Advice Mizo Society & Culture Mizoram Religion

THLANMUAL TITI : ( A One Act Play for Social Satire )

CHARACTERS :
Thlan 1 – Pu Lianhminga a ni a, Zoram buai lai khan Hnam chhantu sipai te zingah tel vein vanduaithlak takin Zoram zalenna hmel hmu hman lovin indona ah a thi ta a ni.
Thlan 2 – A damlai chuan Pu Lalthantluanga tia koh thin ani a, pa tha tak, a damlai pawh a then leh rual te ngaihsak thin tak, mi fel tak a ni. A tar kun thlengin a dam a, kum 83 mi a nihin Ashma natna avangin a thi a ni.
Thlan 3 : Tv. Zohmingliana a ni a, a damlai pawha nun duhdah taka hmang thin mi a ni. Chhungkaw rethei tak atang chawrchhuak a ni a,  Tlangval kum 20 mi a nih in a piangthar ve a, Pathian rawngbawl in vawi tam tak chu a lo feh chhuak ve tawh thin a ni.  Mahse vanduaithlak takin kum 26 mi chauh anih laiin rilru hah luat avanga mahni inti hlumin khawvel alo chhuahsan ta a ni.
Thlan 4 : Pasaltha Lianngama, tia an koh thin a ni a, kum zahnih liam ta khan a thianpa Sakei hrang laka a chhan avangin a nunna alo chan ta a ni. Ani hi a damlai chuan pa zaidam leh pa tha tak, pa rorum leh rilru khauh tak a ni thung.
Thlan 5 : Thuhriltu ropui tak, Rev. Hranglinga, kum 60 kal ta a vai ringlo mi ten an vuak hlum tak.

ACT – I
Thlan 1 : Ka nupui leh fanau ten mittui tla zawih zawiha min ngenna pawh pawisa duh lovin ram leh hnam chhan nan tiin ramhnuai ka la hriat ngai hauh lovah ka thi dawn nge ka dam dawn tih pawh hre hauh lovin zan tam tak thosi leh vaihmite kara rammu ve turin ka in ak chhuak ve a. Riltam leh na tuar reng rengin ka that lai hun tam zawk kha ka hmang ral a, ka nupui fanau te hnena awm chu thlahlel ve ngawih ngawih mah ila, chu aia thlakhlelh leh ngaih pawimawh zawk ka neih avangin tam leh natna te khan min ti vui ve ngai lo a nih kha. Ram chhan nana khatianga natna leh harsatna ka tuar zo zai te avang khan ka lawm ve thei asin. Mahse, lo ti lo tawp tur kha ka ni si a.

Thlan 2 : In zarah mi tam takin zalenna an hmuh phah a, chu chu I hre ve lo vem ni?

Thlan 1 : Chu zalenna I sawi chu Ka kal dawna ka bawp a mittui tla zawih zawiha min vuantu, ka nupui fanaute mittui man rul letna atan chuan a tawk zo lo a ni e.

Thlan 2 : Zalen duh vangin I beia, chu chuan I nupui fanau te mittui tla chu a en liam tir che a ni lo vem ni? I thil duh I neia, I thil tumah I hlawhtlinga, chu lawmman chu ani lo vem ni I nupui fanau te mittui rulh letna atana I tih chu?

Thlan 1 : Zalenna awmzia ka lo hrefiah thiam lo kha ka thil tihsual lian ber chu a ni reng alawm.

Thlan 2 : Tunah chuan mahni in ro an inrel ve tawh a, ‘Keima Ram’ tih tur an nei ve tawh a, chu bak bak a zalenna famkim chu khi khawvel tawp zetah khian a awm leh dawn chuang em ni?

Thlan 1 : Thla hmasa a min rawn zawm ve tu tlangval pakhat khan chu I zawhna chu a chhan sak thei che in ka ring.

(Mahni in tihhlum avanga thla hmasa a mitthi khua a cheng ve, tlangval pakhat chu a rawn tawng chhuak ve ta a…)

Thlan 3 : Ni e, kei pawh in zalenna awmzia hi ka lo hrefiah tawk lo thin a ni. Khawvela ka awmlai khan ‘mi fel’ tia koh ka ni ngai lova, beisei pawh ka beisei ngam ngai hek lo. Kan chhungkua kan retheih em avangin kum 15 chauh ka nih in sikul kai ka chawlhsan a, ka thian te’n thiamna sang zawk beia nasa taka tan an lak laiin kei lehkha thiam lo val tan chuan,  ‘tumruhna’ tih vel chu engmah lo mai mai a ni. Kan ramin mahni a ro kan inrel hnu khan changkanna thli chu Zoramah nasa takin a rawn tleh chiam maia, mi hausa leh mi nei nung  tak takte an rawn in lar ve tan a. Kan ram pawh a thang chak kher mai. Mahse, vanneihna in a thlen ve phak lohna ram, retheihna leh pachhiatna in a tuam mek te tan chuan chu thlipui chu tuar zawh rual lohva nasa a ni thung.

Thlan 2 : Retheihna tihbo tumin nasa takin an hruaitu ten an bei a, chu chu dawt pawh a ni hek lo. Mirethei leh chanhai tun hmaa lo neia eizawng thin te pawhin an eizawnna te chu an bansan tak khi… Hruaitu ten anni tanpui chu hna berah neiin, tun hmaa fairelbel khat ngai lo te pawh a khah liam zawih zawih tak khi! Chu lo liama thu lawmawm chu a awm leh thei dawn chuang em ni?

Thlan 3 : Chu chu a landan mai a ni. An fairelbel khat mahse, an thinlung a ruak si a ni. Hausakna in kan ram kawngkhar a rawn sawi hawn a chin, duhawmna leh hlemhletna, hmuhsitna leh itsikna, huatna leh inthik tawnna te chu kan ramah an rawn zuang lut ve nghal a. Mi rethei leh hausate inkar a zau tual tual a, nei lote tan chuan nei tamte khawvel a chen reng chu zalenna a ni thei dawn em ni?

( Kum zahnih liam ta a Sakei hrang laka a thianpa a chhan avanga khawvel lo chhuahsan ta, pasaltha Khuangchera unaupa neih chhun, pasaltha Lianngama chu a rawn tawng chhuak ve a… )

Thlan 4 : Hlemhletna inti elo maw? Itsikna, elrelna, hmuhsitna, retheihna, in tih te chu enge ni reng reng a?

Thlan 3 : Ni e, kan ramin chungte chu tunah khian a pai mek a ni. Sum in ro a rel a, hnam chu a phenah a ding a, mipui te chu nasa takin an inthen darh mek a ni.

Thlan 4 : A siamtha turin lal leh a khawnbawl upa te an awm lo vem ni? Chung thil te chu thil tha lo tak a ni si a.

Thlan 3 : Lalte chu kum tam tak liam ta khan ban an ni tawh alawm. An ai awh turin mipuite chuan hun bithliah hun chhunga an chunga rorel turin anmahni’n hotu tur an thlang tawh thin alawm.

Thlan 4 : Anih chuan chung hruaitu an thlan te chuan an siamtha thei lo vem ni?

Thlan 3 : An tum a, nasa takin an bei a, mahse siamthat theih rual ani tawh lo a ni. Mi tam takin eitur an neih loh laiin mi thenkhat te chuan ei senloh an nei thung si. Kei ngei pawh hi an zinga ka awm lai chuan ei tur neilo te zingah chuan ka tel ve thin alawm.

Thlan 4 : Anih leh, ‘Dam leh tlang khatah, thih leh ruam khatah,’ tih te, ‘sem sem dam dam, ei bil thi thi,’ tih thu tha tak tak kan rochun zawng zawngte kha anti zo bo ta em ni?

Thlan 3 : Tibo nang le. Chung thu te chu a te ber atanga a lianber thlengin an la vawng reng alawm. Hla ah te siamin an sa rual thup thup thin alawm. Mahse, anmahni nilo, an thenawm te zawm atan chuah an sa thin a ni. An nin sa se, an thenawm ten hria se, ngaithla se, zawm se an ti thin a ni.

Thlan 4 : Anih leh tlangval huaisen leh tlawmngai tlemte tal pawh a siamtha turin an pen chhuak ngam lo vem ni?

Thlan 3 : Pen chhuak ngam teh reng mai. Thalai pawl, YMA an tih mai te pawh dinin nasa takin hma an la ve alawm. Mahse, tunah chuan anni pawh anmahni leh mahni an inbuaipui a ngai tawh. Ruihhlo leh sual dang bawiah tangin ram chhanchhuak tura hma an lak hmain anmahni an inbuaipui hmasak phawt a ngai tawh a ni.

Thlan 4 : Anih tak chu mawle. Thalai te hi ram leh hnam innghahna lungpui leh ban pawimawh tak, hnam ropuina leh hmingthatna thlentu an nih avangin an chak lohna chu ram chuan a tuar ta a nih chu.  Chuti anih chuan tunge nunau leh khawtlang te chu venghim ta ang le?

Thlan 3 : Anni te chuan venhim mamawh niin an inhre tawh hleinem. An thlavang hauhtu sawrkar tha tak leh, thiamna leh finna tam tak anmahni in an nei ve tawh a, mahni in an inngaihtuah thei tawh alawm.Mahse, tunah chuan venhim mamawh tawhlo nia an inngaihna tak khi venhim an tulna tak chu niin ka hria.

Thlan 4 : I thusawi awmzia chu enge nita ngai? Hmeichhia te pawh mahni kut leh kein an ding ve thei tawh I tihna em ni? Chu lo liama thu lawmawm chu van hnuaia leng Zofate zingah chuan a awm leh tawh ngai dawn chuang em ni?

Thlan 3 : Nia, thu lawmawm chu ni tehreng e. Mahse, tunah chuan an hnam thisen leh hnute tui ngei ringin hnam dang  nau te chu an hrinsak mek zel a ni.

Thlan 4 : Eng thu nge maw I sawi tak chu le? An thisen zama thisen luangte chu kan thlahtute thisen kha ani tawh lo I tihna em ni? Khawiah nge Mizo tlangval rual, sa hrang mihrang hmaa zam ve ngailo te kha an zawm zawh tak le?

Thlan 3 : Nang chuan khi khawvela I chen lai khan chhan tlak la awmte chu sa hrang leh mihrang lak ata pawh I chhanchhuak thin ani lo vem ni kha?

Thlan 4 : Ni e, a dik alawm, mahni nunna  ngei pawh thap in chhan tlak la awmte chu ka chhan ve thin a ni.

Thlan 3 : Ni e, I sawi chu a dik alawm. Mahse, chhan tlak awm tawhlo te chu nang pawhin chhan talh I tum thin bik em ni?

Thlan 4 : Chhan tlak awm tawhlo chhan chuan zawmzia a nei tawh hlei nem.

Thlan 3 : I ti dik. Anni chu chhan tlak an awm tawh lo a ni. Hnam vei leh chhanchhuah tum a nasa taka bei apiang te chuan hmuhsitna leh sawiselna chauh an hlawh thin. Chu chu thudik a ni bawk.

( Thu hriltu ropui tak, Rev. Hranglinga, kum 60 kal ta a vai ringlo mi ten an vuak hlum tak chu a rawn tawngchhuak ve a.)

Thlan 5 : In titi chuan kei putar chau tawh tak beng hi a verh kher mai a. Mi tamtak ten mahni hnam phatsan in hnam dang nun phung zawm mahse, mahni hnam chauh hmangaih tlat a, duat taka enkawl thintu thalai huaisen leh fel tak tak chhiar sen loh an la awm alawm. Anni chuan kan ram hliam te chu Pathian thu tak leh a thiltihtheihna hmangin engtik niah emaw chuan an la tuam dam leh ngei ang tih ka ring tlat a ni.

Thlan 3 : Chu I rinna leh I beiseina te chu kei pawhin ringin beisei ve thei ila ka ti khawp mai. Mahse, hmingthatna leh hmingthanna hlawhchhuak lova thil tha tih duh tute chu tlem te chauh anni tawh. Kohhran chu an chakkhai lakna atan chauh an hmanga, hnam innghahna lungpui Isua Krista chu inphen nan chuah an hmang thin a ni.

Thlan 4 : Kohhran inti em ni? Isua Krista in tih te chu eng thil nge ni ta ngai?

Thlan 5 : Ni e, Mizo hnam tam zawk te chuan piantharna changin sakhaw thar Isua Krista zarah an nei tawh a ni. Lungbul, thingbul te bia a, ran thisen hmanga inthawi ngai tawh lovin, nunna thar petu, mihringte damna tura A nun hlantu,  Isua Krista leh mihringte’n thihna kawng kan zawh lohna tura a fapa neihchhun pawh ui lova petu, Hmangaihna Pathian rawng chu tunah chuan an bawl tawh a ni. Chu sakhuana an vawn a chin an hnam chu nasa taka chawi san a awmin hma pawh nasa takin an sawn tawh a ni.

Thlan 4 : Thutlukna duhawm tak anih chu. Chu an Pathian, mahni fapa neihchhun tak ngial pawh ui zo lova petu duhzawng leh lawmzawng chu lo ti fo thin teh sela  an rinna chu thlah hlek suh se. Tin, A nunna ngei pawh an tana thap ngam, Isua Krista in tih rawng chu rinawm takin lo bawl zel teh se.

 Thlan 5 : Nia, thahnem ngai takin mi tam tak te chuan an Pathian rawng chu an bawl mek zel a ni. Mahse, kohhran ah inthendarhna thlipui tunah khian a thawk mek a,chu chuan anni chu nasa takin a thendarh mek zel a ni.

Thlan 4 : Mahse, chu’ng Kohhran I tih te chu Isua Krista thisen ringa nung vek anni I ti ani lo vem ni?

Thlan 3 : Aw ni e, I sawi chu a dik alawm. Pathian lehkhabu thianghlim, Bible zirtirna rinchhanin an za vaiin an kal a ni. Mahse, chu a pawl bika inthendarhna chuan hnam inpumkhatna a ti chhiaa, hnam in a tuar phah a, inpumkhatna chu siamthat hleihtheih loh vin a sawi nghing mek a ni.

Thlan 4 : Chuti anih chuan eng vanga ‘inthendarh’ tih tawngkam chu hmang ta mai ngei I nih le? Isua Krista chanchintha puanzar, kaih pharh duai hnuaiah chuan mi chi tinreng te chu an lo awm pawh a ni mai thei e. A then sa hel ei duh mi, a then hnim hring ei duh mi te, a then tui chauh ring mi te, a then te phei chu engmah ei a in ngai lo te pawh an lo mai thei. Mahse, chu puanzar hlim hnuaia an za vaia Krista thla zar hnuaia Bible zirtirna hnuaia awm an la nih phawt chuan thendarh an la ni lo ve. Insuihkhawm leh zai lo rel leh ngei teh se.

—————-Puanzar kaihthlak a ni a, A tawp ta————–

Related posts

Combined Post: (NLUP) & (Motor chuan man)

Jakepoi

Parthing

XaiA

misual Inneih sawmna!!

aduhi

11 comments

Chhuaklinga June 26, 2012 at 10:15 AM

Chhiar ila.

tren tren

Reply
lr hlonchhing June 26, 2012 at 10:46 AM

Chhiar second ila

Reply
chhangteval June 26, 2012 at 10:52 AM

chhiar ve ta thovi la 😛

Reply
Kher Kher June 26, 2012 at 10:59 AM

Chhiar lo bik lo ta ila (H)

Reply
Dr Mahminga Sailo June 26, 2012 at 11:17 AM

(Y)

Reply
Kawhterenga June 26, 2012 at 11:55 AM

Chhiar hma hawta lo Comment ve phet tum hi chuan sawi tur tha a awm lo reng thin a ni tiraw @chhuakling,lr,chhangteval, kherkher 😛 😛
Mizorama Kohhran hrang hrang, Isua ringtu inti tam lutuk hi chu ka vei thin khawp asin. He sakhaw lo luh dan hi a Chepakaiah a fuh tawk lo a,a tirah Tui ti tak takin kan lem duak duak a, a tawp lamah kan ei luat tuar loin kan luak leh ta bawrh bawrh chu a nih si hi 🙂 :-O

Reply
PKfanai June 26, 2012 at 12:07 PM

Ngaihtuah thui khawp mai. (Y)

Reply
Kawhterenga June 26, 2012 at 12:10 PM

Ram buai laia kan nu leh pa, pi leh puten an lo tuar nasatzia tak kha aw!! ;-( Vai Sipaiin duhtawka patling an sawisa a hmeichhiate an pawngsual tur lai vel ka ngaihtuah a ka’n mitthla vel hian ka la Tim uaih uaih thei nia :-O A huaikawm bawl zawnga Zalenna an han sual chiah kha chu kan nuamsa lo tlang ngawt mai. 😛 Hnam Sipaite thawh rah(ni tak maw?!) Zalenna(famkim lo!) kan nei ta hi a lawmawm khawp mai. (Y) Pu Laldengan a him chin atanga a Sipaite a han command thin mai kha chu a ropui(lem lo!) ka ti ngawt mai (H) India ramin British laka Zalenna a sual lai khan Hruaitute khan Jail bang vawi engzah tak zut hlawm ang maw?! 😉 😉

Reply
Kawhterenga June 26, 2012 at 12:18 PM

Hetia kan rama eiruk hluar ta lutuk hi Central Sawrkar chawmhlawm kan nih vang a ni thei mai lo’ng maw? :-S Mahni thawhchhuah ni lo, a dawna dawn Sum tam tak chu renchem tak leh dik taka hman a har viau ta ve ang. (K)

Reply
sheldon June 26, 2012 at 2:22 PM

Tha riau mai (Y)

Reply
dustin sampler14 June 26, 2012 at 3:27 PM

@Kawhterenga, Kristianna hi ka himna ani kei chuan ka la ti fan duh. Kan chhevela Tribal hnam hrang hrang te nun atang hian a lang chiang hle in ka hria. Mahse, ka hlauh em em thin ‘Ni’ hi alo la thleng palh ang tih ka hlau khawp mai. Indona hriamhrei a zawnga hlauhawm ber, Sakhuana thurin hmanga kan inbeih ni chu… (W)

Reply

Leave a Comment