Fiction

Tiranga

A nui sen sen a, a biang vei lama a biangsum khuar kek te chuan a nui hmel mawina chu a belhchhahin ka mitah zawng a thain a mawi a, chu tleitir hmelthai mawlh chu ka mitin ka hmuhna la rei lovin ka thinlungin a hmelhriatna pawh tuibur hmuam dak chen lek nimahse kei val lungmawl zawng zawlaidi em mi tatlo mahse min hneh ani.

Ka thiante inneihni aniin hmanlo chung chunga bawng mawng zen zo hlim hlawta kal ka ni nen, mi zawng zawng kawrchung mawi tak takte leh an thuam tha nena an kal laia mahni leh mahni ina bawng rim nam tlata kan inhriat tawh chuan mit leh thinlungin min nawr viau mahse zei loh nak alaiin va biak hmasak chu thih hreh takin ka hreh si.

Hall chhung kan han lut a, thiante min biak reng bengkhawn lovin khawiah nge a thut tiin mitsirin a zawng a, a chezia leh hawiher te chu rem leh rem lova ka melh tawk tawk avangin ka mithrui anain ka pian a hnulama mitkalh nih ka chak vawi khatna ani awm e.

Chhei le!!

Ka ngaihbel vang nge pawh ka hrelo, ani pawh chuan mi rawn melh let ve tlata hriatna ka neiin kan mit pawh vawi thum lai a intawng ta. Kan mit ain tawn lah chuan a nui seih a, a hawileta, han en leh vang vang ila rei vaklo hnuah mi rawn melh leh zauhin kan inmit a han intawng leh salh thinin, chuta rang lutuka a han hawilet thin leh a lai hmel te chu nuam ve thin tak ani kei ka tan chuan.

Joint reception a zo a, ruaitheh tura kan han intlar hnu leh Chaltlang tourist lodge a an cook tena an duhthala an siam chu luakchhuak hnawk leh ekchhuak ram ram khawpa tam ka han ei hnu chuan ka tawihtei chu ka mitin a zawng nghalin a chaw ei kham bathroom lama a phei chu ka hmu hman a.

Ka huaisenna sawm khawmin a rawn chhuah a lo biak ngei chu ka tum ta, bathroom opposite lampang, mi rawn tawhna ngei tur laiah dingin ka hmai velte chu ka hrufai thuak thuak a, ka rim tih rehnan ka thiannu lamah pheiin a hand bag ka phih thlak sak hnuleh a butterfly perfume te reuhte ka innhnawih thuak thuak hnu chuan pasaltha ina inring renga an sa kah tur an chang ang mai hian ka lo chang ta khiau mai le.

Ka thinphu a rang a, thlanbawl a rawn lang a, ka tawng ka bah dawn tlat.. Zam hle mahila pelh ka tum hauh chuan silo, thawk ka la halh a rilru a, “ Lame, aduhi te lakah pawh i zam lova, tinge tleirawl hmaah i zam mai dawn . Mahminga sailo anga a hun taka chet nachang hria la, Tuaisiala anga risk huai zir ta che” ti a ka infuih mawlh mawlh lai chuan ka sapui chan chu rawn chhuakin a rawn phei a. Ka zawn a rawn thlen hma chuan ka lam a rawn hawi a, a nui seih a, chu chuan tlemin huaisenna mi pein ka zawn a rawn thlen chuan,

“va puar awm ve, i e nghal vel elo” a nui hmel chu a tawp hmak, ka tawng sual tih ka inhre nghal.
“Maw”
“Va puar awm ve”
“Puar ve tho, nang i puar em”
“Aw puar lutuk” , ka tawng sual kha ka rin ai taka hria anga a lan loh avang chuan tlemin mi ti tlangnel sawt a. Chutah, an kum rualpui ina an uar em em leh a hmel a that leh a thianghlim aia a ha a var thatloh avanga a ei ngei tih ka hriat chu hmanlai Tank Lorry driver ina an nula rimna a khawnvartui an hmachhuan thin tluk zeta inti fu tak chuan,

“Tiranga i duh ve em” tih pah chuan bawm khat chu ka ka chhungah ka han bun nghalin lehlam hawi pahin a dip zawng chu tithang tih hriat takin ka han phuh chhuak chiai chiai a.

“I nei elo, ka van lawm . Ka lei hman lova, ka thianten an nei tawh si lova, kalo ei chak lutuk a” a sawi pah chuan a nui sakin, chu nui hmel chu ka tan zawng a mawi a, bakah ka thil ruahhman a kal tluang bawk nen ka thinlung a hlimzia chu pui tak ani.

Khangte kha thla 16 kalta kha ani a, ka ngaihtuah let chang hian ka lung a leng thin. Tichuan, khami ni pawh khan kan inkawmin kan titi nasa hla, zanlam programme mopa te inlama hmang tura kan kal phei kha chuan kan kal rualin ka phur thla a, chaltlang chhuka a awmbawrin min han nek vel te, a pangti lumin min han nawr thar thar leh a rim tui tak te chuan kei mipa kha min ti zauthau lo chauh ani e.

Kan kalrual nghal e ka tih vang leh kan innel nghal avang khian nula awlsam leh sihhnip ah inlo ngai ange, ani derlo ania, duh ain an avangin kan inpawh hma mai ani. Kan inzui zing tial tialin a hming chu Lalthanpuii niin unau 3, hmeichhe 2 zinga a naupang zawk, an chhungkua pawh pangngai tak anni .

Mahse, kei hianin thiantha tena “Lamea style” anlo tih thin chu tum vang ni miah lovin kalo apply aniange, a rei tual tual a, kan inngaina tial tialin a tawpah pei chuan thiantha deuhah kan inchhuah lehta ngawt si. “Lamea style” antih chu engdang anilo, star leh duhzawng te, minlo duh ve deuh tute pawh thiantha deuha chhuah hi ani mai. Grape te chu a thur thur nen tih vang nimiah lovin Puitei kha chu ka kawm chiang a, ka ngainat chi nimahse ngaihzawng atana iai rukna ka nei ru tlat, a chhan erawh ka hre bik lo.

Ngaihzawng atan ka iai e ka tih vang khian a sual e ka tihna erawh ani lemlo, a rualpui Zoram thalai dang te ang bawkin kei chuan incheina a ngai pawimawh lutuk te, thawmhnaw manto tak tak a leite, ngaihzawng a la lap mah mah tih lova chuan sawisel tur ka hre lem lova, ka ngainain a kawm pawh kan inkawmngeih a, mite dem fiam tur hial pawhin kan inzui nasa a, ka ngaihzawng leh Puitei ngaihzawng pawhin a tirah chuan minlo thik tawn thin ani awm e.

Ani pawhin mi ngaina, mi ngaina mai ani lova, U anga min enin ka zilhhauna leh fuihna thute pawh a ngai pawimawh ve thin. Thuruk a neih leh min hrilh a, a lungngaih leh lawm deuh pawha a hrilh hmasak pawl ka nive fo thinin an inah pawh ka leng zing a, a nu leh pate pawhin min duhsak a, an chhungkaw chungchang pawh ka hrechiang ve thawkhat hman hle.

Hun erawh a liamin thil tul avangin phaiah kum khat chuang ka awmbo a ngaih avangin ka thian Puitei pawh chu ka kalsan a tul a. Hmun dangah ka awm khat nen duhber te ngaih bakah ka rilru chhungril leh ka mangan lai pawha ka hrilh ngam, kum lamah erawh ka nau rual nisi, ka thiannu Puitei pawh chu ka ngai hle thin. Mahse, mahni tawka ka buai ve bawk nen kan inbe khat tial tial a, a chang changa kan inbe thin tihloh chu kan inbe tam em em lo.

Chutia ngaihngam tak leh buai taka ka nitin hun ka hman liam tawp tawp lai chuan, tukin zing chu hma takah ka nau phone call ka dawng a,
“U Mam”
“Enge, minva rawn phone hma ve” vin takin ka han ti a
“Mam, Puitei a thi. A inawkhlum a, tukin dar 6 khan a roomah an hmu a”

Ka bing mup a, ka phone ka dahlai pawh ka hrelo. Ka rilru in kan inhmuh tirhni te ka hrechhuak a, a tira hmeltha ka tih leh ka ngaihzawn , a hnua ka thiantha ber nita Puitei, Lalthanpuii a boral chu ka ui a, bakah ama nunna a la kher chuan mi tihnat bakah ka ring phal silo.

Mahse, kan ti teh ang ka ngaituahna khawvelah chengin Puitei nundan, a mizia leh an chhungkaw chungchang te ka han thlir let a. Mangang ngawih ngawih leh hreawm ti a, he khawvela beisei nei tawh lova ka thiannu a awm hi a hreawm ka ti a, ka rilru ana ani.

Thla hmasa lawka ka buailai taka mi rawn phone a ka chhan that hmaloh tuma “U Lame, I va ngaihawm ve. Tunlai chu ka nun hi a ro tlat..” a tihte kha kan inbiak tawpna ber tur ani ang tih ka ngaihtuah pha lova, a sawi duh a sawi hmaa “Puite, ka buai lutuk, nakinah kan inbe dawn nia ti a ka tihtawp te kha ka inthiam thei tawh dawn silo. A hnua ka han call let lah khan mi chhang mai lova, kei lahin ngaihthat lohna ka nei silo.

Ka thiannu chan ka han ngaihtuah let thin a, thiante mah nise a nunna ala ta mai chu ka ring phal lova, awmlo ka tihna erawh ka ngaihtuah let pauh leh a reh tial tial si. Enga ti maw?

Ele, a pa lah rui bung bung nilo mahse zu in regular ve thei tak, mizorama patling tam tak anga duh tak tak vang nilo, nawmchen duh vang maia an office a ngaihzawng nei. Fate bula zankhat titi a, an bula thuta an mahni kawm ai chuan an mahmawh lei nana an dil ang ang pawisa pek mai chu fate laka Pa te tihtur ni a ngai. Eirukna tawngkam tih haw em em a, lawmthu sawina haw leh hauh silo mi ani a.

A nu lah nise kohhran hmeichhia leh MHIP lama inhmang regular tak, fanu te aia mi fate vei mi , sahdah nghei thei silo leh a that lohzia zirtir silova tiranga pawngpaw khap ve ringawt anisi. Ani taka, Puitei te unau an tleirawl, rawlthar tirh lai hun, fate awbbeha, enkawl uluk hun annihin a pa in sum bak ngaihtuah a nei lova, a nu lahin fate thlawhkhumin khawtlang leh kohhran tan rawngbawlin zantin a chhuak nitin si.

A fanu tiranga ei chu hre thei hlein, nitin a hau a, A fanu ina ngaihzawng vanga a rilru a nat te, a mut theih lova, chaw a ei theihloh te khan a hre lova, a nu hnemna a mamawh ngawi ngawih lai pawh khan a bulah a awm silo.

Puite, Ka nu leh Pate hi an tha ber ka tilo, mahse zirtirna leh enkawlna ka nu leh pa, mimawl lehkha pawh zir sanglo ina min pek hi I dawnglo tih ka hria a, I manganna laia Pathian lam pan nachang hrelo khawpa I awm hi ka riru ana a, mahse Puite, ka demlo che .

Related posts

Ka tlan bo a…

Kawnga

Mizo thawnthu, Sichangneii

chhana

Ka nep em a ni!

21 comments

lr hlonchhing August 1, 2012 at 6:50 AM

A va sei ve.

Reply
lr hlonchhing August 1, 2012 at 7:01 AM

Ka naute hi bei tha thei fuk fuk khawp mai. Ka chhiar ka chhiar a, ka chhiar chhuak dap mai.

Reply
H.Vangchhia August 1, 2012 at 7:15 AM

(Y)

Reply
sheldon August 1, 2012 at 7:43 AM

Tukchhuah nuam vek u le (L)

Reply
ruatruatapa August 1, 2012 at 7:44 AM

I va ziak thiam ve. Ka chhiar chhuak parh a, a laia i vawhawt phawt a, a tawpa min zilh hrep hi a tha hle mai

Reply
TuaiSialA August 1, 2012 at 8:04 AM

A ngaihnawm lungrunin a va tha si em!

Reply
Awmtea Khiangte August 1, 2012 at 9:21 AM

Sei hle mai, muang changin chhiar teh ang

Reply
LaMea CâcTùs FLh August 1, 2012 at 9:48 AM

Inva tho hma hlawm ve

Reply
Dr Mahminga Sailo August 1, 2012 at 10:03 AM

A thui thui nen, kham lo deuhin ka chhiar chhuak. Hringnun i hrethiam bik teh e. Zirtir tha tak neiin i tlip thiam zel bawk si… (Y)

Ka’n tarlang leh hram te’ng. Ka dik loh zawk paw’n, ka tan a tangkai dawn tho… 😉

silova (si lova), annihin (an nihin), nive (ni ve), rilru in (rilruin), pa in(pain), nimahse-1st para (ni mah se), nise (ni se), silo (si lo), adt

Reply
saint sammoo August 1, 2012 at 10:06 AM

avsv… chhunchawlh ah chhiar ang..

Reply
LaMea CâcTùs FLh August 1, 2012 at 10:08 AM

Tlangval khirh nupui hmu har tur tih takah.. 😀 tak2ah ka lawm e..

Reply
Dr Mahminga Sailo August 1, 2012 at 10:15 AM

# 11… Nupui maw? Ka hmu tep tawh, rinna mitin ka thlir a… 😀

Tak takina, ziahzawm tur leh tur lo hi hriat a har em a; hun remchang ka rawn la zeuh zel a nih hi. Remchang takin i lo ziak dik lo phauh phauh zel bawk si nen.. 😉

Reply
saint sammoo August 1, 2012 at 11:13 AM

LaMea.. a tha viau nachungin.. lamea kutchhuak dang anga chhiar ka tum a, a ho.. i ti duhdah deuh.. tum dang a tluk lo…. 😉

Reply
LaMea CâcTùs FLh August 1, 2012 at 11:25 AM

Ava lawmawm ve. I sawi takah chuan, a thui lutuka para 2 ka paih..mahse, ka theihtawp chu ka chhuah ve tho asin :-)..

Reply
bbney August 1, 2012 at 1:58 PM

Ziak ngaihnawm hle mai. A thui hmel viau nain ka rin aiin ka chhiar zo hma, ka kham lo lam a ni.

Reply
Dr John August 1, 2012 at 2:31 PM

(Y)

Reply
Zama Khiangte August 1, 2012 at 2:31 PM

In tawnna hmawr hi zum te mai a nih rualin inthenna hmawr phei chu zum vit vet tak a ni. Kawnga lehkhabu in sut thlak sak palh vanga intawng pawh mizo lemchanah kan hmu thin kha.

Reply
Libra abh August 1, 2012 at 5:03 PM

ngaihnawm hle mai..ka lak fuh deuh lai chu..nu ho sahdah hmuam sim thei si lo,tiranga khap tlat hi..sahdah hi tiranga ang hian khap ve ta se engtin nge an awm ang le hi ka tia…tiranga ka ei ngai lo a,tha lo ka ti lutuk tho na in,an mita khanchhuk hmu si lo in,thalai te mita hmawhte an hmu lian e hi ka lo tia.. (Y)

Reply
Charice_mizo August 1, 2012 at 8:03 PM

U Lamea, ka chhiar laia ka rilrua lo awm chu thuziakah hma i sawn khawp mai tih hi…sentence sei deuh deuh ‘niin’ emaw ‘tiin’ tih ang chia inzawm put put a awm lova, chhiar a hahdama, a tak sawt bawk..

I thiannu te chhungkua ang hi mizo zingah kan tam khawp awm asin, sap tihdan kan la rau rau anih chuan nu leh pate hian fate nen inpawh taka titia, zan lamah te chhun lama an hun hmandan te sawi hoin, an harsatna te zaidawh taka zawtin an thusawi te ngaihthlak sak sela, tin fate nena thil tih ho leh inkawm nel te hi uar sela, tleirawl zingah depression nei leh nun khawlo an tlem sawt ka ring thin..ka lo vei ruk ve em em thin a ni.

PS: ka tuarpui che..

Reply
LaMea CâcTùs FLh August 1, 2012 at 10:36 PM

awi ka va lawm em… tak2a. an tam asin

Reply
TarmitBuna August 2, 2012 at 7:12 PM

Lamea thuziak hi chu sai ha na verh leh sakei ke na tuam loh kara a type thin a nia, ka hrethiam khawps.
Mahse, kan ti te’ng hetiang thusei ngaihnawm pui pui a dam lo en kar a a ngaihtuah chhuak thiam hi chu a ropui dangdai ka tih rualin a dam lo te hian “Ka pu, i damdawi chawh kan ngeih lova” an ti thei lo hi chu ka lawmpui khawps. (@) (&)

Reply

Leave a Comment

Skip to toolbar