Luangliam

Ninawm-rean (Korean) vangin maw!!

Kum thar kan chuang kai ta bawk a, ka Puan In hmun ka’n zauh ve tan ang e. Ngawi renga mi thu ziak chhiar kum tluan reng mai zawng vawi khat pian ve manah a ho bik tlat. Mite angin tawngkam bungrua nei tha lo mah ila, nakina tu leh fate hovin A Pu thuziak an tih ve tur pakhat tal hnutchhiah lova val ka fam tur hi ni thei bik in ka hre lo a. Tun lai nula pawnfen ang deuh in, a pawimawh lai khuh zo tur tawk a fual, a itawm tawka chhingin mi(sual) mit hmuah a tum khatna atan kan thai kawi ve ang e.

Nausen pianghlim chuan tah bak a la thiam loh avangin a tum lawk vang reng pawh ni lovin a rawn tap chhuak hmasa ber a. Nakinah nau fel tak nge, tahbelh tak a la nih dawn pawh a hre bik hauh lo. Chutiang deuh chuan kei pawh ka thiam tawk a la nih miau avangin tawngkam fahrah te hmangin thu sai sa zet ka rawn thehchhuak ve a. Thu puitling leh chhiar nuam tak a nih pawh lo ring suh u; ring lo mai pawh ni lovin lo beisei lo hial zawk rawh u! Thu ziak lamah chuan literature hnute tui hne lai mek, barh chawp ngai ka la ni a. Ziak lama ka u rual, rilru vei zawng duh tawka sep chhuak thiam rual thiau awmkhawm in  ni tih ka hria a. Chuvangin in sawiselna leh thurawn tha tak tak te beisei a, in zara par ka lo chhuan ve theih nan mualpho huamin ka rawn ziak ve rawih a ni e.

Chak tawh naka laia thlam bang pin tih ang deuh in, a kotlanga hel hel lovin thupui lamah khian sawrbing nghal ang aw..! Mahni Pa hming sawi thei chin atanga Upa pawl member ni phak thlenga kan buaipui, kei leh ka hmangaih inkara buaina sim fo tu chu khawchhak tleitir feng chhing, zuih lu buk lo hi an ni..engvang phiangsen chuan maw…? E le zan tin deuh thaw T.V-a an inlan avangin biahthu D inhlan a rem lo thin. Keini ang hmel BPL deuh pawh hian kan mit hi khawhmuh nan ringawt kan hmang phal bik lova;  nula hmeltha leh kheh eng phat tur chin chu kan melh ve ran a.

Zawngte tui thlum hmu ang maia han birh sek takah chuan daifema mi fanu rangkachak fun ka chhar ve nawlh mai a. Pathian malsawmna ka dawn a ni ber e. Mahse, malsawmna dawn zinga sawmapakhat a pek chi a nih hauh si loh avangin ka thinlung  pindanah ka khung bet a, tisaa ka la neih loh ni mah se hmangaihna avanga ka ta a nih miau si avangin inngaizawng chu kan lo ni ve ta. Ka ngaiin ka thlahlel ngawih ngawih a, zing ni chhuah atanga zan lai thlifim a thawt thlenga biak reng mai ka duh thin. Nupa pawh lo ni in, mu dun reng mah ila, leh lam a hawi chhung zeuh paw’n ka ngai lutuk hian lehkha ka thawn duh hial in ka ring! Ka hun tam zawk hi atan ka hlan a, ka thisen nalamin a dawt zo lo chauh a ni. Chuti khawpa ka hmangaih chuan kei aiin Korean film en a thlang zawk si thin. A na a ni..a na hit chuai mai. Chu chuan he thu hi kei ziak mi ni lo ber mai chungah zahtheihlohna lantir in, min mualpho tir ta nih hi. He thu ziak chhiartute chuan a ziaktu hi over min ti mai thei. Mahse, over ka in ti ve hauh lo. Ka duh zia hi ka tawngkam thiamna in a daih loh avangin ka la sawi famkim lo zawk a ni.

Ka tan chuan Korean film hi ninawm-rean a ni a. Ka hmelma kawlh sen te an ni. Ka duh ber in min hriatchan loh phah a. Min ngaihmelhna mit an kher chhiat sak a, a rilru min la hip bo sak zui. Chhun lamah mahni hna ve ve a kan buai avangin inbiakna hun tha kan nei lo a. Tlai khua a lo thim a, a aw nem no tak mai ka hriat chak em avangin kutzungtang khap mawlh mawlh khawpa hmanhmawhin chaw ka bar a, ka’n call a, minute sawm tha awrh kan inbiak chuan Korean en a ngaih avangin duhtawk a lo tul leh a. Se se thu D chu sawi loh hello kan ti hman tawk vel a ni. En han phal dawn lo ngawt ila, mi hriatthiamna pawh I nei lo …hmangaihna chuan a dawh thei a, chuti kha ti a ti leh bawk si. He thu hi chu nula bible keu peuh vak lo paw’n an chang chawi ve tlat. Bible bung leh chang sang tam tak karah hemi ziak hi chu hmangaihte hmaa pangchan nan chuan a lo remchang ve bawk em a tin ni. Chuvanga dawhtla fo reng pawh an nih ka ring! A en a nih rau rau paw’n a tha lai te zir chhuak ve tal se.

Kan inneih hnuah khang Korean nula ho in an mipate an zah dan leh duat thiamna tal kha rawn chhawm tel dawn se la chuan en fo rawh ka ti ang. Mahse, ka laka pangchan uchuak dan a rawn zir thar a, a inchei pang tan ringawt hi chu zan tin inhriatthiam rah atan chuan nep chu ka ti. An lu an zuah buk ang khan kan inhmangaihna par hi zuah buk ve thung ila, an kekawr an zum(thui zuih) ang khan kan induhtawnna zuih ral/ thamral tur hi veng zawk ila kan hlawkpui phian chuan ka ring.

Lehlam zawng taka thlir erawh chuan mahni duhzawng tak mai han en chu a nuam ve bawk si a. Englekhawle, khuanu ruat anga kan awm a nih chuan nakin lawka a taksa leh rilru na lama ka la bawh beh tur a ni tho a; inngaihzawn chhung chu Lalna hun I hawn sak ve phawt mai teh ang. Han then ringawt dawn I la, ani anga tha tawng leh tur chuan Mithianghlim lawr hma chuan hun ka nei tawh dawn si lo. Darthlalang hmaa ka din ve changa, ka hmaa thil lo lang ka hmuh atanga chhut pawhin, ani anga pian nalh leh mawng bawr buk tling hmu leh tur chuan tisaa ka pian nawn leh a tul bur tih ka hria. Chu chu Bible dan kalh a nih avangin ka bawhchhe dawn si a. Chumai bakah tunlai chhanah chuan kawhtebel hmun tha chan a har tawh si a. Mi chul ram ka rit mai mai ang tih ka hlau ve bawk si nen; ka hmangaih, ka chawnpui pari lakah chuan tui ang ka nem zel mai ta nge..!  Kan khawchhak unau (Korean) te chu an thianghlimin an vun a paw nalh em em mai bawk si a. Hmeichhe tan chuan mit khap lek lova en tlak an ni ve bawk.

Mahse, a tana neih mai theih tur, a bul hnai lawka zipper inhawng huaua kei ka awm reng chunga an chan miah loh tur, mumang ramah pawh tum tak takna nena hmehbel chawpa hmuh theih tawk tawk tur an han vei tlat hi a thinrim thlak ve a nia! Chutih rual erawh chuan kei pawhin sap nula ka chan hauh lo tur hisapin ka mu khawng zing tin ve tho alawm le..kan intluktawk viau tho mai. Korean lubuk ho angin vun thar lam tak nei lo mah ila, ka thinlung erawh a var tha ve thung a. Hmangaihna mit dela min thlir phei chuan ka hmel leh vun chu a hmu tuihnai ve fu tho ang. Chu zawk chu ni lawmni hmangaihna dik chu…?

A tawp nana ka’n zeh tel ve leh hram duh chu hmaichhana a hmuh theih reng kei hi min vei zawk rawh se..kekawr zuiha te ho ai chuan. Chutih rual chuan Nu ho tui zawng hi Pa ho pawh hian tui pui dan tawk chu thiam ve a ngai a ni. Ka thaibawih tan ta. Kan pahnihin kan thiam a, kan thiam lo ve ve bawk. A chhan chu Korean ho hi a mawhphurtu bul ber chu an ni a, chumi hnuah ka Bawihtei’n an tawng hrethiam a, a lo atchilh theihna chhan chu tawng lettu an ni leh a, a dawt lehah chuan a lo chhuah chhawngtu te an ni. Heng ho zawng zawng hian kan pahnih inkarah buaina an rawn siam a nih chu. A mak a makin ka dem a ni. Thildangah chuan ka dem lo, kan pahnih inkar boruak atan chuan an demawm a ni. Chuvangin hmangaihna kawnga ninawm-rean(korean) ho vanga ka vui vaihna thu hla chu nangni…..

M = mithiam

I = inkawmkhawm

S = sawi tur tlachham lo,

U = uang ve peih tak

A = a tul huna thu tak thei si

L = lawiluhna bawmah

Hian ka rawn thlen ve a ni e.

 

Related posts

Sava kap thlatu ai chuan a chhar hmasa bertu hi……

ltachhakchhuak

Ka coat of many colors ve chu!

Keimah Thingtlangpa

Every Day, Every Night…

Robert April

32 comments

Ruata Pachuau January 28, 2012 at 10:02 AM

.

Reply
Sãñgpüîípã January 28, 2012 at 10:27 AM

A tawp na chu i van ti thiam reuh e. 😀

Reply
buh-duha January 28, 2012 at 10:59 AM

MISUAL lampum chu a mawi hle mai (Y)

Reply
bucko January 28, 2012 at 11:07 AM

A Conclusion khi ka duh latak… (Y) (Y) (Y)

Reply
Soberboy January 28, 2012 at 11:08 AM

ka chhiar zo peih thlot lo 😀 a tawpna khi ka duh e (Y)

Reply
TuaiSialA January 28, 2012 at 11:27 AM

Good Post (Y)

Reply
century child January 28, 2012 at 11:39 AM

Thu chu i thiam nasat khi le, nuihna tur a tam khawp mai.
A hmawr i bawk nalh untru (Y).

Reply
superpinqponq January 28, 2012 at 11:48 AM

Dik fu mai.. Chhiar a nuam. Thu pawh i thiam, han ti zel teh khai (Y)

Reply
Chhurbura January 28, 2012 at 11:52 AM

(Y)

Reply
zokhawpa January 28, 2012 at 12:04 PM

kei pawh hian ka ning khawp mai.mahse!!!!!!!! ;-(

Reply
^-||R@lT€||-^ January 28, 2012 at 12:08 PM

misual lampum chu va tha kher e (Y)

Reply
Nguntang January 28, 2012 at 12:13 PM

min lo comment sak ve liam liam a,a lawmawm e.ka post ve ngam ang em aw..? tia ka inngaihtuah fe hnuah huaisenna zawng zawng sawmkhawmin ka rawn ti ve thuai a ni e.

Reply
eL January 28, 2012 at 12:17 PM

i thuziak pawh chu Nguntang tiat zet zu ni a…

Reply
sheldon170 January 28, 2012 at 12:18 PM

MISUAL lampum chu a lo va tha tak ve!

Nia tiraw, keipawh Korean film hi ka ning ania. A sei si, chhungkaw member dangin an en duh si chuan sawisel nuam vak silo. A film sei tehreng hlawm nen Mizotawng lah chuan an letling peih ngang mai lehnghal a.

Reply
Nguntang January 28, 2012 at 12:31 PM

#13 mahni nguntang tiat zela nun tur 😀

#14 sheldon chutia i lo ning ve nih phei chuan; korean film mizo tawnga leh khapna bill, Assembly session-ah ka pu lut ang a,min lo thlawp rawh aw 😀

Reply
chhangteval January 28, 2012 at 12:36 PM

I chhas chu then ngam rawh, a fing vak lo a nih chu 🙂

Reply
Chemtatrawta January 28, 2012 at 12:49 PM

Korean hi chu …

Reply
Astericâ„¢ January 28, 2012 at 12:56 PM

A ngaihnawm hle mai…..Ṭawngkam lah chu i varak tui thiam ang zêl lehnghala… 😉

Korean film chu en ve mai la, i bialnu ai khan a lehpeka chhuak tur te kha han thlahlel vel la. Chuan emo i ni mai 😀

Reply
Nguntang January 28, 2012 at 12:58 PM

#18 mi va rawn fak varak thiam eee..!

Reply
aduhi January 28, 2012 at 1:00 PM

Ziak tha e. Thuhmahruai pawh Korean serials tluk zeta sei alawm le 😉

Reply
Ruata Pachuau January 28, 2012 at 1:02 PM

Korean film leh Zu hi chu sawisel nasa viau mah sela, a duh an awm chhung chuan a rem tak tak dawn lo a nih hmel….

Reply
Nguntang January 28, 2012 at 1:51 PM

@ Ruata pachuau..nia i sawi dik khawp mai.Mahse,kan sawi avang hian rem lo mah se la, sawi loh theih loh khawpa mimal nun bika a ninawm chang hi a awm ve.

Reply
stan marsh January 28, 2012 at 2:23 PM

i ziakthiam e, tizel teh khai. nia kasauti ka ning phawt a chuan korean movie $ serial

Reply
Zorema01 January 28, 2012 at 2:45 PM

Kei pawh. An tingun lutuk mah2 alawm le

Reply
ChhanaPa January 28, 2012 at 5:55 PM

M = mithiam
I = inkawmkhawm
S = sawi tur tlachham lo,
U = uang ve peih tak
A = a tul huna thu tak thei si
L = lawiluhna bawmah

A va fuh ve.

Korean serial hi chu a ninawm ve thlawt a ni. TV 3 kan neih hnuah hi chuan tlem chuan a zia awm ta e. Mahse, a ri hrim2 pawh hi ka hre ning.

Reply
Jacka Pi January 28, 2012 at 9:03 PM

Korean film hi pakhat chiah ka la en…post ka chhiar a ka rilrua lo awm daih chu tawngkam thluaithlum vak hi thuziak ti ngaihnawmtu a ni kher lo tih hi!!NOI…p

Reply
aduhi January 28, 2012 at 9:09 PM

agree with #26 Jacka Pi. Tlemin thu i thluaithlum mah mah tep. A saptawng tak chuan “too many cliches”.

Korean film hi ka en ve nual mai, My Sassy Girl tih vel lar lai khan. Tunah chuan ka en lohna a rei ta. Mahse a hmuhnawm thei eeem a lawm.

Reply
thachianga January 28, 2012 at 9:42 PM

Kei pawh korean film hi ka ning, ka tuipui lo.
Kan film en thin hian min kaihruai thei khawp mai.
Naupan lai (ti ve khanglang ila) chuan cowboy film kan en hnem hle. Gun belt, pistol, lukhum parh kan ngaihsan phah. Kan film en vang a ni ber.
Tunlai Aizawl tlangval chu mawng sawi tawlh tawlhin an kal mar ta zawt zawt mai, korean film vang a ni thei ang em?

Reply
liandova khawlhring January 29, 2012 at 11:28 AM

Post tha lutuk k post tum tak min lo post khalh a, mahse apawilo. MISUAL ho nihna ka hriat phaha alawmawm khawp e.

Reply
Pangpuielhtliaka January 29, 2012 at 12:09 PM

I buaina chu ka hriatthiam phak ve rual loh ni mahse, rinthu tlem..
Cable T.V operator te tan chuan business tha lutuk ani tlat atin alawm mawle. Film download tu ten man man lutuk in Operator te hnenah an han hralh phawt ang a (rinthu). Tichuan channel pakhat aia tam 24 X 7 a tihchhuah ve an lo duh bawk a. Mizoram zimte an budget tam si lova item atan chuan demand a lo tha bawk si, duh leh support em em vang pawh ni lovin mahni staff te awm awl tur hna siamna a lo ni vei bawk nen. A kal fuh char char rih anih hi.
Tin, a viewer lamah pawh midang tam tak leh kei ngei pawh hi procrastination ti mai ang, thil dang hrang hranga nuam ti mi kan lo ni bawk si a, kan thil tih a inang lova, mahse thil tul tam tak kalsan a kan pen kual dan chu a in ang vel ang ka ring.. (ngaihdan pakhat ve mai mai, ka en ngai bik hauh lo mai)

Reply
Nguntang January 29, 2012 at 2:45 PM

@ jacka pi, aduhi, ni e in sawi dik khawp mai.Thawmhnaw pawh nalh tum lutuk avanga a rem dan dana chei rang buai kher hi a nalh kher lo e; make-up hmang nasa hmeichhia nazawngin an nalh pui kher lo bawk. mahse, ka’n tihram teh ang.Mi thenkhat tan chuan thu han thluaithlum deuh hian chhiar a lo nuam ve a,kan thuziaha chentirtu pawh a lo ni ve thei bawk.

#29 kan rilru a lo in ang a ni maw..
#30 nia i sawi pawh hi dikna chen a awm in ka hria.

Reply
chawnghilh January 30, 2012 at 5:02 AM

M = mithiam

I = inkawmkhawm

S = sawi tur tlachham lo,

U = uang ve peih tak

A = a tul huna thu tak thei si

L = lawiluhna bawmah …

(Y) A C R O S T I C ……………….. mawi full!

Reply

Leave a Comment