Lifestyle More than words

Panlai Nun – Furkhua leh kan nun

(Phur thuta chhunzawm atan ka ti ve tawh si a… 😉 )

Ramvachal, chal lem lo tak
Computer kan hre ngai lova, TV en tur lah a neitute phalna la hmasa te tea en theih a nih avangin; sikul chawlh ni chuan ramhnuaia ka chhuah loh paw’n, dai hnaiah kan vak vel thin. Thian hovin kan vei leh duhzawng sawi hovin, a chang leh kan lunglenna hla sain kan zai rawng rawng a. Theirah lawh tur a awmin kan lova, kan ei hawng hawng thin. Kut bal deuha thei ei tur lak chang a awmin, upa te’n ram lei chu a thianghlim an ti tiin ngaihtha takin kan ei thin.

Kan thil ei avanga kua a that loh chuan kawiam (kawlthei) hnahno kan ei mai a, a reh ve mai thin. Phek erawh phak ve tek tawk tak a ni. 😛

Vangvat I hlau maw?
Vangvat hi thilnung chi khat ve mai a ni tih kan hria, kan hlau lem lo. Tihtur nei vak lem lova fur khawthat nia ramchhuah changin, ruahtui tlaa lei hnawng lawmin vangvat an lo phar huang huang thin. Keini tan duhthusam a ni lawi si. Kan duhthusam chu endang mah a ni lo. Vangvat kan man lawk a, hmawlhte/thingtang kan la a. Hmawlhte hmawrah vangvat hmui kan thun te tea, kan tawtawlik thin! Tawtawlik hi tawngkam mawi tak a ni lem lo, mahse kan hman uar ber a ni tlat.

Vangvat tawtawlik tawh chu nun leh ngaihna a vang khawp, an kawchhung zawng zawng pholang vekin hmawlhah an tang khawng awt tawh a. 😛

Aiawt chiah
Fur khua a’n ni a. Vaimim lah ei sen loh chhung tinin kan thar vek si a. Chhungkaw tana kan tangkai ve theihna pakhat chu aiawt chiah a ni. Vaimim kan han rawh hmui te te a. Chakai tamna niawma kan hriat luiah, aiawt phurin kan inzui dial dial a. Aiawt kan chiahna li leh hmun bik kha hriat chian a ngai thung. A chhan chu, khua a chena, tui a len changin, aiawt a lo len bo chang te a awm a. Aiawt a bo chang chuan hril a hai duh thin hle.

Kar khat deuh thaw kan han rial vang vang hnuah; aiawt kan han en a. Aiawt khat deuhthawa chakai an lo phar huang huang mai kha chu, nuam ve thin tak a ni. 🙂

Mautuai khawrh
Fur a’n nih chuan mau te paw’n ruahtui lawmin an hrai duhlai an chawikang ve fir fer a. Chutia mautuai rawn chawr chho chu, furlaia chawhmeh tui ber pakhat a ni si. Mautak, rawnal, rawpui, phulrua leh rawthing tuai han khawrh te kha, me zawng an me teh meuh mai. Mahse, chhungkaw chawhmeh hawn ve thei nih hrim hrim kha a nuam a.

Mautuai khawrh leh han kheh vel pawh hi, tihthan loh chuan mautuai tha deuh pawh hi a khem nuai lo paw’n a bal duh khawp mai. Mautak-tuai, a hanga chhum ngei keih hmawk hmawk ka va’n chak em! 😉

Inkhelh a nuam
Ruahsur lai ngeia inkhelh kha a va’n nuam thin! Inkhelthiam ai mahin tuihawk leh diak dai chak kha an langsar zawk fo. Keini, inkhelh ai maha ruah do nuam ti zawk phei chuan ball awmna kan thleng ta maw tihah ball ber pawh pet chuang lovin tuihawk kan chhir per vak vak thin.

Khur hlawk hlawk chungin inah kan haw a. Nu leh pate feh haw hma a nih thin avangin min hautu an awm lem hlei lova, a thawventhlak lehling viau. 😉

Phur thuta chhunzawm atan… 😉

Related posts

Rinthu

vakul

Lalrokhuma Pachau is new head of state police

H.Vangchhia

What I think about Mizos

Vanlalruata Hnamte

50 comments

Awmtea Khiangte August 9, 2012 at 1:36 PM

Chhiar ila

Reply
Awmtea Khiangte August 9, 2012 at 1:39 PM

Panlai hun tluka nuam kha chu a awm lo ang. Paws lunglenthlak tak a ni (Y)

Reply
ulawng August 9, 2012 at 1:39 PM

Chhiar i la, a ngaihnawm leh dawn sa…

Reply
vakul August 9, 2012 at 1:40 PM

Aiawt chiah hi chu nuam ka ti ve thlawt a ni. Mahming, Bangalore leh Mysore inkara lui dum deuh uih deuhah khan va chiah ve ngawt teh ka ti 😉

I ti lunglenthlak hlawm mang e…Mautuai khawrh hi chu thosi hian a tibam deuh va, hiahna lam apiang a me thin si a.

Reply
ahooma_ August 9, 2012 at 1:50 PM

Chawhma lama ruahsur vangin kawng leh khawlai vel a diak chiau pur a, kezungpui kara chirhdiak rap chawr ngoh ngoh chungin daihnai luite kan pan a, chawtlang leh chi hraw keih pawlh bawrh bawrh chungin tlai hlauh vang ni miah lo khan hmanhmawh em emin kan tawlhthlu thla zawt zawt a, dawntial leh nghate chhaiin tlaini kan vuiliam ve leh mai thin.

Tlaiah thosilen chhia leh eng eng emaw hmanga kan nghate man chu kan han insem ve ngei mai a. Mi pali velin sangha te takte te panga vel theuha kan insem kha chuan hlawhtling kan inti ve em em a, kawtchhuahah hlado chham em lo mah i la, a kal ve lote bula insawitheih kha nuam kan ti thin ngei.

Engemaw changa kan sangha man, zana kan han kang khawm hluai mai te kha chu ropui ve thin tak zawng a ni. Zankhat U Buata te ina kan sanghate leh chakai vel kan kanro rim kha ka hnarah hian a la cham fo thin.

A chang leh rawtuai khawrh tur kan zawng a, mi rawtuai kan khawrh ru emaw kan tihte kha kan huan chhung ami te a lo ni a! Vangvat leh thosi karah khan kan ei duh vang leh tui kan tih vang ni miah lo khan thiam leh thiam loin rawtuai nge mautuai tih pawhkan hriat loh kha kan han khawrh a, hnuai lamah vangvatin puar lung khawpamin lo zuk laiin lu lamah thosi a lo ‘vi’ ve reng bawk a, thosi seh nge thak vangvat zukna tih ngaihtuah hman lo lekin kan kut me in nghawng vel kan han hiat ngei mai a, a va vual tha duh thin tak.

Tlai haw pahin hlum so kan hual kha kan han cho haw ngei mai a, ngaih a thain lung a va awi thin em. Zanriah eikhamah thereng man tur zawngin kan tlan kawi zawr zawr a, phingphihlip a chhuah hlauh phei chuan dam man a awmin lawm kha a va kim thin em.
Hun liamin kum a vei a, kan dawntial man thinna luite te chu luikawr a lo chang zo ta a, vangvat hmuh lohna pawh a kum a kum a lo ni ta. Rawtuai kan hmuhte pawh naupan lai hmuh ang kha ni ta lo riau te’n kan hria a. Leilung mawina thlir hman lo leka buaiin kan hmanhlel a, zotuithiang luan lohna hmunah riahrun kan lo rem ta bawk.

Mahse thil danglam ve lo pakhat a lo awm a- ka hmuh khat leh khat loh ah a buai lo a, ka ngaihven leh ngaihven loh a ngaihtuah hek lo. Amahin a hunte ah a nihna angin a lo la inherchhuak reng thin. Fur khawthiang hian pan lai hun mi tingai.

: Post ngaihnawm leh lunglenthlak tak a ni (Y)

Reply
lrpa August 9, 2012 at 2:12 PM

Serchhip kan awm lai kha kum 9 vel ka ni awm e..thosilen chhia a sangha hrut kha kan peih khawp mai! mahni chauh te khan 2 KM dawn dawnah te khan mautuai ka khawrh ngam nia mawle.. tunah hian ka ngam pawh ka in ring ta vak lo e, upa tulh tulh a, dawih tulh tulh mai 🙂 sephung laih tih vel kha chu kan uar nasa khawp mai…!!

Reply
Dr Mahminga Sailo August 9, 2012 at 2:53 PM

@ vakul… Aiawt chu va chiah ve ngawt tak tak dawn maw’n le… 😀

@ ahooma_ I comment a ngaihnawm teh e… (Y)

@ lrpa… A ni tak asin. Hman ni ka haw khan, middle sikul kan kal laia kan lawnna hmawng kungah ka lawn ngawt a. Ka chhuk leh lam chu ka mawng a za nasa mai.. 😛

Reply
saint sammoo August 9, 2012 at 3:53 PM

ahooma chu luangliam an tih ang hian i awm a ni maw….
Post siam rawh..haha..

Reply
sisen August 9, 2012 at 4:07 PM

Vangvat hian tawtawlik a, kawng sira phun a, chil chhak khum hi a hlau ber kan ti thin,,,

Reply
vakul August 9, 2012 at 4:22 PM

vangvat tawtawlik hian ruah a sur duh” kan ti thin a, a dik khawp mai Vangvat awm hun lai hi fur lai a ni a, a sur ngei tur a lo ni.

Zupawl sa ei hian mut a chhuak duh an ti a, hman lai khan an lei ngai lo va, anmahni man an ei mai a; man tur chuan rei tak men a tul a, zupawl tuamin an tlaivar lek lek thin a..mut a chhuah loh nakah.

Aidu hi muttuina an ti a, aidu awm hun lai hi khawlum lai a ni a, khua a lum chuan zik a ngui a..mut a chhuak leh nge nge thin.

Maian bai hmeh hian zun a in duh an ti a, maian awm lai pawh hi a lum a…hnathawh phei chuan taksa mamawh khawp an in thei lo a ni ber…an zunkawngin a tuar ta mai thin a…favang maian hi bai ila zun a in lem lo.

Chi phum hian ruah a sur duh an ti bawk….khua a khen rei viau hian mipuiin kan ning thin a, ruah sur theih dan kan dap a..chi phum an lo awm a…chi kan han phum meuh hi chuan a lo sur dawn hnaih lam a lo ni tawh a..mizoram ang ruahtui tlak thatna ramah chuan… 😀

Reply
Dr Mahminga Sailo August 9, 2012 at 4:57 PM

# 9.. 😀

#10… A ni awm hlawm tak e a… A bengvarthlak hle mai… (Y)

Reply
drake August 9, 2012 at 4:58 PM

vakul maian bai saw engtin maw han sawi chiang deuh thei em.. zun kawng vel saw

Reply
lrpa August 9, 2012 at 5:14 PM

vawi khat chu perhpawng lai tur-in kan chhuak a..kan kal kan kal a..kan bo ta der mai a..kan tap chelchul tawh mai a..! Ka nu khan min ngaihtuah in min rawn zawng chu niin!! kan te ber a pai lai, raipuar teuh chungin!!…a va zia lo thei teh reng em!!..

Reply
vakul August 9, 2012 at 5:20 PM

drake..thenkhat hian maian bai hmeh hian “zunin”(then chuan zunim” pawh an ti mai thei ) kan nei duh an ti a. maian awm hun lai hi a lum a, thlan a chhuak nasa a, hnathawh phei chuan kan taksa demand kan in pha lo ….zun kawng/tai bawr vel hi a fel lo thin a…favang maian hmeh hi chuan kan buai lo a lum tawh lo va…a kaikuang lai tak chu..khawlum leh tui in tlem a nih hmel zawk e…chiang em?

Reply
drake August 9, 2012 at 5:25 PM

vakul zunin chuan kan zung sek/zing zawk lawm ni

Reply
Charice_mizo August 9, 2012 at 5:26 PM

Mautuai bai tunlai chu ka ei chak ngei mai, ka nuin khawvelah maian a bai thiam ber, chaweiah ka la sawm dawn che u nia lol

Reply
Dr Mahminga Sailo August 9, 2012 at 5:27 PM

@ lrpa… Ni khat chu, ka nu’n ka u nen lovah min hruai a. Lo mawnga a awm avangin thlamah kan lo nghak a. Kan rin aia a rei bakah, kan lo mawng a hla se, kan au va, a hre thei bawk si lo. Kan unauin kan han tap tak tak mai aa(h). 😛

# 14… (Y) Zunin hi natna ni lem lovah chuan a hrehawm ve ngawt tak mai. Nia, natnahrik vang (infection) a nih lem loh chuan tui in tam hian a reh chhawm ve mai thin.

@ Charice… Lunglei haw hunah, i comment hi ka hre reng dawn a nia.. 🙂 Mi(sual) fel deuhin Mautuai rep min rawn thawn bik bik.. 😉

Reply
vakul August 9, 2012 at 5:29 PM

drake..zung tehlul mai mahse far thum li nga vel afar a, a na em em zui a..tui in tam a tha khawp mai.

Zung tih lemah zun pangngai chu ni lo ve..

Reply
drake August 9, 2012 at 5:48 PM

vakul maian nen chuan in zawmna lai chu awm ngei ang tlem chuan, ka lo hre ngai lo a, han zawt kual duah che nih kha

Reply
vakul August 9, 2012 at 5:51 PM

drake…research lo bei teh..maian min rawn thawn la..kan lo hmeh ang.

Reply
drake August 9, 2012 at 5:55 PM

vakul zunin khawp a ei keipawh ka chak 🙂

Reply
saint sammoo August 9, 2012 at 6:19 PM

kan khuaah chuan rawtuai khawrh an khap. VC man sa man lovin kan siam mai..haha..

Reply
mamboihi August 9, 2012 at 7:30 PM

Mahminga hi share tur ngaihnawm deuh deuh i nei a, rawn ti zel rawh.. ka lung i ti leng.. ruahsur ah foot ball ka pet ve tawh ngat!! ka pet fuh aiin berh deuh a ka tluk a tam zawk.. 😛

Reply
Dr Mahminga Sailo August 9, 2012 at 7:45 PM

@ mamboihi.. Thingtlang sikula kal tih takah, hmeichhia nen kan khel luih luih zel asin.. 😀

Reply
sheldon August 9, 2012 at 7:51 PM

Thei mu kan dawlh palh a, aia u ten in pumchhungah a tiak dawn an tih te khan kan hlau em em a! A lunglenthlak, tu thaw lova awm rei thei thei te kha kan ti thin a..

Reply
H.Vangchhia August 9, 2012 at 8:10 PM

1. Lungno ei chang kan neih á¹­hin awm tak kha mawle hairehai 😛

2. Kulikawn pu Mata tupa Hruaia kha a mak ve khawp mai. Kawng kan bova, vangvat saiá¹­ial kan kai dun nasa mai a. A tawpah chuan mi thlam kan lut hlawl mai a. A taksa vel ami chu chemin a ziat thla piat puat a, an thlam belah dahin a chhuang sur sur a, a ei hmaks hmaks. Pakhat min peve a, a hmui viau nangin a ma thisen anih vang khan ka uak leh vel nitain ka hria 😉

3. Aiawt hi ka tah ve thiam chang chang nangin a chiah tak chu á¹­um khat chiah ka tel ve awm ka hria. :-S

4. Mautuai/Rawtuai khawrh hi a nuam, a tui pawh ka ti. Mahse riltam tawh vang a a hel a ei ralah chuan a phak tuilo ve chiang a lawm. 😉

5. Field Missile Leaque kan din ve a, Venghnuai field diak lutuk ah tournament ah kan chhuak ve alawm mawle. Kan inkhel hmasaber a, kan chaklo hmasaber bawk. Kan uniform a mawi ber a, fans kan ngah ber bawk (naupang kan hruai á¹­euh). Halpuah leh flag kan sem vek a, kan chhuih luh (goal) a piangin flag vai a halpuah hal turin kan ti ve bawk a, vaina leh halna hun an neilo. Haw kawngah kan hal ta vel mai mai hairehai 😛 😉 3rd division players chu kan ni ve tho 😛

Reply
ɪ̣uɪ̣pnoɥ August 9, 2012 at 9:34 PM

Panlai nun hi i ngai ve a ni, Dr Mahminga Sailo pawh. Kan inanna tak a ni ve…

I thu dam thlup mai hi chhiar a lo nuam ber e… (Y)

Reply
ɪ̣uɪ̣pnoɥ August 9, 2012 at 10:46 PM

#5 ahooma_ sawizuina pawh chu a va han ngaihnawm tehlul… êm! (Y)

Lung hi a leng ngawih ngawih; kan tawn hi a lo inang hlawm a nih hi Mizo thingtlang naupang á¹­heuh á¹­heuh chu…

Reply
H.Vangchhia August 10, 2012 at 1:25 AM Reply
zoho August 10, 2012 at 1:38 AM

posttupa, i thil ziah chuan ka lung a tileng ve deuh ringawt nia, hetiang panlai nun hi sawive zeuh tur pawh pakhatmah ka nei lo a, ka zak hle mai, ka fate hi lo lian deuh se, ka la chhuahpui ve thin ngei ang le,a nawm hmel hi ka tia……..ka rawn luhna chhan ber chu zawhna pakhat ka zawt duh che a – Khang i naupan lai a i thiante, hetia i khawsak puiho zing ah hian TUAI/PHERH chho ta an awm nge an awm lo? I hmuhdan general deuh in ka ngaichang e. Thil chhuilai ka nei a… (H)

Reply
zoho August 10, 2012 at 1:44 AM

hahaha vakul@10 i comment khi ka ru dawn e, a va han dik ril fing tehlul em………. hahaha…….. 😀 (Y)

Reply
Maisek August 10, 2012 at 7:27 AM

ziak ngaihnawm hle mai…panlai nun hi a lo ngaihawm ta ber mai… (Y)

Reply
Dr Mahminga Sailo August 10, 2012 at 8:04 AM

@ Nizana ka comment a lut miah lo.. 🙁
@ zoho.. Kan vannei khawp mai, tumah pherh an tih ang hi an awm lo. Tin kan khuaah khan tuai kan hre ngai lo. Mi ang pha zan lo pakhat a awm tih loh chu. Kan khaw thenawma tuai kan hmuh phei chuan, naupang nafam chuan kan en duh teh asin.. 😀

Reply
zoho August 10, 2012 at 10:43 AM

Dr.Mahminga@33….ka rindan chiah a ni reng a, kan confirm duh mawle, human, genome leh hormone thang diklo hi artificial envt. a naupang seilian ah hian a chance a sang a, tam pawh a tam a, chu chu khitiang nature,a bik in tough leh robust deuh a naupang thanglian ah khian he gene leh hormone thang diklo hi a ven theih tih hi ka rindan a ni, nang i ngaihdan a ni ve em, i line lam a ni I bawk a?
I lunglenna erawh ka hnawttiau ang tih chu ka hlau ang reng….. 😛

Reply
Dr Mahminga Sailo August 10, 2012 at 10:51 AM

@ zoho… kan ngaihdan a inang chiah. Ka lunglen hnawt tiau lovin min hnem zawk a nia.. 🙂

Tuai nisaa piang hi chu mi tlemte an nih ka ring. Zepthu a awm lo, ka patea (ka pa first cousin) pawh hi, a naupan lai chuan tuai tia hriat vek a ni. Mahse, pa nih hnu chuan khatiang mizia kha kan hmu miah lo. Pathian zarah zirtirtu hlawhtling tak niin, state leh national award hial a la thei. Tin, a fapa pakhat pawh, ka hriat ve chinah tuai tia sawi leh ka hmuh a ni. Mahse, tunah zawng a ni ta miah lo. Tlema nemna deuh chu a nei mai thei, mahse tlangval pangngai tak niin, BD a zir mek..
Nia, i sawi ang khian, inenkawl dan leh rilru put hmang a zirin a danglam nasa ngawtin ka hria… (Y) (Mahni lamhnai chanchin ka sawi ta duah a, a pawi em lo’ng chu)

Reply
zoho August 10, 2012 at 11:04 AM

Pawi lo ve,{te lo ti ve ngawt ila, ka decide tur a nih hmel lem lo….. :-)}

Hei hi hria ila, kan fate an naupan lai a an primary sex leh secondary sex ah thil inclash deuh a awm tih kan hriat hian, ramhnuai ah chettlatpui tur, chutiang hmun ah chuan kan hormone thang diklo tur hi a thang dik leh thin tih an ti. Hmeichhia chuan an hlau a an nu(feminism) dik leh mai a, mipa chuan survive an khelh a ngai an pa na a trigger dik leh mai thin. Mizo nu leh pa, intih changkang ten an fate an duat liak liak leh an thatchhiat rah chu naupang ah a lo langchhuak ta fo mai, a zz chu a ni haulo, ti em em a a hluar hi chu do leh herrem theih a ni si a….. ka OT lui ta mai @Dr.Mahminga….. 🙂

Reply
Art-a August 10, 2012 at 11:18 AM

@36
zoho,

Hei ka pawm zawng tak a ni (Y)

Reply
Dr Mahminga Sailo August 10, 2012 at 11:30 AM

#36… (Y)

Reply
Art-a August 10, 2012 at 11:36 AM

ramhnuaia kalpui hman loh chuan RAmbo film leh Tarjona film entir a tha ang 😛

Reply
blackmagicwoman August 10, 2012 at 12:12 PM

In naupan lai chu nawm hmel bik eeeee! Aizawl veng laili taka seilen chu hetiang thil hi kan tawng ve lova, ka chak ve hnuhnawh! Kan uar ber chu in bailemchhuan leh buk sak kha nia…nuam mai mai. 3rd term exam zawh leh xmas inkar kha nuam ve thei hawlh² 😀

Reply
lrpa August 10, 2012 at 5:20 PM

Naupan laia sa hmeh nawm theih zia kha! Sa kha kan va ngaisang teh lul thin em!..Serchhip kan awm lai kha pawisa kha kan nei lo nasa mai thin a. Sa pangngai lei pha lo kha chuan sachek an ti mai a, sadawr bulah khan bel lianpui an chhuang/chhum a, tah khan an duh duh an vawm lut a..kha kha nopui in an teh a..kha kha inrinni thenkhatah kan lei pha ve zeuh zeuh a..dawlzik leh ankasa kan hmeh kha kan uar nasa, huan ah a awm a..Tuktin par ka phun, zing tin mai ka en thin te kha..khawvel hi a lo va mak em!!

Reply
ɪ̣uɪ̣pnoɥ August 10, 2012 at 5:27 PM

#41 lrpa (*) , ha ha ha! Krismas thlen har êm êm á¹­hinna chhan kha chu sâ kham khawp hnawka ei kan châk tawh vàng lek a lo nia… 😛

Reply
lrpa August 10, 2012 at 5:40 PM

@ 42..a dik reng..hehe..
chawei dawn khan kawr phelh kher kha ka naupan lai chuan ka sitail ania…! Masi ruai pawh kha ka huphurh na chhan chu kawr phelh lam daih kha ani pek a..haha..
Duh tawk aia tam ei tur sa a awm ringawt te kha an lo hlu ve hliah hliah thin teh e..naupan lai hi a lo nuam ani e..HIV, diabetes, cancer…engmah reng kan hlau ngai lo e..!

Reply
mamboihi August 10, 2012 at 5:47 PM

LARPA hi enge a sawi ve nuah nuah haha…

Reply
lrpa August 10, 2012 at 5:50 PM

Mamboihi chu le..a va reh rei ve aw!!

Reply
mamboihi August 10, 2012 at 5:57 PM

LARPA dawlzik i sawi khi ka va ei chak..ankasa chu…ei a ka mak deuh a awm thin kha.. ka chak hran lo.. I sa chak lai vel khi ka nuih a za haha..

Reply
lrpa August 10, 2012 at 5:59 PM

Reh rei man-ah..poetry chhe te..
Aw ka di, aw ka rose par..hehe
aw ka lily par..aw ka derhken parmawi..
eng piat piat te!
dapkawraw, dapkawraw, dapkawraw..
chheng chheng chheng!!

Reply
mamboihi August 10, 2012 at 6:03 PM

LARPA min va tluklo tak em.. Hlaphuah thiam ber of the year ah ka inthlang daih tawh keimahin haha.. Hmanah DOC a post a nalh lutuk in ka phuah tih hre rawh haha..

Reply
bbney August 10, 2012 at 7:43 PM

(Y)

Reply
Dr Mahminga Sailo August 11, 2012 at 9:16 AM

Tute emaw chu an lo ChangKang leh ta a ni maw? 😀

Inpuang law law te’ng, Krismas ruai in sawi manah.. (H) Kan thiante kohhran danga lawiin ruai an nawna, kan kohhranin kan nawn ve loh hlauh paw’n sa kan nghei ngai bik lo. An ruaithehna sirah kan lo biru a, kan thian te chaw ei kham khan an hluia sa kha an rawn thum phei a, min rawn pe thin (a ruk te in). Tin, ruai kan nawn ve paw’n chutiang tho chuan ka ti ve thin. Thian te han hlutzia kha chu aww, vawksa lawng kha mual sirah kan keih hawng hawng zel… 😀

A ngaihawm mang e… ;-(

Reply

Leave a Comment