ka zawhna chu heihi ani e,
Mizo ten sava chang chi hrang hrang Vapual Chang, Vaki chang leh adangte an khim hi a awmzia min hrilh theih chuan ka lawm khawp ang


In chhanna nghaktu
Tebonga

Hmalam hun kan thlir thiam a kan hmuh thiam chuan, khi zawhna pathum kan chhanna chu ‘aih, aih leh pawm e‘ tih ani ang, chhiata tlukral kan duh loh chuan.

Zo/Zos hnam hi khawnge a tlanbo tawh ang khawvel indo se?

Han dawn teh, Khawvel buaiin min do se, unau keini Zo hnam hi mahni leh mahni intibuai emaw inremlo leh inhaw bawk ila, Mizoram a awmte chu khawi lamah nge an tlan ang? Chhak lamah lah an lut thei awm si lo, Bangladesh lamah lah chuti bawk, tin Assam lamah lah khawvel buai a min do ni bawk si chuan Chinki ti a min ko thintu hnamdang Vai ho in min lo chang reng dawn sia khawnge in tlan ang, aw ngaihtuahna neilo te u???

Chungtiang bawkin Chin, Meitei, Naga, Thadou/Kuki, Zomi/Paite, etc. te pawh khawnge an tlan ang, unau indo bawk si, hnamdangten min do bawk si chuan, aw unau inhai a inhmangaihlo tak te u???

Tlan ngailo tur in unau tranrual leh pumkhat a, mahni ram tihngheh a tih chak mai ani lovem ni?

Kan ram pel ah kawl leh vai ten min hual, hetah unau leh hnam khat kan in sual dawn em ni?

Aw kawl leh vaite u, unau in ngeihlo tak te run hmasa tu ta ta ani? Chu chu kan duh em le?

Aw harh ru, ka mite u.

Zo Hnam Chak leh Tlanbo Ngailo Dan

Ani, mahni rama ngaihngam a awm a, tlan ngailo leh mi run zawhloh va ding reng tur chuan, kan chhenna ram kan tih chak angai ani. Tin, chumi tur chuan unau, Zo hnam kah harh a kan tanruala kan pumkhat a ngai ani!

Zo Hnam leh Ram Chu

Mizo/Lushei hi hnam anilo, Chin hi hnam anilo, Zomi/Paite hi hnam anilo, Kuki/Thadou hi hnam anilo, Meitei hi hnam anilo, Naga hi hnam anilo, chungtiang bawkin Kom te a dang dang te pawh hnam an ni lo. Kan za erawh chuan unau kan ni a, hnam khat kan ni a, chu kan hnam hming chu Zo ani.

Zo tih hi a dik ani, a dik reeng vang chuan Zo hnahthlak kan intih vek hi, inti lote pawh puk (chhinlung/sinlung) atanga chhuak an inti. Meitei erawh kan tawng hnaih zia ah alang, tehkhin nan sam = sam, mit = mit, ha = ya, (buh) lo = lo, kut = khut, sa = sa, ui = hui, pahnih/hnih = ni, thum = hum, mei = mei, tam mai.

Zo hnam, Zo hnahthlak tih hi a dik ani hei hian ati chiang: Chin hnahthlak kan ti ngailo, Mizo/Lusei hnahthlak kan ti ngai lo, Thadou/Kuki hnahthlak kan ti ngai lo bawk a, Zomi/Paite hnahthlak ngai bawk lo. Mahse, Zo hnahthlak erawh kan ti, Zo hnam kan ni.

Chin, Kom, Meitei, Naga, Thadou/Kuki, Zomi/Paite, leh a dangdangte hi hnam an ni lova hlawmchhuak (a hlawm hlawm a, kan pi leh pu te ram neih hmasa (Israel leh an pemna ram) atangtea chhuak an ni zawk. Chuvang chuan, chung hlawmchhuakte (Chin, Mizo, Zomi..) pakhat te te a kan hman/lam bik chuan hlawmchhuak kan ti tur ani (eg. Chin hlawmchhuak, Meitei hlawmchhuak, Mizo/Lushei hlawmchhuak, Naga hlawmchhuak Thadou/Kuki hlawmchhuak, Zomi/Paite hlawmchhuak, etc.), anih loh leh hlawmchhuak tih thlakna kan siam mahna.

Chhakchhuak, Fanai, Haokip, Hauzel, Hrangkhawl, Ralte, Renthlei, Sailo, tih te pawh hi hnam an ni chuang lo, thlah ani zawk, thlahtu hmingte an ni hlawm si a, tehkhin nan Sailo thlah, Hauzel thlah, etc. etc.

Tin duh leh he thlah hi a siam zel theih. Tehkhin nan ka thlah te a hrana ka siam duh chuan HauzelSailo emaw ka tianga, nih loh leh Elsa te ka tia nga, a theih vek. Mahse kei emaw ka thlahte an dang chuang lo ve, Hnam khat kan ni e.

Kan, Zo ram chu kan za vaiin kan hria, India, Burma/Myanmar leh Bangladesh ah, hmanlai a kan pi leh pu ten mawl vang leh kawngtha an neihloh vanga tangrual theilo leh pumkhat theih loh vangin hnamdang ten min thren.

Mizoram, Manipur Nagaland tihte hi Zo ram chanve aia tlem lek ani, chungtiang vel in Bangladesh leh Burma/Myanmar lama mi te pawh. A zavai erawh chuan Zo ram ani, kan ram ani.

A eng a mah lai bik kha Zo ram ani lo, a za vai erawh chu Zo ram, kan ram ani.

Tawng Hrang Hrang

Kan tawng theuh tlema a hran hret hret emaw avangin kan inhaw tur ani lova, kan in thren tur ani bawk lo.

Enteh u, hmana ka Tibetan thrianpan khawiah emaw min hrilh kan hrilh chhawng ang che u.

Tibetan ho hian tunhma chuan an ram chu hming pathumin, an awmna ang zelin Amdo, Khamba leh Lhasa tiin an ko a. Tin, chung pathum te trawngte chu keini ang bawk in tun thleng pawn a hrang vek ani, mahse unau anni tih an in hre vek a, Tibetan an inti vek asin.

Tin, khaw tin trawng tlem tlem in a hrang hret hret a, khaw khat atranga km 5 emaw 10 velah pawh a chang chuan a hrang thei hle, mahse Tibetan an inti vek a, an trangrual in an pumkhat in an hawihhawmin an intranpui tawn hle ani.

Anni atrang tal unaute awm dan I zirchhuak ang u, entawn tlak an ni e. Zo Hnam awm dan tur ani e.

Tanrual leh Pumkhat Dan/Kawng

Unau kan ni, hnamkhat kan ni, Zo hnahthlak/hnam kan ni tih (kan zavai kilhkelh anih loh pon tam tak, a tam zawkin) kan hre em em, mahse kan tanrual a kan pumkhat theihloh na chhan chu a kawng kan hriat lohvang ani.

Mahse hei a akawng a awm ta e, hei le:

Kan lo tranrual a kan pumkhatna turin inhmuhkhawmna kan siam tur ani, khawtin atrang khaw mipui te aiawh a khaw mipui ten an thlan pahnih emaw pathum (duhthusam) threuh Zo hnam inhmuhkhawmna ah chuan lo kal khawm se. Henghi ti rawh se:

1. Chu lo kal khawm te chuan, Zo hnam tih emaw Naga leh Meitei te pawh a huap theih nan, hming pakhat kan inkoh na tur thlangin lungrual vekin titlu/relthlu  se.
(Naga te hi chhinlungchhuak an ni a, an inti ve bawk)
(Meitei ho kan aia thlang tla hmasa fe anni a mahse an bo thuk deuh, tin Hindu a an lal atranga an inleh in an bo thuk leh zual ta, kan trawng hmanah erawh kan hnampui annih zia a lang chiang in, a ti nghet hle.)

2. Tin chu kalkhawmte chuan Hnam pum General Body/Hnam Hruaitu Luberte thlang se, anni chuan, Young Zo/(Hnam hmingthar) Association angin ram enkawl rawh se.

3 a. Tin kalkhawmte chu haw se, chu kan hnam hmingthar nen. Tin khawtina mipui ten an khaw hruaitu tur thlang roh se. Tin, in tinah, yma, yla, ypa, cya, etc hmang toh lovin, chu kan Hnam hming Zo emaw Hnam hmingthar an thlan tar zawk tawh rawh se.

3 b. He khawtin hruaitu te hi, kumtin Hnam kut hma in kalkhawm in General Body/Hnam Hruaitu Luberte thlang thar zel rawh se.

General Body/Hnam Hruaitu Luberte

Hnam Hruaitu Luberte/General Body chuan Hnam chunga indona a awmloh nan dante siam se.

Unau pahnih emaw a aia tam emaw an insual emaw, chuaia na poh a anlo intih chuan, Hlawmchhuak khat (eg. X)amite leh hlawmchhuak khat amite anlo nih chuan , chu hlawmchhuakte pahnih an indo mai tur ani lova, insual te pahnih inkarah thuphachawi tawnna (insual emaw chuan, trantu ni lo mahse an tisual ve ve toh si a) leh inngaihdamna dan chu an hmang zawk tur ani, Hnam khat, unau an ni si a.

Chui erawh ani anga, a awm tawk in chawi tur te chu a thiamlo zawk in a chawi tur ani. A chawi zawh loh chuan, hriatthiamna nen remna siam tur ani.

Chungtiang bawk in thlah khat (eg. d) leh thlah khat (eg. c) inkara a buailoh nan, a insual emaw chu aia intite inkarah thuphachawi tawnna leh inngaihdamna dan a awm tur ani.

Tawpna mahse Intanna

Tichuan, Chin, Kom, Meitei, Naga, Thadou/Kuki, Zomi/Paite, leh a dangdangte chu trangrual in kan lo pumkhat toh anga, chuan Hnam hming Zo emaw a Thar emaw kan lo nei toh bawk dawn nen.

Kan ramah chak tak leh mi run zoh lohin kan awm tawh anga, tichuan kan ram atrang kan tlan chhuah pawh a ngai tawh lovang.

Haw ule, khawtin atrang Zo Hnamte/Hnahthlakte (Chin, Kom, Meitei, Naga, Thadou/Kuki, Zomi/Paite, leh a dangdangte) chu I kal khawm in, I trangrual in I in pumkhat tawh ang u khai.

Khai le, a hun ta e, harh tawh rawh ule!

Gullu tih chu a ngial a ngan a leh dawn chuan “rullu” tihna a ni. Tlang/mual “rullu’ nen a in ang tihna a ni mai awm e.“Gullu Mual” hi Tedim subdivision chhung Dimzang khaw bul, Sagaing Division border a om a ni. Pathian in zo hanma min hmangaih em em a, kan ram leilungah hausakna a lo phumru teuh mai a. Chu ram leilung hausakna chu kan finna leh thiamna ten a phak hunah kan chhawr tangkai thei dawn a ni. Gullu mual ah hian Nickel tamtak a om tih hriatchhuah a ni. Nickel bakah lunghlu dang pawh tam tham tak om tura ngaih a ni. Heta Nickel omte hi chi 5 vel a ni awm e. A lei rawng a sen a, in rawng hnawih (colour paints) atan a tha em em. A lei hian Mizoram a lo thleng tawh nghe nghe. Mizorama in bang tamtak gullu lei hmanga hnawih sen a ni.

Tunhma rei tawh tak atangin Gullu lai duh in khawvel ram hrang hrang ten an lo hel tawh thin a ni. Mahse Burma sawrkar in a la phalloh avangin tun thlengin laih a la ni lo. Germany a Dr. Vumson an lehkha a va zirlai pawh khan German ho in Gullu chungchang an lo zawt nasa thei thin hle. Ani chuan a lung a la chang tawk lo e, a lo ti awlsam mai thin. Amaherawhchu tun hnai hian Burma sawrkar leh China company(North Mining Investment Company Ltd.) in laih an tum tat lat mai. Zogam leilung hauhsakna a neitu Zomite rawn miah lova laih tumna hi Zomite chuan dodal zel kan tum. Kan ram leilung hausakna hnamdangin min sawrchhuahsak hi kan phallo a ni. Esau a’n a rochan ai a hralh ang hian zomi ten kan rochan kan ram leilung hauhsakna i hralh lullo ang u.

A thu hrimah China hian Burma hi hmanlai atang tawh in an thuhnuaiah an lo dah thin niin a lang. Diktaka sawi chuan China vang hian Burma chuan harsatna leh buaina tamtak a lo tawk tawh thin a ni. Mitsone Project, Letpataung leh Gas pipeline chungchang buaina te pawh Chinaho inrawlh vang a ni. Burma ramah Chineseho an inrawlh nasa lutuk hi a buaithlak hle. Lai tase environment nasa takin a tichhe dawn a. Chubakah lo neihna tur ram zautak a tichhe tel dawn bawk a ni. Kum 2008 Constitution Act 4 chuan ramchhung thuneihna sang ber mipui kutah a lo pe a ni. Mipui ngaihdan lak hi a pawimawh hle tih a lang. Chuvang hian mipui ten rilru fim tak nen ngaihtuahna kan hman a ngai a ni.

Gullu laih tur chungchangah hian vawi tam tak meeting neih tawh a ni. A laitu tur company an phur em em lai in a ram neitu zomi te hian tunah hrih chuan laih kan rem ti lo a ni. A hlawkna kan tel tur zat leh environment leh ram a tihchhiat dan tur ngaihtuah hian laih hrihloh a la tha a ni. Mahse Burma sorkar leh China Company hian laih an duh avangin zomite thlem lungawi an tum fan a. Zomi lam hian Gullu laih an duhloh thu khawvel hriat ah an puangzar tawh a ni. Burmese, English leh Chinese version te a press release siam a ni tawh. Mahse Burma sawrkar leh China Company hian an tilui tho an gem tih erawh hriat a la ni lo.

Gullu hi zo hnam tan ro a tling a ni. Chuvangin theihtawp chhuah a kan humhim hram hram hi a pawimawh. Gullu ah hian Nickel chauh awm chu nise a laitu tur company hi heti tak hian an phur kher loving. Nickel hi a rate hniam lai in ton khat $15,000 vel a ni a, a rate san lai chuan ton khat $20,000 lai a ni. Gullu a Nickel om zawng zawng hi $ trillion tamtak hu a ni thei dawn a ni. Pathian in Chinese hnam tana a pek chu nise Zogamah dah lovin Beijing bawr velah a dah ngei ang. Chuvangin Gullu hi Pathian in Zo hnam kan dinchhuahna tura natural resource min lo dahsak a ni.

1. Disaster Management Plan hi fel tak a siam a nitawh a, District level a mawhphurtute ( Langsar zual ) chu hengte hi an ni.

Responsible Officer     - Deputy Commisioner

Incident Commander – Supt. of Police

Deputy IC                     – Addl. DC

Liason Officer             – SDO ( Sadar )

Safety Officer             – SDC, i/c Disaster Mangement

Information & Media Officer – District Information&Public Relation Officer

Operation Section Chief      – Addl. Supenrintendent of Police

2. Heng ka han sawilante hian an tihtur feltak a ruatsa vek an ni.

3. Kan hmuhleh kan hriattheuh ang khan tunhma aichuan SDRF te kan lo nei ta a hma chu kan sawn khawp in ka hria, mahse zawhna a tam khawp mai……..

Zawhna:

Q.1. Aizawl DC hi a la naupang deuh nge a tihtur a hre vak lo a thei em,  DM plan kha a hre ve em aw?

Q.2. Incident Commander ah khan engvanginnge Traffic SP a awm daih theih! Aizawl SP hian by designation in IC a ni tih a in hrelo a mi?

Q.3. Information Centre kha engatinge YMA in an enkawl!? Khawnge Information & Media Officer, enge a tih ve?

Q.4. Ni 13.5.2013 zan a kal zel dan tur relna ah khan CEC member (YMA) te kha an tel ve ngai em ni, Responsible Officer in a hnuai a mite nen an ngaihtuah chi a ni zawk em?

Q.5. Engvanginnge Electronic Media person thenkhat khan Operation neihna hmunah interview an conduct theih, tunge phalna pe, censored an ni em?

Q.6. Incident response system hi chhiatna khatiang a lo thlem khan Tan nghal tur a ni a Command post pawh awmtur a ni, khawnge a awm?

q.5. YMA member te leh Branch hruaitute hian kan duty kan hai lek lek em, kan inrawlh lohna tur thleng thleng kan kal palh em?

Heng zawhna te hi chhan a har vak lo ang, ka hma hun ah hian kan Chhiatna te hi kan la tawng leh ngei ngei dawn a, kan lo inruahmanna hi chu zawm a tha khawp mai.

misual.com founder Benjamina chuan tun ni 24 hian nupui a nei dawn a, chuvangin Mizoram lama awm remchang misualdotcommer ho zawng chu kal vek tur a nia aw! Nuam dawn lutuks. Misual style takin ka zu ti huks dawn nia! Misual chhungkua kan nih angin tumah zah leh inthlahrun vel a ngai lo reng reng. Misual vek kan nih hi.

Misuaaaaaalllll dot commmmmmm!

Mizoram-a a thlawna advertisement tarlanna website a ni. Advertisement / News & Events / Information/hmunhma pawimawh, etc mahni duh dana post theih leh awlsam taka mahni mamawh zawn chhuah theihna tur a ni a. Dawr leh advertisement eng pawh a thlawnin, mahni duh hunah, mahni duhdana fakna leh information chi tinreng Thlalak nena dahluh theihna a ni.

Dawr lian ber atanga a te ber, Daily Ads chitin, dawr nei remchang ve lo te leh mimal thil nen lam www.allinwap.com ah hian a leng vek a. Information/news chitin a dah theih bawk. Bungrua leh hmanrua eng chi pawh hralh theihte, mimal, inhlawhna pe theite thlengin a dahluh theih vek a. Tui nei, Lu met thei, motor sil leh siam thei, lung lei tur nei, tuition pe thei, ei in siam thei, computer siam thei, taxi leh lirthei hman tur nei, tour guide ni thei, hotel, hostel, school, sumdawnna chitin reng an leng vek a ni. Fakna Bawm lian a ni e.

Internet mumal tawk lohna hmun pawha hman tur allinwap mobile app (jar) a la awm tel cheu. Mi zawng zawngin duh leh mamawh an neih apiang khawi hmun atang pawha awlsam taka an zawn hmuh theihna tur chu www.allinwap.com hi a ni.

Hmun kilkhawr ber leh khawpui lian bera awmte tan pawh mahni duhna khua bik atana post duh tan pawh www.allinwap.com ah hian post theih a ni. www.allinwap.com ah hian menu 40 chuang awmin sub menu 300 chuang teh meuh a awm a. Thil chitin he site-ah hian dah luh theih niin, mi zawng zawng tana duan, khawi khua tan pawha chhawrna tur awm a ni. Mahni khua leh veng bil tan fakna chitin reng mai ni lovin news leh events pawh dahluh theih a ni bawk.
www.allinwap.com ah hian I dawr, sumdawnna leh mipui hnena puanzar tur I neih tinreng rawn tarlang la. Chu chu mi zawng zawngin an duh leh mamawh hun apiangah khawi hmun atang pawhin an lo en mai dawn a ni.

Mamawh leh zawn duh neite chuan www.allinwap.com ah hian zawn mai tur a ni e.

www.allinwap.com ah hian mahniin Free Ad Post hmanga advertisement leh thlalak dah/post mai theih a ni a. Chutih laiin Registration tihfel a Login hnuah mahni vekin a thlawn vek thovin advertisement leh thlalakte hi dahluh theih a ni. In Register hi a thatna leh tangkaina chu thlalak a dah tam theih a, advertisement, thlalak, etc dahluhte mahnia tihdanglam, belh, tih that, extend, etc theih a ni.

Harsatna nei leh zawh duh neite chuan allinwap@gmail.com or 9436371460 ah zawhfiah theih reng a ni a. Mahnia in post hman lote, a duh leh mamawhte chu an dawr leh tarlan an duhte kan tarlan sak thei reng e.

*********************

“Tunah zawng khang hun te khan mual an liam zo ta…”

HMANAH KHA CHUAN naupang chum biang-buang, ngo piak-puak, vai mitha fa ang mai ka ni thin a te han ti ila in awih awm chuang si lova. Ka tet lai chuan Sap naupang emaw min ti thin te ti ila in awih deuh zawk maithei thung, mahse ka ni lo, Mizo naupang dik tak ka ni a, chumi hnuah Mizo tlangval ka ni leh a tunah hi chuan Mizo pathlawi diktak, pathlawi ah pawh ‘pathlawi-two’ ka ni mek thung. Hmanah khan chuan naupang chu kan lo ni ve tawh ngei thin tak alawm mawle. Sephung te kha kan lai a, kan insik tir thin a, veng chhungah in sa thar an awm chuan an ban khur laihna vungah te khan kekawr mawng hnum hlarh khawp khan kan cheng thin kha a ni a, ‘Gari’ thir kual te kha kan khalh a kan hlimphui ve em em thin kha ania, pipu te kha kan suih a kan uai a nuam kan ti ve thei thin teh zawng anih kha. Tlamngsam buk bawhen te hlei hlei kha nuam kan ti thin. Tunah chuan khang hun te kha mual an liam zo ta a, tunlai naupang chuan hmana kan  naupan lai a kan hlim pui em em thin te kha enge an nih a mik-a-mak pawh an hre ta lo.

HMANAH KHA CHUAN aia upa te kha kan hlau in kan zah em em thin a, an thu te kha kan awih in min tirhna apiangah khan i-he lovin kan kal  mai thin kha a ni a. Aia upa te kha chhan enan kan en lova, an mi tirhna pawh sawi buai chi ah kan ngai lo hrim hrim thin kha a ni a. Kan la rawlthar chhuak chiah lo tih hian kan vengah hian kan rual u deuh sual ve tak mai unau hi an awm thin a. Chawlhni te hian bus fare pawh min pe lo hian Zodin kual ah Ganja chengkhat man (Khang lai kha chuan tola khat cheng khat a ni a, zial 10 vel a chhuak thei) lei turin min tir a,  aia upa te an nih avangin hnial enah kan en lova, ke in kan va kal nal nal thin kha a ni a. Tunah chuan aia upa zahna te, aia upa hlauhna te kha hmuh tur a awm ta lo. Naupang te te pawh thil pawimawh ah pawh han tir dawn ila engemaw hlawh nei lo chuan an tirh hleihtheih tawh loh. Kan hun lai a tawngkam hman chi ah pawh kan ngaih loh, hman zahthlak tak ni a kan ngaih, “Ka peih lo” tih te chu mi hman khum hrehna pakhatmah an nei tawh lo. Tunlai naupang chu han tir ila kan tirh hma kan ngai rum rum zel tawh mai zawng a nih hi.

HMANAH KHA CHUAN thenawm khawveng te kha kan inpawh em em a, kan in len pawh a, thu chhia thu tha kan in hrilh a, dammawh hritlan in kan in kan liam liam a, chawhmeh tuihnai deuh siam chang ten kan in suah liam liam thin kha a ni a. Tunah chuan khang hun te khan mual an liam zo ta. Thenawm khawveng pawh kan in len pawh ngai ta lova, thu chhia thu tha pawh kan in hrilh ngai tawh hek lo. Khawpuiah phei chuan thenawmah tutenge awm tih pawh kan in hre mumal ta lo, chawhmeh in suah tih te chu a hnai tawh lo lutuk. Mahni chhungkaw bil in kan in ti khawm tel tel a, tunhma a kan Mizo nunphunga inthenawm khawvenna kan tih ang chi kha chu thil atthlak leh changkan lohnaah kan ngai tawh mah zawk. Khang hun lai te kha an ngaihawm thin teh e.

HMANAH KHA CHUAN vengchhungah chhiat tawk awm se a rang thei ang ber in tih tur tul tul ti turin thlalai kha kan tlan kawm a, a tul tul kan ti a, lo zawmthaw bik leh lo awlthawng bik nih kha zahthlak kan tin a kan phe vat vat thin a. Zualko kal ngai se a kalna hrehawm leh a hla apiang kha kan inchuh a, thlan laihnaah nise thlan chhunga lut lo bik nih kha kan hlaua, a chuh takte khan kan inchuh thin kha a ni a. Khawhar in  riah nise  vengkhat thlalai khawharin riak rual zawng zawng kha kan in pu lut a, khawhar chhungte puih an ngaihna apiangah kan pui ve thin kha a ni a. Tunah chuan chhiat tawk pawh awm se thalai tamtak chuan muangchangin mithi in lam an pan a, khawtlang hruaitu ten an tirh ngawng ngawng pawh a la ti tha duh mang lo te an tam ta mai. Tunlai hunah chuan zualko kal te a angai ta lo zawk a. Zualko kal te hi la ngai ni ta se lam hla deuah chuan kal tur kan in hmu zo lo fo in a nia ka rin ni. Vawikhat chu kan vengah mithi an awm a, Lunglengah an nau te awm zuk koh a ngai tlat mai a, ka thiante pahnih nen zan dar 1 velah torchlight kengin Lungleng lam pan in Serlui lam atangin kan kal ta a. Serlui kan theng tep tawh tih in kan thianpa pakhat chu a pum a na ta tlat mai a, a kal thei tawh si lova. Kan thianpa pakhat chuan a lo awmpui a, mahni in ka kal ta ringawt mai a, kan la rawlthar chhuak zet zawt chauh a ni bawk a a nuamlo ka ti ve khawp mai.

Thlan laih te pawh hi tunah chuan thlan chhung pawh lut lo chu thu dang, thlan khur takngial pawh hmu lova tlingtla ta mai mai hi tunlaiah chuan an tam ta  mai. Khawhar in riah ni se, a khawhar chhungten an inriak te mutna tur an phiat fai a, an phah sak a chutah zingah mut hmunah thingpui an nla pe zui…a va han zahthlak tak. Kan hun lai, ‘han ti ve ngial ila,’ te kha chuan thil tih ngai zawng zawng kha  kan tih sak a, vawkchaw thlengin kan pek pui in kan chhum sak a, khawhar chhungte an rawn thawh hi chuan mutna kan lo tel fel vek a, thingpui sa ver vawr nen kan lo hmuak thin kha a ni a, mahse khang hun te khan tunah chuan mual an liam zo ta. Engtikah mah hian kir zai an rel tawh dawn si lo.

HMANAH KHA CHUAN kan nu leh pa te khan thu tha tinreng min hrilh a, thil engkim min zirtir thin a. Mizo kan nih ang leh mihring nun phung a thil thiam ngai ang chi zawng zawng te kha min zirtir thin kha a nia. Kei pawh ka nu leh pa khan a hun lai chuan awmpui pahnih te pathum te nei thin mah ila ram hnathawh te, inchhung chet zawng zawng te eirawngbawl atanga buh thlei thengin min zirtira, chu mai a ni lo, puan thui te thlengin min zitir a, hmanraw chihrang hrang haman thlengin min zirtir thin a, heng te hi tun hnu thleng hian ka chhawr tangkai em em a, eirawng bawl ngat phei chu tun thleng hian vengkhat ei rawngbawl thiam a sawi ka nih phah…(te han ti vel ila). Kan hun lai chho ami kha chuan mihring nunphung a thil hriat tur leh thiam tur ang tlangpui hi chu a hmei-a-pa in kan thiam thin a, Mizo kan nihna anga kan nunphung hriat tur te hriat loh leh Mizo kan nih anga thiam tur ang chi thiamlo te kha zahthlakah kan ngai thin  kha a ni a. Tunah chuan thangthar te hian hriat a lawi pawh an nei meuh ta lova, thiam a lawi pawh an nei meuh ta lo. Tamtak hi chuan heng Mizo kan nih anga kan hriat tur chi te, kan thiam tur ang chi te hrelo leh thiam lo nih pawh hi zah nachang an hre tawh meuh lo chu a ni e. Mipa thenkhat chem hman pawh thiamlo sawi tur an tam ta mai, tin hmeichhia pawh buhthlei, puan thui ilo faharn thiamlo puan bih pawh thiam lo zah nachang pawh hre lo an tam tawh mai bawk. Mahni tawng ziak thiam mang lo, Mizo thil hming pawh lam thiam mang lo nih te hi intih changkan nan an hmang tawh zawk emawni a zialo khawp mai. Hetiang anih a mahni hnam zia aia hnamdang zia kan ngaihsan chhung chuan kan hnam hi kan ral tial tial dawn a ni mai.

HMANAH KHA CHUAN ti a tun hma a kan thil chindan tha zawng zawng tun hnua kan chin tak loh te engtik-khawtikah mah kir zai an rel tawh hlei law’ng e, ti a thlir liam mai mai lo hian tuna keini thang leh thar te hian tan la in kan thil hriatloh te, kan thil thiamloh te hi thiam a hriat thar leh tum ila, kan nau te kan tu leh kan fa te hnenah zirtir chhawng zel bawk ila, tin Mizo kan ni a, vawi sawmsarih hmun sawmsarih pawh piang nawn in,  Sap sendang tawng emaw, Korean mengmam ho tawng emaw hlir pawn tawng ila Mizo kan nihna a bo dawn chuang lova, chuvangin Mizo kan nih chuan Mizo kan nih anga kan hriat tur te, kan thiam tur te hi hria in thiam ila tichuan kan hnam hi khawvel hnam dang te tan a belhchhian tlak ah kan siam anga engtikahmah hnam dang hian min chimral lo bawk ang. Mizo kan nih anga kan hriat tur hriatloh te, kan thiam tur thiamloh te hi a zahthlak ngawih ngawih a, heng thil hriatloh hi changkanna a ni lo a changkan lohna a ni zawk tih hi i lo hre thar leh teh ang u khai.

BigDaddy Hmahmatea

(R.Lalhmangaiha)

Kulikawn

Ka nu lah khan zu a sa awl lo mai bawk a, rum tawk el awla zufang a sak apiang phei kha chuan, puar nalh khawpin ka hawp bawrh bawrh thin a ni. Chutiang chu tette atanga ka lo chin dan anih tlat avangin, “Zubel bul atanga seilian,” min lo ti tawk pawh an awm ta ve ang; nimahsela thudik lem harsa tak chu a ni na vang vangin ka ngaizam thei tho mai.

Uisa thung erawh hi chu ka thisen hian a ngam ve hlawl loh avangin han ei enah pawh ka en thei lovin, ka ngai lo law law a ni. Chuvangin a tui leh a phak dan pawh ka la hre ve lova, dawt ngaihna pawh ka hre bawk nahek lo. Kum 50 the meuh zu lo in tawh tan erawh hi chuan zankhat thil thu a zu in han sim tak thut mai zet erawh hi chu a awlai lovin, a mi nghawng pawh a na salh salh teh reng mai.

A hlimchhawn lai phei kha chuan ka ra a so a. Mu leh mal pawh nei fumfe lo khawpa ka tal ka tal mai bakah, mit deuh sulha awm chang nei te hian ka la inhre deuh cheu bawk a. Sawi ta zel ila, zu ka in tawh loh hnua ka inlamrel dan leh ka ngaih that loh deuh dan hi chu a mak ang reng khawp mai. Ka hapuite hi an nghing ta deuh vek emaw tiin hlauhthawnna ka neih bakah, lung pawng hi a zing vel chek chuk mai bawk a. Chuvang chuan rilru hahdam hian ka la awm hlei thei meuh rih lo chu a ni.

Ka taksa bung hrang hrang te lah hi a kham deuh them thum in, ka pang khawi lai lai emaw te phei hi chu meiling a han deh hlawk ang mai hian awm chang a nei bawk a. Kangthai kan ang mai hian min ti phu zawkin, a sa vel huai huai mai bawk a ni. Zep thu lah awm hek suh, ka tilmute pawh hi an bichhek zo ta vek emaw ti hian ka kun lap mai bawk a. Chutih nak alai chuan an thenawm pa, a mal a telhawng-pa ang mai a lo chawr ngawk lah hi, tunhma lam anga lo hawkdak ve peih tawh lovin, a nungchang hi a tha hlum dawn mai leh ta nghal a, a mak khawp mai.

Chuvangin, amah Kison Roy Babu (Khasi), hmanlai a Mizoram Sawrkar hna a lo thawh khan, “Ka nau maw, mak hle mai,” tih tawngkam hi a thusawi apianga a telh ve deuh ziah mai pawh kha, ka hriatchhuah phah leh ta hial a ni. Chubakah, tunah chuan keimah ngei pawh hi, “Kaih zangthala pa che che,” an lo tih chu ka lo ni ve ta hian ka inngai deuh ta bawk a ni.

A enga pawh chu lo ni ta sela, Chemtatrawta thawnthu a, “Kaikuang, engatinge a tilah I cheh mai ni?” tia an zawh lai a, Kaikuang tan ngaihna hre ve tawh lo phengin, “A hun ka ti ve hrim hrim,” a ti e tih thu, Pu Lalruaia Zadeng, nuihza siam pawh thiam ve zet mai khan a lo belhchhah tawh ang deuh bawkin, kha leh chen zu lo in chur chur tawhin, ka han sim ve hmiah takna chhan hi chu, “A hun ka ti ve hrim hrim” a ni ber mai.

Ani tak a, zu in mite hian kan hriat tlan theuh angin, han ruih deuh chhelhchhawlh tawh hi chuan pawisak a tlemin, khawvel hi ka ta ber emaw ti a han inchhek deuh hi a awlin, a nuam thei nameuh mai a, mahse ngaihdan lelo leh pawnlang taka han inhampuar duhna mai mai a ni. Chubakah a nawm chhung pawh hi hun rei lo te a la ni leh ta nghal bawk a ni.

Hemi zul zawng hian Arab ho pawhin wine chungchangah thawnthu pakhat an lo zuk nei ve tlat a. An sawi dan chuan, grape thei tiak an phunsawn tirhin tuikang lai a ni kher bawk a, a thang mawh hle mai a; chuvangin Arawn (peacock) an man a, a nghawngah an zai a, tichuan a thi chu tui aiah an hmang ta a ni. Reilote-ah grape kung chu a rawn chawr no ta a, nimahsela tui a la khamkhawp loh cheu avangin Sakeibaknei hrawkah an zai leh a, a thi chu an thil phunah chuan an leih leh ta a. Chutichung pawh chuan a la tawk loh cheu avangin Vawk lian tawk tak an man leh a,  a hrawkah bawk zai lehin grape kung bulah chuan an leih nawn leh ta poh a. Chutah zet erawh chuan grape kung chu a lo puitling ta hluai mai a, grape rah hmin tha leh thlum tui tak tak atangte chuan zu tha elkhen mai te hi an siam chhuak  zur zur ta mai a ni.

Tin, heti hi a ni a, a tobulin a zir bawk a, mi tupawhin, hai deuh chhelhchhawlh khawp a an han intulh hi chuan, Arawn anga mawi leh langsar leh ropui angin an han inngai hmasaber phawt a. Chumi hnuah an han invoh zui zel phei hi chuan an bul hnaiah an duh loh zawng mite lo awm ve te phei kha chu Sakeibaknei iangin an rumthaih duh nghal tawh mai a ni. Chumi hnu leh tawh a, aloaluakchhuak a la hap zui leh hlawp hlawp phei chuan an mizia kha zeldin phak loh khawpin a lo hniam tawh a, a tawpah phei chuan Vawk ang maia tal pawl leh che tawm tawhin, an mahni chetlatna hmunah ngei khan leichhuah hluiin an thusawp nuaih tawh mai nia hriat a ni.

Hetiang hi thil thleng thei anih avangin chaw eitui nan a han lem hlek chingmite lehintih hahdam deuh nana han tauh hmak duh ziah te pawh hian an hriat ve a tul hle in ka hria. Chuti lova, lu lam leh mawng lam pawh hre hrang mang lo khawp a zuin kan duh chhung chu, “Hmelma laka Ostrich sava tlanchhiain a lu chauh lang lova han chawlh zawkna hmun a hmuh hman phawt hi chuan, him ta luaah a inngai a,” an tih ang mai hi kan ni ve dawn a; mahse a him chuang hauh lo a ni.

(Chhunzawm tur…………….)

Thlarau Thianghlim Hnathawh hi ringtu leh kohhran tan a pawimawh êm êm a, a thiltihtheihna a sângin a thȗk a, a hnathawh theih hi a tam êm êm a. Ringtu nun bikah pawh sawi tur tam tak a awm. Vawiinah chuan Ringtu Nun-a Thlarau Thianghlim Hnathawh Pawimawh tak tak 4-te chauh kan sawi dawn a ni. Mihring chu boruak tellovin rei a nung thei lova, Sangha pawh tuiah lo chuan a nung rei thei lo angin, Thlarau Thianghlim tellovin ringtu leh kohhran hi a nung thei lova, a kal rei thei lo. Chuvangin, Fakna hla siamtu chuan, “Thlarau Thianghlim Nunna ber, Awmdan Danglam-tirtu…” a lo ti-hial a, a dik hle a ni. A tlangpui chauhvin, a tawi thei ang berin sawi kan tum ang.

1. Thlarau Thianghlim-a Chhinchhiah (Sealing)
Miin thinlung chhungril ber ațanga tihtak zeta Pathian a rin veleh (a pianthar veleh, cf. Rom 10:9-13), Pathianin Amah ringtu chu, ama ta a nihzia leh a venhimna leh thlazar hnuaiah a awm tih entirna atan Thlarau Thianghlim-in a chhinchhiah (sealed) ta nghal a, “Amahah chuan nangni pawh thutak thu (in chhandamna Chanchin Tha chu) in ngaihthlak a, rin pawh in rin hnuin, amahah chuan Thlarau Thianghlim tiam chuan Chhinchhiah-in in awm kha” (Eph.1:13). Hei hian ringtu chu Pathian venhimna hnuaiah a himzia (security), Pathian fa dik tak a nihzia (authenticity), Pathian ta ngei a nihna (ownership) leh Pathian thuneihna kengtu (authority) a nihzia a tarlang nghal a ni.  Sorkar official – Prime Minister, Governor, Chief Minister-ten an Letterhead-a an ziak, seal chhu a, an sign-hnan tawh Lehkha pawimawh tak ang hi a ni, ti ila hriat fiah a awl ber ang chu maw.

2. Zakhamna Thlarau Min Pe (Guarantee of Inheritance)
Ringtu piangthar Pathianin a chhinchhiah tawh chu, roluahtu tur a nihzia leh, rawngbawlnaah leh nitin nunah chakna a neih theih nan Pathian vekin min țanpui intiamin Za a Kham a, Zakhamna Thlarau min pe bawk a ni, “Chu chu Pathian ropuizia fak nan ama ta ngei tlan chhuahna turin kan roluahna tura zakhamna a ni” (Eph.1:14). Helaia Zakhamna tih țawngkam hi Greek Arabon hman a ni a, Installment-a thil pek sawina a ni. Ringtu Pathian fa, Thlarauva chhinchhiah tawh chu, Roluahtu tur a nih avangin Rawngbawlna kawngah leh nundanah thiltihtheihna neia hun a hman zel theih nan Pathianin Thlarau Thianghlim thiltihtheihna zawng zawng pumbilh tir vek chu rem a ti lova installment-in a pe a. Ringtu chu Pathian tana a inpekna leh inphalna a san dan ang zelin Pathian Thlarau Thianghlim chuan thiltihtheihna-in a chhungkhat țhin a ni. Housing Loan kan la a, 1st installment min pek hnu-a kan hnathawh a țhat dan a zir a, țanpui tlak, malsawm tlak kan nih chuan 2nd leh Last installment-te min pe ang kha a ni, ti ila a fiah ber awm e.

3. Thlarau Thianghlim Awmpuina (Power & Blessing)
Ringtu chu Thlarauva Chhinchhiah-a a awm hnu ah, Zakhamna Thlarau pek a nih hnu chuan, Thlarau Thianghlim Thiltihtheihna leh Malsawmna-in a awmpui tlat a, hma a hruai sak a, hnung a dawl sak a, chakna leh thlamuanna, thil țha leh lawmawm, ropuina leh chawimawina-in a thuam țhin a ni. He Thlarau Thianghlim Awmpuina hi a pawimawh êm avangin Lal Isua pawhin a Zirtirte hnenah khan, “Jerusalem khua kalsan suh u, Pa thiltiam ka sawi in hriat kha lo nghak rawh u… Johana khan tuiin a baptis țhin a, nimahsela ni rei lo te-ah Thlarau Thianghlimin baptisma in chang ang. Thlarau Thianghlim chu in chunga a lo thlen hunah Thiltihtheihna in la nei ang; tichuan Jerusalem khuaah te, Judai leh Samari ram khaw tinah te, kawlkil thleng pawhin ka thuhretute in ni ang,” a ti tlat a nih kha (Tirh.1:4-5, 7-8). He Thlarau Thianghlim, min awmpuia min tichak țhintu hian khup-zawi leh bân uaithla-te a tichak a, dawihzep-te a ti-huaisen a, hlauthawng leh thlabâr-te a thlamuan a, damlo leh nâ te a tidam a, thil mak tam tak ti a, mitthi hial-te kaitho thei turin thiltihtheihna mak tak a pe țhin a ni. He Thlarau Thianghlim Awmpuina nuam leh thlamuanawm tak hi neih i duh chuan tih tur pakhat chiah a awm, “Tupawh ama chunga chu mi beiseina chu nei apiangin Amah a thianghlim angin a in-tithianghlim țhin,” (1 Joh.3:2-3).

4. Thlarau Thianghlim Hruai Theih (Led By the Spirit)
Bible scholar-te chuan, (achunga kan sawi tak) Thlarau Thianghlim Chhinchhiahna te, Zakhamna te, Awmpuina te khi Ringtu puitlinna tak tak thlenna tura inbuatsaihna mai a ni a. A chhan ber chu, ringtu (mihring) khan tih-tur leh tih-theih a nei tlêm êm êm a, Thlarau Thianghlim kha a engkima engkim a ni a, a rah-chhuak pawh ringtu tan chanchin lawmawm leh malsawmna hlir a ni a! Chuvangin, Ringtu puitling kawng tak tak zawk chu, Thlarau Thianghlim Hruai Theih-a awm hi a ni zawk e, an ti! Tirhkoh Paula chuan, “Pathian Thlarau hruaia awm apiangte chu Pathian fate an ni si a. Hlauva awm leh turin bawih nihna thlarau inhmu a ni si lo va; fa nihna thlarau inhmu a ni zawk e, chu thlarau avang chuan “Abba!(Ka pa!)” tiin kan au thin hi. Thlarau ngei chuan keimahni thlarau nen Pathian fate kan ni tih min hriattir țhin; tin, fate kan nih chuan roluahtute kan ni a; Pathian roluahtu, Krista luahpuitute kan ni; a hnena chawimawiin kan awm ve theihna turin amah kan tuarpui tak zet chuan. Tunlaia tuarnate hi nakina kan chunga ropuina tihlan tur nen chuan tehkhin thamah ka ruat si lo” a lo ti a (Rom 8:14-18).

Pathian Thlarau Hruaina hi chu a nuam tawh hauh lova, hlauhna te, hrehawmna te, țahna te, mittui te, lungngaihna te, thihna te, chânna te, khawhârna te, hmuhsitna te, tihduhdahna te, nekchêpna te, dawta sual tinrenga puhna te, etc. a ni tawh zawk a! He ruam-a kal-te Thupui chu “I Duhlohna lamah an kai ang che” (Joh.21:18) tih a nih avangin Thlarau-in a Hruai theih loh an awm țhin a. Missionary te, Pastor te, Kohhran-a rawngbawltu duhawm tak tak-te pawh an zâm a, an tlu a, an kal ngam tawh țhin lo!  Amaherawhchu, hei hi vanram in nuam tak kawng, kross kawng a nih tlat avangin ringtu puitlingte chuan an zawh ngei a ngai si a, țap chung pawhin kross kawng hi zawh zel turin an intiam țhin a, hma lam an pan hrâm hrâm țhin a, hrehawm mahse Lalpa ta an ni tih an inhria a, he țawngțaina hmang hian Lalpa duhzawng ti turin an Nun an hlan țhin a ni,

Lalpa kal tura min duhna hmun apiang chu,
Tlâng sâng tak leh tuipui fawn vel kar pawh nise,
I thu leh Kros mawia min thuam chuanin,
I Hmangaihna thu hi ka hril zel ang.