Luangliam Mizo Society & Culture

Min hneh e

Mimal zia ka sawi tum lo, a hnam pumpuia kan zia-zo zia hi ka hmuh dan tlem han sawi ka’n tum mai chauh a ni. Heng ka sawi avang hian kan chhe ta duaih emaw kan chhe ta ber emaw tihna lam ni lovin kan nihna nia ka hriat han phun chhuahpui ka tum a ni, ka ti lutuk deuh a nih pawhin in hriatthiamna ka ngen lawk.

1)Sawrkar tha kan neih theih loh chhan: A vai chuan ka hre lo, point khat erawh chu kan zia a ngheh loh vang a ni. Kum 5 kum 10 bawr vel kan hrawn kha kan ning ngawih ngawih zel a, kan thlak a, kan thlakna pawh kha kan ning leh ngawih ngawih a, a hnu lawkah a hmaa kan sawisel luai luaiah bawk kan lut leh a, a mihring an lo la ngai reng thin si a. Kan politician-te pawhin hei hi an hriaa an ngaih a ngam pawh a ni bik chuang lo va, an ngheh bik lohna khan an ngaihdan a thlak a, keini lo nghet lo sa nen kan intawng leh mai thin.

Vaiho hi an lo nghet khawp mai, Lalu Prasad-a hi CM leh tur chuan a daih rei ngawtin ka ring(rinthu), Mamata Banerjee-i a tlak leh meuh chuan a dam chhungin a CM leh tawh lovang tih a rinawm hial. Engemaw politics inlumlet leh therhlo hmanga hnam hnuaihnungte tihlawm avanga tling leh mai hi chu an awm zauh zauh va, a tlangpuiah chuan an dawh tawk tawk a, an nghak nghak ngat ngat a, an thlak tawh vek chu ding chhuak leh tur chuan hun a duh rei viau zel; W.Bengal-ah kum 20 chuang Congress leh a sangawizawnpuiten ro an rel a, an dawh ngar ngar a, an han thlak chiah a, CPM-in kum 30 chuang ro an rel ve leh a, an nghak ngat ngat a, an laka beiseina an neih loh tawpah an han thlak leh ta a, tunah TMC-in ro an rel ta a ni a, thlak leh meuh tur chuan a rei phian maithei.

2)Kan pianthar nawn awn awn chhan hi: Kan ze ngheh loh vang a ni. Kum 50 chhunga Kristiana inlet zo deuh puk kan nih kha a that em em rualin, bu kan let nawn ta tluk tluk a ni ber. Kan zia hian kan sakhuana leh kan politics hi a thunun lo thei lo va, min thununtu ber chu a nghet si lo bawk nen kan heti ta mawlh mawlh mai a nih ber hi. Pathian hi a tha hrim a, kum 100 chhung khan harhnain min awi nung leh thin a, chuti ni lo se kan nasa lo viau ang, Harhnain a hrut ve lem loh Khasi te, Central vai Kristiante hi an nghet ngawt mai, an rin fuh bik em em vang lam ai mahin an zia a nghet a ni zawk. Khasi leh vaiho reng hi rei tak inkhawm an dawl mai, an thu tlat mai a ni.

3)Kan insual mai zel chhan hi: Dawhtheihna kan tlakchham vang a ni. Kan inhauh tawh chuan insual hi a hnai thuak zel, hnam dang dawhtheihna neiho hi chu an tliak rem rum tawh ang tihah pawh hian hnar insiin an la inhau thei, an inkhawih mai lem lo. A lan chianna pakhat chu kan Driver-te hi an ni, thenkhat hi chu khap khat a back zawnga tawlh ai chuan insual an thlang furin a lang. Vaiho hi dawhtheihna an lo nei hle a ni, Traffic duty awm phak lohna thingtlang lam deuhah pawh hian traffic hi han Jam chiam mahse thingpui dawr nghak mai mai pawh hian an vai veng leh duak thin.

4)Mi rel kan hrat chhan hi: Sawi tur dang kan hriat tlem vang a ni a, kan chenna bial zim vang a ni bawk, hei hi chu a la reh thuai ang. A hranga chengte(community) zia ve a ni a, miin inrel a hrat chuan a nun community kha a zim a ni. Nula, hmel tha lem lo tak nen thlakhat chhung khawsa dun la, inhmuh tirh chuan an puak lo duh viau. Nula dang hmu ta miah lo chu hmuh chhun kha a tha tawlh tawlh mai a, thla tawpah phei chuan i phu lo deuh hnup tawh pawh a ni thei e, kha zia kha kan kawl tlat a. Ram riah tirh chuan khaw chhung chanchin kan sawi a, kar tawpah chuan hlo thlo chak kan hero tawh mai.

Thil dang sawi tur kha kan hmu tlem thin em a, kan hmuh kha kan sawi a, kan rel ta mai thin a ni; khawpuiah tumah an inrel hman meuh tawh lo, kawi khatah ngaihtuah tur a lo ngir khup zel. Inchhungah TV hmaah thu ila ngaihtuahna hman a lo tul a, computer hmaah tumah kan rel hman lo, mi chanchin kan sawi chuan kan la hman a ni ber, kan bial a zim bawk. Hei hi Harhna nen inzawmna chin an nei, hman ang khan harhna hi a thleng tawh loin a rinawm. Hmanah kha chuan zanah Pathian thu an ngaithla a, loah an feh a, an sawi zui a, inkhawm loh zan pawhin tih tur awm hek lo meilum aiin an sawi zui zel a, an kalkhawm a, an sawi zel a; tunah zawng thu tha tak pawh ngaithla mahila In chhung han thleng ila, sual em em vang pawh ni lo hian, “Manchester an chak” “chak lo” tih zeuh pawh khan kan ngaihtuahna hi a la peng daih, kan thu ngaihthlak khan sawi zui a hlawh hman tawh lo; kan ngaihtuah zui hman tak lovah chuan kan duh ber chu rum el awl, min rawn cha chhuah nghal zut zut hi sawi huai kan ti a, thiam kan ti bawk a, kan fak ta mai thin zawk, Pathian thutak erawh a hla hret hret. Pawimawh ta ber chu mahni chauh pawha rinawm kha an hlu tial tial dawn.

5)Dawhtheihna nei lo tan: Huan nghet neih aia kumtin zau thar zuan thlang tan, “I serthum mu ei kha dahtha rawh” han tih hi a hlu phak lo, buh tin khat hmunah mi thar ang thar kim vek kan tum a; chi khat a hlawma zawrh ai chuan tlem tetea khai kim vek duh sumdawnna rilruin min la thutbet a, tlem tetea hlawk hret hret aia pakhat hlawk nghal awk awk kan tum avangin thil man a sang uchuak lo thei lo, dawhtheihna tlakchham hi kan tuar mek zel a ni. Sumdawngin a dawrtu zalenna mausama a kir aia thil pek a tumna Zoram khawvelah hian thil man sang hi Number bi-a sang zia a ni lo ve, panga hmun/sawm hmun kan chhiar a ni hawt mai.

6)Haw haw Theology: Haw haw-a thlan lai, haw haw-a dam lo zawn thin, haw haw-a lo(thlawhhma) zo thin, haw haw-a mi ruai ei teuh teuh thin thisen zungzam kha a la luang reng a, kan sakhuana pawh haw hawin kan nawr a, kan peih loh chenah kan ngui a, min nawrpui tur kan ruai leh a chuti reng rengin. Tu emaw zai ve thin kha, kan khaw mi a nih vangin haw hawin kan nawr a, an zirlai(future) kan nawr chhe vek a, zik tluak taka ngaihlu leh chuang si lovin kar lovah mi dangah kan pakai san a, lar ve tawha inngai siin engmah paw chhuak si lovin kan kut chi lo hawitir a ni ber zawk.

7)Thil kan tehna: Kan rilru tiatin thil kan teh fo, lian kan tih hi a lo lian lo va, zau kan tih hi a zau na hek lo; kan tehkhawng a tet hian thil kan teh lian thei ngai lo, bel te leh bel lian kan chher chhuana tluk a hlauhawm ting mai. Lo neitua inchhal ar hmai tiat pawh kum khata thlo chhuak mang lovin zirlaia inchhal zir peih chuang si lo a hring a; run dala thawkin kumpuisul kan chhir a, mahni leh mahni inthiamin thawka phitah awm ni kan kham a, dik lo taka la lut thei dinhmuna kan din ve loh avanga ti lo maite khan mi hlemhle leh awkhrawlte kan khing a, kan thinglung buktu chuan mal min sawm chuang si lo.

Changkanna a lerah thuaiin neihthinglungkhawng leh ba thlauin kan inkamki a, mite neih ang duh vena chuan kan rinawmna leh keimahni ngei min lei mek a ni. Mangan leh lusun nikhuaa min hnem tura vantlang phutna rilru neitu khan vantlanga mawina zawng reng rengin zakhua kan rawih ral a ni ber. Chua chhapah tunlaina khawvelin min han buan ngat mai hi zawng keini hnam naupang leh nghet loa kara kan han tang tha duh lo lehnghel hi zawng-Min hneh e.

Related posts

Mizo thuhlaril hmasawn dan – Part 2

Tluanga Chawngthu

Paws mai mai – IV

kawlhawk

In ral chungchang

Sawmtea pa

24 comments

keimah March 22, 2012 at 12:11 PM

A dik hlawm khawp mai! (Y)

Reply
nastycool March 22, 2012 at 12:16 PM

A van dik em, Point 1 leh 2 phei khi chu (Y)

Reply
PKfanai March 22, 2012 at 12:20 PM

A dik hmel hlawm khawp mai.

Reply
Dave Chhangte March 22, 2012 at 12:27 PM

Chhiar ang..

Reply
Dave Chhangte March 22, 2012 at 12:37 PM

Chhiar zo e..Kum 5 kum 10 bawr vel kan hrawn kha kan ning ngawih ngawih zel a, kan thlak a, kan thlakna pawh kha kan ning leh ngawih ngawih a, ahnu lawkah a hmaa kan sawisel luai luaiah bawk kan lut leh a, a mihring an lo la ngai reng thin sia. Min hneh thlawts

Reply
ahooma_ March 22, 2012 at 12:47 PM

Dik hlawm viau…

Reply
mygurl March 22, 2012 at 12:51 PM

dik khuuupsss…

Reply
CFL March 22, 2012 at 12:54 PM

A dik hlawm mang tak e a. Mahni nihna hi tuma’n kan haw tur a ni lul lo ve. (I)

Reply
Dr Mahminga Sailo March 22, 2012 at 12:56 PM

A va thain a va dik kher em! I ngaihtuah kim, i ziak ngaihnawm bawk si.. I thuziak chuan min hneh hle mai… (Y)

Reply
lrpa March 22, 2012 at 1:06 PM

I thlir dan a dik hmel khawp mai. I ziak tha e.
Point 1-na khi tlem in a dik hlel deuh em aw ka ti deuh a. Sawrkar tha kan neih theih lohna bul ber chu political party hi ani in ka hria. ‘Ui pawh congress anih chuan a tling tho ang’ tih ang chi mentality hi kan la thlak thei mang lo, khawpui ah chuan a zia tan a, mahse chibing hlawm awmna ah leh thingtlang lamah a la nasa khawp mai! He rilru hi thiah darh a ngai ani. Ram hruai theih inring takin ZNP leh MPC te an awm ve a, Pu Hawla leh Pu Rama te inkar a Zoram kalphhung pek reng ringawt mai hi chuan Sawrkar tha neih a har dawn hle niin a lang.

Reply
vakul March 22, 2012 at 1:21 PM

lrp. nia ka fimkhur ru viau va, point 1 naah hian a vai chuan ka hre lo tiin ka tan tawp mai a ni factor pakhatah ka dah tihna nih ber chu i sawi pawh hi a ni tho.

party pahniha kar tawn sek lo hian pakhat hi dawhthei takin hrawn ngat ngat phawt ila, kan dawhtheih loh tawpah paihthla ila tung ding leh tawh ngai lo thung ila. kan inngaidam hma leh lutuk a, an sim thei lo.

Reply
Manuni Tlau March 22, 2012 at 1:31 PM

A va’n dik hlawm tak em! Kan hnam la naupan vang a ni thei ang em le? Chuan pasarihna, Thil kan tehna tihah hian sei leh hla kan tih pawh hi a tawi thin khawpin ka hria.

Reply
sheldon March 22, 2012 at 2:15 PM

Chhiar hma in comment phawt ang. First sentence Mimal zia ka sawi tum lo han tih chu a ‘pai’ e, post tupa nen a inhmehlo lutuk 😀 Tunah chhiar ang.

Reply
Jacka Pi March 22, 2012 at 3:09 PM

Point no.1 khi tunlaia ka rilru a awm reng…politics ah hian vai ho kan la tluk loh zia hi …centralah railway minister nei ve ta ila, kan CM tu te pawh hian railway budget tharah rail chuan man tlem te a a to vangin an ban tir phal ve ang em le?? Kum nga chhung chauh ni lo, nakiiiinah pawh anmahni vote tu tur mipui thlavang hauh awm tak hian an va han awm thiam tak em…

Reply
sheldon March 22, 2012 at 3:28 PM

Post thatak ani e. I point pek zawng zawng khi a mal te te pawh a sawi tham a ni. A dik hlawm a, a tha hlawm si a, post pakhata kal tirah chuan a uihawm ka ti. Paih tur ka hre miahlo, a dik em em vekin ka hre mai.

Reply
vakul March 22, 2012 at 3:31 PM

My dear, sheldon (vawiin na na na chu ka hman ren rawn bawk a, lut tlut tlut ila ni mai lawm) a pai min tihsak a, ka ngai pai ta deuh roh va; mahse kan nu ka’n zawt a, enge a awmzia tiin min zawt a, sheldoni’n a pai a ti a, ka ti a; tunge sheldon tia min zawhna chu ka la hmuh bik loh kha hrilhfiah tumin kan tumtla der mai. A pai ta deuh a nih pawhin Tuaisial post “chemtatrawta” tiha comment ho vang vek saw a ni mai; ka chhiar nasa lutuk a.

Jacka Pi, i rawn sawi hmawrhawng a, ka’n chhunzawm ve teh ang, Railway minister bang ta Trivedi hi ka tan teu teu a sin aw,(i hmuh dan chiah chu a ni lo mai thei e) Railway hmachhawp kan hria a, crore nuai 2 bawr vel project neih lai leh thil dang zawng zawng chuan man a san mek laia tlemtea tihsan a tum laia mipui lam against pawh awm hauh hmaa CM Mamata-i berin a do tlat hi a fuh ka ti lo ve tlat.

Mamata-i hi engkim mai a suala sual chi a ni a, a chawr chhuahna hi sreet politics a ni. CM a nih hnu pawh hian a suala sual zel duhna rilru kha a la paih hlei thei lo; a background hi thlir ila, a zirlai pawha man tawk reng, khawlaia kawngzawh(rally) nei reng mai a ni a, a thanhnan tawh a ni ber. Trivedi hmathlir hi ka support tlat a ni, hmasawnna turin.

Amaherawhchu, an politics zawng a pui deuh chu a nih hi; vai rilruah chuan Mamata-i hnathawh tak tak chu kum 15 hnua lang turah an ngai, dawhthei tak an ni tih a la lang hram.

Manuni tlau, a nih ka ring deuh ber. step by step development a kan kal loh vang pawh a ni thei bawk, aggrarian stage atanga computer stage a direct a zuanglutho hi chu kan zia hi a inang put mai.

Reply
EmEich March 22, 2012 at 3:31 PM

(Y) (Y)

Reply
Dr John March 22, 2012 at 3:36 PM

(Y) Very Crucial Post. Pu Vakula chu i ‘Mind-Research Findings’ i rawn Chhawp-chhuak Tha Ngei Mai. Thupui a Fun Tak Zet E. (Y)

Reply
TuaiSialA March 22, 2012 at 3:39 PM

(Y)

Reply
Atom c March 22, 2012 at 4:43 PM

I chhui nasat hmel hlein ka hria, Psycho+Ethics lam atanga lokal annih hmel. (Y)

Reply
sheldon March 22, 2012 at 5:04 PM

‘Haw Haw Theology’ te khi kan va inhmeh tak em! Diktak chuan Mizo mipui hi a nawlpui anga kan sawi dawn chuan i point pek ho khi a dik vek mai a.

Point No. 1 erawh chu sawitur ka nei. Sorkar thalo kan neih hian Democracy ah chuan a thlang tlingtu mipui kan ni a, kan phutawk Sorkar kan nei hi kan ti teh fo a, hei ka pawm chiah lo Mizoram ang atan chuan. Mizo mipuite hi kan politician te hian kan chhia leh tha hriatna pawh hmang hlei theilo in rilru leh taksa ah min sawr fu khawlo zo tawh ka ti ve tlat, a bikin thingtlanga mi rethei lehzual te.

An tih leh tak tak loh tur propoganda an thehdarh a, mi rethei tan chuan rilru thlak kawi zel mai pawh a awl teh ania. Tin, mipui te hi Sorkar khalh ngiltu kan ni thei tak tak lo, a fawng vuantu kan ram hruaitute an diklo hmasa ziah. Point dang khi chu ka thlawp em em vek. A mal te te pawh a sawiho tham veka tha an ni ka tih tawh kha.

Reply
Dr Mahminga Sailo March 22, 2012 at 5:25 PM

#21.. sheldon170 sawi khi ka thlawp mai. Vawikhat mah vote la thlak ve lo hian, politics chungchang sawi ka zak deuh.. 😀 Pu Zoramthanga thusawi thiamzia ka hre ve em em a ni mai.. 😛

Reply
vakul March 22, 2012 at 6:51 PM

sheldon, ni teh reng mai. kan inpuang ang e, he article ka ziah tirh khan no.1 chauh hi ziah ka tum a, kan ze ngheh loh avanga kan chunga thleng sawi ka tum a ni a thupuiah pawh zo ze nghet lo ka ti ve hluai a. ka sawi zela ka ham kual zel a, a thupuiah a last word ka dah ta ngawt mai a ni.

i point of view hi a dik lohna a awm lo, point pakhat a ni ve mai ang chu. politics chu politician ho siam a ni mai bik lo va, kan zaa kan contribute a ni. ka sawi tum ber chu kan za hian kan zia hi a nghet lo em a nghet lo ve ve kan inhrawn a kan heti ta a ni.

sarivaithun chaw zawng an sawi ang maia a che hlek bawh tharh tharh thin kan nih avang hian principle kan nei hlei thei lo. lrpa sawi, party kan ruih chilha kan thatpui lo tih pawh hi a lehlam thawk angin lang mahse principle awm loh vang zawk a ni a, principle chu kan ngheh chhan resonable a ni a, chu chu kan neih si loh chuan partyah aa ruai mahila kan zia lai kha a nghet a ni chuang dawn em ni ka ti deuh.

Reply
ltachhakchhuak March 22, 2012 at 11:03 PM

A tha hle mai a he post zet chu, Ka rilrem zawng tak a ni. (Y)

Reply

Leave a Comment

Skip to toolbar