Mizo Society & Culture Mizoram Opinion Politics

Zoram Hnuk Chhat

Mizoram hnuk 7-te i lo bih chiang teh ang u.

1. Politics: Mahatma Gandhi leh Jawaharlal Nehru-te khân mipuite an tham ngai lova, an rawngbâwl hna thawh man hlawh an ngiatin an la ngai bawk hek lo. Mizorama sawrkâr hruaitute erawh chuan kum 1987 aṭang khân Minister leh MLA hlawh pun leh hamṭhatna dân siam pawh vawi 15 lai an siamṭha tawh. Kan party politics ruihchilh nasa lutukte hian ram hmangaihna a tidal a, hetiang mite hian ram hmasâwnna tûr an dâl tlat a, mahni sahmîm chauh ngaihtuahtute hi zawi zawia Zoram hnuk chhattute an ni.

2. Economics: Intodelh nân kawng hrang hrang a awm a, centrally/state sponsored schemes/projects pawh tam tak a awm. Intodelhna a thlen theih lohna chhan bulpui ber chu politician, sawrkâr hnathawk leh an thawhpui contractor/supplier-ten hlêp tûr an duh luat vang a ni. Kan ram humhalh tlâka siam duh lo tute hi intodelh duh tute tân hmêlma lian tak an ni a, ram hnuk chhattute an ni. Burma leh Bangladesh lam aṭanga chîmral aiin an hlauhawm daih zâwk.

3. Sakhua: Kristian sakhaw rinna leh thil tum hi a nihna ang taka kalpui a nih chuan ringtute chu khua leh tui ṭhaah a chhuah ṭhin. Corruption a nasat êm êm nachhan chu Kristianna hian kan ni tin nunah ṭhatna min pêk tlêm vang a ni. A mawhphurtu berte chu sakhua/Kohhran hnârkaitute an ni. Kohhrana hruaitu ni si, member-te nun kawng dika hruai lo va, thlarau bo leh hum sual daite vei aia mahni nawmsakna veitute hi Zoram hnuk chhat mêktute an ni.

4. Zirna: Shakespeare-a thawnthu leh Wordsworth-a hlate ngawt ni lovin kan hnam thawnthu leh hlate kan zir uar a ṭûl. Mizoram Governor AR Kohli khân “I call Mizoram teachers cheaters” a lo ti a. Department Administration leh Inspection lamah pawh ‘efficiency’ leh ‘quality’ nei thei tûrin Department chhûng luhchilhin eirûkna leh mi sawi sep kai zawng zawngte hai chhuak ṭhin se. Kan Governor kal chhuak tawh sawi ang khân cheaters-te hi kan lo vulh thau lutuk palh ang e, ram hnuk chhattute an ni si a.

5. Ṭawng: Tûnlai changkânnain a ken tel public media (Chanchinbu, Radio leh TV)-ah te hian ṭawng hman dik loh a tam hle. Tûnlai ṭawng thar lo piang ve zêl hi ṭawng hausakna kawng khat chu a ni ngei mai, amaherawhchu ṭawng ril leh belhchian dâwl awmsa a tihdala a tihbo chuan ṭawng thar ṭhatna lam aiin a suih tê ṭhin. Mizoṭawng aia English kan hmang nasa hi kan tihsual lian tak a ni. Mizoṭawng kan hmang tam lo hi state hranga kan awm chhan pawimawh tak pakhat awmze nei lova siamna a ni. Mizoṭawng mausama intih changkân nâna sapṭawng hmang lui tlatte hian Mizote danglamna Mizoṭawng hnuk hi an chhat tial tial a ni.

6. Environment: Mizoramah ramngaw chhah ṭha tih tlâk 3158.57 sqkm (14.98%) leh ngaw pangngai 2628 sqkm (12.46%) chauh kan nei tawh. Ramngaw ṭhiah leh hâl vangin Mizoramah lei chunglâng hâng ṭha kum tin ton 10-20 luang ral zêl ang a ni. Ṭhenawm state Tripura chuan ramngaw ṭha tak tak a nei a, mahse ramngawte khu siam chawp vek zuk nia! Kan ramah erawh natural air conditioner ṭha tak, ramngaw kan nei a, uluk taka enkawlin i tipung zêl ang u. Ramngaw tichereu a, dinhmun chhe taka min hruai thlengtute chu Zoram hnuk chhattute tiin ṭhang leh tharten an la dem ngei ang.

7. Khawtlâng nun: Mizo kan nihnaah hian lungawi ngawt a tâwk ta lo. Khawtlâng tana mi hnawksak, mite tâna harsatna leh buaina siam a, râlmuanna hnawt ṭiauva, râlṭitna hmuna min hnûk lûttute hian kan ram hi awmchhan nei loah an siam a ni. “Mizo kan ni, kan hmêl a ṭha, kan tum a sâng bawk si” tih hla te, “Mizo ka ni hi ka va lâwm êm!” tia lawmthu kan sawi châmchi ṭhinte khân hmanlai a chang tawh ang. Khawtlâng nun tichhia a, tihmêlhemtute hi ram hmêlma, dim dawina tel miah lova Zoram hnuk chhattute an ni.

TLÂNGKAWMNA: ‘Invawn thianghlimna lama chêng khat kan sên hian chêng kua kan hlêp a ni’ tiin mithiamte’n an sawi ṭhin. He ram zîmte tiṭawpa tibâltute hian a nunna zahsak lovin thihna kut vâwt an mantîr a ni. Khawvêl pum puia Mizoram len zâwng chu 0.004% chauh a ni. Chîmral leh hneh chhuhte chu kan va awl dâwn tak êm! Chuvangin hmangaihna, ṭhahnemngaihna, taimakna, tih tak takna leh rinawmna nên he kan ram zîmte hi i chhan chhuak ang u. Ka lâwm e.

Related posts

Mizo Lal Hrangvunga Sailo leh Kristianna

makpa_mawia

Zan vak #3

shailendra

Taliban zingah ‘ Israel hnam bo’ an awm em ni?

crocs

18 comments

khirhkhak April 3, 2012 at 10:17 AM

A ngaihnawm dawn e.

Reply
littlerascal April 3, 2012 at 10:23 AM

Vawiin a ka vawi 2 second na haha

Reply
littlerascal April 3, 2012 at 10:24 AM

Vawiin a ka vawi 3 second na haha

Reply
James Bond April 3, 2012 at 10:25 AM

A va beidawnthlak teh reng em! Ram hmngaih hi an awm anih pawn vote thlak peih tu ten vote tlin tum hek suh. A tawn thei thei, mipui bum thiam thiam hi vote hmu hnem anni si a. Trpura pawh tluk lo nih chu a tlawmngaihthlak kher mai.

Reply
Jacka Pi April 3, 2012 at 11:13 AM

I van ziak tawi, funkim thiam ang reng si e…eng daily ah emaw ni ka chhiar tawh tlat a ka hriat chu, nangmah tho em ni post tu pa?

Reply
sillyBoy April 3, 2012 at 11:14 AM

little, i ho latuk 😛

Reply
Master Kim April 3, 2012 at 11:22 AM

Thlawp thuai2. Sawi belh tur ka hre teuh. Mahse ka sawi ve thiam silo.

Reply
Soberboy April 3, 2012 at 11:34 AM

8. POLYTRICKS

Reply
Lersia April 3, 2012 at 11:40 AM

A tha hle mai a …. suangtuahna han hmang zau leh deuh la, Vanglaini ah han ziak ve teh

Reply
Lamji April 3, 2012 at 2:50 PM

Ava tha par2 ve le.. (Y) Research pawh ngai lova thil chiang sa tawh reng anni. A thim zawnga ngaihthuah hi chuan kan hmabak hi chu a thim thin mawle. Mahse a eng zawnga thlir a,keini thalai mi rainawm kan la awm zia hrechiang tu te alawm kan ni le…ti raw.. (Y)

Reply
lushai_er April 3, 2012 at 4:06 PM

Zirtirtute zawng zawng cheaters tih hi ka tha a na deuh tlat a nia!!!

misual.commer tam zawk hi zirna In lama thawk an tam zawk ang em? te ka ti mai mai. An tha hnem ngaihna hi kan hmu thelh ang e.

Reply
Awmtea Khiangte April 3, 2012 at 6:15 PM

#5 Jacka Pi Vanglainiah nikum lam khan ka chhuah tawh alawm.

#9 Lersia Ka chhuah tawh e

Reply
malsta27 April 3, 2012 at 6:34 PM

Oitho……. ziak tha ve 😀 😀 😀 😀 ……. a tha viau tho na chungin duhthawh lutuk na lamah duhthusam a ang lek2 a then khi chu. NOI

Reply
Jacka Pi April 3, 2012 at 6:43 PM

#12 good to know I still have my memory intact (H)

Reply
sheldon April 3, 2012 at 9:48 PM

Post tha ka ti (Y)

Reply
esh Hauhulh April 3, 2012 at 10:46 PM

ညငု့ေတစ ာေင

Reply
Maverick April 3, 2012 at 11:53 PM

(Y) Post

Reply
CFL April 4, 2012 at 11:40 AM

A va tha em….

Reply

Leave a Comment