang fu ta ve ang. Mi tu pawh mai hian thu dik sawi ngam loh hun kan nei theuh a, thenkhatin ngawih an chuh a, thenkhatin dawt an sawi phah bawk a. Thu dik chauh sawi thin pawh lo ni ta ila, mi a ber leh sual berah puh thluk kan ni tho2 ang. Hei hi kan Lalpa Isua Krista chanvo kha a lo ni reng mai! OT zuai- vawiin chu present turin Holy Bible lei tumin ka chhuak a, ka tlan kual nasain a awmna tura ngaih chu ka en kim viau na a, ka hmu zo der lo mai a! A remchang bawka tiin Aizawl Watch House-a kan MISUAL.COMMER CHARITY Box chu 9:35Am vel chiah khan ka’n bel chiang ve a. Pawisa thlak zat leh hming an lo chhinchhiah a lo ni a. Ka inthlahrun deuh avang leh ka beisei lawk lem loh thil a nih avangin, “boihapa” tih chu pial deuh puatin kan sawi pek a. Hre fuh tak ang maw?

sheldon December 6, 2011 at 3:02 PM

@boihapa, charity box chu hming an ziak maw..va zahthlak ve a, ka la thlak lo lehnghal…

ChhanaPa December 6, 2011 at 3:12 PM

Post tha khawp mai. Ni 1 lek chu kei pawh dawtsawi lo a awm kan tum teh ang ka ti a,ka thei lo. Thiante nen kan inkarah buai a awm nghal a ni mai. Chuan, charity chungchang.Kei pawh hming an ziah chuan ka pe ve ngam dawn emaw ni? Engtik thleng nge a pek theih dawn?

laltheri December 6, 2011 at 3:18 PM

ka hel ka hel a,ka chhiar ta a lo ngaihnawm reuh phian a (Y)

boihapa December 6, 2011 at 3:28 PM

@14 Sheldon, tih dan ka hria. A ziaktu hnenah khan, ‘khawi keiman ka lo ziak’ tia dil a, mahni nick name leh thlak zat kha mahniin ziah mai tur. Tichuan kal nghal vang vang mai tur. Kawngka bul maiah khan a nia, Chhanapa, a zahthlak reng reng lo. Thil tha tih tur hriaa ti si lo chu a tan sual a ni tih a ni em kha hehe.. Tak taka zak lo e a, thilsual tih mah an zah loh chuan thil tha tihte chu kan awmna tura buatsaih lawk a nih kha i’n ti deuh duah teh ang.

xollie December 6, 2011 at 3:39 PM

boihapa @13, Synod Bookroom ah Holy Bible chu an nei lo ami?

FB te hi an sawi ta tehdaih a….ka bo kual vel vek toh keichu

ltvangchhia December 6, 2011 at 4:18 PM

Post tupa i sawi dik tep, mahse dawt itih thenkhat khi chu dawt nilo in etiquete & manner ani zawk lo maw ka ti deuh. 🙂
@ Sheldon facebook ah ka lo zawng tiah2 che a hahaha :-O

Asteric December 6, 2011 at 4:44 PM

Ziak thiam khawp mai, Konark Temple i rawn sawi tê chuan ka lung a ti leng mange. Ni sa rum rut hnuai ah khan kan vei ve zak zak tawh nghe nghe a nia. 😉

Mihring thinlung hi bum hmang chhe lailet der a ni Bible in a tih kha….kan nihna ang tak hi lan chhuahpui/x-ray ila a á¹­awp lutuk, kan pianpui mizia hi chu sual a ni a Dawtpa/Diabola fa te kha kan nia chuvangin “Dawt pawh ni miahlo, Pathian thu tak zawk hmangin kan khap dai zel zawk tur a ni.” Kan mize dik kan hriat hnu chuan “Thu Tak hriat tir hi ka rawn pian chhan chu a ni” Isuan a tih kha a chiang uarh uarh mai ang 🙂

Msi December 6, 2011 at 10:28 PM

Nangmah pui rauh hian mi an loh hi i hlau em a i chhan a nuamlo ta deuh a ang…kei chu ka hahchhiau pui tur a mei zu put put a awm chuan..”A khu pawn ah va zu rawh” ka ti mai..mihring kan inang lo a..kan duh dan pawh a inang lo a ni mai lawm..enge ni vei…mi ang an awm theih nan mi ang lo an awm a ngai tho tho lawm…chuti lo ten tehna tur a awm nang le!

beethugs2 December 6, 2011 at 10:59 PM

A va ngaihnawm mai mai reuh e..Dawt hi sawifiah fe a ngai awm e. Midang tan a pawi tur anih lem loh te hi chuan a pawi vak emaw ni le..tih chang ka nei fo mai 😛

Tute emaw in an rilru zawng zawng a Independence an han sawi mawi hi chu a..!! ka lo ner sawk sawk zel nih chu.

Leave a Comment