Information Religion

Krista Kraws Thiltihtheihna !

By Denis Lalfela

Khawvel ropuina atanga thlir chuan Kraws chu ânchhe dawng, Pathian fapa meuh pawh a thihna a ni. Tirhkoh Paula chuan Kraws hlutzia ti hian min hrilh a, “Kraws thu chu boral mekte tan chuan âtna a ni si a; keini chhandam mekte tan erawh chuan Pathian thiltihtheihna a ni zawk e” (I Kor 1:18). Kraws thiltihtheihna hmu fiahte chuan an ngaisang a; huaisen takin Lalpa an zui thin. Kraws hmangin Lalpan mitin a hnenah a hip a. Amah ngeiin, “Tin, kei, lei ata khaikanin ka awm chuan mi zawng zawng keima hnenah ka hip ang” (Jn 12:32) tiin Pain a pek tawhte chu a huikhawm tur thu a lo puang tawh a. A pa duhzawng tih chu a chaw tui ber (Jn 4:34) a nih avangin a tuarna kal tlangin tlansate min hruaikhawm vek dawn a ni. He Kraws thiltihtheihna rinchhan hian Zofa tam takte chuan India ram leh ram dangah Chanchintha an puang mek a, he Kraws avang hian zâm lovin Lalpa tan ram an kâp zau zel a ni. Harsatna a tam poh leh Kraws atangin chakna an thâl tam a, mite tana malsawmna ni thei khawpin an inpe ngam thin.

Kraws chu sual hnehna a ni

Kraws-ah khaikân a nih hnuin Isuan, “Ka Pa, anni hi ngaidam rawh; an thiltih hi an hre lo a nih hi” (Lk 23:34) tiin amah thiam loh chantirtu leh khengbettute a ngaidam a. Ngaihdamna hi Pathian atanga chhuak a ni tih leh ngaidamtu nih ropuizia a puang chhuak bawk a. Hre reng chunga min tinatute pawh kan ngaihdam hian hnehna kan puang a lo ni reng mai. Tin, Krista hnehna azarah hnehtu kan ni ve a; mihring ram atanga thil theih loh ni anga lang kha Krista avang zawkin kan lo hlen ve reng a lo ni. Kalvari inthawina chuan mi tin min silfai ta a. Sual leh thihna chu hnehin a awm ta. Chak lohna nei theuh ringtute kan nih avangin vawi khat chauh hnehna puan chu a tawk ngai dawn lo va, ni tina hnehna kan puan a tûl dawn a ni. Thil tha chu hre reng mah ila kan hlen kher lo. Kan duh anga kan awm theih lohna tak hi kan thinlunga sual awm nghet tak chu a ni. He duhthlanna inlumlet reng mai nunram hi Tirhkoh Paulan Rom 7:14-23 ah min hrilh a. Mahse chu sual hnehna tur kawng dik chu min kawhhmuh bawk a. Kan sual avanga krawsa khenbeh Isua Krista hminga hnehtu kan ni (Rom 7:24). Krista thihna leh thawhlehna chuan mi tin hnehna famkim min pe ta. Lalpa chu fakin awm rawh se!

Kraws chuan nun thar min pe

Vawi thum lai a Lalpa phattu Petera kha, vawi thum vêk Lal Isuan a beramte chawm turin a ko nawn tlat mai (Johana 21:15-17). Lal Isua chhandamna ruahmanna (project) ropui takah chuan misual ber pawhin hmun kan chang vek a ni. Hei tak hi Pathian leh hringfate danglamna a ni. Keini chuan min phatsantu leh min tiduhdahtu chu ngaihdam ahnêkin an hmel pawh kan hmu peih meuh lo. Lal Isua chuan a mangan lai bera amah haidertu kha a la hmang duh tlat a ni. Ngaihdam tlâk loh khawpa suala i inngaih lai khan, Lalpan a la ngaidam duh che asin! Tun aia nasa a hman che a duh tlat a ni. Nun thar pek che hi kan Pathian hlimna zuk ni tlat a. Kan va han nihlawh em!

Kraws chu nun keh sawmna a ni

Kraws thlangtute nun chu a kehsawm ngei ngei tur a ni. Lal Isuan keh sawm nun hi a ngai pawimawh a; mi dangte tana thlarau chaw ni thei tur khawpa keh sawm turin min sâwm theuh a ni. “Buh fang leia a tlâk loh va, a thih loh chuan a mal chauhvin a awm reng thin; a thih erawh chuan tam takin a rah thin. Tupawh a nun thlahlel chuan a hloh thin; tupawh he khawvelah hian a nun ngaitlâwm chuan chatuana nunna tur a vawng reng ang” (Johana 12:24-25). Tisa châkna sual te, eirûkna leh sual lian dangte kan khenbeh ngam si loh chuan, kan rawngbawlnain rah tha a chhuah ngai lovang. Keh sawmna nun chuan thianghlimna nun a hring tur a ni. Lal Isuan, “Thinlunga thianghlimte chu an eng a thâwl e, Pathian an la hmu dawn si a” (Mathaia 5:8) tiin pawn lam leh chhung lama thianghlim a tulzia a sawi a. Pathian hmu tur chuan ni tin kan intihthianghlim a, ni tin Lalpa hmangaih lehzual kan tum a tul bawk ang.

Kraws chu ni tina put tur a ni

Kraws chu ni tina pu tura sawm kan ni. Amah Isua ngeiin, “Tupawhin mi zui a duh chuan mahni hrehawm pawisa lovin, ni tin a kraws puin mi zui rawh se” (Luka 9:23) tiin min phût a. Luka ziak hi i chhiar chiang em? ‘NI TIN’ tih hi a ziak tel kher a. Hei hian kan peih châng châng ni lova, englai pawha Lalpan kraws min pêk vete pu tur kan nihzia a tichiang a. Kan krawste hi zo taka pu tura beisei kan ni hauh lo va; chhel taka pu tura koh kan ni zawk bawk a ni. He kraws pu tur hian khawvel mit hmuha mifing leh mi chakte thlang lovin, chhuan tur rêng nei lo mite thlan an ni (I Korinth 1:26-27). Tin, kraws lêra a tuar lai khan sipai za hotu khan Pathian Fapa a ni tih an puang chhuak a nih kha!

Isua nun pum mai kha Pathian Fapa a nihzia puan chhuahna a ni. A thihna leh thawhlehna hian a nemnghet chiang hle. Famkim lohna khawvela kan la awm avangin mamawh leh duh tam tak kan nei. Kan duh apiang kan hmu hek lo. A chângin kan buai a, a chângin kan mangang ru thin. Kan hliamte a nasa a, dam harsa kan ti fo. “Engati nge Lalpa?” kan ti fo theuh awm e. Heng kan zawhna leh tuihâlna zawng zawng hian Krista Krawsah chauh chhânna fumfe leh damna famkim a hmu ang. Bân phar meuha kan tana a tuarna azarah tihdam kan ni. He damna thu hi Mt. Peteran ti hian a sawi: “Sual lamahte thi tawhin, felna lamah kan nun theih nan amah ngeiin thingah khan a taksain kan sualte a phur a; amah an vuakna vualte chuan tihdamin in awm ta a” (1 Petera 2:24). Krista kha tholeh ta lo se la, a tuarna khan awmze famkim a nei lovang. Krista thawhlehna hi kan tan beiseina thar lo ni se la: a tuarna, thihna leh thawhlehna chuan kan hliam zawng zawngte tidamin thinlung thar min thlen theuh rawh se.

(He article ziaktu hi Katholik Puithiam a ni a. Sacred Heart Theological College, Shillong ah Lecturer a ni. Mobile: 09862753130).

Related posts

Reply to William Ralte

Mama_B

Mizo-na nge Kristianna?

dustin sampler14

The Mizoram (Revision of Pay) Rules 2010

swani

14 comments

Chhuaklinga April 3, 2012 at 5:07 AM

Amen.

tren tren

Reply
littlerascal April 3, 2012 at 6:33 AM

Amen again!

Reply
sheldon April 3, 2012 at 7:37 AM

Good Morning (L)

Reply
nastycool April 3, 2012 at 7:54 AM

A van dik em! Kar thianghlim ( HOLY WEEK) lo thleng tur hi tlak taka hmang turin inpuahchah theuh ang u. (Y)

Reply
Alejendro April 3, 2012 at 10:05 AM

Ka rilru a awm mai mai. Isua kha lung a den hlum lo ni ta zawk se, lungtum hi kan chhuang em em dawn emni? Nilo in, telso a thlak te kha lo ni ta zawk se, in tinah tel so kan nei reng mai dawn tihna emni? Kraws kan ngaih pawimawh em em na chhan hi ka hrethiam pha velo. Ka ngaihah chuan Kraws a thilthleng zawk kha a ni hlu chu.

P.S. A post ka chhiar lo a, a post hi ka comment chhan lo. A title a tang a ka rilru a awm mai a ni e, Pu H.V. 😛

Reply
Dr John April 3, 2012 at 11:31 AM

(Y) Very Inspiring. A va tha em! ‘Kraws chu nitina put tur a ni’ tih ka chhiar lai khian, Ka rilru-ah “MAHNI HREHAWM PAWISA LOVIN” tih lai hi a rawn ri ring hle!

Ka ngaihtuahna a kal thui hle mai. Ringtu inti tam tak-te hian, Kraws awmzia (a chunga a sawi leh sawi loh te pawh) kan hre em em, mahse, MAHNI HREHAWM PAWISA LOVA KRAWS HI PUT TUR A NI, tih lai hi kan theihnghilh nge, kan ngai pawimawh tawk lo zawk?

-Hrehawm kan tuar peih lo thin,
-Lal Isua hming avanga chan & hloh kan hreh thin,
-Mahni kan in-khawngaih em em thin,
-Pathian hminga Tuar lam ai chuan, Hlawk kan tum zawk thin,
-etc. etc.

Chuvangin,

“Kross thleng lo ringtu, Kross chin ral theih loh ringtu, pawnlam mawina chauh um-a Lal Isua rawngbawltu ten, tuihalte tan Thlarau lama in tur tak an pe chhuak thei ngai lovang” tih hi ka rilru chhungril atangin a rawn alh-chhuak a nih chu… Kan Hla sak lar em em hi han sa leh teh ang :-

Isua Kraws mak tak chungah khan,
Ropuina Lal thi ka hmuh-in,
Ka hlawkna ber ka ngainep a,
Chapo, uanna ka ngai tlawm a.

Engkim mai hi ka ta ni se,
Pathian pekah a tawk lo va,
Cuti-ang hmangaihna nasa chuan,
Thlarau, nunna, engkim a duh.

Kross i thleng tawh em?

Reply
Ignatia (33-115 AD) April 3, 2012 at 12:55 PM

A va han tha pap pap ve! Pu HV (Y)

Pu John-a comment. (Y)

Grik mi ziktluak leh Juda rinna puithu lutuk vuan tan Isua Kraws-a thihna rin hi thil atthlak tak a ni ngei ang. Pathian fapa kraws-a tihhlum hi an ni tan chuan pawm a har viau ang le. “…. thinga khai apiang chu Pathian anchhe dawng a ni si a,” tiin Deut. 21:23 ah khan a inziak miau hek. Isua lo la hma hian mi rintlak tak ni tura ngaih THEUDA a rawn lang a. Mi tamtakin an in leh lo kalsanin an zui a. Mahse rei a daih chuang lo. Theuda hnuah Aigupta ram atangin zawlnei nung tak – miin an zui hluai hluai a rawn lang leh a. Oliv tlanga thilmak a tih an beisei em em a mahse engmah a thleng thei leh chuang lo. “… Judate chuan chhinchhiahna an phut thin” tih awmzia tak pawh hi hetiang chi deuh vang hi niin a lang hle.

Grik ho tan phei chuan Pathian chu lungaihna leh natna hre miah lo, thinrimna leh lawmna pawh nei ngai lo angin an ngai tlat thung. An tan chuan Isua kraws-a kan tana tuar kha Pathian anga pawm chi rual a va ni lo dawn chiang em! Pathian mihringa lo channa phei hi chu hmusitna angah an ngai hial a ni.

Kraws thu hi Pathian Thlarau atang chauhin kan chhandamna famkim a ni tih hi a pawm theih a ni. VanlaltirhkohPAULA khan Zawlnei Isaia bu behchhana hmangin “Mi fing finna chu ka ti boral ang a, remhre remhriatna chu ka paihthla ang” tiin Korinth mite kha a hrilh chiam a nih kha.

Pu VanalCHAWNGKHUPA bawk hian a lo hrechiang mang e aw…ka ti thin!

AW, khawngaihtu Pathianin
Kan thinlung chhungah hian
Thlarau min pek lawmna hi
Khawvel finin a zo love.

Mifing mihrinna hianin
A ngaihtuah chhuak zo lova che,
Ka chhandamtu, i thuruk hi.

A thukin a va sang em!
Khawvel fin zawng aiin
Pathian hmangaihna thu hi,
Van leh khawvelan a khat e.

Aw kei misual bo hnu hi,
A khawngaihna zarah
Thlarau min pek nunna hi
Aw, ka nunna Lalpa fak rawh…

Reply
sillyBoy April 3, 2012 at 1:32 PM

# 6 : “Isua Kraws mak tak chungah khan,
Ropuina Lal thi ka hmuh-in,..

He hla ka ngaihtuah hian a ril ka ti thin. Ropuina Lal kha a thi tak tak lo a, a nung a, keimahni hian kan tan a thihna zawk a kha thi in kan va hmu ta zawk a ni, Ani erawh a thi si lo.

Reply
Lamji April 3, 2012 at 3:11 PM

I post tawh tlat a ka hriat chu. :S nge he pa sermon dang tho hi?? Nakin ah chhiar ang. (Y) pawp hrih mai ang.

Reply
chhingdailova April 3, 2012 at 9:06 PM

Amen. a va ropui em…..

Reply
malsta27 April 3, 2012 at 9:20 PM

Nitin a kraws put tur tih hi ka duh khawp mai, Phak ve ang chin ah chuan, Dennis a te hi an fakawm khawp mai, mahse a thusoi thin tamtak hi chu ka hrethiam ve mang thin lo an lut thuk thin lutuk emaw ni chu ka ti deuh. (Y) (Y)

Reply
Mr.Fanchun April 3, 2012 at 10:42 PM

(Y)
good post

Reply
CFL April 4, 2012 at 10:45 AM

(Y)

Reply
Kitty April 4, 2012 at 8:21 PM

Amen.. kan Father (kan ti deuh kher teh ang) hi chu a thusawi/sermon pawh hi ka ngaithla kham thei ngai lo. Tawi fel fian tak a thusawi thiam a ni.

Reply

Leave a Comment