HAHAHA Lifestyle Luangliam

Kan khua chu

(Mahni mawng kan inhlim dawn ta sa sa, zun leh ek ka thlahdah law law mai thei)

Kan vawkpui Rângi hur thla, ka nu ten Pa Benghmula (kan koh dan) te rama lo hla an neih kuma piang mai ka nih avangin (ka nu sawi danin), kan khaw chanchin hi ka hre bel lutuk lova. Dawt ngial ngan leh thu huihphai tak tak ka zeh tel a ngaih hmel ta viau, ka hriat ang ang leh tlem sawi ka tum dawn a ni.

Kan khua hian mite hmasawn zia leh changkan zia a hmu lo a ni bik lova, kan mâwlna leh kan sum neih lovin min la delh bet mai chauh a ni. Kan tu leh faten hnim buk bawh beta Tuhrik an la kai lai hian, khawpui lama infate chuan nula malngo bawhbet-in AIDS an la kai pheuh pheuh chauh alawm tiin kan la tilpuk thut pui mai mai a. Mahse, awh tinin kan tin pui hauh lova, kan awt bik lem love- khawnvartui hnawihin a dam ve thei si lova.

Mahse e, pawi ta ber chu hei hi a ni. Chhiat tawh ni khuain khualkhua-a kan chhungte’n thuchhe keng an hriat tlai luata, kan tah nin hlei hlui tawh hnu leh ruang phum fel a nih tawh hnua min la tahpui tha leh thin hi a ni. Kan khuaa tlawmngai pawlte chuan kan ngai neih tawh mai a, khualkhua atanga lo kal te erawh kan tihrilhhai lek lek fo reng a ni.

Vanduaithlak tak maiin, kan kamding fapa chu nat lawkna awm hauh lovin a boral thut mai a(khawpuiah sikul a lut thin). A vuina hunserhah khan a thenrualte’n, lehkhathiam awmchhun a nihna-ah hla neih sak ve ngei kan duh a. Sap hla thiam kan awm si lova, mittui tla zawih zawihin a ruang chungah ngei, “Happy birthday to you” tih hla hi kan rak pui ve ruai ruai ta a nih tak kha maw le!! A rilru nat thlakin, rúalawh chu a na ve fak fak thin ngawt mai.

A ni asin, nupui pasal in zawn chungchangah te hian kan awlsam nek a. Hmeichhe chhungte an awm thei em? A pa in a ziak bo ve pha em? Natna vei ruk a nei ang em tih velah kan buai ve lo. Thu pakhat chiah kan buaipui a, kan la sahuai thingvawn a awm a. Chu chu, “A chawn nge lian, a ektum?” tih hi. An nupa hawpkhawp an thlo chhuak thei a nih phawt chuan, khawvel chu a duhtawkin iakin chiap rawh se, a pawi thlawt lo kan ti.

Rinawmna hi kan intodelh ve na zawng tak a ni. A ngal sîn zawkte siam Tala lian pui puiin kan in kan kalh ve ngai lova, a tul pawh kan ti hek lo. Kan nulate pawhin a hnuai hak chi tel lovin, kum kha leh chen kha an lo tamtal pui ve nawk nawk tawh thin a, pawngsual kan la tawk ngai lo. Pawngsual kan tawh tam ber erawh, kan nulate an thu sual ve zeuh zeuh hi a ni mai awm e. A ho e, a na lo em mai kan ti ve tlat.

Ni e, kan hria alawm, kan hai bik lul love. In tu leh fa te’n an keartui an kam san zia, pawnfen san zia leh van san zia te. Kan Lo hla lama Nghalrual eiruk hrat ang zia zanga, eiruk hrat te in awm tihte nen lam pawh. Hei pawh hi kan hria asin, Educational Qualification leh Mark aipawh a, Political fitness a hlut zawk zia te nen lam pawh ti ta ang ila, “em em a che u” min ti hial ang.

Heti chung si hian, kan lo hetih vang a ni ang e, hmawlhte ngei maia kan hnawmhnawk kua hruk pawh kan la zak chuang hauh lova, kan la bansan thei chuang lo chu a nih hi. A thing lutuk, in zak lawm ni inti maw? Aih zak love, kan zak thertê lo. Khawpuia thalai tam zawk an nu leh pa te chawm hlawm, hnathawk peih mang si lote aia kan thinna leh kan zahna tur hi kan hre bik lo tia ân hrep kan chak ve a. Mahse, kan áng kher lovang.

Motor te hi kan hmu khat khawp mai. MLA inthlan hmasa daih tawha kan hmuh kha, kan la hmu leh ta miah lo chu a nih tak hi. Kan khuaa motor kan hmuh hnuhnun ber tum kha, kan arpui Tiali’n phir a hrin kum a ni nghe nghe a. Kan uipui Buangi pawn a khawlai fa, a vawi ngana tur a pai mek bawk.

An lo kala aurinnain thu an sawi a, kawngtha kan lai ang, in thlai tharte kan lei vek ang min ti a. Kan kut kan lo beng thlawn zing tawh a, a tak ram sakuh ser nghaha kan nghah chhungin, fanau dum nil nel leh chang fik fek pali nga vel kan lo hung thlih thliah hman ziah a, inthlan a ni leh chhawm mai thin. Dawt han sawi te hi an thiamin, an lo huai nek hlawm leh nghal a.

Tap chhak plan hi kalsana kap chhak plan (family planning) te hi kan la rawn dai pha ve a nih ngai chuan, kan tu leh fate ngûm a la khâk reng ve tawh lo mai thei asin. Kan la vanneih viau phei chuan, Choak-in chhangphut te pawh a la daibaw ve thei tho. Tunah hi chuan, tlak lam vaihlo a rû tui zawk tih bak hi kan la tuipui pha tak tak lo. Engmah min hrilhfiahin, min sawipui duh kher suh u, kan man pha leh pek lovang.

Hun a la inher danglam ve ang a, zángkhua pawh a la thingthi ve ang a, zawhte pawhin chîk hun a la nei ve chek ang. Chutih hunah chuan, Ukulele D key pachal ngei maia arkaiden zana wholesale leh retail-a, kan kutpui ur thin “Derna anka” hi kan la tin san ve tawh ang a. Loan puk ringawt hi din khaw chhuahna a ni lo tih pawh kan la rawn hre pha ve tawh ngei ang. Kan tu leh fate pawn intih ang, hriat ang leh ruih chilh ang hi an la rawn tuipuiin, an la rawn ti pha ve mahna le…

Related posts

Ka Thiante Chimawm Zia Hi (I En Dawnin Fimkhur Rawh) HD

zopaFX

Kan Vawk Lu

RTPA

Dawn a tawi mang e…!

Pakak

11 comments

chhiartu August 1, 2012 at 6:09 PM

First em aw?

Reply
Hmuhneia August 1, 2012 at 6:56 PM

Kan khau ini lo maw haaaaaaa!! (Y) (Y)

Reply
Charice_mizo August 1, 2012 at 7:32 PM

Hetiang ang thuziak thulkhung tlak fahran leh dawih aw tel hauh lova sep rawtui cho hliah hliah comment tur hi chuan ka in iai mah mah thin…mahse a ziaktupa ka ngaihsan vang hian ka ngawi mai thei silo, in khua (ni awm tak) hun tawn mek leh khawpui nun tlachhe mek i rawn chapchar dan hi uarna tawngkam tam tho mahse a ngaihven mite tan chuan a fiah thawkhata, tunlai thingtlang khaw tam tak dinhmun a tarlang chiang hle,

tin, politics kal sual ruh them hak vanga a khaw nawlpui boruak chim chin sang thei hauh lo leh hmasawnna leh changkanna lam hawi ruahmanna reng rengin than mawh an bawk tlatna chhan bul kulmuk i rawn lepse thiam hle mai bawk…chhiartlak, ngaihnawm, zirchian tham leh dawn ti sei phak a ni e (Y)

Reply
sheldon August 1, 2012 at 8:02 PM

Lr-a hi chu a hmel en ai hian thu a thiam teh ania aw (Y)

Reply
lr hlonchhing August 1, 2012 at 8:06 PM

@Charice, ka tuiral mai dawn alawm le.

Reply
saint sammoo August 1, 2012 at 8:09 PM

thuziak zangkhai tha tak a ni.. GP

Reply
PKfanai August 1, 2012 at 8:25 PM

A ngaihnawmna phena Mizoram thingtlang boruak hap i rawm phochhuak tha hle mai. Tin, tawngkam chheh vel hrim hrim pawh a ngaihnawm tham e. (Y)

Reply
CFL August 1, 2012 at 10:46 PM

Thianpa nge nge. Nula lamah chauh lo pawh a lo luangliam thiam vel vek a ni ber e.

Reply
houdini August 2, 2012 at 1:03 AM

lr hlonchhing nge nge, a thu chaiphung ( 🙂 ) a mawi e… (Y)

Reply
Sihtea August 2, 2012 at 7:35 AM

Hrep tak chehian, kannau panlai a kanawmdan, i rawn puanchhuah vakvak maile. Tlangsam leh Thangpik bawhbet te khachu, nuamve deuh asin. Tuhrik kan hankai a, Tilthak hanhiah neuhneuh tekha, nuam dangdai ve deuhasin, thu i thiam hlemai.

Reply
TuaiSialA August 2, 2012 at 8:02 AM

(Y) (Y) (Y) (Y) (Y) (Y) (Y) (Y) (Y) (Y) (Y) (Y)

Reply

Leave a Comment