Lifestyle Luangliam Mizoram More than words

Ka hmelhriat thar, ka chhuan em em!

A sei viau, i chhiar chhuah chuan i inchhir lo thung ang!

Midang ziak ka rawn nghat chawrh mai
:

Source: http://tkahnamte.blogspot.in/2011/10/hiv-positive-ni-tih-zep-lo.html

Lalchhuanzuali hi March ni 6, 1988 khan Aizawl Civil Hospital ah a piang a. A pa chu Lalnunfela niin, a nu chu Lalthlanchhuahi a ni a. An chhungkuain Venghlui, Aizawl ah an khawsa mek a. Chhuanzuali te unau hi 4 an ni a, hmeichhe pathum leh mipa pakhat niin, amah hi a upa ber a ni.

Sikul hi a kal kual ve nual mai a, Govt. Primary School, Venghlui an bul tanin, Govt. Bible Middle School, Venghlui; Hrawva English Medium School; Brighter Higher Secondary School; MICE leh Basilea ah te kalin, Class 12 thleng a zir a, a bak chu pasal a neih tak avangin a chhunzawm ta lo.

Khawtlangah a theih ang tawk tawkin a inhmang thin a, an Branch KTP in documentary an siam pawhin a theihna apiangah thahnem ngai takin a tel ve a ni. May, 2006 khan pasal a nei a, nau a pai zui a. A nau pai hi a fuh chiah loh avangin December thla khan doctor te chuan ‘bed rest’ turin an ti a, damdawi inah a lut a.

Nau pai apiang an tih thin ang bawkin Chhuanzuali pawh HIV hrik a pai leh pai loh an en a, positive a nih thu hi an hrilh a.

A thu hriat hian a deng na em em mai a, mi lepchiah leh drugs ti te chauhin an kai thin nia a ngaih khan a taksa a luhchilh ve tlat bawk sia.Hreh takin a chhungte a hrilh a, a pasal chuan pawm duh tawh loin an inthen phah hial a. Chhuanzuali hi rilru hrehawm takin a awm a, a chhungte bula awm pawh a hreh a, mut pindanah a inkhung a, khumah muin a inlukhup daih thin.

Awmkhawloh vang emaw, tal duhdah vang emawa he natna hrik hi kai a ni lo a, tihpalh thil thu, vanduai vang liau liau a ni. “A tirah chuan ka mangang a, sawi ngaihna ka hre lo. Ka tap tawp,” a ti a, “A hrehawm a ni tawp mai. Tumah ka kawm duh lo a, ka chhungte pawh ka hmu duh lo,” a ti bawk.

HIV positive a ni tih hriatchhuah a nih lai hian a thiannuin a kalpui a, a thiannu chu amah tih lohva a hre hmasa bertu a ni. A pasal chuan a pawm thei lo a, “Kei chu ka ni ve lo, rawn haw tawh suh,” tih chu a thudawn a ni.
Mangang takin awm mah se a nu leh pa, a chhungte chu a lamah an tang tlat a, an thinhrik ve lo. Ani pawh a insangmar a, tunah chuan Mizorama HIV positive te enkawla buaipuitu a ni ta a, tunah phei chuan Mizoram mai ni lovin India ram a vil tawh dawn.

February, 2007 khan Social Guidance chuan gospel camping an buatsaih a, hetah hian Chhuanzuali pawh a lut ve a, nun thar neiin Pathianah lawmna famkim a hmu tan a.

Pu Vanlalmuana (Kawngtea), President, Positive Network of Mizoram thusawi a ngaihthlak tumin Chhuanzuali rilru hneh deuh tu a awm a. “Pu Kawngtea kha ka en thin a, kei aia sa chhe zawk ania, khati chung khan midangte tan theihtawp chhuahin a inpe thei a, eng vangin nge ka theih loh bik ang,” tih ngaihtuahna neiin, a rilruah HIV positive te tana thawk tura inpek chu a lian ta hle mai a.
HIV positive a ni tih a inhriat hnu hian kawng engkimah LPS Nun Krista host, Lalrintluangi chuan a kaihruai a. A tulna apiangah a tawiawm zel a, a chungah hian Chhuanzuali pawh a lawm hle a.

June 20, 2007 khan Chhuanzuali hian fanu a hring a, hemi hnu hian MPLAS ah a thawk zui a. Amaherawhchu, CHARCA project a tawp avangin a hna atang chuan a chawlh a ngai leh a. 2008 khan Shalom ah a thawk leh a, hei pawh hi project a tawp leh avangin a thawk zui thei ta lo bawk a.

March, 2011 atangin Positive Network of Mizoram ah a thawk tan a, councellor nihna a chelh a. Chu mai bakah, PNM hnuaia Women Cell ah President nihna a chelh mek bawk.

Mizoram hmun hrang hrangah campaign leh programme hrang hrang vangin a zinkual nasa hle a. A tlangpuiin HIV/AIDS chungchangah mipuiin awareness kan la tlachham lutuk hi a vei hle a.

A zinna pakhatah pawh HIV positive a nih thu a sawilan avangin chaw eia sawmtu pawh a hmuh zawh loh thu sawiin, khawlaia a kal pawh mak tih hmel deuha an en hrek hrek thu a sawi bawk a.

Hemi hmuna an campaign chu a hlawhchham chiang hle nia ngaiin, a pawi a ti hle a. Mahse, a hnu daihah chumi khuaa HIV positive pakhat chuan phone in a rawn be nawlh mai a, a rawn berawn a, a hlawhchham thak lo tih a langchhuak ve leh a ni.

HIV/AIDS awareness campaign neiin a zinchhuak deuh reng a, mi tam takin an tangkaipui hle a, hlawkpuitu leh sawtpuitu an pun phah hle a.
Chhuanzuali hian HIV positive a ni tih hi a zep lem loh avangin hei hian mi tam takah chona a pe a, ama zarah hian mi tam takin awareness an neih that phah a ni.

Tunah hian YWCA National Piya Committee member a ni mek a, Positive Women Network ah committee member a ni mek bawk a. National Piya Committee ah hian India hmarchhak atangin mi pahnih chauh an thlang a, Chhuanzuali leh Guwahati-a mi pakhat chauh an awm a ni.

July ni 9-17 chhung khan Switzerland-a Zurich khuaah Young Women Christian Association (YWCA) khawmpui lian, kum li dana an neih thin, World Council an hmang a. Hmeichhia, HIV positive ngei tir tura tih an nih avangin Mizoram YWCA pawhin Chhuanzuali hi an tir a.

Zoram la pel miah lo a nih avangin a huphurh hle mai a, Shillong-ah he khawmpuia a thusawi tur sawi chhin turin an ko a, hemi hnu hian Switzerland lam chu a pan chauh a.
He khawmpuiah hian khawvel ram hrang hrang 100 chuang atangin mi an fuankhawm a, HIV positive chu mi 20 emaw vel chauh an ni a. Hmeichhe positive te hian anmahni rama harsatna an tawhte an sawi a. Chhuanzuali chuan Mizoramah nu tha tak tak, mahni pasalte avanga HIV positive an tam thu a sawi a. Amah ngei pawh HIV positive anih thu hi huaisen takin a sawichhuak a, inthup kher tul a tih loh thu a sawi zui avangin a thusawi ngaithei lo deuh deuh pawh an awm nual reng a ni.

A nihna a zep duh loh vanga amah hawtu hi awm thin mahse, a thiltum hi a thulh phah ngai chuang lo a. Thahnemngai takin midangte tan a thawk ngar ngar mai a ni.

“Pathianin amah ka hnaih theih nan tiin he dinhmunah hian min dintir niin ka hria a. Tunah hian HIV positive nih leh nih loh chungchangah Pathian hian duh min thlantir dawn ta se, ka inngaihtuah rei viau ang,” tiin Chhuanzuali hian a sawi.

Hmeichhe positive te harsatna tawh chungchang sawiin, Chhuanzuali chuan Mizoramah nu tha tak tak, pasalte vanga he natna hrik kai an tam thu a sawi a.
“Nu, a then chu la naupang tak tak, pasalte atanga kai an tam tawh khawp mai a, inenkawlna lamah kan la pachhe hle a, inzirtir nasat lehzual a tul hlein ka hria a. Hmeichhiate hi inchhungkhurah kan buai a, inah kan tawm deuh reng a, zirtirna kan dawng lo. Kan chep a, hun kan nei lo bawk a, enhran kan hlawh bawk,” Chhuanzuali chuan a ti.

A him tur zawnga mipat hmeichhiatna (safe sex) hmang tura inzirtir tul a tih thu a sawi a, “Sex hmang lo tura inzirtir hi a tha a, mahse a tawk lo. Safe sex hmang tura inzirtir a tul tih hi ka ngaihdan a ni,” a ti. “Nu leh pate’n sex hmang lo turin an fate an zirtir a, mahse an fanu kha a lo virgin lo daih tawh thei a. Tin, nupa karah pawh safe sex hi sawi a tul. Entirnan – nu pakhat chuan a pasal kha a ringhlel a, a pasal chu sex lama tladah tak a ni a. A pasal chuan a hmeichhe kawpte atangin natna hrik a kai ta a, a nupui chuan a pasal hnen atangin a kaichhawng ve leh a. Chutiang chu Mizo zingah pawh an tam a, safe sex hmang tura inzirtir hi a tul a ni,” tiin a sawi zawm a ni.

“Mi ramah chuan positive-te hian enkawlna an dawng tha a, ei leh in pawh a tha a. Positive-te pawh an hawiharh a. Keini ramah chuan enkawlna dawngte ngei pawh hian mahni damdawi ei hming leh a thawh dan tur pawh kan hre lo. Tin, tuna positive kan hriatte hi a rethei lam, tanpuina mamawh leh chenna tur thlenga mamawh te kan ni a. A hausate chu an inthup tlat a. Rualawh a na duh khawp mai,” tiin a rualawh thu a sawi.

HIV positive te tan rualawh a nat thu a sawi a, Mizoramah CD4 Count pakhat chauh a awm thu sawiin, “Mi ramah chuan an ngah a, Mizoramah chuan mi 3000/4000 velin pakhat kan intawm a, tlo pawh a tlo lo,” a ti a. CD4 Count hi HIV positive te enna a ni a, CD4 Count hmanga en an nihin, a hniam chuan ART an la thin a, positive te enkawl nana thil pawimawh ber pakhat a ni a. Mizoramah khawl pakhat chauh a awm avangin a rim hle a, a overload phah fo reng a ni.

Mizoramah enhran an hlawh thu sawiin, positive te hi an chhungte’n an hnawtchhuak fo tih a sawi a, chutiang mite leh thingtlang atanga inenkawl tura Aizawl pante tan han riah maina tur (short stay home) an mamawh thu Chhuanzuali hian a sawi a, sorkar hruaitute hnenah pawh a thuphunga an lo thlen tawh thu a sawi bawk.

HIV/AIDS chungchanga harsatna neite puih a inhuam hle a. Hetianga harsatna neite chuan a hnuaia Chhuanzuali phone number tarlanah hian engtiklai pawhin biakpawh theih reng a ni.

Chhuanzuali – 9612977974

Thubelh: July, 2012 khan International Aids Conference, Washington, DC a nghah chu Mizo doctor pakhat, TV. Ronald Lalthanmawia nen anlo chhim hlauh a vangin ka hmelhriat ve thei ta a, ka lawm hle.

Nupui/pasal/nula/tlangval-te hian fimkhur lo tak a midang kan kawp vang te hian keimahni mai nilo, kan chhungte dam chhung hreawm takin kan siam thei tih i hria ila. Midang death sentence kan pe thei a ni tihte i hre fo ila ka duh a ni.

Kan pathum thlalak. Nepali pa penquin ang deuh a ding kha a tel velo ania 😛

Amah Lalchhuanzuali phalna a rawn tar chhuah a ni e.

Related posts

Satellite chhia leiah a rawn tla dawn

H.Vangchhia

Mizo tawng hi engber nge dik ang?

chepahakhata

Ziak Lo Thei Ka Ni Lo

lunglohtui

42 comments

рдпģŤіСHAЩЯ August 8, 2012 at 11:33 AM

ka chhiar hmasa ber

Reply
ɪ̣uɪ̣pnoɥ August 8, 2012 at 11:59 AM

A va fakawm bîk ve…! A vei zárah mi tam takin an damphah dawn hlauh zuk nia!

Ṭhenkhat, vei tih inhriat ruala mi a tam thei ang ber mutpui tum nen chuan an va inang lo deuh ve…

Reply
Charice_mizo August 8, 2012 at 12:02 PM

A thawk ropui hle mai, mahse a chanchin kimchang in tarlang ta rau rau, vanduai vanga HIV alo kai dan te chu hriat a va chakawm ve mawle…anyway..Good post (Y)

Reply
ulawng August 8, 2012 at 12:10 PM

a bawlawk ah khan ka chhiar tawh a, ropui khawp mai (Y)

Reply
lrpa August 8, 2012 at 12:22 PM

(Y) ..
charice i thin hi a..i dilchhut lutuk 😀

Reply
James Bond August 8, 2012 at 12:58 PM

Hei baka mi huaisen! A chhuanawm hle mai. Mizorama HIV leh AIDS lama awareness kan neih loh zia a sawi khi health minister beng thleng se ka va ti ve. AIDS hi khawvelin a hersan tan mek lehnghal a,. Chutih laia helai dai kil kara lo ngaihthah ve ngawt chi ani lo. AIDS hi thihpui duh tur pawh ani lo. Awareness a awm that chuan treatment a awm.

Reply
sheldon August 8, 2012 at 1:19 PM

A va ti tha em! Mizoram, HIV Positive te kan la thinhrik tlatna hmun ah a inpuang a, a huaisen ka ti. Hur leh sual vang ni miah lova Aids victim te phei hi chu an lainatawm ngawih ngawih.

Hman deuh a Aids Awareness atana Drama an chan ka en atang khan Aids victim te hi ka thlir dan a dang ta daih, endawng lova kan hmangaih an tul. Ka vei lutuk a Misual ah pawh ka ziak ve ngei.

Reply
saint sammoo August 8, 2012 at 1:56 PM

huaisen

Reply
keimah August 8, 2012 at 2:51 PM

Ka ngaisang thlawt e! Vawi khat nunga thi mai tur theuh theuh hi midangte tana tangkai apiang hi mi ngaihsanawmah ka ngai. Mite thinhrik leh endawng pawh dawn chang lova HIV+ an nih puang ngamtute hi mi HUAISEN an ni.

Zawhna: engatinge HIV+ an nih hriat ve leha engtia kai nge a nih ti zawnga kan rilruah zawhna a lo awm thin? HIV+ theuh theuh hi thliar hran kual leh vel kan ching fo bawk a, hei hi a tul ber em? An pasal/nupuite avang ni lovin kawng dang avanga kai pawh ni se an nihna ang angin kan khawngaihin kan pawm thei ve mai lo’m ni? Tun dinhmunah hi chuan HIV+ tam ber tan hian mahni inpuan ngamna chi niin kei chuan ka hre lo. Mipuiin zir tur kan la ngah viauin ka hria.

Reply
Dr Mahminga Sailo August 8, 2012 at 3:15 PM

A huaisenin a fakawm hle mai… Chhuanawm zual zel turin thawh teh se, Chhuanzuali chu.. (Y)

# 9… (Y)

Reply
lrpa August 8, 2012 at 3:17 PM

Pu HVa in pose nalh tum lutuk khi..hihi 🙂

Reply
H.Vangchhia August 8, 2012 at 3:37 PM

lrp, Nepali pa penquin an dan zia khi hairehai 😛 😉

Reply
Puii August 8, 2012 at 3:39 PM

A va ngaihnawmin ava runthlak lungkuai si em!! (U) Chhuanzuali hi ka tan tawp! (*) (Y) ! dam reng rawh se…

Reply
H.Vangchhia August 8, 2012 at 3:41 PM

Charice #3 ziah tel kher a ngaiin a hre lo va tar chhuah ka dil hian, mahse ni e hriat a pawimawh a hriatna ka nei. Thu thup deuh hlekin ka thubelh thuhlawm 2 na ah khian ka ziak… 🙂

Reply
lushai_er August 8, 2012 at 5:37 PM

Source lamah chuan ti hian a inziak…,”HIV positive a ni tih hriatchhuah a nih lai hian a thiannuin a kalpui a, a thiannu chu amah tih lohva a hre hmasa bertu a ni. A pasal chuan a pawm thei lo a, “Kei chu ka ni ve lo, rawn haw tawh suh,” tih chu a thudawn a ni.”

A pasal berin a kai loh chuan a pasal lo lak atangin a kai tihna a ni dawn maw..?

Reply
ɪ̣uɪ̣pnoɥ August 8, 2012 at 5:41 PM

#15 lushai_er (*) , nih chu a ni mai ang chu. A nulât laiin vawi hnih-khat leh pawh lo chesual ve thei tho a ni a, chu chu sawi zawm êm êm chîah pawh ka ngai lo.

Awmherh lutuk êm êm vang ni lo hian a vanduai theih tih lam biahthu a ni-ah ka ngai.

Keimahni ngei pawh hian kan mipat-hmeichhiatna kan hman chhunah kan kai ve palh thei tih hriatreng a á¹­ha.

Reply
ɪ̣uɪ̣pnoɥ August 8, 2012 at 5:42 PM

* vawi hnih-khat lek

*kan mipat-hmeichhiatna kan hman chhunah

Reply
Dr Mahminga Sailo August 8, 2012 at 5:49 PM

Sual sima nunthar nei tawh te hi, lawmpui tho chung hian an nunhlui hriatsak kan tum talh zel hi a tha ber em aw? Suala piang mihringte mizia pakhat zawng a ni teh meuh mai, mahse midangte thatna chanchin hriat tawh hnua, an sualna/tlinlohna hriat kan tum fo hi a tul ber ang em?… 😉

HIV AIDS a kaina chhan khi a nulat laia a lo chet khawlohna pawh lo ni ta se, he natna tihbaiawm tak hneha, huaisen taka doa theihtawp a chhuah hi ngaisang ila a hahdam ber lo’m ni? (Y)

Reply
Astericâ„¢ August 8, 2012 at 5:53 PM

A mamawh tu te tana post á¹­angkai tak a ni. (Y)

Reply
CyberThug August 8, 2012 at 5:53 PM

A ropui hle mai. Pathian hian hmanrua a va ngah tak em….

Reply
ɪ̣uɪ̣pnoɥ August 8, 2012 at 6:01 PM

#18 Dr Mahminga Sailo, (Y) (Y) (Y) .

Dik ka ti chiah kei paw’n. Sawi zui vak chi-ah ka ngai lo.

Reply
Charice_mizo August 8, 2012 at 6:05 PM

A kai chhan khi hriat kher duh vanga zawt emaw ka ni lova, ka comment ah chiang takin ka ziah khi. Community blog ah meuh an rawn post tawh si chuan a then zep ting tang kha ka ti mai a ni. A duh phawt chuan a thup thei lutuk alawm, a right a ni. Mahse HIV vei inpuanna tam tak ka lo hriat ve tawh ah chuan an kaichhan diktak an tarlang hreh ngailo, chiang takin thudik an sawi maia, chutak chu midangte hnenah fimkhur a ngaih dan awareness an pekna tur pawh a ni reng a ni.

An HIV vei puite tana an inpekna leh midang tana an thawhna hlu tak avangin tuman kan hmuh khawloh phah kher ngailo. Hetianga mi tam zawk hriata inpuang ngam ngat te hi chu an pianthar vang emaw thil tha tih an duh vang a ni chawka, hmuhsit lam ai chuan kan ngaisangin mipuite hian kan lo welcome em em zawk ani lawm ni case tam zawkah chuan?

An vanduai vang liau liaua kaite annih ngat phei chuan khawngaih leh lainat an hlawh em em zawk a ni.

Reply
James Bond August 8, 2012 at 6:29 PM

Tlangval la ni ila nupui atan ka iai lo tawp. HIV positive raw seksek.

Reply
H.Vangchhia August 8, 2012 at 6:37 PM

lushai_er #15 Ka thubelh para hnuhnungah khian hriat thiam turin ka ziak e.

Reply
H.Vangchhia August 8, 2012 at 6:41 PM

Charice#22 I hrethiam tiraw, ka chhanna che khi? 🙂 ka ngai kawi velo ania

Reply
Dr Mahminga Sailo August 8, 2012 at 6:42 PM

@ Charice.. I tidik. Hmanhmawh deuha comment a nih vangin ka lo hmaih palh a ni. I zawhna chhan ka hrethiam e.. (Y)
ka rilrua lang zawk tak chu, mi thenkhat an han hlim chhuak a, fak ai mah a ANI VE NGAWT ZEL HI, A DAIH REI LEH AWM CHUANG LO, adt., tia mi tawngkam ka hriat ve zauh thin vanga han sawi thui ta deuh ka ni e..

Reply
Charice_mizo August 8, 2012 at 6:42 PM

#24, ka rin ang chiah, ka khawngaih hle mai, a chhuanawm bawk si.

Reply
lushai_er August 8, 2012 at 6:43 PM

#24 : A lo nih tak chu, a khawngaihthlak hle mai ! Mahse, tunlaiah chuan damdawi a tha tawh a, mi pangngai dam chen an dam thei a lawm………..misual.commer zinga AIDS vei nasa ber hramtea_pa hi a va reh ve !!!

Reply
Charice_mizo August 8, 2012 at 6:44 PM

Pu HVa & Mahminga (F) 🙂

Reply
H.Vangchhia August 8, 2012 at 6:47 PM

#28 ka comment ka edit leh mai. A chanchin ngaihthlak hian a lungchhiat thlak tawp a, a huaisenna leh inpek zawhna hi ka chhuang hle thung. Pathian in a awmpui zel ang a, amah kaltlangin mi tam takin fimkhur phah nan leh pumpelh phah theih nan an hman theih ka beisei.

Reply
Atom c August 8, 2012 at 7:38 PM

Ngaihsanawm piahlamah a awh-awm ka ti thlawt e…. (Y)

“HV +ve (Pu HV-a a +ve )” tiin ka chhiar tep a. 😉

Reply
ZerO August 8, 2012 at 7:43 PM

#30, ka chhiar ve duh asin mawle. I lo delete daih a.

A fakawm hle mai a.

Reply
czi ralte August 8, 2012 at 8:58 PM

in comment te ka lo chhiar a lomom ka lo ti chuan,k kaina k soi lohna chhan chu Mizoram mipui te hian hiv ani tih kan hriat hian khoi atanga kai nge tih hi kan ngaihtuaH chhun xom ngei2 a hei hi peih bo k duh vang ani vanduai vang a kai ka ni a k pasal atang a kai ka ni a,mhs virgin a pasal nei ka ni bik lo a, mhs ka pasal hian tiang a min then tak ah hian k kaina dik tak hre duh in ka bialpa hlui hi ka test tir a alo ni lova,chuan ka thoh hnu ah ka pasal kaina nu atangin k pasl chanchin min hrilh atangin k hre chiah ani…..ka tan hian hiv k kaina hi soi hrehom ani lova, mhs mi tamtak positve te insoi hreh chhan chu an insoi ruala an kaina an xot xiah hi hrehom an tih thin vangin an insoi ngam ngailoa… heng te hian zalen tak a an insoi ngam nan hian mipui rilru hi tihdang lam k duh a ni dik in ti nge chu k hrelo 😉

Reply
H.Vangchhia August 8, 2012 at 9:02 PM

ZerO, #33 a czi ralte hi a mah Lalchhuanzuali a ni e 🙂

Reply
H.Vangchhia August 8, 2012 at 9:03 PM

cz #33 kan lawm e (Y) 🙂 hairehai (B)

Reply
PKfanai August 8, 2012 at 10:05 PM

A Lungchhiat thlak hle laiin, Hnehna hlado a chham khum theih mai bakah midangte tana malsawmna nitura ke a pen zui zel hi a ngaihsanawm hle mai. He Post leh Comment ringawt pawh hian min educate fe tawh reng mai. ;-(

Reply
Eve August 8, 2012 at 10:20 PM

Oh Chhuanzual..!!ohPu Hv,!! oh czi ralte…!! ka hnuk a ulh deuh tlat!!

Chanchin lungchhiat thlak ni mahse…midangte tana malsawmna ni tura huaisenna czin a nei hi a ropui lutuk!!

Cz ka chhuang che… (U)

Reply
Puii August 8, 2012 at 11:50 PM

E heu Amah Chhuanzuali ngeiin a lo sawi belh !!! A va han puitling tak em!! ka tan zual sauh che…

Reply
ɪ̣uɪ̣pnoɥ August 8, 2012 at 11:57 PM

#33 czi ralte, kan va chhuang tak che êm…! (Y) (Y) (Y)

Reply
loneeagle26016 August 9, 2012 at 12:01 AM

Ngaihnawm hle mai, a tangkai ngei bawk ang. A damdawi dik tak hi hmuchhuak thuai se ka ti ngawt mai. Pu HV-a pawh hi ngaihtuah hi a tam ve ta deuh nge ni, i thuziah ka chhiar thla zel a, Lalchhuanzuali i ti thla char char a, a chang erawh chuan ‘Chhuanzuali’ i ti thung a. Pic hnuaiah khian ‘Lalchhuanliani’ i ti ta daih a….hahaha… 😀

Reply
H.Vangchhia August 9, 2012 at 12:05 AM

loneeagle26016 #40 alo nih niai nuai tak khi mawle hairehai 😛 Copy/paste pawp zawhin kan ti bawrh bawrh mawle… apology :-S

Reply
loneeagle26016 August 9, 2012 at 12:19 AM

Ka sawi tur hre lovin ka han ti lang mai mai anih khi, thil pawitham ani love…. tak takin, CZ-i chu ka mi hriat zawng ni lo mahse Pathianin mal a sawm ngei ang, ka mi ngaihsan zawng tak ani. 17th Century vel kha chuan TB natna hi thihpui ngei ngei tur natna a an ngaih, incurable disease an tih thin kha ania, tunah hi chuan TB hi chu kan ngai nep ta viau a, TB vang liau liau a thi phei chu sawi tur an vang tawh. TB avang hian John Keats-a ( Romantic poet) khan a hmangaih em em a bialnu (F. Brown-i) kha nei thei lovin, rilru na ngawih2 leh hreh ngawih ngawih chungin a thi anih kha… hetiang deuh thaw hian, nakin lawkah chuan Cancer leh Aids damdawi hi an la hmuchhuak ve tho turah ka ngai…mahse a dang hi alo la chhuak leh zel tho dawn anih hmel e chutih hunah pawh chuan…kan kum hlun lohna tur khawvelah hian mi dangte tanpui tam apiang leh mi rilru natna thawidamtute hi mi vannei, Pathian mite an ni berin ka hria. (Y)

Reply

Leave a Comment

Skip to toolbar