Lifestyle Mizo Society & Culture

Hnathawh Kawr

Krismas leh kumthar ruai ṭheh leh zai tui a liam a, a lunglêng zualte khuang khatin an zai tleng tleng chauh tawh a, a pianna lam hla phei chu tuman châng khat pawh an sa peih tawh lo. Ruai sa chhumna hârte chu an lang ṭhing deuh ṭhiap tawh a, vut leh thingthu kâng bâng ârin a thai darh niai te chuan Krismas lo thleng leh tûr chu dam rei nghah thil a ni tih min hriattir a.

Thlasik khaw vawt chu ṭhâl ruah sûr zeuh chuan a rawn belh a, tang a han thâwm leh rih a. Krismas boruak ngaiin han thlir lêt dâwn ila awmzia a nei tawh si lo, hma lam han thlir dâwn ila rilru leh taksain a la peih meuh bawk si lo. He tih lai vêl boruak hi a nawm dân a laklawh ṭhin ngawt mai!

Krismas kawr aiah hnathawh kawr: Kum thar zawh Pathianni hmasa ber a han liam meuh chuan thingtlang pa ho tî-tî a inthlâk ṭan a, Thanpuii pa vaihlo tuizia te, Aizawlah hmarcha ro hralh a nawmzia te sawi pahin kumin lo neih tûr mau hmun vah nân khawchhak chem hriam lei tûr a awm thute chu tî-ti tlânglâwn a ni ta.

Zing ni chhuak hnung puak zâwngin lungtât an han kapkalak a, tui novah tui an han chhawp sauh sauh a, khawchhak chem thar ngei mai kha tle vawr khawpa hriamin patlingin an han tât a, ni ênga an hlimthla phe zoh zoh khawpin an chem tât an han su nghoh nghoh mai chu hmuhnawm a tling ṭhin a ni! Chutah Krismas hma deuha Zupâwl tuam ṭuma an hâk hnuhnun ber, an hnathawh kawr vawt khawng iaih tawh kha an han thing phawrh phawrh a, inhmeh êm êmin an han ha leh ta zân mai le!

Chu hnathawh kawr chu: He hnathawh kawr chanchin hi a nia ka sawi duh tak chu ni! Tual-tah dik tak, a tirah chuan a vâr, tunah erawh chuan a vâr aiin a uk lam a pâwl mah tawh a, hmun thenkhat laiah phei chuan a ṭial emaw tih mai theihin thing hnai leh reh thei lo dangten an ṭial mawi hle tawh a. A kawr hmalam hnuai deuh hlekah hian ipte pahnih a awm a, a ipte vei lam phei chu a peh deuh nual tawh. A tira kawrkilh (keptê) invuah kim ve ṭhap kha tûnah chuan pathum chiah a awm tawh a, a hatu erawh chuan chu chu ngaimawh êm êm âwm pawhin a lang hlei lo va!.

Chu hnathawh kawr chu a bân tlâwn (tluan) a ni na a, a bân hmâwr ve ve chu tih luih ni si lo hian an hniar sung tawh a. A ban kiu lai chu a ṭet ve ve tawh bawk a, a bân dinglam erawh chu Favâng awllên lai khan an bel tawh avangin a la phui ṭha hle thung. A nghâwng chu a balh êm êm vâng pawh ni lovin a khâk bel tlat tawh a, sûk leh sûk loh thuhmun rengin a rawng chu a inthlâk ve mai mai ngai tawh hek lo.

He hnathawh kawr hi a rim hle a, Pathian ni leh ni bik tê tih chauh lovah chuan kâwla ni chhuak chhiarin a thawk chhuak ṭhin a. Fûr leh ṭhâl, a sûr a sa hnuaiah rinawm takin a hatu hi a ṭawiâwm tluan chhuak zak ṭhin. Vahsân lâk aṭangin Pâwltlâk thlengin âwl tih ni rêng a nei ngai lo. He hnathawh kawr hian hmun tin hmun tang a fang chhuak tawh ṭhin a, Leithûm ram aṭanga Mauhâk ram thlengin fan loha ram pawh a nei tawh lo. Fan phâk china lui dung zawng zawng zawh chhuakin, ngaw dur leh phul pik tam tak a lo tâwn tlang tawh bawk a ni.

Tuisik leh sahbawn aiin thlan tuiin a chiah hnem zâwk a, rimtuina aiin rinawmna a thlang zâwk á¹­hin. A hmêlah mawina rêng rêng a nei lo va, a pian tirh ata tuman ” a va mawi êm ” tiin an la fak chhin eih bawk hek lo. Amah nâwt mâm tûrin Istiri a la tawng ngai lo va, phuh rimtui tûrin eng ‘perfume’ mah a la hnimhnai chhin hek lo. Khawpuia a kal chângte leh changkânna hmun deuhah chuan a rawng leh a zia te chu han thlâk ve deuh nual á¹­hin mah se tuman nalh leh mawi tiin an fak ngai chuang lo va, mite duh leh ngainat a hlawh phah sawt chuang hek lo.

Hlawhtlinna thlentu-Hnathawh Kawr! Thil mak tak mai chu heihi a ni: He hnathawh kawr hi a ngainatu apiang leh a ha ngun apiangte tân hlawhtlinna thlentu zu ni tlat a! Amah hian malsâwmna a keng tel ve hrim hrim emaw tih tûrin a ngainatute chu tlakchhamna lakah a vêng ṭhin a, thawhrimna hi a thupui a nih avangin mi mâwl leh zir sâng vak lote pawhin an lo dinchhuahpui tawh thin a, an dinchhuahpui mêk zêl bawk. Chhût miten an han chhût chian phei chuan he hnathawh kawr ngei mai hi mimal chauh pawh ni lo, chhûngkua leh ram dinchhuahna bul tumtu pawh a lo ni reng a ni tih an hmuchhuak a ni.

Ṭhangtharten an zahpui em ni? He hnathawh kawr hi a tlâwma a lan changkân loh êm avâng hian tunlai ṭhangthar tam takte hmuhsit leh zahpui a tâwk mêk niin an sawi a, tak tak ni maw? Pâwn lam lan dân leh thawmhnaw hâk aṭang ringawta mite ‘judge’ ṭhin tan chuan hriatthiam a har êm rêng a ni. Thawmhnaw ropui leh man to ber ber ha apiang hi mi ropui leh ngaihsânawm an ni kher lo tih hre tûrin an kumin a la pha lo te pawh a ni mahna.

A hmêl enin tlâwm hle mah se chhûngril lama a ropuizia ka hmu a; khawvêl mi ropui zawng zawngte pawhin an lo hâk ṭhin a ni tih han hriat phei chuan he hnathawh kawr hi a ha vêtu nih ringawt pawh inchhuanna tham a lo ni reng mai. A mizia leh nihna hi Siamtu rîlrem zâwng tak mai a lo ni leh zêl bawk nên, kei zawng he hnathawh kawr hi ka ngaisâng lo thei lo a ni e.

(Tun á¹­um chu blog lama mi ka han share ve teh tlat a nih hi..inthlahrung lo takin!)

Related posts

Tûnlai Nula/Tlangvâl/Tleirâwl

Awmtea Khiangte

Aw min hrilh rawh zaninah ngei (updated)

mzvision

Prince William leh Catherine Middleton an in hual ta

Aryan

35 comments

Tete-i January 10, 2012 at 11:36 AM

chhiar ang..

Reply
XaiA January 10, 2012 at 11:37 AM

A va tha em.A ril zek bawk si a.

Reply
Mahminga Sailo January 10, 2012 at 11:49 AM

Thu i thiam, a ngaihnawm e… (Y)

Reply
Sony January 10, 2012 at 11:49 AM

Ka hnathawh kawr chu shirt var, tie dum (emaw sen) suit dum, uk emaw pawl. Thawh hun 9.00 a.m. atanga 5.30 p.m., Thawhtanni atanga Zirtawpni thleng.

Reply
TuaiSialA January 10, 2012 at 11:51 AM

Keimah, i va han ziak thiam em em ve! A tha bawk si. Chhiar a kal kher mai. Thingtlang nun pawh i lo hrechiang mang e. Hnathawh kawr hak a zahthlak loh zia i tarlang chiang viau e.

Reply
keimah January 10, 2012 at 12:04 PM

XaiA & Mahminga, thanks. @Sony,i hnathawh kawr pawh khi a zahawm dan thuhmun reng a ni e. Khawpui leh hmun changkang deuhah chuan hnathawh kawr hian a rawng leh a zia a thlâk ve ṭhin rêng a ni.

TSA, thingtlang pa ka ni e! (*)

Reply
lianchhiara January 10, 2012 at 12:05 PM

A ngaihnawm e. Hla phuahtu hi thuziak thiam a lo ni bawk a nih hi 😀

Reply
Kawnga January 10, 2012 at 12:06 PM

E khai! Chhiar a nuamin a va ril em! A thu ken a ropui a, Mizo hnam zia thui tak a tarlang bawk a, a taka tawng ve kher lo tan phei chuan zeldin thubawl mai chuan hetianga tha-a ziah chhuah hi a har khawp ang le.

Thawk mang lova hausak tumna thlarauvin kan ram a chimpil mek lai hian he ‘Hnathawh Kawr’ ngei mai hi kan ram mamawh ber chu a ni. Hnathawh hlau tlat ram ropui tak tak, sal te hmanga inchhek arbawm a, nuam tawl thin te an lo tluchhe fo tawh a. Chutih laiin, hnathawh hi atchilh tlat ram tam tak an lo dinchhuak tawhin an la dingchhuak mek zel bawk a. Kan ram hi hnathawh kawr nen lo chuan kan dingchhuak mawlh lovang tih hi pawm ngam ang u hmiang.

Reply
kawlhawk January 10, 2012 at 12:11 PM

A ngaihnawmin a va’n tha tehlul em! ★★★★★ ka pe chiang bang e.

Ka senior – Pu Keimaha te’n min la thlahthlam lo hi a thlamuanthlak mange! (Y)

Reply
keimah January 10, 2012 at 12:26 PM

@lianchhiara #7, hla hi thu, thu hi hla an lo tih á¹­hin kha maw!! 🙂

Kawnga, nang a lawm ziak ril thei le! I comment para 2-na khi he post zawm nan hian vawm bei ve mai a va chakawm ve!

@kawlhawk, happy new year maw le! Misual hi chuan mi(sual) bawk hi kan ngaina a, kan bansan hlei thei lo a nih hi maw! 🙂

Reply
lamea25 January 10, 2012 at 12:34 PM

Lung ava kuaiin lung te pawh ati leng. Ka rilru ah i hnathawh kawr khi ka mitthla chuai chuai mai

Reply
Pc-a January 10, 2012 at 12:49 PM

Ka pa nena lo kan vahdun lai minti hrechhuak. Ka naupanlai chuan kapa hnathawhkawr rim kha rimtui ka ti thin tak tak.

Reply
century child January 10, 2012 at 12:56 PM

A va tha ve le.
Kan hnathawh kawr theuh i ha rim ang u. Mutkawr nen chuan hna kan thawk dim riau zel.
Post tha lutuk.

Reply
Asteric January 10, 2012 at 1:21 PM

Kawr chanchin ziak ah chuan ngaihnawm pawl tak a nih hi 😉 Mahse hna kan thawh tak tak laia ka hnathawh kawr aiin ala fai tlat 😉

Mihring hi kan incheina leh kan rilru hi thûk takin a in zawm a ni, hnathawh kawr ha tam an chapo ngai lo. Mi á¹­awp erawh an zahawm ngai lo 😉

Reply
Zofa H Chhangte January 10, 2012 at 1:48 PM

ava thlep á¹­ha em em ve.. copy ila. sermon sawi dawnah pawh chhiar leh zauh chi a ni. (Y)

Reply
Chhuaklinga January 10, 2012 at 2:06 PM

A va ngaihnawm em, khi hnathawhkawr ha tawh thin tute avang a suit nalh tak tak nen a hnathawk thei kan lo ni si a. Ka like e. (Y)

tren tren.

Reply
CFL January 10, 2012 at 2:31 PM

@ A va tha kher vele! Post of the month ah ka puang ve ngawt teh ang.
@ Thingtlang tlangval tih takah zirna avangin fehrehsan awm lohna hmunah han awm ve thin mahila, lam ang leta vangkhaw lamah haw hi chuan a tuk mai atangin hnathawh kawr nen ram hna thawkin kan chhuak leh mai thin chu a ni a. Hrehawm en pawha en lovin a ve tur renga ngaihna nen kan chhuak thin a ni tak si a. He post hian thingtlang nun a tarlangin hnuk hial a tiulh thei mai a. ;-(
@ Pu Keimaha’n misual.com a chhuahsan hun hunah misual.com a ka membership hi a derthawng hle a lo ni tawh ang. Chuvang chuan he site hi a chhuahsan mai mai tur a ni lo. (I)

Reply
ReMpY_ScisSoR January 10, 2012 at 3:07 PM

A va ngaihnawm roh ve 🙂

Reply
PKfanai January 10, 2012 at 3:32 PM

Hetiang thutak pai deuh khalh Post hi awm zeuh zeuh se a tha khawp mai. misual.com tihlu tu pawh a ni e. Comment erawh chu a tam mawh deuh. :-O

Reply
keimah January 10, 2012 at 4:04 PM

Comment-tu zawng zawng a hlâwmin lâwmthu ka han hrilh hnawk mai teh ang che u! @CFL, mi(sual)-dawt-kawm hi chhuahsan mai mai ka tum awzâwng lo a nia! He site-ah hian a thawh hlâwktu ai mahin a chhawr ṭangkaitu ka ni tih hi ka inhre reng bawk ṭhin. Mi(sual) aṭang hian thil thar leh bengvârna ka chhar tam tawh êm mai!! (F) (F) (Y)

Reply
Mahminga Sailo January 10, 2012 at 4:18 PM

# 19… (Y)

Reply
Diktea_Pa January 10, 2012 at 4:23 PM

A va han tha teh lul em. (Y)

Reply
kawlhawk January 10, 2012 at 4:29 PM

He paws hi – Ka chhiar a… Ka chhiar nawn a… Ka chhiar leh thin!!

Reply
lr hlonchhing January 10, 2012 at 4:31 PM

Thu i thiam a, a ngaihnawm piah lamah; thuziak tha tak a ni e. Nice (Y)

Reply
doc_lib January 10, 2012 at 4:40 PM

Va tha mai mai ve aw. Matric examna fee tur inhlawh a bankhur kan laih tum a ka kekawr mawng pawp hak te pawh min ti hre chhuak dawn a lawm le..Naupan zual deuh laia dai huh hniang mai kara hmarcha mal te kha aw..Ip te hi a va han puar har thin tak em..lung te pawh a ti leng alawm le i post chuan

Reply
keimah January 10, 2012 at 4:49 PM

Diktea Pa#22 meuhvin tha a tih chuan thaah pawm ve tawp mai ang!

Kawlhawk, lr hlonchhing & doc_lib, in comment a lawmawm mang e.

Reply
Ignatia (33-115 AD) January 10, 2012 at 5:03 PM

Pu Adam Smith, Scottish Philosopher leh Economist chuan hetiang hian a sawi, “Labour was the first price, the original purchase – money that was paid for all things. It was not by gold or by silver, but by labour, that all wealth of the world was originally purchased.”

Zofate hian kut hnathawh ka tih ang chi hi kan thinlungin kan hnualsuat ang tih a hlauhawm thin.

Good article.

Reply
CFL January 10, 2012 at 5:36 PM

He post hi ka save hmak mai. (Y)

Reply
sheldon January 10, 2012 at 6:06 PM

Post tha hle mai. Nia, kan hnathawh kawr hi a inang tawhlo. Hnathawh kawr chi hrang hrang kan ha tawh, thenkhatin Suit leh tie nen, thenkhat erawh chuan hnathawh kawr leh chempui nen, inanglo nuaih mahse kan hnathawh kawr hakna theuh ah hian taima tak leh rinawm takin thawk ila.

Reply
rohlupuia chalrang January 10, 2012 at 8:21 PM

ka chhiar laiin mizo nun ka ngaihtuah chhuak…..

Reply
Maya January 10, 2012 at 10:04 PM

a va tha em . (Y) . mit thla ah a lang chuai chuai mai a lawm . . .khi hnathawh kawr ha tu khi , hlawh tlin na leh beiseina hlim hmel pu chung in thangthar te mitthla ah cham thei tur in kan ram hian siamthat a mamawh . tun ah hian i sawi ang hnathawh kawr ha tu te ah hian beiseina hlim hmel hmuh tur a awm em aw ? ka ti thin .

Reply
Kawnga January 10, 2012 at 10:45 PM

Thutak leh thu tha tak Post hian sawizui a hlawh lo viau zel mai hi chu aw!! Kan chhiar vek tho turah ngai phawt ila…

Reply
Maya January 10, 2012 at 11:47 PM

ani khawp mai @ kawnga thu tha leh thu tak deuh ah hi chuan mi tam zawk hian mi fing leh thiam pui pui kar ah kan sawi zui in kan lo chip ve vak ngam lo thin a lawm .

Reply
chhangte_ll January 10, 2012 at 11:51 PM

Thu leh hla hichu kan in fah ngun mawlh mawlh teh e, mahse misual dawt kawm members te Aizawla inhmukhawm tur ringawt pawh ke a kalpeih an awm hmel si lo..tsk tsk tsk… :-S ;-(

Reply
bulaya January 11, 2012 at 2:14 PM

Chhiar a manhla e. (Y)

Reply

Leave a Comment